Matio 16

1Ki ble ka Farisiie na Sadukie pre plɛ na pan mna Yesu pe mu le. Pra yo Yesu u kawako kee pe mbe pe nya. 2A Yesu na kna mna yo pe pan mbo, "Na yila shie mbe sɛ to, a lawee nyina haa kre, e ja na chini na yuu na, imi na lawee pe ŋga, baŋga ndramu we saan. 3A na nyiŋge se bnimi kre, e ja na tloe le na yuu na nyiɛ we pan. E ja na ndramu pee le na kalɛɛ taa na yuu, a la, yire ble nyjɛ nu e nyi ŋga, e n ja mbe kee nyjɛ yi piin yi nu le mbe yi kee nya mbe yo. 4E ti ni yo e pan mbe e loo, yire leele sisam pefɛɛnlɛ mblɛ, e Nyiɛkpↄↄ je, na kawako kee chaa mbe nya, la, yaa kawako kee ka ta mbe nya na, fↄna Jona wo ŋga kra pe kre." Ŋga Yesu nyu na to kre, a wra pe ti wa mna sɛ. 5Ŋga Yesu twanfɛɛnlɛ pre na tapla kre kun mna kna ki kro kre, pra paanu fɛɛ. 6Ŋga praa wa wa kre, Yesu na yo pe pan mbo, "E le, e eyɛ dↄↄta Farisiie pre na Sadukie pre yiisi yire haa." 7A pra kna na yuu peyɛ pan mbo, "Ŋga o n pan na paanu ni kre, kre ki tia a wra yuu o pan ma kre." 8Kee ŋga praa yuu kre, Yesu na pe jawala nya, a wra kna mu pe wie mbo, "Ŋgi ki tia a e na jawa na ŋga e n pan na paanu ni kre ki tia ndaa yuu e pan ma ŋga hin? E shↄnlie fiɛn kpa. 9Kena e n ta mu kee nyjɛ nↄↄ loo tun? A e n sↄↄnri na ndaa paanu kunↄ pile mna leele kagbeŋ kunↄ ŋga ŋgaa? A ŋga pra ka mu yↄↄ kre, yi mbuuroe yire kakɛɛ mni e na yoori hin? 10A ŋga ndaa paanu kↄↄnashin yire pile mna leele kagbeŋ jijirɛ ŋga kre, yi mbuuroe kakɛɛ mni e na yoori hin? 11Kena yira ŋgi ki tia e n kee ŋga ni yo ŋga nↄↄ loo, a e na jawa na paanu kee ni yuu ŋga hin? Kena e jande, ni yuu e pan na e eyɛ dↄↄ ta Farisiie pre na Sadukiie pre yiisi yire haa." 12Ŋga Yesu nyu na to kre, bawa u twanfɛɛnlɛ pre na chin mu kee kre nↄↄ loo, na yiisi ŋga pe leni paanu nu kre kee ma u yuu, la, Farisiie pre na Sadukie pre kooloe fuɛn nyjɛ praa leele nyina kre kee wraa yuu, na pe peyɛ dↄↄ ta yi na. 13Ŋga Yesu na le Kaesaria Filipo tra nu kre, wra u twanfɛɛnlɛ pre wie mbo, "Ndro ŋmbi sembremu leele mi Lewo pↄ wre kra hin?" 14A pra kna mbo, "Plɛ yuu na Jↄn ndrajefun wre wi, a plɛ na yuu na Elaija wi, a plɛ na yuu na Jeremia wi, a plɛ na yuu na aada fawolo Nyiɛkpↄↄ kee nyanyofɛɛnlɛ pre wa wi." 15A Yesu na kna mbo, "A yire hin? Ndro ŋmbi sembremu e ni kra hin?" 16A Siimↄn Pita na kna mbo, "Ŋu wi Kristo wre, Nyiɛkpↄↄ ŋmba u le wre Pↄ wre." 17A Yesu na kna mbo, "Siimↄn, Jona pↄ, Nyiɛkpↄↄ mu dwan. Ŋgi na, lewo ma u mu nyina kre kee ŋga, la, ni Lɛ ŋmba uu wa nyjeeri wre u ki wↄ mu mu nyina. 18Kre ndra na ni yo mu pan, ŋu wi Pita, ŋu wi dnɛ ŋga mbe wↄ mbe ni leele yire ki na mbe ni sumi, a kumu waa ki ja. 19Ŋu kɛɛ mbe nyjeeri ŋunumu kre safwa le, kena kee ŋga mu yii tra mna kre, pie ki yii nyjeeri, a kee ŋga mu je tra mna kre, pie ki je nyjeeri." 20Bawa Yesu na u twanfɛɛnlɛ pre jaari na pia shia ki yo mbe ndro loo na wre wi Kristo ŋmba Nyiɛkpↄↄ wↄ kre wre. 21Mu yire kre nyjila kre nu na shie kre, Yesu na paara chasi mna u twanfɛɛnlɛ pre nyina mbo, "Ki fna mbe ni sɛ Jerusalɛm na, mbe sɛ kala nya loplombo pre na Judae sↄfue loplombo pre, na pe mbra nyinafɛɛnlɛ pre kɛɛ. Pie ni gbo, a ki ble taarɛ ble na mbe nyi." 22Ŋga Yesu na yo ma kre, Pita na Yesu yeeri mbɛɛ na mna sɛ u yiɛ kee yo u pan mbo, "Ni Tafun, Nyiɛkpↄↄ we sɛ na kre kee ŋga mu yo ŋga ni lee. Kre kee ŋga n fna mbe pan mu na." 23A Yesu na kna mna yo Pita pan mbo, "Laa ni na! Sutna wi ŋu! Mni a mna ni toni kolo hin? Mu n na Nyiɛkpↄↄ wo haa jawa, la, lewo wo haa mu jawa." 24A Yesu na kna mu yo u twanfɛɛnlɛ pre pan mbo, "Na ndro chaa mbe taa ni kro kre, u fun u uyɛ fɛɛ, mbe u kanyana kumu kaan tio mbe taa ni kro. 25Ŋgi na, ŋmba we na wii u ŋmaa na kre, kie yili u kɛɛ. La, ŋmba we yila ni na mbe u ŋmaa wa mbe fun kre, we ki ta. 26Kena na lewo waŋgra ŋga yirɛ kro ta, mu u ŋmaa wa mu fun, yira ŋgi tnu we ta hin? Ndee yira ŋgi sembremu lewo we jaa ta tra mna mbe Nyiɛkpↄↄ ŋga, mbe ki jaa ti u ŋmaa ta hin? 27Mi Lewo Pↄ wre, mbe pan ni Lɛ wre yɛnyiŋge kre nu, mi na nyjeeri bitumblↄ ni, mbe paan lewo ŋga kee nyjɛ u pe kro fↄtↄↄrↄ. 28Kpra na, e ti ni yo e pan mbe e loo, plɛɛ wa mu yire e nu mna a pia kumu chin, fↄna pe mi Lewo Pↄ wre nya ni ŋunumu kre nu tun."

will be added

X\