Marko 13

1Ŋga wra yili sumindoo kre nu kre, a u twanfɛɛnlɛ pre nunu na kna mbo, "Nyinafun, dnɛ badɛnyi nyjɛ nyini le pe tɛɛ mu nyinyi nyjɛ sin ma!" 2A Yesu na kna mu yo pe pan mbo, "Nyinyi badɛnyi nyjɛ e nyaa ŋga, dnɛ ka n wa mbe kↄↄ kro ki ŋmbrↄ na mbe pia ki laa mbe wa tra." 3Ŋga Yesu na sɛ tni Olive nyua kre na, pe sumindoo kre yɛsimi wa kre, bawa Pita, na Jemisi, na Jↄn, na Andriu chiin na u wie mbɛɛ na, 4mbo, "O nyina nyjila ŋga nu kee nyjɛ mu nyini nyjɛ krɛrɛ we pe? A na nyjila kre waa da, kee ŋgi kie nyina mbe o chin hin?" 5A Yesu na yire wa mna yo pe pan mbo, "E dↄↄta mbe ndro waa shia e fana. 6Leele tataara we pan na ni mɛɛ ni mbe yo na, 'Mi wi Kristo wre', mbe paan leele fana tataara. 7Kena na e waa na ŋunↄ kee ndru lawee lawee nu kre, yaa shia ti mbe gbun yↄ e na, fna ki fna mbe yire kee yire pe tun, la, na waŋgra nyukↄↄrↄ kre n ta mu da tun. 8Waŋgra na waŋgra we to peyɛ na, mbe ŋunu na ŋunu ta peyɛ na, mbe tra na seeri lawee lawee nu, mbe klo to. Kena kanyana yire nↄↄ hlɛhaa yi kre." 9"Kena e eyɛ le chichie, pie e ble loplombo pan, mbe e frↄ fninyinyi nu. A mi ndra na pie e ble loplombo na ŋulo yiɛ, mbe e ni dansiɛrɛ li. 10A ki fna mbe e klu mbe ketaan kre yo mbe waŋgra kro nyina. 11Na pe waa sɛ e ble, mu e wↄ mu ŋga kre, yaa shia klu mbra nyjɛ ee sɛ yo jawai, na mu ta mu sɛ yire wa kre, ŋga Nyiɛkpↄↄ we mu ŋga kre yo. Kre nyjila kre, ŋu ma mu paara. Kpra Ŋumu wre we paara mu nu. 12Lopↄ we u lopↄ wↄ mbe ŋga, mbe pe u gbo, mbe lɛ u pↄ wↄ mbe ŋga, mbe biile pe sefɛɛnlɛ wↄↄ mbe ŋga mbe pe pe gbo. 13Ni mɛɛ ndra na, leele kro we e pra. A ŋmba we jaa yire kanyana nyjɛ nu mbe sɛ su u kumu nu kre, wre we ŋmaa ta." 14"Kena na e waa 'afuŋgo kee ŋga ki waŋgra jee' kre nya a ki yire mna ki n fna mbe yire kre, kena tↄↄnrifun wre, ti u ki le chichie mbe ki nↄↄ chin. Kena leele mblɛ pee wa Judea na kre, mbe praa feni mbra nyuaɛ ndru. 15A ŋmba uu wa nyuŋgo ndra na kre, waa shia tii mbe le katoo lam mbe u yaka wru. 16A ŋmba uu wa see kre, waa ndru mbe pan katoo mbe paan u yoŋgo bali. 17Kre ble kre, lɛɛfɛɛnlɛ na mblɛ biile pe ŋgoorii, pe atɛ!" 18"Kena e na nyiɛ tali mbe ble kre waa shia pan weere nyjila. 19Ŋgi na, yire ble yire we pe kanyana ble kpↄↄ, ŋga ka ki n da mu pan tun, mu yire waŋgra gbeele nyjila. A ka waa pan ma na. 20A na o Tafun wre n na ka kun ble yire na kre, kaa wa na ndro nunu chom kuraa ta. A mblɛ u yeeri mu pe wↄ kre ndra na u yila mu ka kun ble yire na." 21"A yire ble yire nu kre, na ndro waa yo e pan mbo, 'E le, Kristo wre wa mna.' Ndee, 'E le! Uu wa mna wa kre', yaa shia ki shↄ mbe li. 22Kafinɛ Kristoe, na kafinɛ Nyiɛkpↄↄ kee nyanyofɛɛnlɛ we pan. Pie kefↄnyi na kawako kee pe, na pie ja kuraa kre, mblɛ Nyiɛkpↄↄ wↄ kre, pie pe fana mbe laa kpra kre na. 23A yire rɛ, e le chichie, kre na ni klu mu yi kro yo e pan kre." 24"A yire ble yire nu kre, kanyana yire kↄkrↄ kre, 'ndram we wↄ lafo na, a nyiɛpↄ wa jaa fniŋge na. 25Mbe wↄɛlɛɛ na klↄ nyjeeri mbra tuuri tra. Mbe Nyiɛkpↄↄ jaŋga ŋga kii wa nyjeeri kro nyaara.' 26Bawa pie Lewo Pↄ wre nya na u paan na jaŋga na yɛnyiŋge ni tloe nu. 27Kre nu we nyjeeri bitumblↄ tun mbe pe paan u wolo mblɛ u wↄ mu yili waŋgra ŋga kokoo jijirɛ yire kro nu, mu yire tra nyukↄↄrↄ na mu sɛ su nyjeeri nyukↄↄrↄ na, mbe pe ble lawee nunu nu." 28"E fig tiŋge kre yomɛɛlɛ kre twan. Na e waa nya na ki wrɛ nyaara, mu ndru na funi kre, kena e chin na ndram wrɛm nyjila dani. 29Pan yi chↄↄ, na e waa nya na kee nyjɛ ni nyina ŋga waa na pini kre, kena e chin na nyjila kre mbra mna, kre nyjila kre, kena ki da e na kuraa mu kↄ. 30Kpra na ni yuu e pan, na fuŋgaami leele mblɛ wa kↄ fio, fↄŋga kee nyjɛ krɛrɛ we pe tun. 31Nyjeeri na tra we paan tro, la, ni kee wa tro fio." 32"La ble kre na nyjila kre rɛ, wa n ki chin, nyjeeri bitumblↄ pre kuraa n ki chin, hali Nyiɛkpↄↄ Pↄ wre titi kuraa n ki chin fↄna u Lɛ wre chiin. 33Kena e eyɛ le chichie, e eyɛ shie, e na nyiɛtali ŋgi na. e n chin ble ŋga na ble kre we to. 34Pan ki nyi na lewo kolo kuun mbe u katoo ti u sumifɛɛnlɛ pan mbe jaŋga kro wru mbe le pe kɛɛ, mbe pe kro ŋga tnumu peyɛ yɛ, mbe yo jlonwee nyu lefun wre pan na wra katoo kre sri u pan. 35Kena e eyɛ le chichie. Ŋgi na, e n chin ŋga ble katoofun wre we pan. We pan yilakↄŋgↄ o, blee o, ŋgoplↄ mana na o, bnimi o, 36e n chin, mbe waa shia paan e fo mbe e nya na e sni sni. 37Kre kee ŋga ni yuu e pan ŋga ndro kro pan ni ki yuu, na e eyɛ shie e tni."

will be added

X\