Luka 4

1Kpra Ŋumu wre na pan mna le Yesu nu, a wra yili Jↄↄdan lↄↄ lawee wa, a Kpra Ŋumu wre na u bali mu sɛ fimi lawee yire nu. 2A Sutna na sɛ u nyu cha ble fuloe shiin, yire ble yire nu krɛɛrɛ u nsra yaka ka, kra tia ŋga ble yire nyu na to kre, na klo u ta. 3A Sutna na kna mna yo u pan mbo, "Na mu chin na Nyiɛkpↄↄ Pↄ wi ŋu kre, dnɛ nyjɛ ka kaari paanu mu ka mbe ni le." 4A Yesu na kna mu yo u pan mbo, "Pe ki nyunↄ mu yo na ki n pe sro chiin ki lewo tɛɛ waŋgra ŋga nu." 5A Sutna wre na Yesu na sɛ nyua gedeŋge ka ndra na, mna sɛ u nyina waŋgra ŋunumu na yirɛ nyjɛ mu chin ŋga kro titɛɛ kre nu. 6A Sutna na kna mna yo Yesu pan mbo, "Mbe mu ŋga jaŋga ŋga kro, na yirɛ nyjɛ mu nyaa ŋga kro. ŋgi na, pe ni ŋga yi yi, a ndro ŋmba ni chaa, wre mbe ŋga yi yi. 7Kena na mu kosie kan mbe ni sumi kre, mbe mu ŋga yirɛ nyjɛ kro." 8A Yesu na kna mna yo u pan mbo, "Pe ki nyunↄ mu tɛɛ na, kosie kan mu Tafun Nyiɛkpↄↄ wre chiin yiɛ, a wre chiin ki fna mbe mu sumi." 9A Sutna wre na sɛ na u ni Jerusalɛm na, mna sɛ u yire suminyuŋgo kre ndra lalaa, mna yo u pan mbo, "Na mu chin na Nyiɛkpↄↄ Pↄ wi ŋu kre, ye mu to tra. 10Ŋgi na, pe ki yo mu tɛɛ mbo, 'Nyiɛkpↄↄ we u nyjeeri bitumblↄ tun mbe pe paan mu le.' 11Mbo, 'A pie mu tↄwi na kɛnyi ni, mbe mu jele wa gbun dnɛ na.' " 12A Yesu na kna mna yo u pan mbo, "Pe ki nyunↄ na chↄↄ na maa shia mu Tafun Nyiɛkpↄↄ nyu cha." 13Ŋga Sutna wre na Yesu nyu cha kolo kro na a u nyu na to kre, wra u ti ma na nyjila ka sri. 14A Yesu na ndru mna sɛ Galilii na, na Kpra Ŋumu wree wa u nu, a u kee na kpali mu tro waŋgra kre nu kro poŋgo. 15A wraa pe nyina pe fninyinyi nu, a leele pre kro naa u kaan mɛɛ. 16Yesu na sɛ Nazrɛt na, chia ŋga na pra u pↄↄri kre na, mna sɛ pe fninyuŋgo wuuble, imi na wraa pini kre. Wra yiri mbe hlɛ tↄↄnri, 17a pra Nyiɛkpↄↄ kee nyanyofun Yisaia hlɛ kre nyaa mna le u kɛɛ, a wra hlɛ kre lawee ka nyaa, na pe nyunↄ wa mbo, 18"O Tafun Ŋumu wree wa ni kro, ki tia u ni wↄ mbe ni ketaan kre yo mbe shianfɛɛnlɛ nyina. U ni tun mbe ni paan kee ŋga kie ti mbe tinlɛ peyɛ ta kre yo, mbe fuunlo na nyaa, mbe mblɛ pe fiŋge a pra kala nyaa kre shↄ mbe pe wuu. 19Mbe paan o Tafun wre leele nyina yɛlɛ ŋga na we pe shↄ." 20Ŋga Yesu na lawee kre tↄↄnri mu kↄ kre, wra hlɛ kre tↄ mna ki le ŋmba wra pan mu u ŋga ki yi kre kɛɛ, mna tni. A leele pre praa wa fninyuŋgo wa kre kro na nyiɛlɛ kan u na na u le poŋgo. 21A wra kna mna yo pe pan mbo, "Kee kre pe nyunↄ mu tɛɛ fa kre, aŋga ki pe kpra, a e ki loo na ndie ni." 22Leele pre kro yiɛ na shↄ u na, a kee tɛɛn yire yiraa yilii u nyuu kre na pe kro pe kawako ni. A pra kna na peyɛ wie mbo, "Josɛf pↄ wre ma ŋmbaa?" 