Marko 12

1A Yesu na yire wa mna paara pe pan yomɛɛlɛ nu mbo, "Ndro wa wra tresɛnyi bribri see ka pe mna ki le kagbla mu fni mna wee kun ki lam, ŋga nu we na tresɛnyi simi yuwi, mna nyuŋgo sin gedeeŋge ki lalaa, mna ki wru mu falifɛɛnlɛ plɛ jin mna sɛ chia ka na. 2Ŋga yi nyjila na da kre, a wra yire wa mu u sumifun wↄ mu tun falifɛɛnlɛ pre pan na u sɛ kagbla kre sro yɛ shↄ mbe paan u ŋga. 3A falifɛɛnlɛ pre na u yii mna u gbun mna u ni, a wra ndru mu sɛ kɛ waara ni. 4A wra ndru mna u sumifɛɛnlɛ pre shiin wo wↄ mu tun pe pan na, a pra wre yii mu u gbun mu u ndra vru, mna cheu wↄ u na. 5A wra ndru mna fↄŋgↄ tun, a pra wre yii mu gbo. Pan pra tataara mblɛ wra kↄ mu tun pre kↄkro kre plɛ frↄ, mna plɛ gbo. 6Na ki kro nunu wa tɛ, u pↄ nunu chom ŋmba u kori, wre wra tun kro pe pan mbo, 'Ni pↄ wi ŋmba pie wre nyifɛɛrɛ pe.' 7A falifɛɛnlɛ pre, ŋga pra u nya kre, a pra kna mu yo peyɛ pan mbo, 'Krↄlifun wre wi kre. E pan mbe o u gbo. Kena krↄyirɛ yire pe o wie.' 8A pra u yii mna u gbo, mna u fulo mu yili kagbla kre nu, mna sɛ u wa. 9Kena na kagblafun wre waa pan, ŋgi we falifɛɛnlɛ mblɛ pe hin? We pan mbe pe gbo na, mbe tre sɛnyi kagbla kre wru mbe le lefumblↄ kɛɛ. 10E n da mu Nyiɛkpↄↄ kee kre pe nyunↄ kre tↄↄnri tun, 'Dnɛ ŋga nyuŋgo sinfɛɛnlɛ pre na je kre, na, ki kↄ mu pe nyuŋgo kre ndra,' ra? 11'O Tafun Nyiɛkpↄↄ wre kepele yi nyjɛ kro, a yi pe kawako ni o nyibie na.' " 12Bawa Yesu loŋgoolo pre plɛ naa u chaa mbe yii, yaka ma kra tia, pra chin na yomini kre u gbun kre, na pre na u nyi. A na praa fiɛ lenɛɛrɛ pre na. Kra tia pra sɛ mu u ti. 13A pra Farisiie na Hɛrodie pre plɛ tun u lawee na pe sɛ u nyu cha. 14Ŋga pra pan kre, a pra yo u pan mbo, "Nyinafun, o chin na mu pe kprafun, a mu n na yaka le mbe yili ndro pan, a mna ndro yiɛ le, a mu Nyiɛkpↄↄ kee kre nyina kpra ni. Kena kii wa na kolo ni na oo na tↄↄ woni mbra Kaisari waŋgra lopom wre kaan ree mni hin? 15O na yi woni ree, ndee waa na yi wↄni hin?" Ŋga wra pe yiɛnyumu kee kre nya ma kre, a wra kna mna yo pe pan mbo, "Mni a e na ni piin na le hin? E pan na swa kre ka ni mbe ni le." 16A pra pan na ka ni. A wra kna mu pe wie mbo, "Ŋmbi nyunↄmu na u tnↄmu yi ki na ŋga hin?" A pra kna mbo, "Kaisari wee yi." 17A Yesu na kna mu yo pe pan mbo, "Kena e Kaisari wee wru e Kaisari ŋga, e Nyiɛkpↄↄ wee wru e Nyiɛkpↄↄ ŋga." Ŋga wra yo ma kre, a u kala na pe kawako ni pe pan. 18A Sadukiie mblɛ praa yuu na kunnyiiɛ n wa kre na pan mna Yesu wie, 19mbo, "Nyinafun, Mbose nyjila kre, wra nyunↄ mu o ŋga na, na wa nyjↄ, ndee u chunu ku mu u chↄ ti, a u n se chlↄ wre na kre, u nyjↄ ndee u chunu we jaa u leŋge, mbe biile se mbe u ŋga. 20A lobiile kↄↄnashin plɛ naa wa mu tni, a pe lopom wre na leŋge, u nsra se chlↄ wre na mna ku mu u ti. 21A ŋmba u taa shiin kre na chlↄ wre wru mna leŋge, a wre nsra se u na mna ku. A ŋmba wra taa taarɛ kre na sɛ chlↄ wre leŋge, kala nunu kre na yi na. 22Leele kↄↄnashin pre kro na chlↄ wre leŋge mu fni kro a wa nsra se u na. Pe kro kum kↄkro kre chlↄ wre