Matio 15

1Praa wa wa ki ble ka, a Farisiie plɛ na Mbose mbra nyinafɛɛnlɛ plɛ na yiri Jerusalɛm na mna pan mu Yesu wie mbo, 2"Ŋgi ki tia paala nyjɛ o tolɛɛlɛ le mu tɛɛ kre, a mu twanfɛɛnlɛ pre na na lii yi na hin? Pra kɛnyi je o paala kolo na mbe chiin li." 3A Yesu na kna mbo, "A yire titi, ŋgi ki tia e Nyiɛkpↄↄ mbra yire je mu taa e paala yire kolo na hin? 4Nyiɛkpↄↄ yo mbo, 'Mu lɛ na mu lo shↄnli, ŋmba we kee sisaa yo u lo na u lɛ na kre, ki fna mbe pe u gbo'. 5La, yire yo na ndro yira ka ta mbe u lɛ ndee mbe u lo ŋga kre, kena ufun u ki tɛɛ mbe sra wↄ mbe Nyiɛkpↄↄ ŋga. Kena ki n shian na we u lɛ ndee u lo ŋga yaka na. E tro e paala kolo nyjɛ krɛrɛ na mu Nyiɛkpↄↄ mbra kee kre je. 7Yire yiɛnyumufɛɛnlɛ, yɛŋgɛ Nyiɛkpↄↄ kee nyanyofun Yisaia na e kee nya mna yo kre mbo, 8'Leele mblɛ, ni mɛɛ pe yeeri, a nde pe n na ni kee chaa pe lolonyi nu. 9Finfin pe ni sumi. Ŋgi na, lewo paala kolo pe leele nyina, na yuu na Nyiɛkpↄↄ kolo yi.' " 10Ŋga Yesu na paara na pe ni mu kↄ kre, a wra lenɛɛrɛ pre yeeri mna yo pe pan mbo, "E ndie tɛɛ e kee kre nↄↄ loo chiriri. 11Ki n pe yira ŋga ki lee lewo nyuu kre, ki nɛɛrɛ woni u na, la, kee ŋga ki yili lewo nyuu kre, kre ki u toni na nɛɛrɛ ni." 12Ŋga wra yo ma kre, a u twanfɛɛnlɛ pre na flo mu da u na, mna yo u pan mbo, "Mu chin na kee ŋga mu yo kre, ki Farisiie pre yaa?" 13A Yesu na kna mu yo pe pan mbo, "Tiŋge ŋga ni Lɛ ŋmba uu wa nyjeeri kre n luu kro kre, pie ki kↄ mbe wa. 14Kena e pe ti wa, fuunlo lɛ, a pra plɛ nyina kolo, a na fuun u ŋmbrↄ fuun nyina kolo kre, wee nunu pe kro we to." 15A Pita na taan mu yiri mu yo Yesu pan mbo, "Jande, o nyina yomini kre nↄↄ." 16A Yesu na kna mbo, "Kena e n na kaalɛɛ nyjɛ nↄↄ ndru tuun? 17Kena e n chin na yira ŋga ki lee nyuu kre, lɛɛ ki shie, mbe yire wa mbe yili mbe wo ree? 18A la, kee ŋga ki yilii nyuu kre, loloŋgo nu ki yilii, kre ki ja na lewo toni nɛɛrɛ ni. 19Lewo loloŋgo nu sisam jawala ŋga kro yili na paan, linkuuro kee, leŋgeere klaa, tiɛrɛɛ, juuro, kafinɛ dansiɛrɛ lie, na kabaara. 