Marko 9

1A Yesu na yo pe pan mbo, "Kpra na ni yuu e pan na plɛɛ wa mu yire mna, a pia kumu naa mbe le kuraa mbe hɛ su ŋga pie Nyiɛkpↄↄ ŋunumu kre nya na ki pan na jaŋga ni." 2Ble kↄↄnanu kↄkro kre, Yesu na sɛ na Pita, na Jemisi, na Jↄn chiin ni nyua gedeeŋge ka na. Bawa wra chinɛ pe yiɛ na, 3a u dodoŋgi naa chiɛnri mu fniŋge prupru u na, hali kre yonyi jefun n wa tra ŋga na mbe jaa yoŋgo je mbe ki fniŋge ma. 4Bawa Elaija na Mbose na peyɛ wↄ mu pe nyina a pre na Yesu naa paara. 5A Pita na kna mu yo Yesu pan, mbo "Rabi (O Nyinafun)," mbo, "ki nyu paa na oo wa mna. Kena ti mbe o sugbɛɛ taarɛ sin e pan, ŋu wo nunu, Mbose wo nunu, Elaija wo nunu." 6Pita nsra chin kee ŋga u yuu, yaka ndra na ma, na fiɛrɛ pe yii paa. 7Bawa tlo badaaŋga ka na pan mna pe tↄ, a mana ka na yili ki nu mbo, "Ŋmba wi ni pↄ ŋmba ni kori kre. Kena e ndie tɛɛ u pan." 8Titɛɛ kre nu ŋga pra kna kre, pe nsra ndro nya na, na pre na Yesu chiin bↄkↄ. 9Ŋga pra yiri nyua kre na na tri kre, Yesu na pe jaari na pia shia kee nyjɛ pe nya kre yo mbe ndro loo, fↄŋga lewo pↄ wre ku mu nyi tun. 10A pra tia kee kre na kro pe ndra, a pra kna na peyɛ wie, mbo, "Mbe ku mbe ndruu nyi na, kre nↄↄ yi ŋgi hin?" 11A pra Yesu wie mbo, "Ŋgi ki tia a Judae nyinafɛɛnlɛ pre na nyina na ki fna mbe Elaija klu mbe pan Kristo wre na hin?" 12A wra yo pe pan mbo, "Yɛŋgɛ! Na Elaija n klu mu pan mu yirɛ kro gbeele, wa jaa pan. A mni a pe ki nyunↄ na lewo pↄ wre we kala nya tataara, mbe pe u le na lewaa wi hin? 13La ni yuu e pan na, Elaija pan fuŋga ma, a nyjɛ praa chaa, pra yi taa u na, imi na pra ki nyunↄ mu tɛɛ kre." 14Ŋga pra pan mu da twanfɛɛnlɛ hamblɛ pre na kre, pra nya na leele tataara fɛ mu pe kun, pre na nyinafɛɛnlɛ pre na peyɛ wie kee bɛɛlɛ. 15Titɛɛ kre nu, ŋga leele pre na Yesu nya kre, kra pe fo, a pra fɛ mna sɛ u shaari. 16A Yesu na pe wie mbo, "Yira ŋgi kee yire na pre eyɛ wie hin?" 17A leele pre nunu na kna mbo, "Nyinafun, ŋumufↄↄn uu wa ni pↄ nu, a ki tia u pe kpo. Wre ni ni pan mu pan. 18Lawee ŋga nu kie yiri u nu kpan, mbe ki u chan tra, mbe ti u sheli, mbe u nyu na tafↄkↄ kuun, mbe wra u ŋgaala kaa. Kre ni pan mu yo mu twanfɛɛnlɛ pre pan na pe yira kre wↄ mbe yili u nu, a pe n ja mu ki wↄ." 19A Yesu na kna mu yo pe pan mbo, "Oo! Yire aŋga leele mblɛ nu shↄnlie n wa, ni tni e jaara mbe hɛ su nyjila ŋgi nu hin? E pan na u ni e ni ŋga." 20A pra pan na u ni mu u ŋga. Ŋga ŋumu kre na Yesu nya kre, a kra u viŋge, mna chan tra, na u gbila, a u nyu naa tafↄkↄ kuun. 21A Yesu na pↄ wre lɛ wie mbo, "Ŋga ki u pe ki mu ra?" A wra kna mbo, "U bimi ki yire na u ni. 22Ki u chaan kanhun na nyumu nu, mbe chaa u gbo. Kena na mu kolo ka chin mbe jaa pe o pan kre, o fooro le, mu ya o na." 23A Yesu na kna mu u wie mbo, "Mu yo, na mbe jaa? Yira kro we jaa nyu mbe ŋmba u shↄnli ŋga." 24Titɛɛ kre nu a pↄ wre lɛ na paara kpↄↄ mu yo Yesu pan, mbo, "Ni shↄnli. Jande, na ni n shↄnli kpↄↄ kuraa o, ya ni na." 25Ŋga Yesu na nya na lenɛɛrɛ feni na paan na yaa kre, a