Matio 21

1Ŋga Yesu na u twanfɛɛnlɛ pre naa mbra Jerusalɛm na kre, pra le chia ka na praa ki yeeri Bɛtfage, a kii wa Olive nyua kre na. Bawa Yesu na u twanfɛɛnlɛ pre shiin wↄ mu tun mbo, 2"E sɛ chia ŋga kii wa e yiɛ ŋga na. Na e le to, ee nya na pe bubnↄ pↄ tiŋge ka na, a u pↄↄ wa mu yire u jaara, e pe saan e pan na pe ni e ni ŋga. 3Na ndro waa e wie kre, e yo na o Tafun u pe shian, we ti mbe e pan na pe ni." 4Kre kee ŋga na pe mna tia Nyiɛkpↄↄ kee nyanyofun wre kee ŋga wra yo mu tɛɛ kre na pe yɛŋgɛ mbo, 5"Yo Ziↄn chia leele pan na, E le, e ŋunu paan e pan, a u nyjii kama, a uu wa mu tni bubnↄ pↄ na." 6A twanfɛɛnlɛ pre na sɛ kee ŋga Yesu na yo pe sɛ pe kre pe. 7Pra sɛ pan na bubnↄ wre na u pↄ wre ni, a pra pe dodonyi wↄ mu taa taa pe na, a Yesu na tni. 8A lenɛɛrɛ pre plɛ naa pe dodonyi na pe yonyi chaan kolo kre na, a pe plɛ naa tinyi wrɛ kuari na chaan u yiɛ. 9A leele mblɛ pra u yiɛ klu kre na mblɛ pra u kro tↄ kre kro naa gble leni na yuu mbo, "Hosana! Devid nana, ŋmba u paan o kro Tafun wre mɛɛ na kre wo yi dwamu. E Nyiɛkpↄↄ ŋmba uu wa nyjeeri kre ŋga mɛɛ." 10Ŋga Yesu na le Jerusalɛm na kre, chia kre kro na yiri mu paari, pra peyɛ wie mbo, "A ndro ŋmbi wi ŋmba hin?" 11A lenɛɛrɛ pre naa yuu mbo, "Nyiɛkpↄↄ keenyanyofun Yesu wre, ŋmba u yiri Nazrɛt chia ŋga kii wa Galilii tra nu kre, wre wi kre." 12A Yesu na sɛ le Nyiɛkpↄↄ sumi nyuŋgo wa, mna mblɛ praa wa wa na jafa lii kre kro ni, mna mblɛ praa swa chinɛ, mblɛ praa katoo kotulo prɛ kre yirɛ kna mu juule. 13A wra kna mna yo pe pan mbo, "Pe ki nyunↄ mu tɛɛ na, 'Pie ni katoo kre yeeri nyiɛtalihaa' 'A yire ki wru mu pe juuro lawee.' " 14Bawa fuunlo na mblɛ pe fuuru kro na pan u pan suminyuŋgo wa, a wra pe tra. 15Ŋga Judae sↄfue loplombo pre na pe mbra nyinafɛɛnlɛ pre na kawako kee yire Yesu na pe kre nya, mna loo na biile gble suminyuŋgo wa na yuu na "E Devid nana wre ŋga mɛɛ" kre, pe krↄ na kun na u ni. 16A pra tin mna pan Yesu pan mbo, "Le, mu loo kee nyjɛ leele mblɛ yuu ŋgaa?" A Yesu na kna mu yo pe pan mbo, "Ɛnhɛɛn, e n da mu ki kee ŋga pe nyunↄ mu tɛɛ kre tↄↄnri tun ra?" Mbo, "Hali biile fiɛn fiɛn kuraa we u ŋga mɛɛ." 17Ŋga kra pan ma kre, wra yili mu pe ti wa mna sɛ ŋunu Bɛtani na. 18Ŋga nyiŋge na se bnimi kre, Yesu na ndru na shie Jerusalɛm na bnimi nyu kre na. Ki nyjila kre na klo u ta. 19A wra kna mna fig tiŋge ka nya kolo mbɛɛ na, mna flo mu da ki jaara, ŋga wra da wa kre, u nsra sɛŋgɛ nya ki na, na wrɛ bribri yi tiŋge kre na. A Yesu na kna mu yo tiŋge kre pan mbo, "Ŋu waa sɛŋge sɛ na fio." Titɛɛ kre nu to, a tiŋge kre na yua mu nyaara. 20Ŋga u twanfɛɛnlɛ pre na kre kee ŋga nya ma kre, kra pe pe kawako ni. A pra kna na wie mbo, "Mni fig tiŋge ŋga pe mu yua titɛɛ ŋga nu ma hin?" 21A Yesu na kna mu yo pe pan mbo, "Kpra na ni yuu e pan na, na e shↄnli, a e n e jawala pe shiin kre, kee ŋga ni pe fig tiŋge ŋga na ŋga chiin ma ee jaa pe, hali na e yo nyua ŋga pan na kↄ mu sɛ to epo nu kuraa kre, kie kↄ mbe sɛ to ki nu. 22A kee ŋga ee wie nyiɛtalaa nu kpan, ee ki ta, na e shↄnli wala." 23Ŋga Yesu na yiri wa kre, wra sɛ le pe suminyuŋgo wa, na leele pre nyina, a Judae sↄfue loplombo pre na pe loplombo na pan mu u wie mbo, "Ŋmbi u mu ŋga jaŋga a mna yire kee nyjɛ pini ŋga hin?" 24A Yesu na kna mbo, "Mbe e wie kee nunu ka. Na e ja mu ki nyu wↄ, mbe e nyina mna ni ni jaŋga kre ta. 25E