23A wra kna mna yo pe pan "Kakra n wa ki na na yaa kre kee ŋga yo ni pan fio, na yambla trafun, muyɛ tra, kee nyjɛ o loo na mu pe Kapɛnↄm na kre, fuŋga mu da ŋu titi chia, yi pe mbe o le." 24Mbo, "Kpra na ni yuu e pan na, Nyiɛkpↄↄ kee nyanyofun wa n wa a pe u shↄnli u chia fio. 25La, kpra kee ni yuu e pan kre, nyjila ŋga nu Nyiɛkpↄↄ kee nyanyofun Elaija naa wa kre, lekuchiɛlɛ naa wa Israel leele nu tataara a pra nyjeeri tↄ yɛlɛ taarɛ na nyiɛpↄ kↄↄnanu, na nyiɛ na pan, a klo na to tra kre nu kro. 26Nde Nyiɛkpↄↄ nsra tia Elaija na sɛ ya pe wa na, la, Nyiɛkpↄↄ na tia wra sɛ ya lekuchlↄ wa na, wra yiri Zarifat na. 27A Nyiɛkpↄↄ kee nyanyofun Elaisha nyjila kre, yiranyiɛrɛfɛɛnlɛ tataara naa wa Israel leele nu, nde u nsra pe wa tra, la, Naaman ŋmba wra yiri Siria na kre chiin wra tra." 28Ŋga leele mblɛ praa wa fninyuŋgo wa kre na kee yire loo kre, krↄ na pe kun kro. 29A pra taan mna yiri, mna u krↄ ŋunↄ mna yili na u ni chia kre na, mna sɛ na u ni nyua ŋga na pra pe chia kre sin kre mana na, mbra u ŋunↄↄ wa nyua krↄ wee ka nu. 30A Yesu na nyaari mna tro leele pre nu mna sɛ. 31A wra yiri wa mna sɛ Galilii chia ŋga pe yeeri Kapɛnↄm kre na, mna sɛ paara mu pe nyina Judae wuuble ka nu. 32A kee yire wra pe nyina yire na pe pe kawako ni. Ŋgi na, wra paara na jaŋga ni. 33Ŋumufↄↄn naa wa blↄ wa nu fninyuŋgo wa, a wra paara gedeŋge mbo, 34"Yesu ŋmba mu yiri Nazrɛt na, kee ŋgi ni wre na ŋu nyi hin? O klahaa mu pan ree? Ni chin ndro ŋmba sembremu wi ŋu, ŋu wi Nyiɛkpↄↄ Pↄ cheche wre." 35A Yesu na kna mna fuu u na mbo, "Pieri mu yili u nu mu sɛ." A ŋumufↄↄn wre na blↄ wre chan tra leele pre yiɛ na, mna chin mu yili u nu mu sɛ, a yaka nsra u ta. 36Kra leele pre kro pe kawako ni, a pra kna mna na peyɛ wie mbo, "Yira ŋgi kee nyini yi ŋga hin? A ndro ja mu fuu jaŋga ni ŋumufↄↄn na a ki yili lewo nu ŋga hin?" 37Titɛɛ kre nu, Yesu kee na kpali tra kre nu kro poŋgo. 38Yesu na yili fninyuŋgo wa mna sɛ Siimↄn katoo, kre nyjila kre na kabro Siimↄn nafun chlↄ yii, a pra u kee yo Yesu pan. 39A wra sɛ yire u jaara mna fuu yira kre na. Titɛɛ kre nu a kabro kre na laa chlↄ wre na, a wra saanla, a wra yiri mna sro pe mna pe ŋga. 40Ŋga yila na kↄ kre, mblɛ katoo yambla nyininyini na nyi kre na pe tio mna pan mu Yesu ŋga. A wra kɛnyi taataa pe kro na nununu mna pe tra kro. 41Ŋumufuɛn na yili leele nu tataara, a praa gble leni na yuu mbo, "Ŋu wi Nyiɛkpↄↄ Pↄ wre." A Yesu na fuu pe na, u nsra tia pra paara. Ŋgi na, pra chin na wre wi Kristo wre. 42Ŋga nyiŋge na se kre Yesu na yili wa mna sɛ fimi lawee waa ka nu. A lenɛɛrɛ pre na u cha, mna sɛ u lawee. Ŋga pra u nya kre, pe nsraa chaa mbe u sɛ haka na. 43La, Yesu na kna mna yo pe pan mbo, "Ki fna mbe ni Nyiɛkpↄↄ ketaan kre yo mbe tro chiɛ yɛ na na. Kre ndra na Nyiɛkpↄↄ yila mu ni tun." 44A wra nyaari mna ketaan kre kpali pe fninyinyi yire nu mu tro.

will be added

X\