Luka 7

1Ŋga Yesu na paara leele pre pan mna kↄ kre, wra sɛ Kapɛnↄm na. 2Sojae lafaa lefun wa naa wa chia kre na, a u tnu wa naa yaa mna yire kum kɛ na, blↄ wre naa u tnu wre kee chaa. 3Ŋga wre sojae lopom ŋmba na Yesu kee loo kre, wra Judae loplombo pre plɛ tun u pan na u paan u tnu wa tra u pan. 4A pra pan mna Yesu tali mbo, "Jande, wre blↄ ŋmba fna mbe mu sɛ ya u na. 5Ŋgi na, u wre Judae kori, mu fninyuŋgo sin mu o ŋga." 6A Yesu na kna mna taa pe na a pe kro naa shie. Kra kro chiɛri mbe pe le lopom wre katoo, a lopom wre na u nↄↄlↄ tun Yesu pan mbo, "Ni Tafun, maa muyɛ fna, ni n fna na mu le ni katoo, 7a ni n fna mbe da mu na. Kena yire wa mu paara mu ni tnu wre tra ni pan. 8Mi chↄↄ jaŋga ka jaara ni nyi, a nii wa na sojae ni ni jaara, na ni yo wa pan na u sɛ, we sɛ, a na ni yo wa pan na u pan, we pan, a na ni yo ni tnu pan na pe imi, we ki pe." 9Ŋga Yesu na blↄ wre kee kre loo kre, u kee na u pe kawako, a wra kna mna yo lenɛɛrɛ pre pra taa u kro kre pan mbo, "Kpra na ni yuu e pan, ni n da mu shↄnlie ŋga nyini nya tun, hali Israel leele nu." 10Ŋga sojae lopom wre bitumblↄ pre na ndru mu pan katoo kre, na u tnu wre saanla. 11Kee nyjɛ kↄkro kre, ki nsra mu a Yesu na sɛ chia ka na praa ki yeeri Nein, u twanfɛɛnlɛ pre na lenɛɛrɛ na taa u kro. 12Ŋga pra da chia kre jlonwee nyu na kre, na blↄ wa ku praa shie u le haa, blↄ wre chiin u lo na se, a u lo wre na pe lekuchↄ, a lenɛɛrɛ na yili mna taa chlↄ wre kro. 13Ŋga o Tafun wre na chlↄ wre nya kre, u kee na pe u pan fooro ni, a wra kna mna yo u pan mbo, "Maa nyɛni!" 14A Yesu na nyaari mna sɛ kɛ taa daka kre na, a leele mblɛ pra gboo wre tio kre na yire. A wra kna mna yo gboo wre pan mbo, "Nyanyjɛble, ni yo mu pan, Yiri!" 15A gboo wre na yiri mu tni, mnaa paara. A wra u wru mu le u lo kɛɛ. 16Fiɛrɛ na leele pre kro yii. A praa Nyiɛkpↄↄ kaan mɛɛ na yuu mbo, "Nyiɛkpↄↄ kee nyanyofun kpↄↄ yiri o nu, a Nyiɛkpↄↄ pan u leele shↄhaa." 17A kee ŋga wra pe kre na kpali Judae tra kre na tra nyjɛ yira mbra wa yire kro nu poŋgo. 18Ŋga kra pan ma kre, Jↄn twanfɛɛnlɛ pre na sɛ kee nyjɛ Yesu naa piin yire krɛrɛ bↄ u pan. 19A Jↄn na u twanfɛɛnlɛ pre shiin wↄ, mna pe tun Yesu pan na pe sɛ u wie, mbo, "Ŋu wi ŋmba u paan kre ree o na fuŋu sri hin?" 20Ŋga pra sɛ kre, a pra sɛ Yesu wie mbo, "Jↄn, ndrajefun wre, u o tun mu pan mbo, 'Ŋu wi ŋmba we pan wre, ree o na fuŋu sri hin?' " 21Kre nyjila kre nu na Yesu yambla nyininyini tra tataara mna ŋumufuɛn wↄ plɛ nu. A wra tia lenɛɛrɛ mblɛ pra fun nyiɛlɛ na, naa nyaa. 22A Yesu na kna mna yo Jↄn twanfɛɛnlɛ pre pan mbo, "E sɛ kee nyjɛ e loo mu nya yire yo Jↄn pan na fuunlo nyaa, a mblɛ pe fuuru yiri mu yire, a mblɛ na yiranyiɛrɛ nyi kre saanla, a kpoolo na ndru, a gboolo nyi, a shianfɛɛnlɛ ketaan kre ta na ndru. 23Kena ŋmba u ni shↄnli kre wo yi dwamu." 24Ŋga Jↄn bitumblↄ pre na ndru mna sɛ kre, Yesu na Jↄn kee yo lenɛɛrɛ pre pan mbo, "Ŋga e na yili mna sɛ Jↄn pan fimi lawee yire nu kre, ŋgi e naa jawa na ee sɛ nya hin? Nyaa nyjɛ fuflɛ mↄŋↄi ree? 25Kena yira ŋgi nyini pan e na sɛ wa hin? Ndro ŋmba u dodonyi chichiele le lehaa e na sɛ ee? E le, mblɛ pe dodonyi chichiele leni, mu na peyɛ lii pe tnimu nu kre, ŋunu katoo pe nyi. 26Kena e ni nyina nyjɛ pan e na sɛ wa. Nyiɛkpↄↄ kee nyanyofun wa lehaa e na sɛ ree? Kpra na e ti ni yo e pan, e na ŋmba wra wɛ Nyiɛkpↄↄ kee nyanyofun na nya. 27Ŋgi na, wre Jↄn ŋmba kee pra nyunↄ mu tɛɛ fa kre mbo, 'E le, mbe ni bituŋu tun mbe u yiɛ klu mu pan. Wre we yiɛ klu mbe sɛ kolo gbeele mu pan.' 28E ti ni yo e pan, leweele nu, ndro n wa mu wɛ Jↄn na, a nde ŋmba uu fiɛn Nyiɛkpↄↄ ŋunumu kre nu kre wɛ u na." 29Lenɛɛrɛ pre na lampoo shↄfɛɛnlɛ pre na Yesu kee yire loo, na Jↄn pe ndrɛ je, a praa yuu na Nyiɛkpↄↄ pe kprafun. 