titi na ku na. 23Kena na pe kro waa nyi kunnyiiɛ kre nu, pe ŋmbihaa chↄ wi chlↄ wre hin? Na leele kↄↄnashin pre kro u leŋge mu fni?" 24A Yesu na kna mu yo pe pan mbo, "Na e n Nyiɛkpↄↄ jaŋga na u kee kre pe nyunↄ kre chin, kre ki tia e punu kre. 25Na pe ta mu ku mu nyi mu kↄ, pia leŋge na, wrunkɛɛ na leŋgeere n wa bawa. Pe kro we pe na nyjeeri bitumblↄ lɛ nyjeeri wa. 26Kunnyiiɛ kee kre, e n ki tↄↄnri Mbose hlɛ kre nu, u nyaa shↄↄ kre kee kre, imi na Nyiɛkpↄↄ na yo u pan mbo, 'Mi wi Abraham Nyiɛkpↄↄ na Isaki Nyiɛkpↄↄ na Jekↄb Nyiɛkpↄↄ wre.' " 27Mbo, "U n pe gboolo Nyiɛkpↄↄ, la, blenyini ŋmaafɛɛnlɛ Nyiɛkpↄↄ wi. Yire e punu kee kre na tataara." 28Ŋga nyinafɛɛnlɛ pre nunu na pan mna nya na pe peyɛ wie kee bɛɛlɛ a Yesu na pe kee kre nyu wↄ chichie kre, a wra kna mu Yesu wie mbo, "Mbra yire nu, ki ŋgihaa ki yiɛklu hin?" 29A Yesu na kna mu yo u pan, mbo, "Ŋga ki yiɛklu mbra yire nu yi, 'Israel, e loo! O tafun Nyiɛkpↄↄ wre, Tafun nunu wi. 30Kena mu Tafun Nyiɛkpↄↄ wre kori mu loloŋgo nu, na mu ŋumu kro ni, na mu jawala kro ni, na mu faŋga kro ni.' 31A ŋga ki taa shiinwo yi, 'Mu ŋmbrↄ kori na ŋu titi wi.' Mbra ka n wa na mu wɛ nyjɛ na." 32A nyinafun wre na kna mu yo Yesu pan mbo, "Nyinafun, mu kpra yo na Nyiɛkpↄↄ uu nunu, a wa n wa na, na Wre bↄkↄ, 33mbe mu u kori na mu loloŋgo kro ni, na mu nↄↄloo kro ni, na mu faŋga kro ni, mbe mu ŋmbrↄ kori na ŋu titi wi. Kre ki nyu mu wɛ yurↄ poŋgo sroo sra, na Nyiɛkpↄↄ srayira kro na." 34Ŋga Yesu na nya na u kee kre nyu wↄ kachindɛ ni kre, a wra kna mu yo u pan mbo, "Ŋu na Nyiɛkpↄↄ ŋunumu kre haa n le." Ndro nsra ja mna Yesu wie kee ka wa na. 35Ŋga Yesu naa nyina sumindoo kre nu kre, bawa wra pe wie mbo, "Ŋgi ki tia a nyinafɛɛnlɛ pre na yuu na Kristo wre Devid nana wi hin? 36A Devid wre titi na ki yo Kpra Ŋumu wre jaŋga ni fa na, 'O Tafun Nyiɛkpↄↄ wre na yo ni Tafun pan na, tni ni kalie, mu sɛ su nyjila ŋga nu mbe ti mu mu jeelee taa mu loŋgoolo na.' 37Devid wre titi na Kristo wre yeeri 'ni Tafun', mni ki kↄ mu pe a u pan mu u ta nana hin?" Bawa lenɛɛrɛ na ndie tɛɛ mna u kee kre loo na yɛshↄↄrↄ ni. 38Ŋga wraa pe nyina kre wra yo pe pan mbo, "E eyɛ dↄↄ ta na nyinafɛɛnlɛ mblɛ pe dodonyi tutunↄnyi lenkilaa chaa, na lete shaara, 39na loplombo tnihaa fninyinyi nu, na loplombo tnihaa lihaa kre na. 40Pre pe lekuchiɛlɛ yirɛ shio pe pan, mbe tuwi mbe nyiɛtali tutunↄↄŋↄ leele yiɛ na. Pre pie Nyiɛkpↄↄ kanyana kre nya kpↄↄ." 41A Yesu na sɛ tni pe swa leyira kre yiɛ, na pe le a praa paan na pe swa leni, a swafɛɛnlɛ tataara na pan swa le le tataara. 42Ba lekuchlↄ shianfun wa na pan na u swa bie shiin ni mna pan mu le, yie pe kↄbↄ. 43A Yesu na u twanfɛɛnlɛ pre yeeri a pra pan. A wra yo pe pan mbo, "Kpra na ni yuu e pan na lekuchlↄ shianfun ŋmba pan mu swa le nɛɛrɛ mu wɛ leele mblɛ na kro. 44Ŋgi na, mblɛ pe pan mu swa le kre krɛɛrɛ, pe swɛ nyjɛ yi taataa pe katoe wie na kre yɛ ni pe pan, a chlↄ ŋmba rɛ, u shian, nde ŋga kii wa u pan kro wra kaan ki na kre, kre u pan mu le kre."

will be added

X\