Matio 2

1Pra Yesu se Bɛtlɛhɛm ŋga kii wa Judea tra nu kre na, kre nyjila kre na Hɛrodi wi ŋunu kre tra kre nu. Ŋga pra Yesu se kre, kachimblɛ plɛ na yiri yilafinhaa mna pan Jerusalɛm na, 2mna pan na wie mbo, "Sena Judae ŋunu ŋmba pe se kre nyi hin? O u wↄlↄ nya yilafinhaa na paan mbe u sumi." 3Ŋga ŋunu Hɛrodi na kre kee ŋga loo kre, gbun na yↄ u na, a kra wre na Jerusalɛm leele kro hau. 4A wra Judae sↄfue loplombo na nyinafɛɛnlɛ pre kro ble mna pe wie mbo, "Chia ŋgi na pra yo na pie Kristo wre se kre hin?" 5A pra kna mbo, "Bɛtlɛhɛm ŋga kii wa Judea tra na kre na. Pan Nyiɛkpↄↄ kee nyanyofun wre na ki nyunↄ mu tɛɛ, mbo, 6'Ŋu Bɛtlɛhɛm ŋga muu wa Juda tra nu, mu ŋunumulie n pe fiɛn Judae ŋulo nu. Ŋgi na, ŋu sele nu ŋunu we yiri mbe paan ni leele Israel le.' " 7Ŋga kra pan ma kre, Hɛrodi na kachimblɛ pre yeeri brɛm mna pe wie nyjila ŋga nu wↄlↄ kre na yili. 8A wra yo pe pan mbo, "E sɛ pↄ wre haa cha chiriri. Na e waa u nya kre, e ndru e pan e yo ni pan, mbe ni sɛ u sumi ka na." 9Ŋga pra ŋunu wre kee kre loo mu kↄ kre, a pra to kolo. Ŋga praa shie kre to, wↄlↄ ŋga pra nya yilafinhaa kre, na yiɛ klu pe pan mna sɛ yire katoo ŋga nu pↄ wre na nyi kre ndra na. A pe yiɛ na shↄ mu tro. 11A pra sɛ le katoo wa mna pↄ wre na u lo Maria nya, a pra kosie kan u yiɛ, mna pe tuuro zaanri mna u kɛ swa nyiɛ, na tlade, na kroboo ndiom taan. 12Ŋga praa wa wa kre, ki ble ka blee Nyiɛkpↄↄ na pe jaari ŋunɛ nu na pia shia ndru mbe sɛ tro Hɛrodi lawee na. A kra tia pra tro kolo fↄŋgↄ na mna sɛ pe chia. 13Ŋga kachimblɛ pre na yili wa mna sɛ kre, nyjeeri bituŋu wa na uyɛ wↄ mna Josɛf nyina ŋunɛ nu mbo, "Yiri mu pↄ wre na u lo wru mu fɛ mu sɛ Egypt na. E sɛ tni wa e sɛ su nyjila ŋga nu mbe yo e pan na, e ndru e pan. Ŋgi na, Hɛrodi pↄ wre chaa mbe gbo." 14A Josɛf na yiri blee kre mna pↄ wre na u lo bali mna yili chia kre na mna sɛ Egypt na. 15Ba pra tni mna sɛ su nyjila ŋga nu Hɛrodi na ku. Kre kee ŋga na pe mna tia Nyiɛkpↄↄ kee ŋga wra yire u kee nyanyofun na mna yo kre na pe kpra na. "Ni ni pↄ yeeri mu yili Egypt na." 16Nyjila ŋga Hɛrodi na nya na kachimblɛ pre u fana kre, u krↄ na kun kpↄↄ. A wra leele tun na pe sɛ bibilɛ mblɛ pee wa Bɛtlɛhɛm na, na ki mbɛɛlɛ chiɛ yire na kro gbo, pe mblɛ pe li yɛlɛ shiin, na mblɛ pe n ta mu da tun kre kro, mu yire ŋga ble wra kee kre loo kachimblɛ pre pan kre na. 17A kee nyjɛ Nyiɛkpↄↄ kee nyanyofun Jeremia na yo kre na pan mna mbo, 18"Mana kpↄↄ ka yilii Rama na, nyɛnɛɛ na fooro kpↄↄ kee ni, Rahɛl u biile nyɛni, a pia jaa u bre. Ŋgi na, u biile pre n wa na." 19Hɛrodi kum kↄkro kre, Nyiɛkpↄↄ bituŋu na uyɛ wↄ mna Josɛf nyina ŋunɛ nu Egypt na wa mbo, 20"Yiri mu pↄ wre na u lo wru mu ndru mu sɛ Israel tra nu. Mblɛ pe pↄ wre chaa mbe gbo kre pe ku." 21A Josɛf na yiri mu pↄ wre na u lo wru mna sɛ Israel tra nu. 22A ŋga Josɛf na loo na Arkelao sɛ u lɛ Hɛrodi krↄ li mu ŋunumu li Judea na kre, kra tia fiɛrɛ na Josɛf yii, a wraa fiɛ na we sɛ wa. Ŋga kra pan ma kre, Nyiɛkpↄↄ na Josɛf jaari ŋunɛ nu a wra sɛ Galilii tra nu. 23mna sɛ tni Nazrɛt chia kre na. Kre kee ŋga na pe, mna tia kee ŋga Nyiɛkpↄↄ kee nyanyofɛɛnlɛ pre na yo mu tɛɛ kre na pe kpra mbo, "Pie u yeeri Nazrɛt wo."

will be added

X\