Luka 24

1Ŋga nyiŋge na se Aliɛri ble bnimi pupu kre, chiɛlɛ pre na pe tuwe ndiom tɛɛn yire pra pe yire wru mna sɛ faŋga kre lawee. 2Ŋga pra da wa kre, na pe dnɛ kre gbila mu laa wee kre nyu na. 3La, ŋga pra jle wee kre nu kre, pe nsra Yesu gboo wre nya. 4Ŋga pra yire na ki jawa kre, titɛɛ kre nu to, a bilɛ shiin plɛ na pan mna yire pe jaara, mna dodonyi finyi prupru le, yira chiɛnri. 5Fiɛrɛ na chiɛlɛ pre yii, a pra yiɛ juule tra, a bilɛ shiin pre na kna mna pe wie mbo, "Mni a e na ndro ŋmba u le chaa gboolo nu hin? 6U n wa mna! U nyi! E kee ŋga wra yo e pan Galilii na kre sↄↄnri." 7Mbo, "Pie Lewo Pↄ wre wↄ mbe le sisampefɛɛnlɛ pre kɛɛ, mbe pe u kan kanyana kumu kaan na, a u ble taarɛ ble na we nyi." 8Bawa pra Yesu kaalɛɛ nyjɛ wra yo pe pan yire sↄↄnri. 9A pra flo faŋga kre jaara, mna sɛ mandiɛ kre kro yo u twanfɛɛnlɛ kɛmbↄnunu pre, na leele hamblɛ pre pan. 10Chiɛlɛ mblɛ pra sɛ mandiɛ kre yo bitumblↄ pre pan na lɛ, Maria Magdalene, na Joana, na Maria, Jemisi lo. Chiɛlɛ plɛ na ya pe na. 11Kee kre na pe pe na mbuura yi, ki tia pe nsra ki shↄnli. 12A Pita na yiri mna fɛ mu sɛ faŋga kre lawee, mna sɛ ja mu ki lam jle, mbↄfiŋge ŋga ni pra Yesu pↄ kre chiin wra nya wa, kee kre na u pe kawako, a wra ndru mna sɛ katoo. 13Ki ble kre lam, na u twanfɛɛnlɛ pre shiin shie see chia ka na, praa ki yeeri Emaus, na kre na Jerusalɛm we pe kↄnsni kↄↄnashin. 14Ŋga praa shie kre, kaalɛɛ nyjɛ yira pe yire kee praa yuu na shie. 15Ŋga praa yire kee yire yuu na peyɛ ni na shie kre, Yesu na pan mu chaa pe nu, a pe kro na chaa na shie. 16Pra u nya, la, pe nsra chin na Yesu wi. 17A wra kna mna pe wie mbo, "Kaalɛɛ nyji e yuu na shie ŋga hin?" A pra yire na fooro yiɛ ni na u le. 18A pe nunu wa praa yeeri Cleopa, na kna mna kee kre nyu wↄ mbo, "Kala ŋga ki pan Jerusalɛm na ble shiin ŋga nu ŋga, kena ŋu chiin wi fuŋu wa, a mu n ki loo ree?" 19A Yesu na kna mbo, "Yira ŋgi kala ki pe wa hin?" A pra kna mna yo u pan mbo, "Kaalɛɛ nyjɛ yi pan Yesu Nazrɛt wo wre na kre. Nyiɛkpↄↄ kee nyanyofun na wi, a wraa kekpↄɛ pini na paara na jaŋga ni, a Nyiɛkpↄↄ na leele kro u shↄnli. 20A o sↄfue loplombo pre na Judae loplombo pre u wↄ mu ŋga na pe sɛ u gbo, a pe sɛ u kan kanyana kumu kaan na. 21La, o naa kaan na wre we pan mbe Israel leele shↄ pe tnimu nu. A na o kee ŋga o yuu ŋga tɛɛ mbee na kre, ŋga pe u gbo aŋgaa ki ble taarɛ. 