Matio 10

1Yesu na u twanfɛɛnlɛ kɛmbↄshiin pre yeeri mu pan u jaara, mna pe ŋga jaŋga mbe pra ŋumufuɛn woni leele nu, mbra yambla kro trai. 2Twanfɛɛnlɛ kɛmbↄshiin pre mɛɛ na yi kre, ŋmba wra yiɛklu na wi Siimↄn, ŋmba praa yeeri Pita kre, na u chunu Andriu, na Jemisi, Zebedii pↄ wre, na u chunu Jↄn, 3na Filipo, na Batolomio, na Tↄmasi, na Matio ŋmba wraa lampoo shio kre, na Alfio pↄ Jemisi wre, na Tadio, 4na Siimↄn Kaanan wo wre, na Judas Iskariↄt, ŋmba wra kↄ mu Yesu wↄ mu ŋga kre. 5Leele kɛmbↄshiin mblɛ, pre Yesu na tun mna yo pe pan mbo, "Yaa shia tro leele mblɛ pe n pe Judae, ndee Samariae chia ka na. 6La, e sɛ Israel leele mblɛ pe fun na mbaala lɛ kre pan. 7E sɛ yo pe pan na 'Nyiɛkpↄↄ ŋunumu kre mbra mna'. 8E na yambla kro trai, e na gboolo nyini e na yira nyiɛrɛfɛɛnlɛ trai, e na ŋumufuɛn woni leele nu. Ni e ŋga jaŋga kre finfin, kena e na yaa pe na finfin. 9Yaa shia swa wru mbe le greree nu. 10A yaa shia bↄtↄe wru, a yaa shia dodonyi shiin shiin wru, ndee mbe kpawrɛ shiin wru, kanyie kuraa kre, yaa shia ka wru mbe yii. Ŋgi na leele mblɛ na ee sɛ ya kre we e ŋga nyjɛ yi e shian kro. 11A chia ŋga na ee le kpan, e Nyiɛkpↄↄ chinfun wa lawee haa cha e le, a na e waa ta mu le u pan kre, e tni wa e sɛ su ŋga ble ee yili wa. 12A katoo ŋga nu ee le kpan, e ki leele shaari kama. 13Kena na katoo kre leele waa e shↄ mu e kee loo kre, e ti mbe e dwamu kro ki nu. La, na pe n shia e shↄ kre, e ndru e sɛ na e dwamu kre ni. 14A na pe n shia e shↄ ndee mu e kee ŋga ni e sɛ loo chia ka na ndee katoo ka nu kre, e yili kre lawee kre nu, e e jeelee tra pↄ e wo wa mbe ki pe sisam dansiɛrɛ li. 15Kpra na ni yuu e pan, na Nyiɛkpↄↄ kpra kun ble kre waa da, Sodom na Gomora kanyana kuraa we prↄ pefɛɛnlɛ na." 16"E le, ni e tun mbe e sɛ na mbaala shie komboolo nu. Kena e kala chin na wↄↄlↄ lɛ, e eyɛ nyjii na katoo kotulo lɛ. 17E le, e na eyɛ le chichie, pie e yii mbe sɛ na e ni kala li hɛɛ nu, mbe e frↄ pe fninyinyi nu. 18Mi ndra na pie e yii mbe sɛ loplombo na ŋulo yiɛ, mbe e sɛ ni dansiɛrɛ li pre na waŋgrafɛɛnlɛ yiɛ. 19La, na pe e wↄ mu ŋga kre, yaa shia na kawa na ŋga ee yo ni. Ŋgi na, na nyjila kre da kre, Kpra Ŋumu wre we e ŋga, ŋga ee yo. 20Kre nyjila kre, na yire ma e paara na, la, na e Lɛ wre Ŋumu we paara e nu. 21E le, lo pↄ we lo pↄ wↄ mbe ŋga mbe pe u gbo, mbe lɛ u pↄ wↄ mbe ŋga mbe pe u gbo, mbe biile yiri mbe paara mbe pe sefɛɛnlɛ taanla, mbe pe wↄↄ ŋga mbe pe pe gbo. 22E le, mi ndra