Luka 8

1Nyjila chiɛri ka kↄkro kre, Yesu na kila mna tro kakpↄɛ na kabɛɛlɛ yɛ na, na ketaan kre, na Nyiɛkpↄↄ ŋunumu kre kee yuu. 2Wre na bitumblↄ kɛmbↄshiin pre na chiɛlɛ mblɛ nu wra ŋumufuɛn wↄ mna pe tra kre kro pra sɛ. Maria ŋmba praa yeeri Magdalene ŋmba nu wra ŋumufuɛn kↄↄnashiin wↄ kre, 3na Joana, Hɛrodi katoo lefun ŋmba praa yeeri Choza wre chↄ, na Susana, na chiɛlɛ tataara mblɛ praa nyaari pre titi kooloe na, na yaa Yesu na u bitumblↄ na kre. 4Ŋga lenɛɛrɛ mblɛ pra yiri chiɛ yire na, na pan mu fni u lawee kre, a wra pe gbun yomini ka mbo, 5"Blↄ wa wra sɛ u yirɛ bie yɛ wohaa, ŋga wraa yi woni kre yɛ na wo kolo mbɛɛ na, a leele na yi taanla, a hanyiɛlɛ na yi li. 6A yi yɛ na wo tra ŋga nu dnɛ nyi nu, ŋga yira ŋↄↄ mbe yili to, mna ku. Ŋgi na, na yi nsra nyumu ta. 7A yi yɛ na wo wuuro nu, a yire na wuuro yire na chaa mu fin, a wuuro yire na yi fↄ a yira ku. 8A Yirɛ bie yire yɛ na wo tra taan na, mna fin, mna sɛ lafaa lafaa." A Yesu na kna mbo, "Ŋmba uu ndie ni kre u ndie tɛɛ u loo." 9Yesu twanfɛɛnlɛ pre na u wie, na yomini kre nↄↄ yi ŋgi hin? 10A wra kna mbo, "Nyiɛkpↄↄ ŋunumu kee ŋga ki ndra kre, pe yire nyina ke yi, la, leele hamblɛ pre pan rɛ, yomɛɛlɛ nu pie pe nyina ki yi. Pie nyiɛlɛ nyaa mbra le, la pia kee kre nya, pie kee kre loo, la pia ki nↄↄ loo. 11Kena yomini kre nↄↄ yi kre, yirɛ bie yire yi Nyiɛkpↄↄ ketaan kre. 12Nyjɛ yira wo kolo mbɛɛ na kre lɛ mblɛ pe ketaan kre ndru, mbe Sutna pan mbe ki wↄ pe lolonyi nu, mbe pia kee kre shↄ mbe li, mbe pe pe shↄ. 13A nyjɛ yira wo dnɛ lawee kre lɛ mblɛ pe ketaan kre ndru mbe ki shↄ na yɛshↄↄrↄ ni, la, kee kre wa tni pe nu. Na pe kee kre shↄnli maa, na penlee waa pan to, na pe to. 14A yirɛ bie nyjɛ yira sɛ wo wuuro nu kre lɛ mblɛ pe ketaan kre ndru, mbe waŋgra kebɛɛlɛ, na waŋgra yirɛ na ki yɛshↄↄrↄ pan mbe tni pe nu mbe ketaan kre fↄ, mbe kia jaa sɛ. 15A nyjɛ yira sɛ wo tra taan kre nu kre lɛ mblɛ pe ketaan kre ndru na loloŋgo chichie ni, mbe frↄ mbe kee kre jaa sɛ pe nu." 16"Ndro wa kania mu mbe yira tɛɛ mbe ki juule, ndee mbe ki le mpa ndoo. La, kania taayira na pe ki muni na taari, na ndro le katoo mbe u nya ki na. 17Ŋgi na, kre yira n wa a pe ki ndra mbe kia kↄ mbe yili fimi na. 18Kena kee kre e ndru kre, e ki dↄↄta. Ŋgi na, ŋmba uu ka ni mu ki le chichie kre, pie ka ya u pan mbe u ta nɛɛrɛ. A ŋmba uu fiɛn ni a u n ki le chichie kre, chiɛri ŋga ni u nyi kre kuraa pie