Luka 5

1Ki ble ka Yesu na sɛ yire Genesarɛt epo kre nyu na, a lenɛɛrɛ na kan mna pan mu wɛ u na, na Nyiɛkpↄↄ kee chaa mbe loo. 2A wra kna mna mbroe wↄfɛɛnlɛ plɛ krↄɛ shiin yɛ nya, na pe yi pↄ epo kre nyu na, na krↄɛ yirefɛɛnlɛ tii yi nu mu sɛ na pe asau jee. 3A Yesu na le krↄɛ yire ka nu, na Siimↄn wo yi krↄ kre. A wra kna mna yo u pan na u krↄ kre ŋunↄ mbe ki sɛ lalaa chiɛri. A Yesu na tni krↄ kre nu mna na paara na leele pre nyina. 4Ŋga Yesu na paara leele pre pan mna kↄ kre, a wra kna mna yo Siimↄn pan mbo, "Sɛ na krↄ kre ni lawee ŋga ki juo nu, mbe ŋu na mu wolo pre sɛ e asau yire wa wa, ee mbroe wↄ." 5A Siimↄn na kna mbo, "Ni Tafun, o tnumu tun blee chiin, a o n yaka ta. La, mu nyu kee kre ndra na mbe asau kre wa." 6Ŋga pra asau kre wa lↄↄ kre nu kre, pra mbroe wↄ tataara, a asau kre na chaa knumu. 7A pra pe wolo mblɛ praa wa krↄ shiin wo kre nu pre yeeri, na pe paan ya pe na, a pra pan mna ya pe na, a pra mbroe pre wↄ krↄɛ shiin yire nyini, a krↄɛ yire naa chaa mbe tii tapan. 8Ŋga Siimↄn Pita na kee kre nya ma kre, a wra kna mna kosie kan Yesu yiɛ mbo, "Jande, ni Tafun, sisam pefun wi mi. Kena maa da ni na." 9Mbroe pre pra wↄ kre na wre na mblɛ praa wa wa kre kro pe kawako. 10Pan chↄↄ kra Siimↄn nↄↄlↄ Jemisi na Jↄn, Zebedii biile pre pe kawako. A Yesu na kna mna yo Siimↄn pan mbo, "Maa fiɛ! Mu yire aŋga na shie mu pe leele wↄfun." 11Ŋga pra pan mna krↄɛ yire pↄ lↄↄ nyu na kre, pra pe yirɛ kro ti wa mna taa Yesu kro. 12Ki ble ka Yesu naa wa kakpↄɛ yire ka na, a blↄ wa na pan u pan, na kokoe u knumu kro poŋgo, a wra pan mna to Yesu yiɛ mna u tali mbo, "Ni Tafun, na mu chaa, ti mbe ni saanla." 13A Yesu na kɛ tini mna taa u na, mna kna mbo, "Ni chaa. Kena, saanla!" Titɛɛ kre nu a kokue yire na laa blↄ wre na. 14A wra u jaari mna yo u pan mbo, "Maa shia ki yo ndro pan. La, sɛ muyɛ nyina Judae sↄfu wre pan, mu sra yirɛ nyjɛ Mbose mbra nyina yire wↄ, mbe ki mu dansiɛrɛ li." 15La, fuŋga Yesu mɛɛ na kpali kpↄↄ kuraa mu ya, a lenɛɛrɛ na kan mu pan mbe u kee yire loo, mbe u pe tra. 16La, Yesu naa pe tii na shie fimi lawee ka nu mbe sɛ nyiɛtali. 17Ki ble ka Yesu naa leele nyina, na kre nyjila kre, na Farisiie plɛ na mbra nyinafɛɛnlɛ mblɛ pra yiri Galilii na Judee chiɛ yire kro na, na Jerusalɛm na, na pan mna fni wa, a o Tafun Nyiɛkpↄↄ wre jaŋga na pan Yesu nu, a wra yambla tra. 18A bilɛ plɛ na fna wa tio dɛŋglɛ ni, mna pan na kolo chaa mbe le na u ni katoo ŋga nu Yesu na nyi kre nu, mbe u tɛɛ Yesu yiɛ. 19A imi leele pre na nɛɛ kre ndra na, pe n sra kolo ta mbe da na u ni Yesu na. Kra tia pra nduu na yaŋu wre ni katoo ŋga nu Yesu na nyi kre ndra na, mna lahoo ŋga kra Yesu tↄ kre