Matio 13

1Ki ble kre lam Yesu na yili wa mna sɛ tni epo kre mbɛɛ na. 2A lenɛɛrɛ na pan u jaara, kra tia a wra le krↄ lam mna tni ki nu, a leele pre kro naa wa mu yire epo kre nyu na. 3A wra tni wa mna pe nyina kee tataara yomɛɛlɛ nu mbo, "Kena falifun wa wra sɛ u yirɛ bie wohaa. 4Ŋga wraa yirɛ bie yire woni kre, yɛ na sɛ wo kolo mbɛɛ na, a hanyiɛlɛ na yi nya mna yi yoori mu li. 5A yɛ na sɛ wo tra ŋga tapan dnɛ nyi na. Ki nsra mu a yira fin. Ŋgi na, yi nsra ja mu sɛ tapan. 6Ŋga yila na yili mna yi gbun to, a yira ku, na yi didinyi nsra ja mu sɛ tapan. 7A yɛ na sɛ wo wuuro nu, a wuuro yire na fin mu yi fↄ, a yira ku. 8A yɛ na sɛ wo tra chichie na mna fin mu sɛ, yɛ na sɛ lafaa lafaa, a yɛ na sɛ fuloe tataarɛ, a yɛ na sɛ fulo na kɛ." 9A Yesu na kna mu yo pe pan mbo, "Ŋmba uu ndie ni kre, u ndie tɛɛ u loo." 10Ŋga kra pan ma kre, Yesu twanfɛɛnlɛ pre na pan mu u wie mbo, "Mni a mna paara na leele mblɛ nyina yomɛɛlɛ nu ŋga hin?" 11A Yesu na kna mbo, "Nyjeeri ŋunumu ndra ndra kee kre, pe yire nyina ki yi, la, pre rɛ, pe n pe nyina kee kre. 12Lewo ŋmba uu shↄnlie ni kre, pie ka ya u pan mbe u ta nɛɛrɛ. La, ŋmba u n shↄnlie ni kre, fiɛn ŋga ni u nyi kre, pie ki shↄ u kɛɛ. 13Kee ŋga ki tia ndaa paara pe pan yomɛɛlɛ nu yi kre, pee nyiɛlɛ ni, nde pe n na nyaa, pee ndiile ni, nde pe n na ndru, a pe n na kee kre nↄↄ ndru. 14Pe kepele yire tia a Yisaia kee yire wra yo mu tɛɛ kre, a yi pe ma yɛŋgɛ mbo, 'Ee kee kre loo, la yaa ki nↄↄ loo, ee le chiin, a yaa nya. 15Ŋgi na, pre leele mblɛ jawala ku, a pe pe ndiile yurↄ, mu pe nyiɛlɛ tↄ, ki tia pe n na nyaa, a pe n na ndru mbe pe jawala tɛɛ mbe kee kre nↄↄ loo ndee mbe pe jawala chinɛ mbe pan ni pan, mbe ni pe shↄ.' 16A yire rɛ, e ndra nyu titi, e nyaa, na ndru. 17E ti ni yo mbe e loo, Nyiɛkpↄↄ kee nyanyofɛɛnlɛ pre na Nyiɛkpↄↄ leele pre tataara naa chaa na pie na kalɛɛ nyjɛ e nya mu loo ŋga nya mbra yi loo. A la, pe nsra yi nya, a pe n sra yi loo." 18"Kena e ndie tɛɛ, e yirɛ bie woo yomini kre nↄↄ loo. 19Ŋmba we Nyiɛkpↄↄ ŋunumu kre ketaan kre loo a wa ki nↄↄ loo kre, pan we pe na yirɛ bie nyjɛ pra wo a yira sɛ wo kolo mbɛɛ na kre yi. Na Sutna pan, we paan kee kre pe luu ufun loloŋgo nu kre, wↄ u nu. 20A yirɛ bie nyjɛ yira sɛ wo dnɛ lawee yire nu kre lɛ mblɛ pe ketaan kre ndru, mbe ki shↄ na yɛshↄↄrↄ ni. 21La, kee kre wa didinyi kan pe lolonyi nu, pie frↄ chiɛri, kena na kanyana ndee na pe yila ketaan kre na mu wa pra to, na u fɛ mu wa. 