Marko 16

1Ŋga wuuble kre na tro kre, Maria Magdalene, na Jemisi lo Maria, na Salome, na sɛ tuwe ndiom taan ka lↄ mbe sɛ Yesu fa na ki ni. 2Ŋga nyiŋge naa paan mbe se mbe pe kranu nↄↄ hle kre, bnimi pupu, a pra yiri mna sɛ faŋga kre lawee, na yila yili. 3A pra kna mu na peyɛ wie mbo, "A ŋmbi we dnɛ kre laa faŋga kre nyu na o pan hin?" 4Ŋga pra yiɛ yire mbe le kre, pra nya na pe dnɛ kre laa faŋga kre nyu na, dnɛ kre na kpↄↄ. 5Ŋga pra le faŋga ndoo wa kre, pra nya na nyanyjɛble waa wa mu tni pe kalie kɛhaa, mu dodoŋgi titnↄŋↄ fiŋge le. Ŋga pra u nya ma kre, fiɛrɛ na pe yii. 6A wra kna mu yo pe pan mbo, "Yaa fiɛ! Yesu (Nazrɛt wo) ŋmba pra kan kanyana kumu kaan kre na wre e chaa ra? U nyi! U n wa mna! E le! Lawee ŋga nu pra u sniŋge yi kre. 7E sɛ yo Pita na twanfɛɛnlɛ hamblɛ pre pan, na u yiɛ klu na shie Galilii na. Bawa ee u nya, imi na wra yo e pan kre." 8Titɛɛ kre nu, a pra krↄ kna mna fɛ mu yili faŋga ndoo wa mu sɛ. Na seeree na fiɛrɛ wo pe kro na. Pe nsra kala ka yo ndro pan, ŋgi na, na pe fiɛ. 9Ŋga Yesu na yiri ble ŋga ki kranu yiɛklu kre bnimi kre, wra klu mu uyɛ wↄ mu Maria Magdalene ŋmba nu wra ŋumufuɛn kↄↄnashin wↄ kre nyina. 10A wra sɛ ki yo mblɛ pre na Yesu naa nyaari fa kre pan, na pee wa na fooro lii na nyɛni. 11Ŋga pre na loo na u u nya a uu wa na le kre, pe nsra ki shↄnli. 12Kre kↄkro kre, wra uyɛ wↄ mna pe shiin plɛ nyina kepele fↄŋgↄ ka na, na pe nyaari na shie kable ka na. 13A pra ndru mna pan mna ki yo hamblɛ pre pan, a pe nsra pe shↄnli na. 14Kre kↄkro na, na u twanfɛɛnlɛ kɛmbↄnunu pree wa mu tni na lii, a wra uyɛ wↄ mu pe nyina, mna pe yiɛ kee yo pe pan, shↄↄ ŋga pe nsra shↄnli, na pe ndikana sisaa, na ŋga pe nsra mblɛ pra u nya mu pan mu yo kre shↄnli kre ndra na. 15A wra yo pe pan, mbo, "E sɛ waŋgra kro nu. E sɛ ketaan kre yo e leele kro nyina. 16Ŋmba we shↄↄli, mbe e u ndra je kre, ŋmaa ta, a ŋmba u n shↄnli kre, pie u gbun pimi ni. 17Kee nyjɛ mɛɛ yie taa ni shↄnlifɛɛnlɛ pre na yi kre, ni mɛɛ ni, pie ŋumufuɛn wↄ leele nu, pie paara kayooro fↄnyi nu, 18pie wↄↄlↄ yii na kɛ ni, a na pe tuwe sisaa gbↄ kuraa kre, kia jaa pe pe yaka, pie kɛ taa yambla na mbe pe faŋga ta." 19Ŋga o Tafun Yesu na paara pe pan mu kↄ kre, a Nyiɛkpↄↄ na u wru mu sɛ nyjeeri, a wra sɛ tni Nyiɛkpↄↄ kalie. 20A u twanfɛɛnlɛ pre na yiri wa mna sɛ ketaan kre yo lawee kro nu, a o Tafun wre jaŋga na tnumu tun pe nu, a pra yire kawako kee yire na mna faŋga le kee kre nu.

will be added

X\