Matio 22

1Ŋga Yesu nyu na to kre, wra ndru mu pe gbun yomini fↄŋgↄ ka na mbo, 2"Pan nyjeeri ŋunumu kre nyi na, ŋunu wa na chlↄ leŋge mna u pↄ ŋga. Bijam kre nu kre, pra sro pe kama mbe leele li. 3Ŋunu wre na u sumifɛɛnlɛ tun mbe pe mblɛ u kɛ wa mu yeeri kre kro yeeri mbe pe paan li, a pra je, pe nsra pan. 4A Ŋunu wre na ndru mna sumifɛɛnlɛ pre plɛ tun shiin wo na, mandiɛ nunu kre ni na chↄↄ mbo, 'E le, e sɛ yo mblɛ ni kɛ wa mu yeeri kre pan na ni yira kro pe mu kↄ, ni nui, na yurɛ mblɛ nu nyina gbo, mu sro kre pe kama, kena pe pan mbe paan bijam sro kre li.' 5Mblɛ pra sɛ yeeri kre nsra ki wru mu pe kɛshian, wa na yiri mna sɛ u see, a wa na sɛ na u jafa lii, 6a hamblɛ pre na sumifɛɛnlɛ pre yii mna pe gbun mna pe fiŋge tataara, mna pe gbo mu wa. 7Ŋga kra pan ma kre, ŋunu wre krↄ na kun, kra tia wra sojae wↄ mu tun a pra sɛ linkufɛɛnlɛ pre kro gbo, mna kanhun le pe chia na mna ki sro. 8Bawa ŋunu wre na kna mna yo u sumifɛɛnlɛ pre plɛ pan mbo, 'Ni bijam sro kre pe mu kↄ, a mblɛ ni kɛ wa mu yeeri kre n pe cheche na pie ki li. 9Kena e sɛ lete na, mblɛ ee nya kpan, e pe yeeri mbe pe pan mbe sro kre li.' 10A sumifɛɛnlɛ pre na yili mna to lete na, mna mblɛ pra nya kro yeeri, mblɛ pra nyu na pe mblɛ pe nsra nyu kro chaara, a pra pan mu bijↄ plↄ katoo kre nyi. 11Ŋga ŋunu wre na yiri mbe paan fumblↄ pre le kre, wra fumblↄ pre wa nya na u n u yɛ kna na bijam lawee u paan. 12Ŋga ŋunu wre na u nya ma kre, a wra kna mna yo u pan mbo, 'Awe, mni a mu n bijam dodonyi le mu pan mna ŋga hin? Mu n muyɛ pe na bijam lawee mu paan.' A blↄ wre na yire na ŋunu wre yiɛ le. 13A ŋunu wre na kna mu yo u sumifɛɛnlɛ mblɛ praa wa mu yire na fumblↄ pre le kre pan mbo, 'E u yii, e u kɛnyi na u jeelee pↄ, e sɛ u wa wↄmu lawee kre nu.' Bawa leele we na nyɛni mbra pe ŋgaala chirɛ. 14Ŋgi na, Nyiɛkpↄↄ we tataara yeeri la, chiɛri plɛ we wↄ." 15Ŋga Yesu nyu na to kre, Farisiie pre na yili wa, mna sɛ kolo cha mbe paan u wie kebɛɛlɛ, mbe u ta mbe yii. 16Farisiie pre na sɛ pe bitumblↄ wↄ mna ya Hɛrodi lekpↄɛ plɛ na, mna pe tun Yesu pan. A pra pan mu Yesu da mbo, "Nyinafun, o chin na mu pe kprafun, a mna Nyiɛkpↄↄ kolo nyina na kpra ni. A mu kee ka ma ŋga lewo we yo ni. A mu n na lewo yiɛ fiɛ. 17Kena mu jawala yi ŋgi kre kee ŋga ni hin? Ki fna o tↄↄ tↄ mbe ŋunu lopom Kaisari ŋga ndee mni hin?" 18La, Yesu na pe kolo sisaa ŋga praa chaa na u ni kre nya, a wra kna mbo, "Yire yiɛnyumufɛɛnlɛ, mni a e na ni piin na le ŋga hin? 19E ni ŋga swa nyjɛ ni e tↄↄ toni yire ka." A pra pan na swa bie ka ni mu Yesu ŋga. 20A Yesu na kna mna pe wie mbo, "Ŋmbi kumu na u mɛɛ yi swa ŋga na ŋga hin?" 21A pra kna mbo, "Ŋunu lopom