Marko 1

1Nyiɛkpↄↄ pↄ, ŋmba pe yeeri Yesu Kristo wre, u ketaan kre nↄↄ hlɛhaa yi kre. 2Imi na Nyiɛkpↄↄ kee nyanyofun ŋmba praa u yeeri Yisaia na yo u hlɛ kre nu kre mbo, "Le, mbe ni bituŋu tun mbe u yiɛ klu mbe hɛ kolo gbeele mu pan." 3"Wre mana ki yilii fimi lawee waa kre nu na, e o Tafun kolo kre gbeele, e u trohaa kre fraka." 4Blↄ wa, praa u yeeri Jↄn ndrajefun, wraa wa fimi tra kre nu na nyina na fↄŋga lewo we u jawala chinɛ mbe pe u ndra je, mbe Nyiɛkpↄↄ chiin u sisam ti mbe u kɛ. 5Bawa Judea tra kre leele, na Jerusalɛm chia leele kro na yili mna sɛ u pan wa, a wraa pe ndrɛ jee Jↄↄdan lↄↄ kre nu, a praa pe sisam yuu. 6Nyuuma yooro yoŋgo Jↄn naa toni. Yurↄ hlɛ na yi u greree, a u sro na lɛ kpatↄ na srɛ. 7A wraa yuu, mbo "Ŋmba u wɛ mi naa wa kro na paan. Mi n fna kple, na u kpawrɛ kuraa mbe kɛ taa yi na. 8Mi rɛ, nyumu ni ni e ndrɛ jee la, na wre waa pan, Kpra Ŋumu wre ni we e ndrɛ je." 9Kre nyjila kre nu, Yesu na yiri Nazrɛt chia ŋga kii wa Galilii tra nu wa kre mna pan, a Jↄn na u ndra je Jↄↄdan lↄↄ kre nu. 10Ŋga wra yili lↄↄ kre nu to, mna nyjeeri nya na ki nyaa a Ŋumu wre naa tri u na na katoo kotro wi. 11A mana ka na yili nyjeeri mbo, "Ŋu wi ni pↄ ŋmba ni kori, a ni yiɛshↄ mu na." 12Titɛɛ kre nu, a Ŋumu wre na sɛ na u ni fimi tra kre nu. 13Bawa wra nyi, fimi tra kre nu ble fuloeshiin, a Sutna na u sɛ u nyu cha. Wre na nyaalam yurɛ praa wa wa, a Nyiɛkpↄↄ bitumblↄ na pan mna u sumi. 14Pra kↄ mna Jↄn yii mu le nyuŋgo, kre kↄkro Yesu na pan Galilii tra nu wa, mnaa Nyiɛkpↄↄ ketaan kre yuu. 15Mbo, "Nyjila kre da, Nyiɛkpↄↄ ŋunumu kre da mna. E e jawala chinɛ. E Nyiɛkpↄↄ ketaan kre shↄ e li." 16Ki ble ŋga wraa tro Galilii epo kre mbɛɛ na kre, na blↄ wa wi, pe u yeeri Siimↄn, na u chunu, Andriu, na pee wa epo kre yiɛ na na asau waa. Ki nyjila kre na mbroe wↄfɛɛnlɛ lɛ. 17A Yesu na yo pe pan mbo, "E pan e taa ni kro, mbe e pe leele wↄfɛɛnlɛ." 18Titɛɛ kre nu, a pra pe asau yire ti wa mna pan mu taa u kro. 19Ŋga pra sɛ yiɛ chiɛri na, na Jemisi na Jↄn wa pe krↄ lam, na pe lɛ Zebedii ni, na pe asau gbeele. 20Yesu na pe yeeri titɛɛ kre nu, a pra pe lɛ na tnumu tunfɛɛnlɛ pre ti krↄ kre nu, mna pan mu taa Yesu kro. 21Yesu na u kotↄmblↄ pre na sɛ Kapɛnↄm na. Ŋga Siwri ble na to, pe ble fuŋgo ble, wra sɛ le pe fninyuŋgo, mna na pe nyina Nyiɛkpↄↄ kee kre. 22Imi wraa pe nyina kre na pe pe kawako ni. Yaka ma, wraa paara na jaŋgafun wi. U nsraa paara na pe nyinafɛɛnlɛ pre lɛ. 23Jaa na ŋumufↄↄn wa blↄ wa nu fninyuŋgo wa, titɛɛ kre nu, 24a wra gblee le mbo, "Kala