Marko 8

1Kre lalaa kre nu, ki ble ka, leele na pan mu nɛɛ Yesu lawee, a kra pan na pe n yaka ta mbe ka kre, Yesu na u twanfɛɛnlɛ pre yeeri mna yo pe pan, 2mbo, "Lenɛɛrɛ mblɛ kee pe fooro ni ni pan, yaka ma. Pe ja mu tni ni jaara mu taala ble taarɛ yi ŋga, a pe n yaka ni mbe ka. 3A na ni tia pe sɛ na klo ni pe katooe nu ma kre, pe yiɛ we wↄ pe na kolo, ŋga pe plɛ yiri haalee kre ndra na." 4A u twanfɛɛnlɛ pre na kna mu u wie, mbo, "A hena ndro we ja mbe paanu ta fimi lawee ŋga nu mbe leele mblɛ ŋga mbe pe ka mbe yↄↄ hin?" 5A Yesu na kna mu pe wie mbo, "Paanu mni yii wa e pan hin?" A pra yo, "Kↄↄnashin!" 6A wra tia leele pre na tni tra. A Yesu na paanu kↄↄnashin yire wru mna Nyiɛkpↄↄ ŋga mboo, mna yi pile mna le u twanfɛɛnlɛ pre kɛɛ na pe leele pre kɛ. 7Na mbroe chiɛri plɛ wa pe pan, a wra pe shↄ mna dwan mu le pe nu, mna yo na pe pe kɛ mbe ya leele pre pan. 8A leele pre na ka mna yↄↄ, a pra yi knumɛɛ nyjɛ yira kro kre koli kakɛɛ nyini kↄↄnashin. 9Na leele pre we pe kagbeŋ jijirɛ, a wra chin mna pe wa kolo. 10Titɛɛ kre nu, a Yesu na u twanfɛɛnlɛ pre na le krↄ nu mna sɛ Dalmanuta lawee yire nu. 11Bawa Farisiie pre na yili mna pan, mnaa Yesu wie kee bɛɛlɛ, mna u penle na u nyjeeri kawako kee ka pe mbe pe nya. 12A Yesu na ŋu fɛɛn, mna yo pe pan mbo, "Ŋgi ki tia a aŋga leele na kawako kee chaa mbe nya ŋga hin? Kpra na ni yuu e pan na aŋga leele mblɛ wa kawako kee ka nya na nyini ni." 13A wra pe ti wa mna ndru mna sɛ tni krↄ kre nu na, mna sɛ epo kro kokoo ka na. 14Ŋga praa shie kre, pra fɛɛ a pe nsra paanu wru, a yaka nsraa wa pe pan krↄ kre lam na paanu nunu chom ka bↄkↄ. 15A wra kna mna yo u twanfɛɛnlɛ pre pan mbo, "E dↄↄ ta. E eyɛ le chichie Farisiie pre yiisi kre, na Hɛrodi yiisi yire na." 16U twanfɛɛnlɛ pre na ki kna peyɛ ni na paanu n wa pe pan mbe pe ka. 17Ŋga Yesu na pe dↄↄ ta ma kre, a wra kna mna yo pe pan, mbo, "Mni a e na jawa na paanu n wa e pan ŋga hin? Kena e n nya tun ra? A e n kee kre nↄↄ loo tun ra? E kala nↄↄ loohaa wa mu sheli tɛ ra? 18Nyiɛlɛ wa e pan, a nde e n na nyaa, a ndiile wa e pan, a nde e n na ndru. E le, kena e na kee sↄↄnri ra? 19Ŋga ndaa paanu kunↄ knumu mna bilɛ kagbeŋ kunↄ ŋga kre, knumɛɛ kakɛɛ nyini mni e na koli hin?" A pra kna mna yo u pan mbo, "Kɛmbↄshiin!" 20"A ŋga ndaa kↄↄnashin knumu mna leele kagbeŋ jijirɛ ŋga kre, knumɛɛ kakɛɛ nyini mni e na koli hin?" A pra yo mbo, "Kↄↄnashin!" 