Marko 14

1Na ki kro ble shiin mbe pe Klɛntro ble kpↄↄ kre, na yiisi paanu fun ble yire li. A sↄfue loplombo pre na pe nyinafɛɛnlɛ pre naa u chaa mbe yii kachindɛ kolo ka na, mbe u gbo. 2A pra yo mbo "Waa u yii ble kpↄↄ titi kre nu, na kre ma, lenɛɛrɛ we tun na o ni." 3Ŋga praa wa Bɛtani na, Siimↄn yiranyiɛrɛfun wre katoo na lii kre, bawa chlↄ wa na pan na alabasta gbolo ŋga nu tlade ndiom taan, ŋga ki yili nard tiŋge nu, a ki ndrↄ sheli ni, mna ki nyu ja, mna tlade kre kna mu wo Yesu ndra na. 4Ki nsra tna leele mblɛ praa wa wa kre plɛ pan, a praa yuu mbo, "Ŋgi ki tia u tlade ŋga kla finfin ŋga hin? 5We na jaa ki prɛ mbra shↄ mbe ki wɛ denari lafɛɛ taarɛ na, mbra shianfɛɛnlɛ ŋga." A praa taanri u na. 6A Yesu na kna mbo, "E u ti! Ŋgi ki tia a e na u hau ma hin? U kee chichie pe mu ni ŋga. 7Yire na shianfɛɛnlɛ pre lɛ mna nyjila kro nu, ble ŋga na e chaa kpan, ee jaa pe pe chichie. A mi rɛ, nyjila kro nu ma ee mi ta e jaara. 8Ŋga we ja u pe kre, u klu mu tlade kna mu wo ni wejiŋge na, mbe pe chiin ni le wee. 9Kpra na ni yuu e pan na, waŋgra lawee ŋga nu pie ketaan ŋga yo kpan, kee ŋga chlↄ ŋmba pe ŋga, pie ki yo wa mbe tɛɛ mbe u sↄↄnri." 10Bawa Judas Iskariↄt, kɛmbↄshiin pre nunu, na yiri mna sɛ sↄfue loplombo pre lawee, mbo we Yesu wↄ mbe pe ŋga. 11Ŋga pra ki loo kre, kra pe pe yɛshↄↄrↄ, a pra kna mna yo u pan na pie u ŋga swa. A wraa kolo chaa imi na we u wↄ mbe pe ŋga. 12Ŋga ble nyjɛ nu pe nsraa yiisi paanu kaa kre na da, ki ble ŋga kra yiɛklu a praa Klɛntro sra mbↄↄ wre kuu kre, u twanfɛɛnlɛ pre na u wie, mbo "Hena mu chaa mbe o sɛ gbeele mu pan mbe hɛ Klɛntro ble kre li hin?" 13A wra u twanfɛɛnlɛ pre shiin wↄ mu tun, mna yo pe pan mbo, "E sɛ chia kre lam. Na e shie, ee ndro wa fni na u chↄkoo tio na nyumu ni. E taa u kro. 14Katoo ŋga nu we le kre, e le wa, e yo katoofun wre pan na, Nyinafun wre yo na, 'Sena fumblↄ nyuŋgo ŋga nu wre na u twanfɛɛnlɛ pre we Klɛntro ble kre li kre nyi hin?' 15Wre titi we e nyina nyuŋgo badaaŋga ka nyjeeri, ŋga lam pe san, mu ki lam gbeele kama, mbe e bawa gbeele o pan.' 16A u twanfɛɛnlɛ shiin pre na to kolo mna sɛ. Ŋga pra le chia kre na kre, pra nya imi na Yesu na yo pe pan kre, a pra Klɛntro lawee kre gbeele. 17Ŋga yila na kↄ kre, wre na kɛmbↄshiin pre na le chia kre na. 18Ŋga pra tni na lii kre, a Yesu na yo pe pan mbo, "Kpra na ni yuu e pan na, yire mblɛ mi na yire lii ŋga wa we ni wↄ mbe ŋga." 19Bawa fooro na pe yii, a praa Yesu wie nununu, mbo, "Mi wi ree?" 20A wra kna mna yo pe pan mbo, "Yire kɛmbↄshiin mblɛ wa wi, ŋmba mi na wre kɛ leni kotolo nunu nu na lii. 21Lewo Pↄ wre shie imi na pe ki nyunↄ kre, la, ndro ŋmba we Lewo Pↄ wre wↄ mbe ŋga kre, u atɛ! Na pe nsra ufun wre se, ka ki nyu mu ufun ŋga." 22Ŋga praa lii kre, Yesu na paanuu wru mna ki dwan mna ki pile mna pe ŋga, mna yo pe pan mbo, "E shↄ. Ŋga yi ni wejiŋge." 