ti ni e wie. Sena haa Jↄn ndrajee kre jaŋga na yiri hin? Nyiɛkpↄↄ pan kra yiri ndee lewo pan hin?" A pra kna na kakra lii na peyɛ ni mbo, "Na o yo na nyjeeri kra yiri kre, we yo o pan na, a ŋgi ki tia a e nsra u shↄnli hin? 26A waa sro mbe yo na lewo pan kra yiri, o fiɛ lenɛɛrɛ pre na. Ŋgi na, pe kro na chin na Nyiɛkpↄↄ kee nyanyofun na wi Jↄn." 27A pra kna mna yo Yesu pan mbo, "O n chin." A Yesu na kna mbo, "Kena mba e nyina mna ni ni jaŋga kre ta." 28A Yesu na kna mu pe wie mbo, "Mni e kee ŋga jawa hin? Blↄ wa naa bibilɛ shiin ni. Ki ble ka a wra yiri mna sɛ lopom wre da mbo, 'Ni pↄ, sɛ fali ni see wa aŋga.' 29A pↄ wre na kna mu yo u lɛ pan mbo, 'Ndoo, mba sɛ!' La, wra kↄ mu u jawala chinɛ mna sɛ see kre nu. 30A pe lɛ wre na sɛ shiin wo wre pan mna sɛ kee nunu kre chↄↄ yo u pan, a wre na kna mbo, 'Ndoo, mbe sɛ.' La, u nsra kↄ mu sɛ. 31Kena biile mblɛ shiin ŋmbi haa wra kee ŋga u lɛ chaa pe hin?" A pra kna mbo, "Lopom wre wi." A Yesu na kna mna yo pe pan mbo, "Kpra na ni yuu e pan na, lampoo shↄfɛɛnlɛ na tiɛrifɛɛnlɛ pre, lewaala pre, pie le Nyiɛkpↄↄ ŋunumu kre nu mbe e ti. 32Ŋgi na, Jↄn ndrajefun wre na pan mu e nyina kpra kolo kre, a e nsra u shↄnli. La, lampoo shↄfɛɛnlɛ pre na tiɛrifɛɛnlɛ pre na u shↄnli. E pe kpra kre nya, a e je e n e jawala chinɛ mu shↄnli." 33Bawa Yesu na kna mu yo pe pan mbo, "E ndie tɛɛ e yomini ŋga loo. Falifun wa wra u see tɛɛ, mna ki le kagbla mu fni, mna wee kun ki lam, ŋga nu we na tre sɛnyi simi yuwi. Mna nyuŋgo sin gedeŋge see kre lam, mna ki wru mu le tnumutunfɛɛnlɛ plɛ kɛɛ, mna sɛ waŋgra ka nu. 34Ŋga sro na le kre, blↄ wre na yire mna wra sɛ kre, mna u sumifɛɛnlɛ plɛ tun u see kre lefɛɛnlɛ pre pan, mbe pe sɛ sro yɛ shↄ mbe paan u ŋga. 35Ŋga pra sɛ kre, see kre lefɛɛnlɛ pre na sumifɛɛnlɛ pre yii mna nunu frↄ, mna nunu gbo, mna nunu waari na dnɛ ni. 36A seefun wre na ndru mna u sumifɛɛnlɛ pre plɛ wↄ mu tun shiin wo na, pre na nɛɛ mu wɛ jle wolo pre na. A pra pe pe imi pra jle wolo pre pe kre chↄↄ. 37Ŋga kra pan ma kre, a wra wre titi pↄ wↄ mu tun pe pan, wraa jawa na pie u pↄ wre shↄↄli. 38Ŋga pra pↄ wre nya na u paan kre, a pra kna mna yo peyɛ pan mbo, 'Wolo, pↄ ŋmba we u lɛ wre krↄ li kre u paan kre, e pan mbe o u gbo. Kena krↄ yirɛ yire pe o wee.' 39A pra pↄ wre yii mna u tini mu yili see kre lam, mna sɛ u gbo. 40Kena na seefun wre waa pan, mni e jawa na we pe pe hin?" 41A leele pre na kna mna yo Yesu pan mbo, "Na seefun wre titi waa pan kre, pre sisampefɛɛnlɛ pre nyini, we pe luuro pre sro peii. Mbe see kre wru mbe le lefumblↄ kɛɛ, mblɛ pie see kre le, na ki sro pan, mbe pe u ŋga nyjɛ yi fna u ta." 42A Yesu na kna mu yo pe pan mbo, "E n kee kre pe nyunↄ mu tɛɛ kre tↄↄnri mu nya tun ree? 'Dnɛ ŋga nyuŋgo sinfɛɛnlɛ pre na je na ki n nyu kre, kre ki kↄ mu pe nyuŋgo kre ndra. O Tafun Nyiɛkpↄↄ wre kepele yi nyjɛ kro, a yi pe kawako ni o pan.' 43Kena e ti ni yo e pan mbe e loo, na Nyiɛkpↄↄ ŋunumu kre, pie ki shↄ e pan mbe sɛ waŋgra ŋga pie ki le mbe tnu pan ki nu kre ŋga ki yi. 44Kena ŋmba we gbro dnɛ kre na mbe to kre we pile. A ŋmba na dnɛ kre we to kpan, kie u brɛri." 45Ŋga Yesu na yomini kre gbun kre, Judae sↄfue loplombo pre na Farisiie pre na chin na pre kee u yuu. 46A praa u chaa mbe yii, la, pra fiɛ lenɛɛrɛ pre na. Ŋgi na, lenɛɛrɛ pre na chin na Nyiɛkpↄↄ kee nyanyofun wi Yesu.

will be added

X\