Matio 17

1Ble kↄↄnanu kↄkro kre, Yesu na Pita na Jemisi na u chunu Jↄn pre chiin bali a pra sɛ nyua gedeŋge ka na. 2Bawa Yesu na sɛ chinɛ pe yiɛ na, a u yiɛ naa chiɛnri na yila yi, a u dodoŋgi na fniŋge prupru u na. 3Bawa Mbose na Elaija na peyɛ wↄ mu paara Yesu pan. 4A Pita na kna mna yo Yesu pan mbo, "Ni Tafun, ki nyu na oo wa mna, na mu chaa oo sugbɛɛ taarɛ sin e pan fuŋgaami, mu wo nunu, Mbose wo nunu, Elaija wo nunu." 5Ŋga Pita naa wa na paara to, a sugbeŋge ka na pan mu pe tↄ, a mana ka na yili sugbeŋge kre nu mbo, "Ŋmba wi ni pↄ ŋmba ni kori, a ni yiɛ shↄ u na kre. Kena e ndie tɛɛ u pan." 6Ŋga twanfɛɛnlɛ pre na mana kre loo ma kre, fiɛrɛ na pe yii kpↄↄ, a pra yiɛ juule tra. 7A Yesu na pan mna kɛ taa taa pe na mna yo pe pan mbo, "E yiri, yaa fiɛ!" 8Ŋga pra yiɛ yire kre, Yesu chiin pra nya na u wa mu yire pe jaara. 9Ŋga pra yiri nyua kre na na tri tra kre, Yesu na yo pe pan mbo, "Yaa shia kee ŋga e nya na ŋga bↄ mbe ndro loo, fↄna mi Lewo Pↄ wre ku mu nyi tun." 10Ŋga wra yo u twanfɛɛnlɛ pre pan ma kre, a pra kna mbo, "A ŋgi ki tia a Judae mbra nyinafɛɛnlɛ pre na yuu na ki fna mbe Elaija klu mbe pan Kristo wre na hin?" 11A Yesu na kna mbo, "Kpra kee pe yuu na Elaija we klu mbe pan mbe yirɛ kro nyu mbra, mbe ni chiin pan. 12La, e ti ni yo e pan mbe e loo, Elaija na yiɛ klu mu pan, la, pe nsra u chin, ki tia pra nyjɛ praa chaa kro taa u na. Pan chↄↄ mi Lewo Pↄ wre pan, mbe paan kala nya pe kɛɛ." 13Ŋga wra yo ma kre, a u twanfɛɛnlɛ pre na chin mu kee kre nↄↄ loo, mna chin na Jↄn ndrajefun wre kee Yesu yuu. 14Ŋga pra tii nyua kre na mna pan lenɛɛrɛ pre lawee kre, blↄ wa na fɛ mna pan mu kosie kan Yesu yiɛ mbo, 15"Ni Tafun, ni pↄ ŋmba fooro le. Tonkolii wa u na mu tia wra kala nya tataara, ki tia wra tuuri kanhun, ka nu mbe u to nyumu nu. 16Kre ni pan na u ni mu twanfɛɛnlɛ pre pan a pe n ja mu u tra." 17A Yesu na kna mbo, "Yire aŋga leele mblɛ nu shↄnlie n wa, e ndie kan kpa, ni tni e jaara, ndee ni kala nya na e ni mbe sɛ su nyjila ŋgi nu hin? E pan na u ni e ni ŋga." 18A pra pan na u ni, a Yesu na fuu ŋumufↄↄn kre na, a kra yili yaŋu wre nu, a wra saanla titɛɛ kre nu. 19Kee ŋga kↄkro kre, twanfɛɛnlɛ pre na Yesu yeeri mbɛɛ na mna u wie mbo, "Kena yira ŋgi ki tia a wre n ja mu ŋumufↄↄn kre wↄ ŋga hin?" 20A Yesu na kna mna yo pe pan mbo, "E shↄnlie fiɛn, kre ki tia. Kpra na ni yuu e pan na, na e shↄnlie da na mↄstad bie ni kre, ee jaa yo nyua ŋga pan na, kↄ mu sɛ to lawee fↄŋgↄ nu, mbe ki kↄ. A yaka n wa mbe yaa jaa ki pe." 21La, blefuun na nyiɛtalaa chiin kie jaa kre ŋumufↄↄn ŋga wↄ lewo nu. 22Ŋga Yesu na u twanfɛɛnlɛ pre kro na sɛ fni Galilii na kre, wra yo pe pan mbo, "Pie Lewo Pↄ wre wↄ mbe le leele kɛɛ, mbe pe u gbo, a we ndru mbe nyi ki ble taarɛ ble na." Ŋga wra yo ma kre, pe sↄↄnrↄ na ku. 24Ŋga pra yiri wa kre, pra sɛ Kapɛnↄm na, bawa sumi nyuŋgo tↄↄ swa shↄfɛɛnlɛ pre na pan mu Pita wie mbo, "Kena e nyinafun ŋmba sumi nyuŋgo tↄↄ kre toni ŋgaa?" 25A Pita na kna mbo, "Ŋgi ki tia mbe wa ki tↄ hin? U toni." Ŋga Pita na yiri wa mna le katoo to, a Yesu na klu mu u wie mbo, "Siimↄn, mni nyini mu kee ŋga jawa hin? Leele mblɛ haa pan ŋulo tra swa shio hin? Fumblↄ pan ree? ndee kabiile pan hin?" 26A Pita na kna mbo, "Fumblↄ pan pe ki shio." A Yesu na kna mbo, "Kena ki nyina na kabiile pre wuu kre tↄↄ ŋga kɛɛ. 27La, o n na chaa mbe ti leele pre krↄ kun, kena drawa wru mu sɛ tapla kre nyu na, mu sɛ ki wa lↄↄ kre nu, mbro jlewo ŋmba mu wↄ kre, u nyu nyaa, mu swa nya wa, ki wↄ mu pan mu mi na ŋu wo tↄ."

will be added

X\