Luka 9

1A Yesu na u twanfɛɛnlɛ kɛmbↄshiin pre yeere mna pe ŋga jaŋga na faŋga mbe pra ŋumufuɛn wↄni leele nu, mbra yambla trai. 2Mna pe tun na pe sɛ Nyiɛkpↄↄ ŋunumu kre kee kpali, mbra yambla trai. 3Mna yo pe pan mbo, "Yaa shia sɛ na yaka ni, yaa sɛ na kanyie ni, ndee bↄtↄ ni, ndee mbe paanu wru, ndee mbe swa wru, a yaa shia dodonyi shiin shiin wru. 4A katoo ŋga nu ee le kpan, e tni wa e sɛ su ŋga ble ee yili wa. 5A mna ee le kpan a pe n shia e shↄ kre, na e yilii chia kre na kre, e e jeelee tra pↄ e wo wa, mbe ki dansiɛrɛ li mbe pe taan." 6A twanfɛɛnlɛ pre na yiri mna sɛ kabɛɛlɛ yire na, na ketaan kre kpali, na yambla trai na tro. 7Ŋga Galilii ŋunu Hɛrodi na kee nyjɛ Yesu pe yire loo kre, kra u hau kpↄↄ. Ŋgi na, na leele yuu na Jↄn ndrajefun wre u ndru mu nyi. 8A plɛ naa yuu na Elaija u yiri, a plɛ naa yuu na fa Nyiɛkpↄↄ kee nyanyofɛɛnlɛ pre wa u nyi. 9A Hɛrodi na kna mbo, "Jↄn rɛ, ndaa u gbo, kena ndro ŋmbi kee ni ndru ŋga hin? Ni u chaa mbe nya". 10Yesu twanfɛɛnlɛ pre na ndru mna pan mna kee nyjɛ pe sɛ pe yire krɛrɛ bↄ Yesu pan. A wra pe wru a pe kro na sɛ chia ka na praa ki yeeri Bɛtsaida. 11Ŋga lenɛɛrɛ pre na ki loo kre, pra taa u kro, u nsra pe ni, a wra Nyiɛkpↄↄ ŋunumu kre kee yo pe pan, mna mblɛ praa yaa tra. 12Ŋga yila naa shie mbe sɛ to kre, twanfɛɛnlɛ kɛmbↄshiin pre na pan mu yo Yesu pan mbo, "Leele pre wa kolo mbe pe sɛ seechiɛ nyjɛ yii waa mbɛɛlɛ na mna ŋga na, mbe sɛ sro cha mbe li, mbe snihaa cha. Ŋgi na, yaka n wa mna." 13A Yesu na kna mna yo pe pan mbo, "E pe ŋga yaka mbe pe ka." A pra kna mbo, "Yaka n wa o pan, paanu kunↄ, na mbroe shiin pee wa o pan. Kena fↄŋga oo sɛ sro lↄ mbe leele mblɛ kro ŋga". 14Na bilɛ mblɛ pee wa pe nu we pe kagbeŋkunↄ. A Yesu na kna mu yo u twanfɛɛnlɛ pre pan mbo, "E ti pe ble ble peyɛ na, fuloe shiin na kɛ kɛ." 15A pra tia leele pre na ble ble ma. 16A Yesu na paanuu kunↄ yire na mbroe shiin pre bali mna yii kɛɛ, mna yiɛ wa nyjeeri mna dwan mu le yi nu, mna yi pile mna u twanfɛɛnlɛ pre ŋga, na pe leele pre ŋga yiyi imi na pe ble ble kre. 17A leele pre kro na ka mna yↄↄ. A pra pe kampraa yire yoori kakɛɛ kɛmbↄshiin. 18Nyjila ka nu Yesu naa wa na nyiɛtali wre nunu, a u twanfɛɛnlɛ pre na pan u lawee, a wra pe wie mbo, "Ndro ŋmbi lenɛɛrɛ pre ni jawa hin?" 19A pra kna mbo, "Plɛ yuu na Jↄn ndrajefun wre wi ŋu, a plɛ na yuu na Elaija wi, a plɛ na yuu na fawolo Nyiɛkpↄↄ kee nyanyofɛɛnlɛ pre wa wi ŋu." 20A wra kna mna yo pe pan mbo, "A yire hin? Mni e ni jawa hin?" A Pita na kna mbo, "Ŋu wi Nyiɛkpↄↄ Mizaia wre." 21A wra pe jaari