Marko 15

1Ŋga nyiŋge naa sii bnimi pupu to, a sↄfue loplombo pre na nyinafɛɛnlɛ pre, na loplombo pre na mblɛ pra fni wa kre kro na sɛ bↄↄnri, mna Yesu pↄ mna sɛ u le Ŋunu Pilato kɛɛ. 2Bawa Pilato na u wie mbo, "Ŋu wi Judae ŋunu wre kree?" A Yesu na kna mbo, "Ŋu mu ki yo." 3A sↄfue loplombo pre na kee tataara yo na Yesu yi pe. 4A Pilato na ndru mu u wie mbo, "Kena ma ka nyu kun ra? Kee tataara nyjɛ pe yuu na mu taanla ŋga le ma rɛ." 5Yesu nsra paara na, a kra Pilato wre pe kawako ni. 6Kena na pe pe ble kpↄↄ kre lii kre, u ndro nunu woni nyuŋgo mbe wa, ŋmba pe chaa. 7A kre nyjila kre, na linkufɛɛnlɛ plɛ kanyaa le mu abani taan, mna ndro gbo, a pra pe yii mna sɛ le nyuŋgo, na nunu waa wa pe nu, a praa u yeeri Barabas. 8A leele tataara pre na flo mu da na yuu Pilato pan, na u wa wↄ nyuŋgo mbe pe ŋga imi na u pini na pe kaan kre. 9A Pilato na pe wie mbo, "E chaa mbe ni Judae ŋunu wre wↄ mbe e ŋga ree?" 10Wra chin na prara na sↄfue loplombo pre na kanhun le leele pre nu na pe ti mbe u Barabas wↄ mbe pe ŋga. 12A Pilato na ndru mu kna mu pe wie, mbo, "Kena mni e chaa mbe ni ŋmba e yeeri Judae ŋunu wre pe hin?" 13A lenɛɛrɛ pre na kna mbo, "U kan kanyana kumu kaan kre na!" 14A Pilato na kna mbo, "Mni hin? Sisam ŋgi u pe hin?" A pra ndru mu gble le kpↄↄ mbo, "U kan kanyana kumu kaan kre na!" 15Ŋga Pilato naa chaa mbe lenɛɛrɛ pre gbun nyiŋge kre ndra na, a wra Barabas ti mna pe ŋga, mna tia pra Yesu frↄ na fwa ni, a wra pe ŋga kolo na pe sɛ u kan kanyana kumu kaan kre na. 16A sojae pre na sɛ na u ni ŋunu wre katoo, a pra sojae pre kro yeeri a pra pan mu fni. 17A pra u le dodoŋgi nyiɛ ka, mna wuuro juulee tin mu u juule. 18A praa u shaari na yuu mbo, "Judae Ŋunu, mu ka pe!" 19A pra braŋgↄ fwa tɛɛ mu u ndra lalaa fↄↄri, mnaa tɛɛnrɛ woni u na, na kosie kani u yiɛ, na sumi pe u sumi. 20Ŋga pra pna na u ni mu kↄ kre, a pra dodoŋgi nyiɛ kre tini mu wↄ u na, mna u le wre titi dodoŋgi kre. A pra sɛ na u ni mbo pe shie mbe sɛ u kan kanyana kumu kaan kre na. 21Ŋga praa shie kre, pra Kirene ndro, Siimↄn ŋmba biile lɛ Alɛksandria na Rufo kre fni na wre yiri see na paan, a pra u yii mna u tio kanyana kumu kaan kre. 22A pra sɛ da na Yesu ni lawee ka nu praa ki yeeri Golgota ki nyina na lewo ndra kajle lawee. 23Bawa pra u ŋga simi ka pra tuwe susrom ka chaa ki nu, a u nsra ki gbↄ. 24A pra u kan kanyana kumu kaan kre na, mna u dodonyi yire wru mu yↄↄlɛ mu peyɛ ŋga, hali mna yi kɛɛn tɛɛ, mbe chin kokoo pie ta ta. 25Ŋga pra u kan kanyana kumu kaan kre na kre, na kie pe bnimi nyjila kↄↄnajirɛ. 26A pra u pimi kee nyunↄ u ndra nyjeeri mbo, "JUDAE ŊUNU". 