23A wra gbↄyira wru mna Nyiɛkpↄↄ ŋga mboo, mna pe ŋga, a pe kro na gbↄ ki nu. 24A wra kna mu yo pe pan mbo, "Ŋga yi ni nyimi ŋga nyu Nyiɛkpↄↄ na le na pie knaa wo lenɛɛrɛ pan kre. 25Kpra na ni yuu e pan, na mba tre sɛnyi nyumu ŋga ka gbↄ na, mbaa sɛ su ŋga mbe ki gbↄ fↄŋgↄ Nyiɛkpↄↄ ŋunumu kre nu na." 26Ŋga pra yire wa mna mboo mɛɛ kↄ mna Nyiɛkpↄↄ ŋga kre, a pra sɛ Olive tinyi nyua kre na. 27Bawa Yesu na yo pe pan mbo, "E kro we fɛ mbe laa ni kro. Pe ki nyunↄ mu yo na, 'Mbe mbaala lefun wre gbo, mbe mbaala pre nyina.' " 28La, ni kunnyiɛ kↄkro kre, mbe yiɛklu mbe sɛ Galilii na. 29A Pita na kna mu yo u pan mbo, "Na pe kro we fɛ mbe laa mu kro kuraa kre, mba fɛ." 30A Yesu na kna mu yo u pan mbo, "Kpra na ni yuu mu pan na, aŋga lam, blee ŋga, ŋgoplↄ wa nyɛni gbee shiin na mu kaala gbee taarɛ na mu n ni chin kuraa." 31Pita rɛ yɛnyiɛ ni wre naa paara, mbo, "Na kumu yi kuraa kre, mi na ŋu we ku, mba laa mu kro." Imi Pita na yo kre chↄↄ, pan hamblɛ pre na yo na. 32Ŋga pra da lawee ka nu, praa ki yeeri Gɛtsɛmani kre, bawa wra yo u twanfɛɛnlɛ pre pan mbo, "E tni mna, mbe ni sɛ nyiɛtali mbe pan tun." 33A wra Pita, na Jemisi, na Jↄn wru mna ya uyɛ na a pra sɛ yiɛ chiɛri. Bawa weere na wo u na, a u jawala naa u hau. 34A wra kna mu yo pe pan mbo, "Fooro ni yii na shie kumu nu. E tni mna e na le. Yaa shia ŋunu." 35A wra pe ti wa mna sɛ yiɛ chiɛri mna sɛ juule tra, mna nyiɛtali mbo, "Na kie ja, ti mbe kanyana nyjila ŋga tro ni na mbe sɛ." 36A wra kna mbo, "Abba, Ndoo! Mu ja na yira kro pini, kena kanyana gbↄyira ŋga flo ni mbɛɛ na mu sɛ. Imi na mi chaa ma, la, imi na ŋu chaa ki pe." 37Ŋga wra ndru mu pan kre, wra pan mu da na pe ŋunu, a wra kna mu yo Pita pan mbo, "Siimↄn, mu sni ra? Kena mu n ja mu shie nyjila nunu kuraa. 38E yiɛ tɛɛ, e na nyiɛtali, mbe yaa shia to nyu chaara kee nu. Jawala ki chaa, la, wejiŋge pe yiɛyiɛ." 39A Yesu na ndru mu sɛ nyiɛtali shiin wo na, mna kee nunu kre yo chↄ. 40A wra ndru mna pan mu da na pe ŋunu na, na ŋunumu kre wɛ pe na kuraa. Ki tia pe nsra chin imi na pie yo. 41A wra ndru mna sɛ mu pan gbee taarɛ wo, mna pan mu pe da na pe ŋunu tɛ, a wra yo pe pan mbo, "Ee wa mu sni na wuui tɛ ra? Ki yila ma. Nyjila kre da mbe pe mi Lewo Pↄ wre wↄ mbe le sisampefɛɛnlɛ kɛɛ. 42Kena e yiri mbe o sɛ. E le, ŋmba we ni wↄ mbe ŋga kre, u mbra mna." 43Titɛɛ kre nu, ŋga wraa wa mu yire wa na paara kre to, a Judas pe kɛmbↄshiin pre nunu na pan wa. Na lenɛɛrɛ mblɛ pe bↄↄnfiɛnlɛ na vɛɛn yii mu yiri sↄfue loplombo pre, na nyinafɛɛnlɛ na chia loplombo pre nuu wa mu taa u kro. 44Na ŋmba we u wↄ mbe pe ŋga kre, pe nyina na "ŋmba nyu mbe shiun kre, wre wi", kena pe u yii chichie mbe sɛ na u ni. 45Ŋga pra da u na kre, titɛɛ kre nu to, a wra pan Yesu jaara, mbo, "Ni Tafun!" to, mna u nyu shiun. 