21A wra kna mbo, "Kre e je, a e n nↄↄ loo ta tun ŋgaa?" 22Ŋga pra le Bɛtsaida na kre, pra pan mu u ŋga fuun wa mna u tali na u u kɛ taa u na. 23A Yesu na fuun wre kɛ yii mna yili na u ni chia kre lam, mbookrↄ, mna tɛɛnrɛ hlu mu wo u nyiɛlɛ yire na, mna kɛ ta u na mna kna mu u wie mbo, "Mu nyaa ra?" 24A wra yɛ yire mna yo Yesu pan mbo, "Ni leele nyaa a pra tro, a la ni pe nyaa na tinyi yi." 25A Yesu na ndru mu kɛ taa u nyiɛlɛ yire na na, a wraa le haan, to, mna saanla, mnaa nyaa chiriri. 26A wra tia wra sɛ u katoo, mna yo u pan na waa shia tro chia kre lam. 27Yesu na u twanfɛɛnlɛ pre na yiri wa mna sɛ Kaisaria Filipi kabɛɛlɛ yire na. Ŋga praa shie kre, a wra u twanfɛɛnlɛ pre wie, mbo, "Ndro ŋmbi sembremu leele ni jawa hin?" 28A pra kna mbo, "Pe yo na Jↄn ndrajefun wre wi ŋu, a plɛ yo Elaija wi ŋu, a plɛ na yuu na Nyiɛkpↄↄ kee nyanyofɛɛnlɛ pre wa wi ŋu." 29A Yesu na kna mna pe wie mbo, "A yire, ndro ŋmbi e ni jawa hin?" A Pita na kna mu yo u pan mbo, "Ŋu wi Kristo ŋmba Nyiɛkpↄↄ wↄ wre." 30A Yesu na pe jaari na pia shia u kee yo ndro pan. 31Ba Yesu na yire mna na pe nyina kanyana tataara nyjɛ yi fna mbe wre lewo pↄ wre nya, na imi na loplombo na sↄfue loplombo na pe nyinafɛɛnlɛ pre we laa u kro mbe pe u gbo, ki ble taarɛ ble na mbe u ndru mbe nyi. 32Ŋga wra kee kre yo mu wali ma kre, a Pita na u yeeri brɛmm mna sɛ na u ni mbɛɛ ka na, mna sɛ u yiɛ kee yo u pan. 33A Yesu na kna mu twanfɛɛnlɛ hamblɛ pre le komm mna kna mu Pita yiɛ kee yo u pan mbo, "Sutna, laa ni na. Mu n na Nyiɛkpↄↄ haa jawa, fↄna lewo haa." 34A Yesu na lenɛɛrɛ pre na u twanfɛɛnlɛ pre yeeri mu pan u jaara mna yo pe pan, mbo, "Na ndro chaa mbe taa ni kro kre, ufun u uyɛ fɛɛ, mbe u kanyana kumu kaan kre wru mbe taa ni kro. 35Ndro ŋmba we na kɛ toni u ŋmaa na kre, kie yili u kɛɛ, a ŋmba we u ŋmaa wa mbe fun mi na ketaan kre ndra na kre, we u yira ta. 36Na ndro waŋgra ŋga kro ta, mu u ŋmaa wa mu fun, tnu ŋgi kii wa ki nu hin? 37Ndee kena yira ŋgi ni lewo we jaa tɛɛ mbe u ŋmaa chinɛ na hin? 38A ndro ŋmba we nyifɛɛrɛ pe mi na ni kee kre na, aŋga leele leŋgeere klafɛɛnlɛ na sisampefɛɛnlɛ mblɛ nu kre, wrefun kee we pe lewo pↄ wre pan nyifɛɛrɛ ni na, ŋga ble wre Yesu na Nyiɛkpↄↄ bitumblↄ chechee pre we pan u Lɛ yɛnyiŋge kre nu kre."

will be added

X\