Matio 12

1Judae wuuble ka nu Yesu na u twanfɛɛnlɛ pre na sɛ tro fifiire see ka nu. Ŋga pra da wa kre, na klo twanfɛɛnlɛ pre ta, a pra yi sɛnyi yire yɛ mbru na kaa. 2Ŋga Farisiie pre na pe nya kre, a pra pan mu Yesu wie mbo, "Ŋgi ki tia mu twanfɛɛnlɛ o wuuble mbra taan mu na sro kuun wuuble ŋga hin?" 3A Yesu na kna mu Farisiie pre wie mbo, "E n da mu tↄↄnri mu loo kala ŋga Devid na u kotↄmblↄ na pe, nyjila ŋga klo na pe ta, 4a Devid na sɛ le Nyiɛkpↄↄ nyuŋgo, mna sɛ paanu ŋga praa teeri Nyiɛkpↄↄ yiɛ kre wru, a wre na u kotↄmblↄ pre na ka, la, na ki mbra taan na pie kre paanu kre sembremu ka. Ŋgi na, Sↄfue chiin praa kre paanu kre nyini kaa. 5Ndee e n Mbose mbra yire tↄↄnri mu nya na, Israel sↄfue mblɛ praa lee suminyuŋgo kre nu wuuble na pe tnumu tuni kre, praa wuuble yire klai ree? A nde pe nsra da mu yo wa pan na u wuuble kla. 6Kena e ti ni yo e pan mbe e loo, ndro waa wa mna mu wɛ sumi nyuŋgo kre na. 7Pe ki nyunↄ mu tɛɛ mbo, 'Ni n na yurↄ srawↄↄ chaa, la, fooro chiɛn, kre ni cha.' Na e na kee ŋga nↄↄ loo kre, kaa leele mblɛ pe n fↄↄn pe kre, yaa naa pe gbuun na pimi ni. 8Ŋgi na, Lewo Pↄ wre wi wuuble kre Tafun." 9Ŋga Yesu na yiri wa kre, a wra sɛ pe fninyuŋgo. 10Ŋga wra le wa kre, na blↄ waa wa wa a u kɛ ku. Kre nyjila kre nu na leele plɛɛ wa fninyuŋgo wa na chaa na pie Yesu nyu cha, mbe u ta mbe yii. Kra tia pra Yesu wie mbo, "Kena mbra kolo ŋga na mu yaŋu tra wuublee?" 11A Yesu na kna mu yo pe pan mbo, "E ŋmbi haa we mbↄↄ ta, na mbↄↄ wre to wee wuuble, mbe ufun wa sɛ u wↄ hin? 12Kena e ti ni e wie, mbↄↄ wɛ lewo na ra? Kena ni chaa mbe e loo na mbra o ŋga kolo mbe o chichie pe wuuble." 13A Yesu na kna mu yo kɛyaŋu wre pan mbo, "Mu kɛ kre tini!" A wra u kɛ kre tini, a kra nyu na shiin wo kre yi. 14A Farisiie pre na yili mna sɛ kolo cha, 15ŋga na pie tro mbe u taa gbo, a wra yili wa na shie, a lenɛɛrɛ na taa u kro, a wra mblɛ praa yaa kro tra. 16Mblɛ wra tra kre kro, wra yo pe pan na pia shia u mɛɛ kpali. 17Kre kee ŋga ki tia kee ŋga Yisaia na yo mu tɛɛ kre na pe yɛŋgɛ mbo, 18"E le, ni sumifun ŋmba ni wↄ wi kre, wre wi ŋmba ni kori, a ni yiɛ shↄ u na, mbe ni Ŋumu le u nu, mbe u leele mblɛ pe n pe Judae pre nyina kprakuↄn kee kre. 19A wa nyu kna ndro ni, a wa gble lete na mbe ndro u mana loo. 20We ti ŋmba u n yire kre yire haa ta, a ŋmba kanhun ki firi u nu kre, we ti ki nyi, we wi mbe sɛ su ŋga kpra we yili. 21A wre na waŋgra leele we na kaan." 22Bawa leele plɛ na pan na blↄ wa ni Yesu pan, na ŋumufↄↄn wa u nu. Ki tia u nsraa nyaa, a u nsra ja na paara. Yesu na blↄ wre tra, a wra ja na paara na nyaa kama. 23A Kra leele pre kro pe kawako, a pra kna na peyɛ wie mbo, "Devid nana wre ma ŋmbaa?" 24Ŋga Farisiie pre na kee kre Yesu pe kre loo kre, a praa yuu mbo, "Bɛɛlzebul, ŋumufuɛn ŋunu wre u Yesu ŋga jaŋga, kre ki tia a u ja na ŋumufuɛn woni leele nu kre." 25Titɛɛ kre nu Yesu na leele pre jawala nya, a wra kna mna yo pe pan mbo, "Na waŋgra ki yɛ yↄↄlɛ na wii na kiyɛ ni kre, waŋgra kre wa jaa yire. A chia ndee sele ŋga kie kiyɛ yↄↄlɛ mbra wii na kiyɛ o ni kre wa yire. 26Na Sutna kna na wii na uyɛ ni kre kena u uyɛ yↄ shiin, a u ŋunumu kre wa yire haa ta. 27Kena na Bɛɛlzebul, ŋumufuɛn ŋunu wre ni ni ŋumufuɛn woni leele nu kre, kena yire titi biile pre, jaŋga ŋgi ni pre ŋumufuɛn woni hin? E biile pre titi kuraa chin na kala e fni. 28Kena na Nyiɛkpↄↄ wre u ni ŋga ŋumu wre a ndaa ŋumufuɛn woni kre, kena e ja e chin na Nyiɛkpↄↄ ŋunumu kre mbra e na. 29Ndro wa jaa le faŋgafun nyuŋgo mbe u yirɛ koli, fↄna u klu mu faŋgafun wre pↄ tun, kre we jaa le u nyuŋgo mbe u yirɛ koli." 30"Ŋmba u n wa ni kro kre, mu chin na u ni pra. A ŋmba wa ya ni na mbe o leele ble titɛɛ kre, mu chin na wre u pe zaanri. 