46A leele pre na sɛ u yii. 47A leele mblɛ praa wa wa kre wa na brↄfiɛn tini mna sↄfu lopom wre tnu chieri ndie na mu kↄ. 48A Yesu na kna mu yo pe pan mbo, "E pan ni pan na brↄfiɛnlɛ, na vɛɛn ni mbe paan ni yii na kokↄↄn wi mii? 49Ŋga nii wa e jaara sumindoo nyila kro nu, na e nyina kre, e n ni yii wa. A imi kie pe mbe kee kre pe nyunↄ kre pan ma kre ki tia." 50Ŋga kra pan ma kre, u twanfɛɛnlɛ pre na fɛ mu laa u kro. 51A nyanyjɛble wa na mbↄfiŋge tↄ mu taa u kro, a pra wre yii na, 52a wra u yoŋgo kre kun mu wa pe pan mna fɛ mu sɛ na wejiwaara ni. 53A pra sɛ na Yesu ni sↄfue loplombo pre lopom wre pan, a sↄfue loplombo pre na chia loplombo pre na nyinafɛɛnlɛ pre kro na pan mu fni. 54Pita na taa pe kro mu lalaa wa lee wre na Yesu pan, mna sɛ le sↄfu lopom wre katoo lam wa, mna sɛ chaa sumifɛɛnlɛ pre nu mu tni na kanhun yuai. 55A sↄfue loplombo pre na leele mblɛ pra fni wa kre, naa dansiɛrɛ kee ka chaa mbe yire kre na mbe Yesu gbo, a pe nsraa kee ka taa. 56A leele tataara na kafinɛ dansiɛrɛ li mu Yesu taan, a pe dansiɛrɛ yire pra li kre krɛrɛ na yili yiyɛyɛ. 57A plɛ na yiri mna kafinɛ dansiɛrɛ ka li mna Yesu taan, 58mbo, "O loo a wraa yuu na, mbe suminyuŋgo badaaŋga ŋga pe kɛnyi tɛɛ mu sin kre juari, mbe ndru mbe ki sin ble taarɛ ni, ŋga pe n kɛ tɛɛ mu sin." 59Kre dansiɛfɛɛnlɛ pre kuraa nyu na yili yiyɛyɛ na. 60A sↄfu lopom wre na yiri mu yire lalaa, mna Yesu wie mbo, "Ma nyu kun ra? Ŋgi mu pieri a pra kee nyjɛ nyini yuu na taari mu na ŋga hin?" 61A wra u nyu tↄ, hali u nsra nyu kun na ndro ni. A sↄfu lopom wre na ndru mu u wie na mbo, "Ŋu wi Kristo, Nyiɛkpↄↄ Pↄ wree?" 62A Yesu na kna mbo, "Mi wi, a ee mi Lewo Pↄ wre nya na ni tni Jaŋga kre kalie mbra paan tloe nu nyjeeri." 63A sↄfu lopom wre na wre toto dodoŋgi tini mu wila uyɛ na, imi u krↄ na kun kre na, mbo, "Dansiɛrɛ ŋgi o chaa na hin? 64E u jiɛnlɛ kee ŋga loo ŋgaa. A mni e jawa hin?" A pe kro na u gbun pimi ni, na u fna kumu ni. 65A plɛ naa tɛɛnrɛ hlu na woni u na, mna u yiɛ fo, na u gbuun kaŋguroe na yuu u pan mbo, "Ŋmba u mu gbun nya mu yo o pan ɛ!" A sumifɛɛnlɛ pre naa u gbuun ka na. 66Ŋga Pita naa wa tra katoo lalaa wa kre, a chiɛlɛ mblɛ pe sↄfu lopom wre sumi kre nunu na pan wa, 67mna Pita nya na uu wa mu tni na kanhun yuai, a wra u le komm, mbo, "Ŋu na Yesu Nazrɛt wo wre ma e nyaari kree?" 68A wra kaala mbo, "Ni n u chin, a ni n kee ŋga mu yuu ŋga kuraa nↄↄ loo." A wra yiri wa mna sɛ jlonwee nyu taanlaa na wa, to a ŋgoplↄ jle na nyɛni. 69A bichable wre na ndru mu pan mu u da wa na, mna kna na yuu leele mblɛ praa wa wa kre pan mbo, "E le, blↄ ŋmba u chaa Yesu leele pre nu." 70A Pita na ndru mu kaala na. Praa wa wa maa, a leele mblɛ praa wa wa kre wa na kna mu yo Pita pan mbo, "Yɛŋgɛ yi. Ŋu, mu chaa pe nu. Galilii wo wi ŋu." 71Bawa Pita naa uyɛ suni kuraa na dani, mbo, "Ndro ŋmba kee e yuu ŋga kuraa, ni n u chin." 72Titɛɛ kre nu to, a ŋgoplↄ na nyɛni shiin wo. A Pita na kee ŋga Yesu na yo u pan kre sↄↄnri, na wra yo na ŋgoplↄ wa nyɛni gbee shiin, na u kaala gbee taarɛ na u n u chin. Ŋga wra ki sↄↄnri kre to, a wraa nyɛni.

will be added

X\