Marko 2

1Kie pe ble chiɛri yɛ kↄkro kre, Yesu na ndru mu sɛ Kapɛnↄm na. Ŋga wra le wa kre lenɛɛrɛ na u kee loo na u ndru mu pan katoo. 2Titɛɛ kre nu, katoo ŋga nu Yesu na nyi kre na nyi leele bribri, hali lawee nsraa wa jlonwee nyu na mbe ndro tro mbe le. A Yesu naa Nyiɛkpↄↄ kee kre yuu pe pan. 3Bawa leele jijirɛ plɛ na fna wa tio u dɛŋglɛ ni mnaa paan Yesu pan. 4Imi na leele pre na nɛɛ kre ndra na, pe nsraa kolo taa mbe da Yesu na. Kra tia pra nduu nyjeeri mna lahoo ŋga kra Yesu tↄ kre tuu mu vru, mna yaŋu wre tre na u dɛŋglɛ ni mu tɛɛ Yesu yiɛ tata. 5Imi na Yesu na leele pre shↄnlie nya na ki kpↄↄ kre, Yesu na kna mu yo yaŋu wre pan mbo, "Ni pↄ, mu sisam kro laa mu na." 6Ŋga Yesu na yo ma kre, na nyinafɛɛnlɛ pre plɛɛ wa mu tni wa. A pra kna na yuu pe jawala nu mbo, 7"Mni a blↄ ŋmba na paara ma ŋga hin? U jiɛnlɛ kee yuu. Ŋmbi we jaa sisam tii kɛ hin? Na Nyiɛkpↄↄ chiin bↄkↄ." 8Yesu na pe jawala nya, mna kna mu yo pe pan mbo, "Mni a kala ŋga ni yo ŋga na e hau ma hin?" 9Mbo, "Kee shiin nyjɛ ŋgi haa ki sheli hin? Ŋga mu yo fna pa na mu sisam kro laa mu na, ndee yiri! Mu mu dɛŋglɛ wru mu nyaari. Ŋgi ki shieli hin? 10La, imi kie pe mbe e chin na mi, Lewo Pↄ wre wa na jaŋga ni tra mna, mbe jaa sisam ti mbe kɛ kre ndra na yi." A wra kna mu yo fna wre pan mbo, 11"Ni yo mu pan na, yiri, mu mu dɛŋglɛ wru mu sɛ mu katoo." 12Titɛɛ kre nu, a blↄ wre na yiri mu u dɛŋglɛ wru leele pre yiɛ na wa mna sɛ. Kra leele pre kro pe kawako ni, a praa Nyiɛkpↄↄ kaan mɛɛ, mbo, "O n da mu kala ŋga ŋmbrↄ nya tun!" 13A Yesu na yili wa mu sɛ epo kre nyu na wa na, a lenɛɛrɛ na fɛ mu u kun, a wraa pe nyina Nyiɛkpↄↄ kee kre. 14Ŋga Yesu naa nyaari na tro epo kre mbɛɛ na wa kre, wra Alfio pↄ, Levi wre, nya na uu wa mu tni u tↄↄ swa nyuŋgo. A Yesu na kna mu yo u pan mbo, "Yiri mu taa ni kro." A Levi na yiri mu taa Yesu kro. 15Ki ble kre blee, Levi na sro pe kama, mna u wolo tↄↄ shↄfɛɛnlɛ pre plɛ, na sisampefɛɛnlɛ mblɛ praa wa wa kre plɛ yeeri, a pe kro na sɛ chaa mu li na Yesu na u twanfɛɛnlɛ pre ni kro. Kre nyjila kre na tↄↄ shↄfɛɛnlɛ na sisampefɛɛnlɛ pre plɛɛ wa tataara mu Yesu kro tↄ. 16Ŋga Farisiie nyinafɛɛnlɛ pre plɛ na Yesu nya na wre na sisam pefɛɛnlɛ na tↄↄ shↄfɛɛnlɛ pre lii kre, pra u twanfɛɛnlɛ pre wie na, "Yira ŋgi ki tia a Yesu na leele mblɛ na lii hin?" 17Ŋga pra wie ma kre, Yesu na ki loo, mna kna mu yo pe pan mbo, "Lewo ŋmba u yaa kre, wre u fna mbe sɛ yambla trafun pan. Nde ŋmba u n na yaa kre, wre n fna mbe sɛ trafun pan." Mbo, "Ni n pan mbe paan yo leele mblɛ pe fraka pan na pe pe jawala chinɛ, la, sisampefɛɛnlɛ ndra na ni yila mu pan." 18Ki ble ka Jↄn twanfɛɛnlɛ pre na Farisiie pre naa ble funi, imi praa ki piin wa kre, a leele plɛ na pan mu Yesu wie mbo, "Ŋgi ki tia a Jↄn twanfɛɛnlɛ pre na Farisiie twanfɛɛnlɛ pre na ble funi, a wre Yesu twanfɛɛnlɛ pre na ble fun hin?" 19A Yesu na kna mu yo pe pan, mbo, "Nyjila ŋga nu bijↄ plↄ wree wa kre, ki fna mbe nↄↄlↄ pre ble fun ra? Nyjila ŋga nu bijↄ plↄ wre na u nↄↄlↄ wa kre, pe yiɛ wa je mbe pe ble fun. 20La, nyjila ka we pan mbe pe bijↄ plↄ wre wru pe mbɛɛ na mbe sɛ na u ni, kre nyjila kre pie u cha mbe la, mbe fooro pe yii, mbe pe ble fun mbe u sↄↄnri. 21Lewo wa n wa mbe yoŋgo fↄŋgↄ ŋga pe n je tun tɛɛ mbe yoŋgo lɛɛ ŋga ki wali tↄ. Na kre ma, na pe yoŋgo kre je, fↄŋgↄ kre we suuru mbe lɛɛ kre tini mbe wali kpↄↄ mbe wɛ jle wo kre na. 22A lewo wa n wa mbe sifiŋge fↄŋgↄ le yurↄ hlɛ gbolo lɛɛ nu. Na kre ma, sifiŋge kre we kan mbe gbolo kre wali, mbe sifiŋge kre wo. Ki fna mbe mu sifiŋge fↄŋgↄ le gbolo fↄŋgↄ nu." (Fawolo pre naa sifiŋge leni yurↄ hlɛ gbolo nu.) 23Wuuble ka nu Yesu na u twanfɛɛnlɛ pre na sɛ tro fifiire yɛ nyini see. Ŋga praa tro see kre nu kre, Yesu twanfɛɛnlɛ pre naa yi sɛnyi yire yɛ mbru na kaa. 24Ŋga pra piin ma kre, a Farisiie pre na Yesu wie mbo, "Yira ŋgi ki tia a mu twanfɛɛnlɛ mblɛ, kala ŋga ki n nyu mbe pe pe wuuble, a pra ki pini hin?" 25A Yesu na kna mu yo pe pan mbo, "E n da mu tↄↄnri mu loo kala ŋga Devid na pe, nyjila ŋga kra sheli mu u ŋga, a klo na u ta wre na u kotↄmblↄ ni. 26Imi na wra sɛ le Nyiɛkpↄↄ nyuŋgo, na kre nyjila kre na Abiata wi sↄfu lopom. A wra sɛ paanu, ŋga praa teeri Nyiɛkpↄↄ yiɛ, wru mu ka, mna u wolo pre ŋga ka." (A ki n fna mbe lewaa ki ka, fↄŋa sↄfue pre chiin.) 27Mbo, "Ni chaa mbe e chin na lewo na pra yila mna wuuble kre le. wuuble kre na ma Nyiɛkpↄↄ na yila mu lewo gbeele. 28Kre ndra na, mi Lewo Pↄ wre, nii wa na jaŋga ni wuuble kre na."

will be added

X\