Marko 11

1Ŋga praa mbra Jerusalɛm na, mna da Bɛtfage na Bɛtani na, Olive nyua kre mbɛɛ na kre, a wra u twanfɛɛnlɛ pre shiin wↄ mna tun, 2mna yo pe pan mbo, "E sɛ kable ŋga kii wa e yɛsimi ŋga na. Na e le wa to, ee bubnↄ pↄ wa nya, ŋmba na ndro n da mu tni tun, a pe maŋa le u na mu pↄ, mbe e u saan mbe pan. 3Na ndro waa e wie na mni a e ma piin na hin? Mbe e yo ufun pan na, o Tafun u u chaa, a we ndru mbe pan na u ni mna fuŋgaami." 4A pra sɛ nya na pe bubnↄ pↄ wa pↄ katoo ka yiɛ lete na, a pra u saan. 5A leele mblɛ praa wa wa kre na kna mbo, "Ŋgi e bubnↄ pↄ ŋmba saanri mbe sɛ pe hin?" 6A pra kee ŋga Yesu na yo pe pan kre yo, a pra pe ŋga kolo a pra u saan mna sɛ. 7A pra pan na bubnↄ pↄ wre ni, mu Yesu ŋga, mna pe yonyi wo bubunↄ wre na, a Yesu na tni u na. 8A leele tataara na pe yonyi chan kolo kre na, a wraa tro yi na, a plɛ na tinyi klɛ knumu nyaa wa mu nyina kolo kre na kro. 9A mblɛ pra yiɛklu kre na mblɛ pra u kro tↄ kre na gblee leni mbo, "Hosana!" "Dwamu yi ŋmba u nyaari o Tafun mɛɛ nu na paan kre." 10"Dwamu yi o tolɛɛ Devid ŋunumu ŋga ki paan kre!" "Hosana wa nyjeeri nyjeeri!" 11Ŋga wra le Jerusalɛm na kre, wra sɛ pe sumi ndoo. Ŋga wra yirɛ yire le mna kna mu nya na yila kↄ kre, a wra kɛmbↄshiin pre yeeri, a pra sɛ Bɛtani na. 12Ŋga nyiŋge na se a pra ndru mu yiri Bɛtani na na paan kre, klo na u ta. 13A wra yire mna tiŋge ka nya haaleelee ka nu, pe ki yeeri fig tiŋge, na wrɛɛ wa ki na tataara, a wra sɛ ki jaara na aada we sɛŋgɛ ta ki na. Ŋga wra da ki jaara kre, u nsra yaka nya ki na, na wrɛ chiin bↄkↄ, yaka ma kra tia, na tiŋge kre sɛ nyjila ma. 14A Yesu na kna mu tiŋge kre sun mbo, "Ndro n wa mbaa ŋu sɛŋgɛ ta mbe li na fio!" Ŋga wra yo ma kre, u twanfɛɛnlɛ pre na ki loo. 15Ŋga pra le Jerusalɛm na kre, a wra sɛ le pe sumindoo mna na leele mblɛ praa wa wa na yirɛ prɛ, na mblɛ praa loni kre kro nini na yilii fimi na. Mna pe swa chinɛfɛɛnlɛ tebru na pe mblɛ pe katoo kotulo prɛ kro jↄɛn kna mu juule. 16U nsra ndro ŋga kolo, mbe u yira wru mbe tro sumi ndoo wa. 17A wra yire wa mu pe nyina, mbo, "Pe ki nyunↄ mu yo na, 'Pe ni katoo kre yeeri nyiɛtalaa ndoo mbe waŋgra kro ŋga.' A yire rɛ, e ki wru mu pe 'juolo ndrahaa.' " 18A pe sↄfue loplombo na nyinafɛɛnlɛ pre na ki loo, na kolo ka chaa mbe u gbo, a na praa u fiɛ, yaka ma kra tia, imi na wraa leele pre nyina kre na ndro kro pe kawako ni. 19Ŋga blee na wↄ kre, a pra yili chia kre na. 20Ŋga nyiŋge na se bnimi pupu a pra ndru na tro kre, pra nya na fig tiŋge kre, ku mu sɛ su ki didinyi na. 21A Pita na sↄↄnri, mna kna mu yo Yesu pan mbo, "Nyinafun, le! Fig tiŋge ŋga mna sun kre ku!" 22A Yesu na kna mu yo pe pan mbo, "E Nyiɛkpↄↄ shↄ e li. 23Kpra na ni yuu e pan, na ndro ŋmba we yo nyua ŋga pan na kↄ mu sɛ to epo ŋga nu! A ufun n u jawala pe shiin, mu shↄnli na ŋga u yuu kre we pe yɛŋgɛ kre, kie pe ma mbe ufun ŋga. 24Kre ndra na ni yuu e pan na yira ŋga ee wie kpan nyiɛ talaa nu kre, e shↄ e li na e ki ta, a kie pe ma mbe e ŋga. 25A na e yire na nyiɛtali, na kala kaa wa yire na wa lalaa kre, e ki ti e ufun kɛ, mbe e Lɛ ŋmba uu wa nyjeeri kre, e sisam ti mbe e kɛ. 26A na e n ti mu kɛ naa, e Lɛ ŋmba uu wa nyjeeri kre, wa e sisam ti mbe e kɛ." 27A pra ndru mu pan Jerusalɛm na. Ŋga pra le na tro pe sumindoo kre lam kre, pe sↄfue loplombo pre, na nyinafɛɛnlɛ pre na loplombo pre na pan u jaara, 28mna u wie mbo, "Jaŋga ŋgi ni mu tnumu ŋga tuni hin? Ndee ndro ŋmbi sembremu u mu ŋga jaŋga, a mu tɛɛ na kee nyjɛ pini hin?" 29A Yesu na kna mu yo pe pan mbo, "Mbe e wie kee nunu. Na e ki nyu wↄ kre, mbe e nyina jaŋga ŋga ni ni tɛɛ na kee nyjɛ pini. 30Jↄn ndrɛ jee kre, nyjeeri kra yiri ree, ndee lewo pan hin? E ki nyu wↄ!" 31A pra ki jawa mna ki kna peyɛ nu mbo, "Na o yo na nyjeeri kra yiri, we yo na ŋgi kra tia o nsra u shↄnli hin? 32Kena o yo na lewo pan kra yiri ra?" Pe nsra ja mu nyu ka kun, na pe lenɛɛrɛ pre fiɛ. Ŋga kra tia rɛ, lenɛɛrɛ na Jↄn shↄnli na Nyiɛkpↄↄ kee nyanyofun wi yɛŋgɛ. 33A pra kna mu yo Yesu pan mbo, "O n chin." A Yesu na kna mbo, "A mba e nyina jaŋga ŋga ni ni tnumu ŋga tuni."

will be added

X\