na pia shia ki yo mbe ndro loo. 22Yesu na kna mu yo pe pan mbo, "Lewo pↄ wre fna mbe kala nya tataara, mbe Judae loplombo pre, na pe sↄfue loplombo pre, na pe mbra nyinafɛɛnlɛ pre u je, mbe u gbo, a ki ble taarɛ ble na we nyi." 23A Yesu na kna mu yo leele pre kro pan mbo, "Na ndro chaa mbe taa ni kro kre, u fun u uyɛ fɛɛ, mbe u kanyana kumu kaan wru mbe taa ni kro. 24Ŋgi na, ndro ŋmba we na kɛ toni u ŋmaa na kre, kie yili u kɛɛ. A ŋmba we yila ni na mbe u ŋmaa wa mbe fun kre, we ki ta. 25Kena na lewo waŋgra ŋga yirɛ kro ta, mu u ŋmaa wa mu fun, tnu ŋgi we ta hin? 26ŋmba we na nyifɛɛrɛ piin mi na ni ketaan kre yoo na kre, na Lewo Pↄ wre waa pan wre na u Lɛ wre na nyjeeri bitumblↄ chechee pre yɛnyiŋge nu kre, we ufun mɛɛ yeeree nyifɛɛrɛ pe. 27La, ni yuu e pan, kpra na, leele plɛɛ wa mu yire e nu mna a pia kumu chin, mbaa sɛ su ŋga pie Nyiɛkpↄↄ ŋunumu kre nya." 28Ŋga wra yire kee nyjɛ yo kre, kie pe ki ble kↄↄnataarɛ, a Yesu, na Pita, na Jↄn, na Jemisi bali mu ya uyɛ na, a pra sɛ nyua na nyiɛtalihaa. 29Ŋga wraa wa wa na nyiɛtali kre, u yiɛ na chinɛ, a u dodonyi na fniŋge prupru u na. 30Titɛɛ kre nu to, bilɛ shiin plɛ, Mbose na Elaija na pan na paara na u ni. 31Pra pan na nyjeeri yɛnyiŋge ni, mna pan mu kumu ŋga Yesu we sɛ ku Jerusalɛm na kre kee yo. 32Kre nyjila kre, na Pita na u wolo pre gbunu, a pra fo mu nyi, mna u yɛnyiŋge kre nya, mna bilɛ shiin pre pra pan mu na paara na u ni pre nya. 33Ŋga bilɛ pre naa shie mbe Yesu ti kre, Pita na kna mu yo Yesu pan mbo, "Ni Tafun, ki nyu na oo wa mna. Kena ti mbe o sugbɛɛ taarɛ sin, ŋu wo nunu, Mbose wo nunu, Elaija wo nunu." Na Pita n chin kee ŋga u yuu. 34Ŋga Pita na kre kee ŋga yo ma kre, titɛɛ kre nu a sugbeŋge na pan mna pe tↄ, a fiɛrɛ na pe yii. 35A mana ka na yili sugbeŋge kre nu mbo, "Ŋmba wi ni Pↄ ŋmba ni wↄ wre. Kena e ndie tɛɛ u pan." 36Ŋga mana kre na yili ma to, Yesu chiin pra nya na u yire wa. Pe nsra nyu kun na, a kee yire pra nya wa kre krɛɛrɛ pe nsra yi ka bↄ ndro pan yire ble yire nu. 37Ŋga ki nyiŋge na se a pra yiri nyua kre na mna tii tra kre, lenɛɛrɛ na sɛ u fni. 38A blↄ wa na gblee badaŋga ka le lenɛɛrɛ pre nu mbo, "Nyinafun, jande, ni pↄ ŋmba le ni pan. Ŋgi na, wre nunu chom wi ni pↄ. 39A ŋumufↄↄn wa u nu, na ki yiri mbe ki u chan, mbe wra gble leni, mbe ti u jire, mbe u nyu na tafↄkↄ kuun. Na ki pan ma ki u hau, a kia laa u na yira. 40Kre ni pan mu mu twanfɛɛnlɛ pre tali mbe pe u tra, a pe n na ki jani." 41A Yesu na kna mbo, "Yire aŋga leele ndikanmbla mblɛ nu shↄnlie n wa, ni tni e jaara, ndee ni kala