Marko 6

1Yesu na yili wa mna sɛ wre titi chia. Ŋga wraa shie kre u twanfɛɛnlɛ pre na taa u kro. 2Ŋga Judae pre wuuble na to, a wra sɛ pe fninyuŋgo wa na pe nyina Nyiɛkpↄↄ ketaan kre. Leele tataara mblɛ pra kee kre loo kre, kra pe pe kawako. A praa yuu mbo, "Sena ŋmba sɛ kee nyjɛ nyini ta ŋga hin?" Mbo, "Mni u pe mu kachindɛ ŋga sembremu twan ŋga hin?" Mbo, "Kawako kee nyjɛ u piin ŋga nↄↄ yi ŋgi hin?" 3Mbo, "Kapinta wre ma ŋmbaa? Maria pↄ wre, Jemisi na Josɛf na Juda na Siimↄn ee nyjↄ wre maa? Wre na u jaala kuraa oo wa mna?" Ŋga kra pan ma kre, leele pre kro krↄ na kun na u ni. 4A Yesu na kna mu yo pe pan, mbo, "Nyiɛkpↄↄ kee nyanyofun kro, pra u shↄnli u chia, na u sele, na u katoo nu." 5Kra tia Yesu nsra ja mna kekpↄↄ ka pe wa, fↄŋga yambla chiɛri mblɛ na wra kɛ taa mna pe tra. 6Kra Yesu pe kawako ni na u wolo pre nsra shↄnli. A wraa kila kabɛɛlɛ yire na, na pe nyina Nyiɛkpↄↄ ketaan kre. 7A Yesu na u twanfɛɛnlɛ kɛmbↄshiin pre yeeri mna pan u jaara, mna pe mbra shiin shiin mna pe tun ketaan kre yohaa. Wra pe ŋga jaŋga mbe pe tɛɛ mbra ŋumufuɛn woni leele nu. 8Yesu na yo pe pan na pia shia sɛ na yaka ni kolo kre na, fↄŋga kaan yii wo chiin. 9Mbo, pia shia sɛ na sro ndee, tↄkli ndee, mbe swa le greree nu, pe kpawrɛ le la pia shia dodonyi shiin shiin wru. 10A Yesu na ndru mu yo pe pan mbo, "Mna ee le katoo ka nu kpan, e tni wa e hɛ su nyjila ŋga nu ee yili kre chia kre na." 11Mbo, "A mblɛ lawee ee le a pe n shia e shↄ, ndee pe n shia e kee kre loo kre, na e waa yili wa na shie kre, mbe e e jeelee lam tra pↄ mbe wo wa, mbe ki pe sisam dansiɛrɛ li." 12A twanfɛɛnlɛ kɛmbↄshiin pre na sɛ ketaan kre yo na leele pe pe jawala chinɛ. 13A pra ŋumufuɛn wↄ leele nu tataara, mna yambla tataara fa na tlade simi ni mna pe tra. 14A Ŋunu Hɛrodi na Yesu kee loo. Na u mɛɛ kpali mu tro kro, a plɛ na yo mbo, "Jↄn, ŋmba wraa leele ndrɛ jee kre, u ndru mu nyi." Mbo, "Kre ki tia a u faŋga ta mu ja na kawako kee nyjɛ pini ma kre." 15A plɛ naa yuu mbo, "Elaija wi." A plɛ na yo mbo, "Ki pe na fawolo Nyiɛkpↄↄ kee nyanyofɛɛnlɛ pre wa wi." 16Ŋga Hɛrodi na ki loo kre, mbo "Jↄn, ŋmba ndra ndaa kↄ kre, u ndru mu nyi kre." 17Na Hɛrodi wre tia pe Jↄn yii mna sɛ le nyuŋgo, Hɛrodias, ŋmba wra pe u chunu Filipo chↄ, a wra u shↄ mu leŋge kre ndra na. 18Mbo nde Jↄn na yo u pan na ki n fna mbe u u chunu chↄ leŋge. 