ŋgi ni wre na ŋu nyi hin? Ŋu Yesu ŋmba mu yiri Nazrɛt na? O klahaa mu pan ree? Ni chin ndro ŋmba wi ŋu. Ŋu wi Nyiɛkpↄↄ ndro cheche wre." 25Yesu na u yiɛ kee yo u pan mbo, "Pieri mu yili u nu mu sɛ!" 26Ŋga kra pan ma kre, ŋumufↄↄn wre na blↄ wre chan tra, na u gbila, wra gble leni, mna chin mu yili u nu. 27Kra leele mblɛ praa wa wa kre krɛɛrɛ pe kawako ni, a praa peyɛ wie mbo, "Kolo fↄŋgↄ ŋgi ni blↄ ŋmba pan ŋga hin? Jaŋga ni ma. Hali na u fuu ŋumufuɛn pre na kuraa pe ndru u pan." 28Titɛɛ kre nu, Yesu kee na kpali mu tro Galilii tra kre nu kro. 29Ŋga Yesu na yili fninyuŋgo wa to, a wre na Jemisi na Jↄn na sɛ Siimↄn na Andriu katoo. 30Ŋga pra le wa kre, na kabro Siimↄn nafun chlↄ gbun a u sni, a pra ki yo Yesu pan titɛɛ kre nu. 31A Yesu na le u kro mu u yii kɛ na, mna u yire mu yire sholo. Titɛɛ kre nu to, a kabro kre na laa chlↄ wre na, a wra yiri mu sro pe mna pe ŋga. 32Ki yilakↄŋgↄ nyu na, na yila to mu kↄ kre, pra pan na yambla na mblɛ nu tiprɛm nyi ni Yesu pan, mbe u pe tra. 33Chia kre leele kro na pan mu fni mna Yesu na nyi kre. 34A Yesu na yambla pre tataara tra, mna tia ŋumufuɛn na yili lenɛɛrɛ nu, la, u nsra tiprɛm ŋumu pre ŋga kolo na pe paara. Ŋgi na, pra Yesu chin. 35Ŋga ki nyiŋge naa paan mbe se, Yesu chiin na gbolo mu yili mu sɛ fimi lawee ka nu, mbe wre na Nyiɛkpↄↄ sɛ paara. 36A Siimↄn na kotↄmblↄ hamblɛ pre na kↄ mu Yesu cha chiin, 37mna sɛ u nya mna yo u pan mbo, "Lenɛɛrɛ mu chaa na tro." 38A Yesu na kna mu yo pe pan mbo, "E ti mbe o sɛ chiɛ yɛ na na, mbe ni sɛ Nyiɛkpↄↄ kee kre yo wa na. Kre ndra na ni yila mu pan." 39A Yesu na kila mu tro Galilii tra kre nu kro, mna na lee pe fninyinyi yire nu na Nyiɛkpↄↄ kee kre yuu pe pan, na ŋumufuɛn woni leele nu. 40Yiranyiɛrɛfun wa na pan mu Yesu tali, mna kosie kan u yiɛ mbo, "Yesu, na mu chaa, mu jaa ti mbe ni saanla mbe pe cheche." 41Ŋga wra yo ma kre, u kee na pe Yesu pan fooro ni, a wra kɛ tini mu taa u na, mna yo u pan mbo, "Ni cha, kena saanla!" 42Titɛɛ kre nu, yiranyiɛrɛ yire na laa blↄ wre na, a wra saanla. 43A Yesu na u jaari chichie mbo, "Sɛ, mu sɛ muyɛ nyina Judae sↄfue pre pan. 44La, maa shia nyu kun na ndro ni kolo. Sra yirɛ nyjɛ Mbose e nyina kre, mu sɛ na yi ni mu sɛ sↄfue pre ŋga mbe ki nyina na mu saanla." 45Ŋga yaŋu wre na yili wa na shie kre, u nsra ja mu frↄ. Wraa kee kre kpali na shie. Kra tia lenɛɛrɛ na kala kre loo. Ŋga kra pan ma kre, Yesu nsra ja mbe le chia ka na na. A wra kro fimi lawee kre nu, a leele na yiri mbɛɛlɛ chiɛ yire na kro mnaa paan wa.

will be added

X\