22A yirɛ bie yire yira wo wuuro nu kre lɛ mblɛ pe ketaan kre ndru, la, waŋgra yirɛ jawala tataara, na swa chaara we ti kee kre ku u nu. 23A yirɛ bie yire yira sɛ wo tra taan kre nu kre lɛ mblɛ pe ketaan kre ndru mbe ki nↄↄ loo, mbe ki sɛŋgɛ sɛ, mbe plɛ sɛ lafaa lafaa, mbe plɛ sɛ fuloe tataarɛ, mbe plɛ sɛ fulo na kɛ." 24Yesu na ndru mu pe gbun yomini fↄŋgↄ mbo, "Pan nyjeeri ŋunumu kre nyi na, blↄ wa na sɛ u yirɛ bie chichiele yɛ wo u see. 25Ŋga ble na wↄ a leele na sni peii kre, a u loŋgo na yiri mna sɛ nyaa fuɛn yɛ sɛnyi wo mu chaa yi nu. 26Kena nyjila ŋga ni yirɛ yire na fin kre, a nyaa fuɛn yire na fin mu chaa yi nu na. 27Ŋga blↄ wre sumifɛɛnlɛ na sɛ yi nya kre, a pra pan mu yo u pan mbo, 'O Tafun, yirɛ chichie yire mna wo see wa kre, nyaa fuɛn yɛ fin mu chaa yi nu, sena yi yiri hin?' 28A seefun wre na kna mbo, 'Ni loŋgo wa u sɛ yi wo mu chaa yi nu kre.' A u sumifɛɛnlɛ pre na kna mbo, 'Kena mu chaa mbe o sɛ yi klↄ mbe wo ra?' 29A seefun wre na kna mbo, 'E frↄ, na kre ma, na e yo ee yi klↄ kre, e waa yirɛ chichiele yire yɛ klↄ mbe chaa yi nu. 30Kena e yi ti mbe yire na yirɛ chichiele yire kro chaa mbe lɛ, na yirɛ yire kun nyjila waa da, mbe yo kunfɛɛnlɛ pre pan mbe pe nyaa yire klↄ mbe yi ble titɛɛ, mbe kanhun le yi na, mbe chiin yirɛ chichiele yire kun mbe sɛ yi le sugbaa.' " 31Yesu na ndru mna pe gbun yomini fↄŋgↄ mbo, "Pan nyjeeri ŋunumu kre nyi na mↄstad bie ŋga lewo wru mbe sɛ luu u see yi. 32Kre ki pe fiɛn yirɛ bie kro nu, la, na pe ki luu a ki fin, ki tiŋge kpↄↄri mbe wɛ tinyi tataara na. Ki tiŋge kpↄↄri mbe hanyiɛlɛ jaa zeere le ki klɛ nu." 33Wra ndru mna pe gbun yomini ka na mbo, "Pan nyjeeri ŋunumu kre nyi na yiisi yi. Na paanufↄfun ki chiɛri wↄ mu le paanu mimi nu kre, kie paanu mimi kre shↄ mbe ta, mbe ki tin." 34Yomɛɛlɛ nu Yesu naa paara lenɛɛrɛ pre pan, nyjila ŋga nu we paara pe pan kpan kre, yomɛɛlɛ nu wraa paara. 35Pan wraa paara, ki tia Nyiɛkpↄↄ kee nyanyofun wre kee ŋga wra yo mu tɛɛ kre na pe kpra mbo, "Yomɛɛlɛ nu mbe paara pe pan, a kee nyjɛ yi ndra mu yire waŋgra gbeele nyjila krɛrɛ kre, mbe yi wↄ mbe pe nyina." 