Kaisari wi." A Yesu na kna mbo, "Kena yirɛ nyjɛ yi pe Kaisari wee kre, e u ŋga u yirɛ. A nyjɛ yi pe Nyiɛkpↄↄ wee kre, e Nyiɛkpↄↄ ŋga yi yi." 22Ŋga pra Yesu kee kre loo kre, kra pe pe kawako ni, a pra u ti wa mna sɛ. 23Ki ble kre lam Sadukiie mblɛ pe yuu na, na ndro ku wa jaa nyi na kre, na pan mu Yesu wie mbo, 24"Nyinafun, Mbose na yo na, na lewo leŋge a u n shia se chlↄ wre na, a waa ku mu chlↄ wre ti kre, ki fna mbe u chunu u lekuchlↄ wre wru mbe leŋge, mbe se mbe gboo wre mɛɛ wa fun." 25A pra kna mbo, "Kena nyjↄↄlↄ na chinlɛ kↄↄnashin plɛ praa wa mu tni mna. Jle wo wre na leŋge, a u nsra se chlↄ wre na mna ku mu u chlↄ wre ti u chunu pan. 26Pan kra shiin wo wre nya na, hali mu sɛ su kↄↄnashin wo wre na. 27Kre kↄkro kre, chlↄ wre na ku. 28Kena kunnyiɛ ble kre, leele kↄↄnashin mblɛ, ŋmbi haa chↄ wi chlↄ wre hin? Na pe kro u leŋge mu fni." 29A Yesu na kna mbo, "Na e n kee kre pe nyunↄ mu tɛɛ kre nↄↄ loo, a e n Nyiɛkpↄↄ jaŋga kre nↄↄ chin, kre ki tia e na jawa ma kre, 30Ŋgi na, kunnyiɛ ble yire nu kre, ndro wa leŋge. Ndro kro we pe na nyjeeri bituŋu wi nyjeeri. 31A kunnyiɛ kre kee ŋga Nyiɛkpↄↄ na yire u kee nyanyofɛɛnlɛ na mu yo e pan kre, e n ki tↄↄnri tun ree?" 32Mbo, "Mi wi Abraham, Isaki, na Jekↄb Nyiɛkpↄↄ wre." U n pe gboolo Nyiɛkpↄↄ, la, ŋmaafɛɛnlɛ Nyiɛkpↄↄ wi. 33Ŋga lenɛɛrɛ pre na kee kre loo ma kre, kee nyjɛ Yesu na pe nyina kre na pe kawako ni. 34La, ŋga Farisiie pre na loo na Yesu Sadukiie pre nyu gbo kre, pre na ndru mna sɛ fni. 35A pe mbra twanfun wa na pan mna Yesu wie kee ka mna u pe mu le mbo, 36"Nyinafun, mbra yire nu ŋgi ki sna titi hin?" 37A Yesu na kna mbo, " 'Ki fna mbe mu mu Tafun Nyiɛkpↄↄ kori na mu loloŋgo kro ni, na mu faŋga kro ni, na mu jawala kro ni.' 38Kre mbra ŋga ki kpↄↄ mu sna. 39A ŋga ki taa kre, pan ki nyi to na jle wo kre yi. 'Ki fna mu mu ŋmbrↄ kori, imi na mu muyɛ kori kre.' " 40A Yesu na kna mna yo pe pan mbo, "Yire mbra shiin nyjɛ ni e nyina ŋga, yire yi Nyiɛkpↄↄ kee nyanyofɛɛnlɛ pre mbra yire kro ndra." 41Farisiie pre plɛ na fni, a Yesu na pe wie mbo, 42"Mni sembremu e Kristo wre kee jawa hin? A ndro ŋmbi sele ndro wi hin?" A pra kna mbo, "Devid nana wi." 43A Yesu na kna mu pe wie mbo, "Ŋgi ki tia Kpra Ŋumu wre na tia Devid na u yeeri u Tafun hin? Devid wre titi na yo mbo, 44'O Tafun, Nyiɛkpↄↄ wre, na yo ni Tafun pan na, tni ni kalie, mu sɛ su nyjila ŋga mbe ti mu mu jeelee taa mu loŋgoolo na.' 45Na Devid wre titi Kristo wre yeeri ni Tafun, kena mni ki kↄ mu pe, a u pan mu pe u nana hin?" 46Ŋga Yesu na kre kee kre wie kre, ndro nsra ja mu ki nyu wↄ, a mu yire kre ble kre ndro nsra u wie kee ka na fio.

will be added

X\