Matio 20

1Yesu na yomini gbun mbo, "Pan nyjeeri ŋunumu kre nyi na, falifun ŋmba wra yiri bnimi pupu, mna sɛ falifɛɛnlɛ wru mbe pe sɛ fali u see kre wi. 2Ŋga wre na pre na paara mna fni kre, pra yo pie shↄ swa denari nununu ble nunu, a wra tia pra sɛ na fali. 3Kie pe nyjila kↄↄnajirɛ kre, wra sɛ leele plɛ da jafa lawee na pe yire finfin. 4A wra kna mna yo pe pan mbo, 'Wolo, yaa sɛ fali ni pan mbe ni e fↄlↄ tↄ imi na ki fnaa?' A pre na sɛ ya mblɛ pre na. 5Kie pe nyjila kɛmbↄshiin na nyjila taarɛ lalɛɛ yire nu kre, seefun wre na sɛ plɛ da na, mna pe yeeri ma na. 6A kie pe nyjila kunↄ kre, wra sɛ plɛ da na pee wa mu yire, a wra kna mna yo pe pan mbo, 'Yira ŋgi e yire na ble poŋgo klai finfin ŋga.' 7A pra kna mbo, 'Na ndro n o wru tnumu ka nu.' A seefun wre na kna mbo, 'E tro e sɛ fali ni see wa.' 8Ŋga yila na kↄ a pra pan katoo kre, a seefun wre na u tnumu lefun yeeri a wra pan, a wra kna mbo, 'Tnumutunfɛɛnlɛ pre kro yeeri mu pe fↄlↄ tↄ. Yire mblɛ pe kro tↄ kre na mu sɛ su yiɛkulo pre na.' 9Ŋga mblɛ pra kro tↄ falihaa kre na pan, a wra pe tↄ denari nununu kre, 10yiɛkulo pre na chin na pre we ta mbe ki wɛ ma na. La, denari nununu wra pre ŋga na. 11Ŋga pra swa yire shↄ mu kↄ kre, a praa taanri seefun wre na mbo, 12'Kotↄmblↄ mblɛ, nyjila nunu chom ni pe tnumu tun, a wre mblɛ wre kala nya a yila o gbun chiin kre, nde fↄtↄↄrↄ nunu o kro ta.' 13A seefun wre na kna mna yo pe wa pan mbo, 'Awe, ni n wa pe sisaa, mi na yire n paara a o nyu fni, a e yo denari nununu ee shↄ kre ra? 14Kena yire e e wie shↄ e sɛ. Mi ni chaa mu mblɛ ŋga ma na. 15Kena ni n kolo ni na mbe ni swa tɛɛ mbe ŋga ni chaa pe ree? Ndee mni a ni chichie pee kaari e pan krↄ ŋga hin?' " 16A Yesu na u yomini kre nyu le mbo, "Kena ni yuu e pan na kotↄmblↄ we kna mbe yiɛklu, mbe yiɛkulo kna mbe kro tↄ." 17Yesu na lenɛɛrɛ naa shie Jerusalɛm na, ŋga praa shie mu da kolo kre, a wra u twanfɛɛnlɛ kɛmbↄshiin pre yeeri mbɛɛ na mna yo pe pan mbo, 18"E le, Jerusalɛm na o shie kre, bawa pie Lewo Pↄ wre wↄ mbe le Judae sↄfue loplombo pre na pe mbra nyinafɛɛnlɛ pre kɛɛ, mbe pe u gbun kumu pimi ni, 19mbe u wru mbe le leele mblɛ pe n Nyiɛkpↄↄ chin kre kɛɛ, mbe pe u tɛɛlɛ, mbe u frↄ, mbe sɛ u kan kanyana kumu kaan kre na, a ki ble taarɛ ble na we nyi." 20Bawa Zebedii chↄ na pan na u biile Jemisi na Jↄn ni, mna pan mu kosie kan Yesu yiɛ, na Yesu u ya u na. 21A Yesu na kna mu u wie mbo, "Ŋgi mu chaa mbe ni pe mbe mu ŋga hin?" A chlↄ wre na kna mbo, "Jande, ni chaa mbe mu ti mbe ni biile shiin mblɛ, mbe wa tni mu kalie kɛ, mbe wa tni mu kamɛŋɛ kɛ, na maa sɛ mu ŋunumu kre nu." 22A Yesu na kna mbo, "Mu n chin kee ŋga mu yuu." A Yesu na kna mu Jemisi na Jↄn wie mbo, "Eee jaa gbↄ kanyana gbↄyira ŋga ni ni gboo nii?" A pra kna mbo, "Oo jaa gbↄ na ki ni." 23A Yesu na kna mna yo pe pan mbo, "Ee jaa gbↄ na kanyana gbↄ yira ŋga ni ni gboo ni, la, mbe tni ni kalie na ni kamɛŋɛ kɛ kre rɛ, ni wo ma mbe ni jaa ki kolo ŋga, la, mblɛ pan ni lɛ ki gbeele mu tɛɛ kre wo yi." 24Ŋga twanfɛɛnlɛ kɛ hamblɛ pre na kre kee ŋga loo kre, pe krↄ na kun Jemisi na Jↄn ni. 25A Yesu na twanfɛɛnlɛ pre kro yeeri mna yo pe pan mbo, "E chin na leele mblɛ pe n Nyiɛkpↄↄ chin kre, pe loplombo pre peyɛ pe tafɛɛnlɛ na jaŋga lii hamblɛ naa? 26A yire rɛ, pan ma ki nyi e nu. La, ŋmba we na chaa mbe pe lekpↄↄ e nu kre, u kaari e kro sumifun. 27A ŋmba we na chaa mbe e yiɛklu kre, u kaari e kro tnu. 28Lewo Pↄ wre kuraa n pan na pe u sumi, la, sumi haa u pan, mbe u ŋmaa tɛɛ mbe sra wↄ mbe lenɛɛrɛ ŋga." 29Ŋga Yesu na u twanfɛɛnlɛ pre na yili Jɛriko na, na shie kre, leele tataara na taa pe kro. 30Kre nyjila kre nu na fuunlo shiin plɛɛ wa mu tni kolo mbɛɛ na. Ŋga pra loo na Yesu tro pe jaara kre, a pra gble fↄↄri mu le mbo, "O Tafun, Devid nana, o fooro le." 31A lenɛɛrɛ pre naa fuuru pe na, na pe pieri, a pra taa kuraa na gble kre leni kpↄↄ na yaa mbo, "O Tafun, Devid nana, jande, o fooro le." 32A Yesu na yire mna pe yeeri, mna pe wie mbo, "Kee ŋgi e chaa mbe ni pe mbe e ŋga hin?" 33A pra kna mna yo Yesu pan mbo, "Jande, ti mbe o nyiɛlɛ nyaa." 34Ŋga pra yo ma kre, fooro na Yesu yii, a wra kɛ taa taa pe nyiɛlɛ yire na, titɛɛ kre nu to, a yira nyaala, a pra taa Yesu kro.

will be added

X\