ki shↄ u kɛɛ." 19Kre nyila kre nu Yesu lo na u chinlɛ na pan na u chaa, a imi leele pre na nɛɛ kre ndra na, pe nsra kolo ta mbe da u na. 20A pra yo u pan mbo, "Mu lo na na mu chinlɛɛ wa mu yire fimi na, na mu chaa mbe nya." 21A Yesu na kna mna yo pe pan mbo, "Ni lo na ni chinlɛ lɛ mblɛ pe Nyiɛkpↄↄ kee kre ndru na lii ki na kre." 22Ki ble ka Yesu na u twanfɛɛnlɛ pre na le krↄ nu, a wra yo pe pan mbo, "E ti mbe o kun lↄↄ kro kokoo ŋgaa na." 23Ŋga praa shie kre, Yesu naa ŋunu. A fuflɛ kpↄↄ ka na gbun lↄↄ kre yiɛ na, a nyumu na le krↄ kre nu, a kraa chaa mbe kna. 24A twanfɛɛnlɛ pre na Yesu gbun mu nyi mna yo u pan mbo, "O Tafun, o chaa ku!" A Yesu na yiri mna fuu fuflɛ kre, na nyumu kre na, a yira yire dimm. 25A wra kna mna yo pe pan mbo, "Sena e shↄnlie sɛ hin?" Kee kre na pe pe kawako ni, a fiɛrɛ na pe yii, a pra kna na peyɛ wie mbo, "Ndro ŋmbi nyini wi ŋmba hin, na u fuu fuflɛ na nyumu na mbe yi yire dimm ŋga hin?" 26A pra sɛ le Gerasenie tra nu, kraa wa Galilii mbɛɛ na. 27Ŋga wra le tra kre nu kre, blↄ wa na pan mna u fni, na ŋumufↄↄn wa u nu, kie pe nyjila tataara na wra yoŋgo tↄ, a wa tni katoo, fanyi weele nu wraa sni. 28Ŋga wra Yesu nya kre, a wra gble fↄↄri mu le, mna pan mu to u yiɛ, mna paara gedeŋge mbo, "Yesu, Nyiɛkpↄↄ ŋmba uu wa nyjeeri kre pↄ, mu yira ŋgi kii wa ni pan hin? Ni mu tali, maa shia ni kla!" 29Na Yesu klu mu yo ŋumufↄↄn wre pan na u yili blↄ wre nu. Nyjila tataara nu na ŋumufↄↄn wre yiri u nu a pe u kanpan tuŋmble na kre, we tↄↄnrↄ mɛnyi yire kunumu mbe wa, mbe ŋumufↄↄn wre sɛ na u ni fimi lawee nu. 30A Yesu na kna mna u wie mbo, "Mu mɛɛ yi ŋgi hin?" A wra kna mbo, "Ni mɛɛ Ligion." Ŋgi na, na ŋumufuɛn nɛɛ u nu. 31A ŋumufuɛn pre na u tali na waa shia pe ni mbe pe sɛ wee ŋga ki n nyukↄↄrↄ ni kre nu. 32Kre nyjila kre na prakoe plɛɛ wa na kaa nyua ka mbɛɛ na wa, a pra Yesu tali na u ti mbe pe sɛ le prakoe pre nu. A wra pe ŋga kolo. 33A ŋumufuɛn pre na yili blↄ wre nu, mna sɛ le prakoe pre nu, a pra mↄŋↄ poŋgo mna sɛ to tapla kre nu, a kra pe li. 34Ŋga yurɛ pre lefɛɛnlɛ na kee ŋga kra pe kre nya kre, pra fɛ mna sɛ mandiɛ bↄ chiɛ nyjɛ yiraa wa wa yire kro na. 35A leele na yili mna sɛ kee ŋga ki pe kre lehaa. Pra sɛ Yesu lawee mna blↄ ŋmba nu u ŋumufuɛn yire wↄ wre nya, na uu wa mu tni u jaara. Na u yiɛ to kama, a u yoŋgo tↄ, a fiɛrɛ na pe yii. 36Mblɛ pra sɛ u nya kre na leele bↄ mandiɛ, imi na ŋumufuɛnfun