nya na e ni mbe sɛ su nyjila ŋgi nu hin?" A wra kna mna yo blↄ wre pan mbo, "Pan na mu pↄ wre ni mna." 42Ŋga pↄ wre naa paan to, a ŋumufↄↄn kre na u chan, a wraa jirei. A Yesu na fuu ŋumufↄↄn kre na, a pↄ wre na saanla, a wra u wru mna u lɛ ŋga. 43Jaŋga kpↄↄ ŋga Nyiɛkpↄↄ na nyina kre na leele pre pe kawako. Ŋga leele pre na yire na kawa na Yesu kee nyjɛ u pe yire ni kre, wra kna mna yo u twanfɛɛnlɛ pre pan mbo, 44"E ti mbe kee ŋga le e ndie. Pie Lewo Pↄ wre wↄ mbe le leele kɛɛ." 45Kee kre wra yo kre pe nsra ki nↄↄ loo. Pra kee kre ndra pe na, mbe pia ki nↄↄ loo, a praa fiɛ na pie ki nↄↄ wie. 46Kakra ka na le twanfɛɛnlɛ pre lalaa, a praa yuu na pe ŋmbihaa u wɛ pe kro na hin? 47Yesu na pe jawala nya, a wra kna mna pↄ wa yii mna yire u jaara. 48Mna kna mna yo pe pan mbo, "Ŋmba we pↄ imi shↄ mi ndra na kre, kena ufun ni shↄ. A ŋmba we ni shↄ kre ŋmba u ni tun wre shↄ. Ŋgi na, ŋmba we uyɛ pe fiɛn e nu kre we pe e kro yɛklo." 49A Jↄn na kna mbo, "Ni Tafun, o blↄ wa nya na u mu mɛɛ tɛɛ na ŋumufↄɛn woni leele nu, a o u jaari, na u n chaa o nu." 50A Yesu na kna mbo, "Yaa u jaari. Ŋgi na, ŋmba u n na paara na e taanla kre, e chin na uu wa e nu." 51Ŋga Yesu ble yire naa paan mbe kↄ, mbe u sɛ nyjeeri kre, wra yiɛ tɛɛ Jerusalɛm na. 52A wra leele tun a pra yiɛklu mna sɛ le Samariae kable ka na, mna lawee gbeele na u sri. 53La, bawa leele pre nsra u shↄ. Ŋga wraa shie Jerusalɛm na kre ndra na. 54Ŋga u twanfɛɛnlɛ pre, Jemisi na Jↄn na leele pre nya ma kre, a pra kna mbo, "O Tafun, mu chaa mbe o kanhun yeeri ki yiri nyjeeri mbe paan pe sro ree?" 55A wra kna mna fuu, mna pe yiɛ kee yo pe pan mbo, "E n chin ŋumu ŋga leele lɛ yire ree? Lewo Pↄ wre n pan leele klahaa, la, pe shↄhaa u pan." 56A pra yili wa mna sɛ chia fↄŋgↄ na. 57Ŋga pra kolo kre yii na shie kre, a blↄ wa na kna mna yo Yesu pan mbo, "Mna mu sɛ kpan, ni chaa mbe taa mu kro." 58A Yesu na kna mna yo u pan mbo, "Ŋmbokuŋmboe wa na wee ni na sni, a hanyiɛlɛ mblɛ pe tro nyjeeri ŋgaa wa na zeere ni na sni, la Lewo Pↄ wre n wa na ndra tɛɛhaa ni." 59A wra kna mna yo lefuŋu pan, mbo, "Taa ni kro." A wra kna mbo, "Ni Tafun, ni ŋga kolo mbe ni sɛ ni lɛ gboo le mbe pan tun." 60A Yesu na kna mu yo u pan mbo, "Ti mbe mblɛ pe n ŋmaa ni kre, sɛ na pre titi gboolo leni, la, ŋu rɛ, sɛ Nyiɛkpↄↄ ŋunumu kee kre kpali." 61A wa na kna mbo, "Ni Tafun, mbe taa mu kro, la ti mbe ni sɛ ni katoofɛɛnlɛ kla mbe pan." 62A Yesu na kna mna yo u pan mbo, "Ndro ŋmba we kɛ le Nyiɛkpↄↄ tnumu nu, mbe ndru kro kre n fna Nyiɛkpↄↄ ŋunumu kre nu."

will be added

X\