tuu mu vru, mna yaŋu wre tre u dɛŋglɛ ni mna tɛɛ Yesu yiɛ tata. 20Ŋga Yesu na nya na leele pre shↄnlie kpↄↄ kre, a wra kna mna yo yaŋu wre pan, mbo, "Awe, mu sisam kro ki laa mu na." 21A mbra nyinafɛɛnlɛ pre na Farisiie pre na kna na peyɛ wie, mbo, "A ndro ŋmbi wi ŋmba a wra jiɛnlɛ kee yuu ma ŋga hin? Na Nyiɛkpↄↄ bↄkↄ, ndro ŋmbi we jaa sisam ti mbe kɛ hin?" 22Yesu na pe jawala kee nya, mna kna mna yo pe pan mbo, "Mni a e na kee nyjɛ jawa e ndra hin? 23Ŋga mbe yo na 'mu sisam kro ki laa mu na' yoo kii foofoo ree, ndee ŋga mbe yo na 'yiri mu nyaari yi' hin? 24La, ŋga ni chaa mbe e chin yi na, Lewo Pↄ wree jaŋga ni tra mna mbe jaa sisam ti mbe kɛ." A wra kna mu yo fna wre pan mbo, "Ni yo mu pan na yiri mu mu dɛŋglɛ wru mu sɛ mu katoo." 25Titɛɛ kre nu a blↄ wre na yiri mna u dɛŋglɛ kru leele pre yiɛ na, mna sɛ katoo, na Nyiɛkpↄↄ kaa mɛɛ. 26Kra leele pre kro pe kawako ni, a fiɛrɛ na pe yii, a praa Nyiɛkpↄↄ kaan mɛɛ na yuu mbo, "Aŋga rɛ, o kawako kee nya." 27Yire kee nyjɛ kↄkro kre, Yesu na yili fimi na mna sɛ lampoo shↄfun wa nya na uu wa mu tni u lampoo shↄ nyuŋgo. Praa u yeeri Levi. A Yesu na kna mu yo u pan mbo, "Yiri mu taa ni kro!" 28A Levi na yiri mna u yirɛ kro ti wa mna taa Yesu kro. 29A Levi na sɛ sro pe badaŋga wre titi katoo Yesu pan, a lampoo shↄfɛɛnlɛ tataara na lenɛɛrɛ na sɛ chaa mu li na pe ni. 30A Farisiie pre na pe mbra nyinafɛɛnlɛ pre naa taanri Yesu twanfɛɛnlɛ pre na mbo, "Yira ŋgi ki tia e chaa mu li mu gbↄ na lampoo shↄfɛɛnlɛ na sisam pefɛɛnlɛ mblɛ ni ŋga hin?" 31A Yesu na kna mna yo pe pan, mbo, "Mblɛ pe n na yaa kre n yambla trafun shian, fↄna mblɛ pe yaa kre. 32Ni n pan mbe paan leele mblɛ pe fraka yeeri, la sisampefɛɛnlɛ pan ni pan, mbe pe pe jawala chinɛ." 33A pra kna mna yo Yesu pan mbo, "Jↄn twanfɛɛnlɛ pre naa blefuni na nyiɛtali nyjila kro nu, a pan chↄↄ Farisiie pre twanfɛɛnlɛ pre pini, la, ŋu twanfɛɛnlɛ mblɛ lii na gboo." 34A Yesu na kna mna pe wie mbo, "Kena ŋga bijↄplↄ wree wa u nↄↄlↄ jaara ŋga, u nↄↄlↄ pre fna mbe blefun ra? 35La, nyjila ka paan mbe pe paan bijↄplↄ wre bali mbe sɛ, yire ble yire nu pie blefun." 36A Yesu na kna mna pe gbun yomini ka mbo, "Ndro n wa mbe dodoŋgi fↄŋgↄ kun mbe ki tɛɛ mbe lɛɛ tↄ, na ki pe ma kre, fↄŋgↄ kre we kla, a lɛɛ kre wa jaa tↄ chiriri mbe nyu. 37A ndro wa n wa mbe sifiŋge fↄŋgↄ le yurↄ hlɛ gbolo lɛɛ nu. Na kre ma, sifiŋge kre we kan mbe gbolo lɛɛ kre wali, mbe simi kre kna mbe wo, mbe gbolo kre kla (fawolo pre naa simi leni yurↄ hlɛ gbolo nu). 38La, sifiŋge fↄŋgↄ fna yurↄ hlɛ gbolo fↄŋgↄ nu. 39A ndro n wa mbe simi ŋga ki lɛ gbↄ mbe yiri kre kro mbra ŋga ki n lɛ chaa, we yo na lɛɛ kre nyu."

will be added

X\