wre saanla mu da. 37A leele mblɛ praa wa Gerasenie pre tra nu kre kro naa yuu na Yesu u yili pe pan tra kre nu. Ŋgi na, fiɛrɛ na pe yii kpↄↄ. Kra tia Yesu na le krↄ nu mna ndru u kro. 38Blↄ ŋmba nu ŋumufuɛn yire na yili kre na Yesu tali mbo, "Jande, ti mbe mi na ŋu sɛ." 39A Yesu na kna mna yo u pan mbo, "Ndru mu sɛ mu katoo mu sɛ kee ŋga Nyiɛkpↄↄ pe mu mu ŋga kre bↄ." A blↄ wre na sɛ chia lam, mna sɛ na kee ŋga Yesu pe u na kre kpali na tro. 40Ŋga Yesu na ndru mu kun epo kre kro kre, lenɛɛrɛ na pan mu u fni. Ŋgi na, na pe kro u sri. 41Bawa Judae fninyuŋgo loplombo pre wa, praa u yeeri Jairↄs, na pan mna kosie kan Yesu yiɛ, mna u tali na u ti pe sɛ u katoo. 42Ŋgi na, na u pↄ bichable nunu ŋmba u se we pe yɛlɛ kɛmbↄshiin, na u yaa mu chaa ku. Ŋga Yesu naa shie blↄ wre katoo kre, lenɛɛrɛ pre na wɛ u na, mnaa u frɛ. 43Na nyimi woni chlↄ wa pan mu wɛ yɛlɛ kɛmbↄshiin na, a u tra chiin mu pra. 44A chlↄ wre na yiri mu chaa lenɛɛrɛ pre nu mu taa Yesu kro, mna sɛ kɛ taa u dodoŋgi nyu na, titɛɛ kre nu to, a u nyimi woo kre na kun. 45A Yesu na kna mbo, "Ndro ŋmbi u kɛ taa ni na ŋga hin?" A pe kro na kaala. A Pita na kna mbo, "Ni Tafun, na leele pre nɛɛ mu na, na gbuun mu na kro poŋgo." 46A Yesu na kna mbo, "Ndro kɛ taa ni na. Ŋgi na, ni chin na faŋga ka yili ni nu." 47Chlↄ wre na nya na wa jaa ndra, a wra pan mna kosie kan Yesu yiɛ, na seeri, mna paara lenɛɛrɛ pre kro yiɛ na, mna nyina ŋga ki tia a u kɛ taa u na, na imi na u saanla titɛɛ kre nu. 48A Yesu na kna mu yo u pan mbo, "Ni pↄ, mu shↄnlie mu shↄ. Sɛ na wejinyiŋge ni." 49Yesu naa wa mu yire na paara, a blↄ wa na yiri Judae fninyuŋgo lopom wre katoo mna pan mbo, "Mu pↄ wre ku. Kena maa tuwi mbe nyinafun wre hau." 50La, ŋga Yesu na kee kre loo kre, a wra kna mna yo u pan mbo, "Maa fiɛ, shↄnli rɛ, we ŋmaa ta." 51Ŋga Yesu na sɛ le katoo wa kre, u nsra tia ndro na le wa, fↄna wre na Pita, na Jↄn, na Jemisi, na pↄ wre lɛ na u lo chiin. 52Mblɛ praa wa wa kro naa nyɛni na fooro lii, a Yesu na kna mbo, "Yaa nyɛni. Ŋgi na, pↄ wre, u n ku. Sni u sni." 53A pra laa mu to na Yesu tɛɛ, na pre chin na kuu pↄ wre ku. 54A Yesu na sɛ pↄ wre yii kɛ na, mna kna mbo, "Bichable, yiri!" 55A u ŋumu na ndru mu pan u nu, a wra taan mu yiri. A Yesu na yo pe pan na pe u ŋga yaka mbe u ka. 56A kra u sefɛɛnlɛ pre pe kawako, la, Yesu na pe jaari na pia shia kee ŋga ki pe kre yo ndro pan.

will be added

X\