30La, Farisiie pre na Mbose mbra twanfɛɛnlɛ pre na kee ŋga Nyiɛkpↄↄ naa chaa mbe pe pe pan kre je, a pe nsra tia Jↄn na pe ndrɛ je. 31A Yesu na kna mbo, "Kena leele mblɛ nyini ni kuraa ni mbe aŋga leele mblɛ wru mbe gbun hin? A yira ŋgi sembremu pe wru ŋga hin? 32Pan pe nyi na biile mblɛ pee wa mu tni jafa lawee nu lɛ. Mbe plɛ kna mbe yo plɛ pan mbo, 'O bijam mɛɛ kↄ e pan, a e je; e n yↄ. A o kumu kpali, a e je; e n nyɛni.' 33Jↄn ndrajefun na pan na blefuni, a u nsraa simi ka na ka gboo, a e naa yuu na ŋumufↄↄn wa u nu. 34A Lewo Pↄ wre pan na lii na gboo, a e na yuu na lilio na gbↄgbↄↄ wi, a u nↄↄlↄ lɛ sisam pefɛɛnlɛ na lampoo shↄfɛɛnlɛ. 35La, Nyiɛkpↄↄ kachindɛ, u biile pe ki chini." 36Bawa Farisiie pre wa na u yeeri mbe u sɛ li u katoo. A Yesu na sɛ, mna sɛ tni lihaa wa. 37Chlↄ sisampefun wa naa wa chia kre na, ŋga wra loo titɛɛ kre nu na Yesuu wa na lii Farisiie wo wre katoo kre, wra sɛ na alabasta tlade gbolo ka ni, 38mna sɛ yire Yesu kro, mna kosie kan mna u jeelee yii, mna nyɛni, a u yotunyi na fo mna Yesu jeelee nyiŋge. A chlↄ wre na u ndra nyjuro yii mna u yotunyi yire tlu, mna Yesu jeelee shiun mna tlade kre kna mna wo u jeelee na. 39Ŋga Farisiie wo ŋmba wra sɛ na Yesu ni u katoo kre na kee ŋga nya kre, wra kna na yuu u jawala nu mbo, "Na Nyiɛkpↄↄ kee nyanyofun wi blↄ ŋmba yɛŋgɛ kaa we na ndro ŋmba nyini wi chlↄ ŋmba u kɛ taari u na ŋga chin. Ŋgi na, sisam pefun titi wi." 40A Yesu na kna mna yo blↄ wre pan mbo, "Siimↄn, nii wa na kee ka ni mbe yo mu pan." A wra kna mbo, "Nyinafun, ki yo ni pan." 41A wra kna mbo, "Bilɛ shiin plɛ pra swajinfun wa fↄlↄ li, jlewo wre na u fↄlↄ li denari lafɛɛ kunↄ, a shiin wo wre na u fↄlↄ li danarii fuloe shiin na kɛ. 42Ŋga swafun wre na nya na pia jaa yi tↄ kre, wra fↄↄlɛɛ yire ti mna pe kro shiin kɛ. Kena pre leele shiin mblɛ, ŋmbi we na swafun wre kee chaa kpↄↄ hin?" 43A Siimↄn na kna mbo, "Ni jawa na ŋmba fↄlↄ ki kpↄↄ wre wi." A Yesu na kna mbo, "Mu kpra yo." 44A Yesu na kna mna chlↄ wre le, mna yo Siimↄn pan mbo, "Mu chlↄ ŋmba nyaa? Ni pan mu katoo, la, mu n ni jeelee je. La, u yotunyi tɛɛ mu ni jeelee je, mu u ndra nyjuroe tɛɛ mu yi tlu. 45Mu n ni nyu shiun, a mu yire ŋga ni le katoo ŋga nu, chlↄ ŋmba n ni jeelee shiuun ti. 46Mu n ni ndra fa na simi ni, la, chlↄ ŋmba ni jeelee fa na tlade ni. 47Kre ndra na, ti mbe ni yo mbe mu loo, u koroo ŋga u nyina kre nyina na u sisam tataara nyjɛ u pe yire kro, ni yi ti mu u kɛ. Ŋmba pie ti mbe kɛ fiɛn kre, mu chin na u koroo kii fiɛn" 48A Yesu na kna mu yo chlↄ wre pan mbo, "Ni mu sisam ti mu mu kɛ." 49A mblɛ praa wa mu tni tebru na lihaa wa kre na kna na peyɛ wie mbo, "A ndro ŋmbi sembremu wi ŋmba, a wra sisam tii na kee ŋga hin?" 50A Yesu na kna mna yo chlↄ wre pan mbo, "Mu shↄnlie mu shↄ, kena sɛ na wejinyiŋge ni."

will be added

X\