na, lenɛɛrɛ we e pra, la, ŋmba we jaa frↄ ta mbe sɛ su ni pan nyjila kre, wre ŋmaa mbe shↄ. 23La, na pe e pra chia ka na kre, e yili wa e sɛ fↄŋgↄ na. Kpra na ni yuu e pan na, yaa jaa tnumu tun Israel leele chiɛ kro na mbe kↄ mbe Lewo Pↄ wre chiin pan. 24Twanfun wa jaa wɛ u nyinafun na, a tnu wa jaa wɛ u tafun na. 25Ki nyu mu fna na twanfun we pe na u nyinafun wi, mbe tnu jaa pe na u tafun wi. Kena na pe katoo tafun wre yeeri ŋumufuɛn ŋunu kre, yira ŋgi kie ti mbe pia katoo kre tnifɛɛnlɛ yeeri ma na hin? Pre wo kuraa we wɛ." 26"Kena yaa na pe fiɛ. Ŋgi na, kre yira n wa a pe ki tↄ, mbe pia kↄ mbe ki nyaa, a ndra ndra kee ka n wa mbe kia kↄↄ yili fimi na. 27Kena kee nyjɛ ni ndra na yuu e pan kre, e na yi yuu fimi na. A nyjɛ ni juu na yuu e pan kre, e yire lete na e yi kpali. 28A yaa shia mblɛ pie jaa wejiŋge gbo, a pia jaa ŋumu gbo kre fiɛ, la, e na Nyiɛkpↄↄ ŋmba we jaa ŋumu na wejiŋge kro gbo, mbe sɛ na ki ni kanyana kanhun nu kre fiɛ. 29Hanyiɛlɛ bɛɛlɛ mblɛ kuraa pia prɛ shiin kↄbↄ kre, pe wa n wa mbe ku mbe e lɛ ŋmba uu wa nyjeeri kre wa chin ki nu. 30La, ni yuu e pan na, e nyjuro nyjɛ yii wa e ndrɛ na kuraa u yi nyu chin. 31Kena yaa shia fiɛ. Ŋgi na, e tnu kpↄↄ mu wɛ hanyiɛlɛ tataara na." 32"A ŋmba we yire leele yiɛ na mbe yo na u Tafun wi mi kre, mbe u mɛɛ sↄↄnri ni Lɛ ŋmba uu wa nyjeeri kre yiɛ na. 33A ŋmba we yo na u Tafun ma mi leele yiɛ na kre, mba ufun mɛɛ sↄↄnri ni Lɛ ŋmba uu wa nyjeeri kre yiɛ na." 34"Yaa shia jawa na wejinyiŋge ni ni pan tra mna, wejinyiŋge ni ma ni pan, la, kakrↄ ni ni pan. 35Ni pan mbe e yↄↄlɛ, 'mbe pↄ na u lɛ to peyɛ na, mbe bichable na u lo to peyɛ na, mbe nafun na nafun to peyɛ na. 36mbe lewo sele ndro kaari u loŋgo.' 37A ŋmba we na u lɛ ndee u lo kee chaa mbe wɛ ni na kre n fna ni wo. A ŋmba we na u biile kee chaa mbe wɛ ni na kre n fna ni wo. 38A ŋmba u n u kanyana kumu kaan wru mu taa ni kro kre n fna ni wo fio! 39A ŋmba ŋmaa kee kie u shian mbe tro kre, kie yili u kɛɛ. A ŋmba we yila ni na mbe u ŋmaa wa mbe fun kre we ki ta." 40"Ŋmba we e shↄ kre, u ni shↄ. A ŋmba we ni shↄ kre, u ŋmba u ni tun kre shↄ. 41A ŋmba we Nyiɛkpↄↄ kee nyanyofun chin mbe u le kre, ufun we Nyiɛkpↄↄ kee nyanyofun fↄtↄↄrↄ ta. A ŋmba we lewo ŋmba u fraka chin mbe u kre, ufun we lewo ŋmba u fraka fↄtↄↄrↄ ta. 42A ŋmba we fiɛn fiɛn mblɛ wa chin na ni twanfun wi, mbe u ŋga nyumu chirɛgbↄↄ nyini nunu chom kre, kpra na ni yuu e pan, ufun wa u fↄtↄↄrↄ la."

will be added

X\