27Na pe kokↄↄnlↄ shiin plɛ kan mu ya u na, nunu naa wa u kalie, a nunu naa wa u kamɛŋɛ. 28(Bawa Nyiɛkpↄↄ kee ŋga pra nyunↄ kre, na pie u chaa sisampefɛɛnlɛ nu kre, na pan ma.) 29Leele mblɛ praa tro na u nyaa kre naa u tɛɛlɛ na tro, na pe ndrɛ nyaara, mbo, "Ao! Ŋu ŋmba mu suminyuŋgo juari mbe wo, mbe ndru mbe ki sin ble taarɛ kre wi ŋmbaa? 30Muyɛ shↄ mu yili kanyana kumu kaan ŋga na mu tii tra." 31Pan chↄↄ, sↄfue loplombo pre na nyinafɛɛnlɛ pre naa pna na u ni na yuu mbo, "Wraa plɛ shio, a wa jaa uyɛ shↄ. 32Fuŋgaami ŋga e ti mbe Kristo wre, Israel Ŋunu wre, mbe u tii kanyana kumu kaan kre na mbe o nya, mbe shↄↄli." A mblɛ pra kan mu ya u na wa kre naa u tɛɛlɛ ka na. 33Ŋga nyjila kɛmbↄshiin na gbun kre, ndram na wↄ lawee kro nu, mna sɛ su nyjila taarɛ lafo na. 34Ki nyjila taarɛ wo kre nu Yesu na mana kpↄↄ tɛɛ mu fuu, mbo, "Eli! Eli! Lama sabaktani?" Ki nyina na "Ni Nyiɛkpↄↄ! Ni Nyiɛkpↄↄ! Mni a mu laa ni kro hin?" 35Ŋga leele mblɛ praa wa wa kre plɛ na kee kre loo kre, a pra kna mbo, "E loo, u Elaija yeeri!" 36A pe nunu na fɛ mu sɛ zeere le simi ŋga ki taan nyanya ka nu, mu ki su braŋgↄ kaan nyu na, mna u ŋga mbe u gbↄ, mbo, "E ti mbe o na le, na Elaija we paan u tire tra rɛ." 37Ŋga Yesu na ndru mu gble kpↄↄ kre le na ma kre to, mna fii. 38Kre nyjila kre nu yoŋgo ŋga pe pↄ mu suminyuŋgo kre yↄ kre na peeri shiin, mu yire nyjeeri mu pan mu su tapan. 39Ŋga sojae lopom ŋmba wraa wa mu yire u yɛsimi na u le kre na nya na Yesu fii kre, a wra kna mbo, "Kpra na, ndro ŋmba, Nyiɛkpↄↄ Pↄ wre wi yɛŋgɛ." 40Na chiɛlɛ plɛɛ wa mu yire haalee na ka le, na Maria Magdalene, na Jemisi ble, na Joses lo Maria, na Salome, na pee wa mu chaa pe nu. 41Pre chiɛlɛ mblɛ, nyjila ŋga ni Yesu naa wa Galilii na kre, pe kro na taa u kro mna u sumi, a chiɛlɛ mblɛ pra taa u kro mu pan Jerusalɛm na wa kre plɛ na chaa. 42Ŋga kra da yilakↄŋgↄ nyu na kre, na kre ble kre yi peyɛ kna ble, mbe nyiŋge se Judae wuuble. Kre ndra na, 43Josɛf, ŋmba u yiri Aramatia na, ŋmba wra chaa loplombo kalalifɛɛnlɛ pre nu, a pra u shↄnli kama, a wraa Nyiɛkpↄↄ ŋunumu kre sri na chↄↄ, na gbun titirem wru mna sɛ Pilato yiɛ mna sɛ u tali Yesu gboo wre. 44Pilato ndra nsra saan u na na Yesu ku tun. Ki tia wra u sojae lopom wre yeeri mna u wie na u ku rɛ? 45Ŋga sojae lopom wre na yo u pan na u ku kre, a wra tia Josɛf na sɛ u gboo wre wru. 46A Josɛf na sɛ mbↄfiŋge lↄ, mna sɛ Yesu laa kaan kre na, mna mbↄfiŋge kre tɛɛ mu u pↄ, mna sɛ u le dnɛ wee ŋga pe tuu mu tɛɛ ka nu, mna dnɛ gbila mu wee kre nyu tↄ. 47A Maria Magdalene na Maria, Joses lo, na Yesu lehaa kre nya.

will be added

X\