19Kee ŋga ndra na, Hɛrodias, Hɛrodi chↄ wre, u krↄ na kun na Jↄn ni, a wraa u chaa mbe gbo, a wa ki ja. 20Hɛrodi wre titi naa Jↄn fiɛ. Wra chin na Jↄn pe lewo ŋmba u fraka mu pe cheche, kra tia wra tↄ u na, u chↄ wre kɛɛ. Na Jↄn paara u pan kre, kraa u hau tataara, a nde u yiɛ naa shio u kayooro na. 21Nyiɛnyↄↄrↄ ble ka na to Hɛrodias pan, a u plↄ Hɛrodi naa u seble lii. Wra kɛ wa mna u lekpↄɛ na u loplombo na Galilii wa loplombo yeeri a pra pan mu fni mbe pe yiɛ shↄ. 22A u chↄ Hɛrodias pↄ bichable wa na pan mu yↄ a kra Hɛrodi na u loplombo mblɛ praa wa wa kre yiɛ shↄ. A ŋunu wre na kna mu yo bichable wre pan mbo, "Ni wie yira ŋga mu chaa kpan. Mbe mu ŋga ki yi." 23A wra da mu pↄ wre ŋga mbo, "Yira ŋga mu ni wie kpan, mbe mu ŋga ki yi, hali ni ŋunumu ŋga ni lii ŋga yↄↄ." 24A bichable wre na yili mna sɛ u lo wie mbo, "Maa, ni sɛ yira ŋgi wie hin?" A u lo na kna mbo, "Sɛ yo na Jↄn ndrajefun wre ndra mu chaa." 25Titɛɛ kre nu, a wra ndru nyaanyaa mna sɛ ŋunu wre lawee mna yo mbo, "Ni chaa mbe mu Jↄn ndrajefun wre ndra taa taa paawa na mbe ni ŋga fuŋgaami." 26Kra ŋunu wre yaa paa, a na u danyi yire na u fumblↄ pre praa wa u jaara kre ndra na, u nsraa chaa mbe kↄ yi na mbe je pↄ wre pan. 27Titɛɛ kre nu, a wra u ndrakↄŋu wↄ mu tun na u sɛ pan na Jↄn ndra ni. A wra sɛ u ndra kↄ nyuŋgo wa, 28mna taa taa paawa na mna pan mu bichable wre ŋga, a wra sɛ u lo ŋga ki yi. 29Ŋga Jↄn twanfɛɛnlɛ pre na ki loo na pe u gbo kre, a pra pan mna u gboo kre wru mna sɛ le. 30Yesu bitumblↄ mblɛ wra tun kre na yiri pe kolo kre na mna pan mna kee nyjɛ pra hɛ pe na nyjɛ pra hɛ nyina yire krɛɛrɛ yo u pan. 31A Yesu na kna mu yo pe pan, mbo, "E yili e sɛ lawee waa ka nu e hɛ wuu chiɛri." Na pan leele pre nɛɛ wa na shie na paan. Kra tia pe nsra kolo ta kuraa mbe yaka ka. 32A pra le krↄ nu mna sɛ lawee waa ka nu. 33Leele pre plɛ na pe nya pe sɛhaa, mna chin na pre lɛ, a pra wru tra, mu yili chiɛ yire kro na, mna fɛ mna sɛ yiɛ klu pe na. 34Ŋga Yesu na yili krↄ kre nu mna tii kre, wra leele nya tataara, a pe kee na pe fooro ni u pan, imi na pra pe na mbaala mblɛ pe n lefɛɛnlɛ ni lɛ kre. A Yesu na yire wa mna pe nyina Nyiɛkpↄↄ kee kre tataara. 35Ŋga yila na kↄ kre, Yesu twanfɛɛnlɛ pre na pan u jaara, mna pan mu yo u pan, mbo "Mna pe fimi lawee, a yila kↄ. 36Kena leele pre wa kolo mbe pe sɛ seele na kabɛɛlɛ nyjɛ yii wa mbɛɛlɛ na mna ŋga na mbe sɛ yɛyɛ chaa lↄↄ ka." 37A Yesu na kna mu yo pe pan mbo, "E pe ŋga yaka mbe pe ka ɛ." A twanfɛɛnlɛ pre na kna mu yo u pan mbo, "O sɛ mbe hɛ paanu lↄ tataara denari lafaa shiin wie mbe paan pe ŋga ra?" 38A Yesu na kna mu yo pe pan mbo, "Paanu mni ni e nyi hin? E sɛ yi le." A pra sɛ yi le mbo, "Yii paanu kunↄ na mbroe shiin." 