wra fuu ŋumufↄↄn kre na, mbo, "Ŋu ŋumu kpo, ni yo mu pan na, yili u nu mu sɛ, maa shia le u nu na." 26A ŋumufↄↄn kre na pↄ wre chan tra, a wraa gble leni, na uyɛ tini na jaŋga ni, a ŋumufↄↄn wre na chin mu yili u nu. A wra pe na gboo wi, a lenɛɛrɛ naa yuu mbo, "U ku!" 27A Yesu na u kɛ yii mna u yire, a wra yiri mu yire. 28Ŋga Yesu na yiri wa mu sɛ katoo kre, a u twanfɛɛnlɛ pre chiin na u wie mbo, "Ŋgi ki tia wre n ja mu ŋumufↄↄn kre wↄ pↄ wre nu hin?" 29A wra kna mna yo pe pan mbo, "Kre yira ŋga nyini rɛ, ma jaa yaka tɛɛ mbe ki wↄ, fↄŋga mu blefun na nyiɛtalaa ni." 30Ŋga pra yili wa kre, pra hɛ tro Galilii na, a u nsraa chaa mbe ndro u kee loo. 31Na kre nyjila kre u u twanfɛɛnlɛ pre nyina, na pie wre Lewo Pↄ wre wↄ mbe le leele kɛɛ, mbe pe u gbo, a na pe u gbo, ki ble taarɛ ble na mbe u nyi. 32Kee kre wra yo kre, pe nsra ki nↄↄ loo, a praa fiɛ na pie u wie ki nↄↄ. 33A pra sɛ le Kapɛnↄm na. Ŋga praa wa katoo kre, a Yesu na pe wie, mbo, "Yira ŋgi kee e yuu yuu kolo wa kre hin?" 34A pra pieri, yaka ma kra tia, na kolo wa kre, na peyɛ pe wie na pe ŋmbihaa wi pe lekpↄↄ hin? 35A Yesu na tni mna kɛmbↄshiin pre yeeri mu yo pe pan mbo, "Na wa chaa mbe kↄↄ pe yɛklo kre, u pe e kro kotↄŋↄ, mbe pe e kro sumifun." 36A Yesu na pↄ fiɛɛn wa wru mna yire pe lalaa mna u kↄ mu yii, mna kna mu yo pe pan, 37mbo, "Ŋmba we pↄ imi wa shↄ mi ndra na kre, kena u ni shↄ; a ŋmba we mi shↄ kre, mi ma u shↄ, la ŋmba u ni tun kre u shↄ." Yesu yɛkpↄↄmu kolo tↄ 38A Jↄn na kna mu yo mbo, "Nyinafun, o blↄ wa nya a u mu mɛɛ tɛɛ na ŋumufuɛn woni leele nu, a o u tↄ kolo na u n chaa o nu." 39A Yesu na kna mu yo mbo, "Yaa u tↄ kolo. Ndro wa n wa mbe jaa ni mɛɛ tɛɛ mbe faŋga tnumu tun lawee, mbe kↄ kre na mbe jaa ni kefↄↄn yo wa. 40Ŋmba u n na kee ka piin na o taanla kre, e chin na o kro u nyi. 41Ndro ŋmba we e ŋga nyumu chirɛgbↄↄ nyini mbe e gbↄ, na e pe Kristo wolo kre, kpra na ni yuu e pan na ufun wa ke fↄtↄↄrↄ la." 42"Ŋmba we ti mbe bibɛɛlɛ mblɛ pe ni shↄnli ŋga wa le sisam nu kre, na pra fifiire tre dnɛ badaŋga pↄ ufun lagboo mu u wa epo nu kuraa kaa ki prↄ. 43Kena na mu kɛ shie na mu ni sisam nu kre, ki kun mu wa. Ki nyu mu mu ŋga na mu sɛ na kɛkↄↄn ni ŋmaa lawee mu wɛ ŋga mu kɛnyi shiin ta mbaa sɛ kanyana lawee kre nu, kanhun ŋga kra fii kre nu, 44mna fiɛnlɛ pra ku, a kanhun kre wa fii. 45Na mu jele shie na mu ni sisam nu kre, ki kun mu wa! Ki nyu mu mu ŋga na mu sɛ na jeekↄↄn ni ŋmaa lawee, mu wɛ ŋga mu jeelee shiin ta mbe pe sɛ mu wa kanyana lawee kre nu. 47A na mu nyini shie na mu ni sisam nu kre, ki foli mu wa! Ki nyu mu mu ŋga na mu sɛ na nyini nunu ni Nyiɛkpↄↄ ŋunumu nu, mu wɛ ŋga mu shiin ta, mbe pe sɛ na mu ni kanyana lawee kre nu, 48'mna fiɛnlɛ pra ku, a kanhun kre wa fii.' 49Pie kanhun wo ndro kro na mbe u chiin nyu, imi na pe weŋge leni chiin nu mbe yi chiin tna kre. 50Weŋge nyu, a na weŋge ki tnamu wa mu fun, ŋgi ki ki taan na hin? Kena e ti mbe weŋge tni e nu, mbe e wejinyiŋge ta eyɛ nu."

will be added

X\