Matio 11

1Ŋga Yesu na paara mu u twanfɛɛnlɛ kɛmbↄshiin pre nyina mu kↄ kre, wra yili wa, mna sɛ na kila chiɛ nyjɛ yiraa wa wa yire na, na ketaan kre yuu na leele nyina. 2Kre nyjila kre nu, na pe Jↄn, ndrajefun wre, yii mu le nyuŋgo, a wra tni nyuŋgo wa mna Yesu tnumu nyjɛ wra pan na tuni yire kee loo, mna yire wa mna u twanfɛɛnlɛ pre plɛ tun 3na pe sɛ Yesu wie na wre wi ŋmba u paan kre ree? Ndee pra lefuŋu sri hin? 4A Yesu na yo pe pan mbo, "E sɛ kee nyjɛ e nya na nyjɛ e loo yire kee yo Jↄn pan, 5na mblɛ pe fun nyiɛlɛ na kre nyaa, a finla na nyaari, a yira nyiɛrɛfɛɛnlɛ saanla, a kpoolo na ndru na paara, a gboolo na nyini, a shianfɛɛnlɛ ketaan kre ta na ndru. 6Kena ŋmba we ni shↄ mbe li mbe wa ni je kre we dwamu ta." 7Ŋga Jↄn bitumblↄ pre na ndru na shie kre, Yesu na wre Jↄn kee yo lenɛɛrɛ pre pra fni wa kre pan mbo, "Ŋga e na yili na shie Jↄn pan fimi lawee yire nu kre, yirɛ nyji sembremu e naa jawa na ee sɛ nya hin? Nyaa nyjɛ fuflɛ mↄŋↄi le haa e naa shie ree? 8Kena yirɛ nyji pan kuraa e na sɛ wa hin? Ndee lewo ŋmba u dodonyi chichiele le e naa shie mbe sɛ le ree? E le, e ti ni yo e pan, dodonyi chichiele lefɛɛnlɛ pre, ŋunu katoo pe nyi. 9Kena e ni nyina nyje pan e na sɛ wa, Nyiɛkpↄↄ kee nyanyofun wa lehaa e na sɛ ree? Kpra yi, e ti ni yo e pan, e na ŋmba wra wɛ Nyiɛkpↄↄ kee nyanyofun na nya. 10Ŋgi na, Jↄn kee pra nyunↄ mu tɛɛ fa mbo, 'Le, mbe ni bituŋu tun mbe u yiɛ klu mu pan, wre we kolo gbeele mu pan.' 11Kpra na, e ti ni yo e pan, leweele nu kro, wa n wa a Jↄn ndrajefun wre n wɛ u na. La, ŋmba uu fiɛn Nyiɛkpↄↄ ŋunumu kre nu kuraa kre, u wɛ u na. 12A mu yire Jↄn ndrajefun wre nyjila mu pan mu su ble nyjɛ nu o nyi ŋga nu kre, nyjeeri ŋunumu kre sɛɛ sheli. A mblɛ pe chaa mbe sɛ ki nu kre, gbeŋmbaa ni pe ki shie. 13Nyiɛkpↄↄ kee nyanyofɛɛnlɛ pre na Mbose mbra yire na klu mna nyjeeri ŋunumu kre kee tataara nya mu yo a Jↄn ndrajefun na chin mu pan. 14Kena na e chaa mbe ni kee ŋga shↄ mbe li kre, ni yuu e pan na Elaija ŋmba kee pra yo fa na we yiɛklu mbe pan Kristo wre na kre, wre wi Jↄn ndrajefun wre. 15Kena ŋmba uu wa ndie ni kre u loo. 16Kena leele mblɛ nyini ni kuraa mbe fuŋga leele mblɛ wru mbe gbun hin? Pan pe nyi na biile mblɛ pe pna jafa lawee nu lɛ, mbe plɛ kna mbra yuu plɛ pan mbo, 17'O binyi gbun e pan, a e je; e n yↄ. A o kum kpali, a e je; e n nyɛni.' 18Jↄn na pan, u nsraa sro lii, a u nsraa simi gboo. Kpatↄ na srɛ chiin na lɛ u sro, a nde leele naa yuu mbo, 'Ŋumufↄↄn wa u nu.' 19A mi Lewo Pↄ wre pan, na lii na simi yɛ gboo, a e na yuu na lilio na gbↄgbↄↄ wi mi, a ni nↄↄlↄ lɛ lampoo shↄfɛɛnlɛ na sisampefɛɛnlɛ. La, na Nyiɛkpↄↄ kachindɛ wa lewo nu kre, u kepele kie ki nyina." 20Chiɛ yɛ naa wa wa, bawa Yesu na u kawako kee yire pe nɛɛrɛ mu tro. La, bawa leele nsra pe jawala chinɛ. Ki tia Yesu na paara mna chiɛ yire taan mbo, 21"Yire Chorazin na Bɛtsaida leele, e atɛ! Ŋgi na, kawako kee tataara nyjɛ ni pe e nu ŋga, na yire ndaa pe Tiro na Sidon na kre, bawa leele wra fooro yonyi tↄ, mbra tↄↄnrↄ fa, mbe kra nyina na pe laa pe sisam kro. 22Kena e jawa e chin na waŋgra kla ble kre, Nyiɛkpↄↄ we Tiro na Sidon leele fooro chin mbe wɛ e na. 23A yire Kapɛnↄm leele, e eyɛ kpↄↄ, na jawa na ee sɛ Nyiɛkpↄↄ lawee, la, kanyana lawee ee sɛ. Ŋgi na, kawako kee nyjɛ ndaa pe a e na nya kre, na Sodom na ndaa yire kee nyjɛ pe kre, pe wra pe jawala chinɛ, a kaa chia kree wa aŋga tɛ. 24Kena e jawa e chin na Nyiɛkpↄↄ kpra kun ble kre, we Sodom leele fooro chin mbe wɛ e na." 25Ŋga Yesu na paara mu da wa kre, a wra kna mbo, "Ndoo, nyjeeri na tra Tafun, ni mu kaan mboo na mu mu kee kre ndra kachimblɛ na, mu ki wↄ mu bibɛɛlɛ nyina. 26Yɛŋgɛ yi ndoo, ŋga ki tna mu pan mu pini. 27Ni Lɛ wre yirɛ kro le ni kɛɛ, la, ndro n u Pↄ wre chin fↄna Lɛ wre chiin, a ndro n Lɛ wre chin, fↄna u Pↄ wre na mblɛ Pↄ wre chaa mbe u Lɛ wre wↄ mbe nyina pre." 28"Kena e pan ni pan, yire mblɛ pe tio tuuro a e fna kre, mbe e tuu mbe e wuu. 29E ni sumiɛ le e ki twan. Ŋgi na, ni nyjii, a ni ndra n sheli, kena na e pan mu ni sumi kre, ee wuu. 30Ni sumiɛ n sheli, ki tia e tuuro wa sna."

will be added

X\