39A Yesu na kna mu yo pe pan mbo, "E ti mbe leele pre ble ble peyɛ na, nyaa yire na." 40A leele pre na ble ble peyɛ na, lafaa lafaa, na fuloeshiin na kɛkɛ. 41A Yesu na paanu kunↄ yire na mbroe shiin pre bali mu yii kɛɛ, mna yiɛ wa nyjeeri mna dwan mu le yi nu. Wra paanu yire knumu mna u twanfɛɛnlɛ pre ŋga na pe leele pre kɛ kɛ imi na pe tni tni kre, mna ndru mu mbroe shiin pre pile mu pe ŋga kro. 42A leele pre kro na ka mna yↄↄ. 43Ŋga pra ka mu kↄ kre, a pra paanu yire na mbroe pre knumɛɛ nyjɛ yira kro kre koli kakɛɛ nyini kɛmbↄshiin. 44Leele mblɛ pra yi ka kre naa bilɛ kagbeŋ kunↄ. 45Titɛɛ kre nu a Yesu na tia u twanfɛɛnlɛ pre na le krↄ nu mbe yiɛ klu mbe hɛ epo kro chia ŋga pe yeeri Bɛtsaida kre na, mbe u leele pre wa kolo mbe chiin pan. 46Ŋga Yesu na leele pre wa kolo mu kↄ kre, a wra hɛ nyua ka na, mbe wre na Nyiɛkpↄↄ hɛ paara. 47Ŋga ble naa woo kre, na u twanfɛɛnlɛ pre da na krↄ kre ni epo kre lalaa, a Yesu chiin na wa tra fimi na. 48A wra nya na pe sɛhaa yiɛ shelii pe na, na fuflɛ kre yiri pe yiɛ na gbuun na paan. Na kie pe nyisee nyu na, a wra nyaari epo kre yiɛ na, mna pan pe jaara. Wraa chaa mbe tro pe mbɛɛ na. 49Ŋga u twanfɛɛnlɛ pre na u nya na u nyaari epo kre yiɛ na kre, praa jawa na gboo wi, mna gble fↄↄri mu le. 50A pe kro na kna mu u nya, a gbun na yↄ pe na. Titɛɛ kre nu to, a Yesu na paara na pe ni, mna yo pe pan mbo, "E eyɛ yii! Mi wi, yaa fiɛ!" 51A Yesu na le pe kro krↄ kre nu, a fuflɛ kre na yire. A kra pe pe kawako ni mu tro. 52Na pe n paanu yire leele tataara pre na ka mu pra kre nↄↄ loo, a pe kala nↄↄ loohaa naa wa mu sheli tɛ. 53Ŋga pra kun kre, pra sɛ to Genesarɛt tra nu, mna tii wa. 54Ŋga pra tii krↄ kre nu kre, titɛɛ kre nu, leele mblɛ praa wa wa kre na u chin na Yesu wi. 55A pra tafɛŋgɛ wru mna tro mbɛɛlɛ chiɛ nyjɛ yiraa wa wa yire kro na, mnaa paan na yambla mblɛ pee wa mu sni sni dɛŋglɛ na kro ni, mna pie loo na u nyi kpan. 56Lawee ŋga nu Yesu we sɛ kpan, see chiɛ na o, kakpↄɛ na o, seele nu o, praa yilii na yambla pre ni lete na mbra u tali na u ti mbe yambla pre kɛ taa u dodoŋgi nyu chiin na, a lenɛɛrɛ mblɛ pra ja mu kɛ taa u dodoŋgi kre na kpan na saanla.

will be added

X\