20Yire kee nyjɛ krɛrɛ yi lewo toni nɛɛrɛ ni, kena na mu kɛnyi nyjɛ pe n je paala kolo na tɛɛ mu li kre, kia jaa lewo tↄ na nɛɛrɛ ni." 21Ŋga Yesu na paara a u nyu na to kre, wra yili wa mna sɛ Tiro na Sidon lawee yire nu. 22Chlↄ wa naa wa wa, a wra yiri Kenaan sele nu. Ŋga chlↄ wre na Yesu nya kre, a wra fɛ mna taa u kro na nyɛni mbo, "Jande, Devid nana, ni fooro le, ni Tafun. Ni pↄ bichable nu ŋumufↄↄn nyi na u hau. Kena jande, ya ni na." 23Ŋga chlↄ wre na yo ma kre, Yesu nsra nyu kun, a u twanfɛɛnlɛ pre na kna na Yesu tali mbo, "Jande, chlↄ wre ni mbe u laa o kro, u gble o ndie titi." 24A Yesu na kna mu yo chlↄ wre pan mbo, "Israel leele mblɛ pe fun Nyiɛkpↄↄ kolo na kre, pre pan pe ni tun." 25A chlↄ wre na kosie kan Yesu yiɛ mbo, "Jande, ni Tafun, ya ni na." 26A Yesu na kna mbo, "Ki n fna mbe wa u biile sro wru mbe wa nyukwanla pan." 27A chlↄ wre na kna mbo, "Ni ki chin, ni Tafun, la, sro knumɛɛ nyjɛ yi woni tra kre, nyukwanla yi yoori na kaa." 28Ŋga chlↄ wre na yo ma kre, a Yesu na kna mbo, "Mu pe chlↄ ŋmba mu shↄnlie kpↄↄ. Kena ŋga mu tali kre, ki pe ma mbe mu ŋga." Titɛɛ kre nu to, a chlↄ wre pↄ wre na saanla. 29A Yesu na yili wa mna sɛ tro Galilii epo kre nyu na, mna sɛ nyua ka nduu mu tni wa. 30Lenɛɛrɛ na sɛ na yamblɛ ni u pan, fuunlo na finla na mblɛ pe fuuru, na kpoolo na yira nyininyini fɛɛnlɛ ni kro, mna pan mu pe wa Yesu yiɛ, a wra pe tra peii. 31Ŋga leele pre na kpo nya a wra paara, mu fna ŋmba u fuuru nya a wra nyaari, mu nya a fuun nyiɛlɛ nyaa kre, kra pe pe kawako, a praa Israel Nyiɛkpↄↄ kaan mɛɛ. 32Ŋga kra pan ma kre, Yesu na yire wa mna u twanfɛɛnlɛ pre yeeri mna pan u jaara, mna yo pe pan mbo, "Leele mblɛ kee fooro ni ni pan. Ŋgi na, pe tni ni jaara kie pe ble nununu taarɛ yi ŋga, a pe n yaka ta mbe ka. A ni n na chaa mbe pe ndru mbe sɛ na klo ni, na kre ma, plɛ we jire kolo." 33A u twanfɛɛnlɛ pre na kna mu u wie mbo, "A sena oo sro ta mbe ki leele tataara mblɛ da mbe li fimi lawee ŋga nu hin?" 34A Yesu na kna mu pe wie mbo, "Paanu mni yii wa e pan hin?" A pra kna mbo, "Paanu kↄↄnashin na mbroe chiɛri plɛ ni o nyi." 35A Yesu na kna mu yo lenɛɛrɛ pre pan, na pe tni tni nyaa yire na. 36Yesu na paanu yire na mbroe pre wru mu yii, mna Nyiɛkpↄↄ ŋga mboo, mna yi pile na mbroe pre ni mna le u twanfɛɛnlɛ pre kɛɛ, a praa lenɛɛrɛ pre kaan. 37Lenɛɛrɛ pre kro na ka mna yↄↄ, a twanfɛɛnlɛ pre na pe kampraa yire yoori kakɛɛ kↄↄnashin. 38Bilɛ mblɛ pra yirɛ yire ka kre naa kagbeŋ jijirɛ, pe nsra pe chiɛlɛ na pe biile tↄↄnri mu chaa. 39Ŋga lenɛɛrɛ pre na kↄ kre, a Yesu na pe wa kolo, mna sɛ le krↄ nu, mna sɛ Magadan tra nu.

will be added

X\