Marko 7

1Ki ble ka Farisiifɛɛnlɛ pre plɛ na pe nyinafɛɛnlɛ pre plɛ na yiri Jerusalɛm na mna pan mu fni Yesu lawee. 2Bawa pra nya na Yesu twanfɛɛnlɛ pre plɛ kɛnyi nyjɛ pe n je tɛɛ na lii. 3Kre nyjila kre na Farisiie pre, na pre Judae pre kro, na wa n kɛnyi je chiriri wa li na yi ni ma. Ŋgi na pe fa loplombo paala yire kro praa toni. 4Na pe yiri jafa na mu pan kuraa, na pe n peyɛ je, pia li, a paala yire tataara naa wa a pra yi piin. Pe gbↄyirɛ, na pe chↄɛ, na pe tↄↄnrↄ yirɛ nyjɛ ni pe sro piin kro, fↄŋga pie yi je mbe chiin yi tɛɛ mbe yaka pe. 5A kra tia Farisiie pre na nyinafɛɛnlɛ pre na Yesu wie, mbo, "Ŋgi ki tia a mu twanfɛɛnlɛ pre na li fa loplombo kee yire na, mu na kɛnyi nyjɛ pe n je tɛɛ na lii hin?" 6A Yesu na kna mu yo pe pan, mbo, "Yɛŋgɛ na Yisaia na yire yiɛnyumufɛɛnlɛ mblɛ kee nya mu yo kre, imi na pe ki nyunↄ u hlɛ kre nu mbo, 'Leele mblɛ, nyu ni pe ni mɛɛ yeeri, a nde pe n na ni chaa pe lolonyi nu. 7Finfin pe ni sumi, leele mbra nyjɛ pe le yire, yire pe leele nyina mu yo Nyiɛkpↄↄ mbra yi.' 8E Nyiɛkpↄↄ mbra yire ti, mu fawolo kee yire yi kɛshiin." 9Mna ndru mu yo pe pan mbo, "E ki chin, imi na ee Nyiɛkpↄↄ kolo kre wa mbe taa e fawolo kee yire na. 10Mbose na yo mbo, 'Mu lɛ na mu lo ŋga buuro.' 'Ŋmba we u lo ndee u lɛ kee sisaa yo kre, kum ki fna mbe e ti u ku.' 11A yire rɛ, e yo na, na ndro yo u lɛ ndee u lo pan na, 'Tnu yira ŋga ee na ta mbe yili ni pan kre, ki pe srayira.' 12Kena e na ti mbe ufun yaka pe mbe u lɛ ndee u lo ŋga na. 13A e na fawolo kee nyjɛ krɛɛrɛ teeri na Nyiɛkpↄↄ kee kre klai. Hali kee nyjɛ nyini tataara wa, a e na yi pini, na teeri e krofɛɛnlɛ pan." 14A wra lenɛɛrɛ pre kro yeeri, a pra pan mu fni u jaara, a wra kna mbo, "E kro e ndie tɛɛ e loo. E kee kre nↄↄ loo. 15Fimi yira ka n wa, ŋga kie le lewo nu mbe jaa u tↄ nɛɛrɛ ni fↄna nyjɛ yie yiri u lam mbe yili fimi na kre, yire yi ja na lewo toni nɛɛrɛ ni. 16Ŋmba uu wa ndie ni kre, ti ufun ndie tɛɛ mbe loo." 17Ŋga Yesu na yili lenɛɛrɛ pre nu mna sɛ katoo kre, a u twanfɛɛnlɛ pre na u wie yomini kre nↄↄ. 18A Yesu na kna mu pe wie mbo, "Pan yire kuraa kala nↄↄ loohaa sheli imi ra? Kena e n chin na fimi yira ŋga ki lee lewo lɛɛ kre na ja mbe u tↄ na nɛɛrɛ ni ra? 19Ŋgi na, na kra le u loloŋgo nu, lɛɛ ki lee, mbe sɛ yili mbe wo tra nu." Kena wra nyina na sro kro nyu. 20A wra kna mu yo mbo, "Ŋga ki yilii lewo lam mbe pan kre, kre ki u toni na nɛɛrɛ ni." 21Mbo, "Lewo loloŋgo nu jawala sisaa yilii na paan. Tɛtiɛrɛɛ kee, juuro kee, linkuuro kee, 22chachaara, blɛchaara, yira kro chaara, ndra shelee, dnumu lie, jajaara, nyibinyiɛ sisaa, kro yoo, yiɛkpↄↄmu, kepele fↄↄn yire 23sisam kee nyjɛ krɛɛrɛ, lewo loloŋgo nu yi kro yilii na paan, na nɛɛrɛ woni lewo na." 24A Yesu na yiri wa mna sɛ Tiro na Sidon lawee yire nu. Ŋga wra sɛ kre, wra sɛ le katoo ka nu. U nsraa chaa mbe ndro u lee loo a na wa jaa ndra. 25Na ŋumufↄↄn wa chlↄ wa pↄ bichable wa nu, titɛɛ kre nu a chlↄ wre na Yesu kee loo mna pan mu kosie kan u yiɛ, 26nde na Hela ndro wi chlↄ wre, a u sehaa kre, wra pe Siro-Foinika ndro. A wra Yesu tali na u ŋumufↄↄn wre wↄ mbe yili u pↄ wre nu. 27A Yesu na kna mu yo chlↄ wre pan mbo, "Ti mbe biile pre yↄↄ tun." Mbo, "Ki n fna mbe mu biile sro wru mbe wa nyukwanla pan." 28A chlↄ wre na kna mu yo Yesu pan, mbo, "Kii wa ma, ni Tafun, ande nyukwanla mblɛ pee wa tebru tapan kre kuraa kre, pe biile sro knumɛɛ nyjɛ yi mbru na woni tra kre yoori na kaa." 29A Yesu na kna, mbo, "Kee ŋga mu yo ŋga ndra na sɛ. Ŋumufↄↄn wre yili mu pↄ wre nu." 30Ŋga chlↄ wre na ndru mna sɛ le katoo kre, wra sɛ da na ŋumufↄↄn wre yili u pↄ wre nu mu sɛ, a uu wa mu sni dɛŋglɛ na. 31Yesu na yili Tiro tra nu, mna tro Sidon na mu sɛ Dakapoli tra nu, Galilii epo kre mbɛɛ na. 32Bawa leele plɛ na pan na geŋgefun dintaana wa ni Yesu pan, mna Yesu tali na u kɛ taa u na. 33A Yesu na dintaana wre bali mu yili lenɛɛrɛ pre nu chiɛri mna u kambɛɛlɛɛ le le u ndiile nu, mna tɛɛnrɛ hlu u kambɛlɛ na mu taa u ndile na, 34mna yiɛ wa mna le nyjeeri, mu ŋu mu tii lam mna kna mu yo mbo, "Hafata! Ki nyina na, Nyaa." 35Titɛɛ kre nu to, a blↄ wre ndiile na nyaala, a u ndile na saan, a wra ja mna paara kama. 36A Yesu na leele pre jaari na pia shia kee kre kpali mbe leele loo, a imi na wraa pe jaari, pan chↄↄ praa kee kre kpali na shie yiɛ. 37Kee kre na pe pe kawako ni mu tro, a praa yuu, mbo u yirɛ kro piin chichie, u tia a ndikambla na ndru, a kpoolo na paara.

will be added

X\