31Kena e ti ni yo e pan mbe e loo, sisam na jiɛnlɛ kee ŋga lewo we yo kpan, Nyiɛkpↄↄ we jaa ki ti mbe u kɛ, la, ŋmba we jiɛnlɛ kee yo mbe Kpra Ŋumu wre taan kre, Nyiɛkpↄↄ wa ki tii u kɛ fio. 32A ŋmba we paara mbe Lewo Pↄ wre taan kre, we jaa sisam tinkɛɛ ta, la, ŋmba we paara mbe Kpra Ŋumu wre taan kre wa sisam tinkɛɛ ta fio, hali waŋgra shiin wo kre nu." 33"Tiŋge chichie ki sɛŋgɛ chichie sɛni, a tiŋge sisaa na sɛŋgɛ sisaa sɛni. A tiŋge sɛŋgɛ na pe yiree na ki chini. 34Yire leesaala mblɛ, ŋga sisam wa e nu ŋga, mni ee pe mbe jaa paaraa chichie paara hin? Kala ŋga ki yili nyuu kre, mu chin na loloŋgo nu ki yili. 35Lewo kepele chichie ŋga kii wa u loloŋgo nu kre, kre ki tia wra chichie pini. A lewo kepele sisaa ŋga kii wa u loloŋgo nu kre, kre ki tia wra sisam pini. 36E ti ni yo e pan mbe e loo, Nyiɛkpↄↄ kpra kun ble kre, kee ŋga ki da mu yili lewo nyuu kpan, we ki nyu wↄ. 37A lewo nyu kayolo na pie yire mbe u kee li, mbaa u gbun pimi ni, ndee mbaa u ŋga tam." 38Bawa Mbose mbra nyinafɛɛnlɛ pre plɛ na Farisiie pre plɛ na yiri mna paara mbo, "Nyinafun, o chaa mbe mu kawako kee yire ka pe mbe o nya." 39A Yesu na kna mbo, "Yire aŋga leele sisam pefɛɛnlɛ mblɛ, e Nyiɛkpↄↄ je, na kawako kee chaa mbe nya, yaa ka nya na, fↄna Nyiɛkpↄↄ kee nyanyofun Jona kee kre chiin bↄkↄ. 40Imi Jona na ble taarɛ li, lafo na blee, mbro badaaŋga wre lɛɛ kre, pan chↄↄ Lewo Pↄ wre we ble taarɛ li wee nu tra lam, lafo na blee. 41Kena Nyiɛkpↄↄ kpra kun ble kre, yire na Nineve leele we yiri, mbe pe paara mbe e taan. Ŋgi na, ŋga Jona na kↄ mu ketaan kre kee yo Nineve leele pan kre, pra ki loo mna pe jawala chinɛ, mna laa pe sisam kro. La, ndro waa wa mna fuŋgaami, a u wɛ Jona na, a e n u shↄnli. 42Nyiɛkpↄↄ kpra kun ble kre, yire na Sheba ŋuchlↄ wre we yiri, mbe u paara mbe e taan. Ŋgi na, wra yiri haalee mna pan mu Sↄlↄmↄn kachindɛ kee kre loo. A e le, ndro waa wa mna fuŋgaami mu wɛ Sↄlↄmↄn na, a e n u shↄnli." 43"Na ŋumufↄↄn yili lewo nu kre, kie sɛ kuraa fimi lawee yire nu mbe sɛ lawee chaa tni. La, na ki n shia lawee ta kre, 44mbe ki kna mbe yo ki yɛ pan mbo, 'Mbe ndru mbe sɛ katoo ŋga nu ndaa yili kre nu,' kena na ki waa ndru mu pan mu tnihaa kre nya, na pe ki pↄ pleple a yaka n wa ki nu kre, 45kie ndru mbe sɛ ŋumufuɛn kↄↄnashin nyjɛ yi wɛ ki na cha, mbe yi paan tni ki tnihaa kre nu. Na ki pan ma kre, lewo ŋmba nu yie tni kre sisam we wɛ u fa na. Pan aŋga leele sisam pefɛɛnlɛ mblɛ pe n ni shↄnli ŋga we pe." 46Ŋga Yesu na yire wa na paara na leele pre nyina kre, u lo na u chinlɛ na pan u pan. A pra yire fimi na, na Yesu yeeri mbe paara na u ni. 47A leele pre praa wa wa kre wa na kna mu yo Yesu pan mbo, "Le, mu lo na mu chinlɛ wa mu yire fimi na na mu chaa." 48A Yesu na kna mna pe wie mbo, "Mblɛ lɛ ni lo na ni chinlɛ hin?" 49Bawa wra kna mna kɛ nyini u twanfɛɛnlɛ pre na, mna yo pe pan mbo, "E le, mblɛ lɛ ni chinlɛ na ni loolo. 50Kena ŋmba u ni Lɛ ŋmba uu wa nyjeeri kee ndru na ŋga u chaa pini kre, wre wi ni chunu, ni jaa na ni lo."

will be added

X\