Matio 19

1Ŋga Yesu na kee nyjɛ yo a u nyu na to kre, wra yili Galilii na mna sɛ Judea tra na, Jↄↄdan lↄↄ kre kro. 2Ŋga wraa shie kre lenɛɛrɛ na taa u kro, a wra pe tra wa peii. 3Bawa Farisiie pre plɛ na pan mna u pe n le, mna u wie mbo, "Kena mbra kolo ŋga mbe lewo na u chↄ je kolo kro naa?" 4A Yesu na kna mna yo pe pan mbo, "E n ki tↄↄnri mu nya na, 'ŋmba wra klu mu lewo faanri kre', na 'blↄ na chlↄ wra klu mu faanri rↄ'? 5'Kena kre na blↄ we u lo na u lɛ ti, mbe sɛ mbra u chↄ na, mbe pe shiin pre pe wejiŋge nunu.' 6Na pe ta mu mbra mu kↄ, kena pe n pe leele shiin na, la, pe pe ndro nunu. Kena ŋga Nyiɛkpↄↄ mbra kre, yaa ti mbe lewo ki kla." 7A Pra kna mna Yesu wie mbo, "Kena ŋgi ki tia a Mbose na mbra le na, na mu yo mu chlↄ je ki fna mu u ŋga hlɛ mbe ki nyina na mu u je hin?" 8A Yesu na kna mbo, "E ndikana ndra na Mbose na tia e naa e chiɛlɛ jee, pan ma kra nyi jle kre. 9La, mi yuu e pan na, na ki n yire tiɛrɛɛ na a blↄ u chↄ je, maa sɛ wa leŋge kre, kena u leŋgeere kla." 10A Yesu twanfɛɛnlɛ pre na kna mu yo u pan mbo, "Kena na pan kre kee ŋga nyi blↄ na chlↄ lalaa rɛ, kena ki n fna mbe o na leŋgei." 11A Yesu na kna mbo, "Ndro kro ma we jaa tni mbe wa leŋge, fↄna mblɛ pe ŋga ki yi kre. 12Leele plɛɛ wa pra leŋge. Pan pe pre se. A plɛɛ wa pe pe san, kre ki tia pra leŋge. A plɛɛ wa mu yila nyjeeri ŋunumu kre na, ki tia pra leŋge. Kena ŋmba we jaa li kre kolo kre na kre, e ti u taa ki na." 13Bawa leele plɛ na pan na biile plɛ ni Yesu pan na u kɛ taa taa pe ndrɛ na, mbe nyiɛtali mbe pe ŋga, a twanfɛɛnlɛ pre naa fuuru leele pre na. 14A Yesu na kna mna yo u twanfɛɛnlɛ pre pan mbo, "E biile pre ŋga kolo mbe pe pan ni pan, yaa pe tↄ kolo, pre imi wo yi nyjeeri ŋunumu kre." 15A pra pe ŋga kolo, a leele pre na pan na biile pre ni, a Yesu na kɛ taa taa pe ndrɛ na, mna chin mu yili wa. 16Titɛɛ kre nu wa, yirifuŋu wa na pan mu Yesu wie mbo, "Nyinafun, kee chichie ŋgi mbe pe mbe blenyini ŋmaa kre ta hin?" 17A Yesu na kna mbo, "Ŋgi ki tia mna ni wie kee chiriri ŋga mu jaa pe hin? Nyiɛkpↄↄ chiin u kee chichie chin. Kena na mu chaa mbe ŋmaa ta kre, li Nyiɛkpↄↄ mbra yire na." 18A blↄ wre na kna mu Yesu wie mbo, "Mbra nyji na Nyiɛkpↄↄ yo o taa hin?" A Yesu na kna mbo, " 'Maa shia linkuuro kee pe, a maa shia leŋgeere kla, a maa shia ju, a maa shia kafinɛ dansiɛrɛ li. 19Mu lo na mu lɛ shↄnli, mu mu ŋmbrↄ kori na mu yɛ yi.' " 20A yirifuŋu wre na kna mbo, "Yire kee nyjɛ krɛɛrɛ, ni li yi na kro, kena ŋgi ki kro na hin?" 21A Yesu na kna mbo, "Kena na mu chaa mbe pe cheche kre, sɛ yirɛ nyjɛ yii wa mu pan kro prɛ, mu shianfɛɛnlɛ ŋga yi swa kre, mu pan mu taa ni kro, kre mu krↄyirɛ ta nyjeeri." 22Ŋga yirifuŋu wre na kre kee ŋga loo kre, u sↄↄnrↄ na ku, a wra kna brɛm na shie. Ŋgi na, na yirɛɛ wa u pan tataara. 23A Yesu na kna mna yo u twanfɛɛnlɛ pre pan mbo, "Kpra na ni yuu e pan, kie sheli mbe swafun ŋga na we sɛ nyjeeri ŋunumu kre nu." 24E le, kie pe yiɛyiɛ nyuuma pan na we le pandiɛ wee mbe wɛ ŋga swafun we le nyjeeri ŋunumu kre nu. 25Ŋga twanfɛɛnlɛ pre na kre kee ŋga loo ma kre, kra pe pe kawako ni mu tro. A pra kna na yuu mbo, "A kena ndro ŋmbi haa we ŋmaa ta na hin?" 26A Yesu na kna mu pe le komm, mna yo pe pan mbo, "Lewo pan kia jaa pe, la, Nyiɛkpↄↄ pan kre, kee kro we jaa pe." 27Bawa Pita na kna mna yo Yesu pan mbo, "Le, o o yirɛ kro ti mu pan mu taa mu kro, kena tnu ŋgi oo ta ki nu hin?" 28A Yesu na kna mu yo pe pan mbo, "Kpra na ni yuu e pan na, waŋgra shiin wo kre nu kre, Lewo Pↄ wre we tni u yɛnyiŋge ŋujↄↄn kre na, a yire mblɛ e taa u kro aŋga ŋga we tni ŋujↄɛn nununu kɛmbↄshiin na, mbra Israel sele kɛmbↄshiin yire kpra kuun. 29A ŋmba u u kalonyi ndee, u chinlɛ, ndee u jaala, ndee mu u lɛ, ndee u lo, ndee mu u biile, ndee mu u tra ti mu pan mu taa ni kro kre, ufun we ndru mbe yi ta ma gbee lafaa lafaa, mbe blenyini ŋmaa kre ta mbe ya. 30La, lenɛɛrɛ mblɛ pe yiɛklu kre we kro tↄ, mbe kotↄmblↄ kna mbe yiɛklu."

will be added

X\