Matio 14

1Nyjila ŋga nu Yesu naa kila kre, Ŋunu Hɛrodi na u kawako kee yire wraa piin yire loo. 2Ki tia wra yo u sumifɛɛnlɛ pan mbo, "Kie pe Jↄn ŋmba ndaa gbo kre u ndru mu nyi kre, kre ki tia u jaŋga ŋga sembremu ta kre." 3Ŋga kra tia Ŋunu Hɛrodi na Jↄn gbo rɛ, Hɛrodi na u chunu Filipo chↄ ŋmba praa yeeri Hɛrodias kre shↄ mna leŋge. A Jↄn na paara mu Hɛrodi taan na ki n fna mbe u u chunu chↄ shↄ mbe leŋge. Jↄn na ki yo u pan gbee tataara. Kena ŋga wra klu mu ki yo kre, Hɛrodias wre krↄ na kun paa, a wra tia Ŋunu Hɛrodi na Jↄn yii mu sɛ le nyuŋgo. Ŋunu Hɛrodi naa chaa mbe Jↄn gbo, la, leele tataara na Jↄn shↄnli na Nyiɛkpↄↄ kee nyanyofun wi. Kra tia Hɛrodi naa fiɛ na we u gbo jle kre. Praa wa wa ki ble ka, Ŋunu Hɛrodi naa u seble lii, a Hɛrodias pↄ bichable wa na pan mu yↄ, a kra Hɛrodi yiɛ shↄ. Kra tia wra da mu pↄ wre ŋga lenɛɛrɛ pre yiɛ na, na yira ŋga we u wie kpan, we u ŋga ki yi. A pↄ wre na sɛ ki yo u lo pan, a u lo na u nyina na u sɛ yo na Jↄn ndra u chaa. A pↄ wre na pan mbo, "Ni ŋga Jↄn ndra taa paawa na mna fuŋgaami!" 9Ŋga kre pan ma kre, Ŋunu Hɛrodi yiɛ na je chiɛri, la, ŋga wra da mu pↄ wre ŋga fumblↄ yiɛ na, u nsraa chaa mbe kↄ u danyi yire na. Ki tia wra yire wa mna tia pra sɛ Jↄn ndra kↄ nyuŋgo wa mna pan mu bichable wre ŋga lalaa wa. A pↄ wre na sɛ u lo ŋga ki yi. 12Ŋga pra Jↄn gbo kre, a u twanfɛɛnlɛ na sɛ u gboo wre wru mu sɛ le, mna chin mu sɛ Yesu bↄ mandiɛ. 13Ŋga Yesu na Ŋunu Hɛrodi kee kre loo kre, wra sɛ krↄ wru mna sɛ lawee waa ka nu wre na u twanfɛɛnlɛ pre ni. Leele pre na lawee ŋga nu wraa shie kre haa chin, a pra nyaari tra mna u kↄŋgↄ ni. 14Nyjila ŋga wra yili krↄ kre nu mu to fimi na kre, wra leele pre nya tataara, a pe kee na pe fooro ni u pan mu tro, a wra pe mblɛ praa yaa kro tra. 15Ki ble kre yila kↄŋgↄ, u twanfɛɛnlɛ pre na pan mna yo u pan mbo, "O Tafun, yila koo, a leele ma pee wa lawee ŋga nu, mbe lenɛɛrɛ mblɛ yaka ta mbe lↄↄ ka, kena pe wa kolo mbe pe sɛ sro cha mbe lↄ kabɛɛlɛ yire na mbe li." 16A Yesu na kna mbo, "Ki n shian na pie sɛ sro cha peyɛ, kena e pe ŋga yirɛ yɛ mbe pe ka." 17A twanfɛɛnlɛ pre na kna mbo, "Paanu kunↄ na mbroe shiin chiin ni o nyi mna." 18A Yesu na kna mu yo pe pan mbo, "E pan na yi ni e ni ŋga." 19A wra kna mu yo leele pre pan na pe tni nyaa yire na, a wra kna mu paanu kunↄ yire na mbroe shiin pre wru mu yii kɛɛ, mna yiɛ wa nyjeeri, mna Nyiɛkpↄↄ ŋga mboo, mna paanu yire na mbroe pre pile mna le u twanfɛɛnlɛ pre kɛɛ, a pra yi kɛ mna leele pre ŋga. 20Leele pre kro na ka mna yↄↄ, a twanfɛɛnlɛ pre na pe kampraa yire koli kakɛɛ kɛmbↄshiin. 21Bilɛ mblɛ pra yirɛ yire ka kre naa kagbeŋ kunↄ, pe nsra chiɛlɛ na biile tↄↄnri mu chaa. 22Ŋga pra li mu kↄ kre, a Yesu na yo u twanfɛɛnlɛ pre pan na pe krↄ wru mbra yiɛklu tapla kre kro, mbe u leele pre wa kolo mbe pan. 23Ŋga Yesu na leele pre wa kolo mu kↄ kre, a wre nunu na sɛ nyiɛtali nyua ka na. Yila na Yesu kↄ wa. 24Kre nyjila kre na krↄ kre wa tapla kre lalaa, a fuflɛ naa gbuun na pe fni, a pe sɛ haa yiɛ na sheli. 25Kre nyjila kre na kie pe nyjila jijirɛ nyisee nyu na, a Yesu naa nyaari tapla kre yiɛ na, na shie u twanfɛɛnlɛ pre pan. 26Ŋga u twanfɛɛnlɛ pre na u nya na u nyaari nyumu kre yiɛ na kre, fiɛrɛ na pe yii, praa jawa na gboo wi, kra tia pra gble le. 27Titɛɛ kre nu, a Yesu na paara na pe ni mbo, "E eyɛ gbun yii, mi wi, kena yaa fiɛ." 28A Pita na kna mna yo Yesu pan mbo, "Ni Tafun, na ŋu wi kain kre, ti mbe ni nyaari nyumu ŋga yiɛ na mbe pan mu jaara." 29A Yesu na kna mbo, "Yiri mu pan!" A Pita na yili krↄ kre lam mu to tapla kre yiɛ na, na nyaari na shie Yesu pan. 30Ŋga Pita na nya imi fuflɛ kre nyumu kre wru kre, fiɛrɛ na u yii, to, a wraa tri tapan, ŋga wra ki nya ma kre, a wra gble fↄↄri mu le mbo, "Ni Tafun, ni shↄ!" 31A Yesu na kɛ tini mu u fa mu yii, mna kna mu yo u pan mbo, "Mu shↄnlie fiɛn kpa, mni a mu mu jawala pe shiin ŋga hin?" 32A Yesu na Pita yii a pe kro shiin na le krↄ kre lam, 33a leele pre kro naa kosie kani na yiri na yuu mbo, "Kpra na, Nyiɛkpↄↄ Pↄ titi wi ŋu." 34Ŋga pra tapla kre kun kre, pra to Genesarɛt tra nu. 35Leele pre praa wa wa kre na Yesu nya mna u chin, titɛɛ kre nu, a praa feni na pe yambla wru na paan Yesu pan. Ki nsra da nyjila ka, na pe pan pe tra kre yambla kro ni mu ble Yesu yiɛ, 36na u tali na u ti mbe yambla pre kɛnyi taa u dodoŋgi nyu na, mblɛ pra ja mna kɛ taa u dodoŋgi na kre kro na saanla.

will be added

X\