36Ŋga Yesu na lenɛɛrɛ pre ti wa mna sɛ katoo kre, a u twanfɛɛnlɛ pre na u kↄŋgↄ ni mna sɛ yo u pan mbo, "Jande, o nyina nyaa fuɛn yire yira fin see kre nu kre yomini kre nↄↄ." 37A Yesu na kna mbo, "Blↄ ŋmba wra yirɛ bie yire wo kre na wi mi Lewo Pↄ wre, 38A see kre nu wra yi wo kre na yi waŋgra ŋga. Yirɛ bie chichiele yire lɛ Nyiɛkpↄↄ leele pre, a nyaa yire yi Sutna leele pre. 39A loŋgo ŋmba wra sɛ nyaa yire wo kre na wi Sutna wre. A yirɛ kun ble kre yi waŋgra kla ble kre. A kunfɛɛnlɛ pre lɛ nyjeeri bitumblↄ pre. 40A imi na pe nyaa fuɛn ble titɛɛ mbe kanhun le yi na kre, pan chↄↄ waŋgra kla ble kre we pe. 41Ki ble kre mi Lewo Pↄ wre we ni nyjeeri bitumblↄ pre tun mbe pe paan nyjɛ yi tia leele na sisam pini kre, na sisam pefɛɛnlɛ pre kro wↄ mbe yili yi ŋunumu kre nu, 42mbe sɛ pe wa kanyana kanhun kre nu, bawa pie na nyɛni mbra pe ŋgaala chirɛ. 43A Nyiɛkpↄↄ leele pre we na chiɛnri na yila yi, pe lɛ ŋunumu kre nu. Kena ŋmba uu wa na ndie ni kre, u loo." 44"Kena pan nyjeeri ŋunumu kre nyi na swa nyiɛɛ wa tra ka nu, a lewo sɛ ki nya, mu ndru mu gbeele mu ki tↄ tra ni mu ya, mbe ki yɛshↄↄrↄ sisaa ti mbe u sɛ yirɛ nyjɛ yii wa u pan kro prɛ mbe sɛ kre tra kre lↄ." 45"Nyjeeri ŋunumu kre, pan ki nyi na jafalifun yira chichie ka chaa, 46na waa sɛ ki nya imi na ki ndrↄ we da kpan, mbe u sɛ yirɛ nyjɛ yii wa u pan kro prɛ mbe sɛ ki lↄ." 47"Nyjeeri ŋunumu kre, pan ki nyi na imi na pe asau waa lↄↄ nu, mbe ki mbroe nyini nyini wↄ. 48Na ki nyi kre, asau kre wafun we ki tini mbe paan tɛɛ tanyiɛ na, mbe tni mbe mbroe pre yoori, mbe chichiele pre le yira lam, mbe fuɛn pre wa. 49Pan kie pe waŋgra kla ble kre. Ki ble kre, nyjeeri bitumblↄ pre we sɛ sisam pefɛɛnlɛ pre yoori mbe yili chichie pefɛɛnlɛ pre nu, 50mbe sɛ fuɛn pre le kanyana kanhun kre nu. Bawa pie nyɛni, mbra pe ŋgaala chirɛ." 51A Yesu na kna mu pe wie mbo, "E kee nyjɛ krɛrɛ nↄↄ loo?" A pra kna mbo, "Ɛnhɛɛn!" 52A Yesu na kna mbo, "Kena Judae mbra nyinafɛɛnlɛ pre, pe ŋmba we paan pe twanfun nyjeeri ŋunumu kre nu kre, we kee chichiele shiin ta, lɛɛ na fↄŋgↄ mbe leele nyina." 53Ŋga Yesu na paara pe pan yomɛɛlɛ nu mu kↄ kre, wra yili wa, 54mna sɛ u chia, mna na leele nyina pe fni nyinyi nu, a kra pe pe kawako ni. A pra kna na peyɛ wie mbo, "Sena ŋmba yiri na jaŋga na kachindɛ kee nyjɛ sembremu ni imi hin? 55Kapinta pↄ wre ma ŋmbaa? Wre ma Maria pↄ kree? Wre chinlɛ ma Jemisi na Josɛf na Siimↄn na Judas kree? 56Wre jaala ma pee wa o pan mna kree? A sena u yiri na yire kee nyjɛ ni hin?" 57U kee na pe pe kawako ni mu tro, a kra tia pe krↄ na kun na u ni. A Yesu na kna mna yo pe pan mbo, "Nyiɛkpↄↄ kee nyanyofun kro pe u shↄnli lawee kro nu, fↄna u chia, na u sele leele nu." 58Ki tia Yesu nsra kawako kee nɛɛrɛ pe wa, ŋga pe nsra u shↄnli kre na.

will be added

X\