22A chiɛlɛ mblɛ wre na pre nyaari kre plɛ pan mu kee ka yo o pan, a ki o fo. Pe sɛ faŋga kre lawee bnimi ŋga, 23mu sɛ u gboo kre cha mu la wa, a pe ndru mu pan mu ki yo o pan, mbo, hali pe nyjeeri bitumblↄ nya wa, a pe yo na u nyi. 24A o wolo pre plɛ sɛ wa, mu sɛ ki nya ma yɛŋgɛ, a pe n u nya faŋga kre nu." 25A Yesu na kna mna yo pe pan mbo, "Mni a e daŋga ma hin? E ndiile kan. Kee nyjɛ Nyiɛkpↄↄ kee nyanyofɛɛnlɛ pre na yo e pan yire krɛrɛ, e n yi shↄnli. 26Nyiɛkpↄↄ kee nyanyofɛɛnlɛ pre nsra yo na ki fna mbe Kristo wre yire kaalɛɛ nyjɛ krɛrɛ nya tun mbe chiin sɛ u yɛnyiŋge kre nuu?" 27A Yesu na pe nyina wre titi kee nyjɛ Mbose na nyunↄ u hlɛ yire nu, na u kee nyjɛ Nyiɛkpↄↄ kee nyanyofɛɛnlɛ pre na nyunↄ mu tɛɛ yire kro. 28Ŋga pra mbra seechia ŋga na praa shie kre na kre, a Yesu na pe na u chaa mbe troo sɛ yiɛ. 29A pra u yii mna yo u pan mbo, "Jande, maa sɛ ma, ble wↄ mu kↄ. Kena o sɛ katoo." A wre na pre na sɛ katoo. 30Wre na pre na tni na lii. A wra paanu wru, mna ki dwan, mna ki pile mu pe ŋga. 31Titɛɛ kre nu to, a Nyiɛkpↄↄ na pe nyiɛlɛ nyaa, a pra u nya mna chin na Yesu wi. Titɛɛ kre nu to, a wra fun pe yiɛ na. 32A pra kna na yuu peyɛ pan mbo, "Nyjila ŋga ni u o nyina u kee yire pe nyunↄ mu tɛɛ kolo wa kre, na ki pe yɛshↄↄrↄ ni." 33Titɛɛ kre nu to, a pra yiri mna sɛ Jerusalɛm na, pra sɛ bitumblↄ kɛmbↄnunu pre, na leele hamblɛ pre da, na pe fni titɛɛ. 34Na yuu mbo, "O Tafun wre nyi yɛŋgɛ. U uyɛ wↄ mu Siimↄn nyina." 35Pre shiin pre na kee ŋga pe nya kolo kre, imi pra Yesu nya mna u chin ŋga wra paanu pile mu pe ŋga yire krɛrɛ yo pe pan. 36Nyjila ŋga nu praa kaalɛɛ yire yuu pe pan kre to, Yesu wre titi na pan mu yire pe lalaa mu yo pe pan mbo, "Nyiɛkpↄↄ we e ŋga wejinyiŋge." 37A fiɛrɛ na pe yii. Pra seeri, mnaa jawa na pe gboo nya. 38A wra kna mna yo pe pan mbo, "Mni a fiɛrɛ e yii, a e jawala pe shiin ŋga hin? 39E ni kɛ lam na ni jeelee le, e ni yii e le, e chin na mi wi. Gboo n wa na wejikaara na kajle ni, imi na ni nyi mu yire ŋga." 40Ŋga wra yo ma kre, a wra pe nyina u kɛnyi, na u jeelee yire. 41Kee kre na pe pe yɛɛshↄↄrↄ na kawako, ande na pe n ta mu u shↄnli peii mu kↄ. A wra kna mna pe wie mbo, "Yakaa wa e pan mna mbe e ka ree?" 42A pra mbro sↄↄ wo wa peeri mna u ŋga, a wra ka pe yiɛ na. 44A Yesu na kna mna yo pe pan mbo, "Yire kee nyjɛ, nyjila ŋga ni ndaa wa e jaara kre, ndaa yi yo e pan, na ni kee yire Mbose nyunↄ u mbra yire nu mu tɛɛ kre, na nyjɛ Nyiɛkpↄↄ kee nyanyofɛɛnlɛ pre nyunↄ kre, na nyjɛ yii wa mɛɛ hlɛ kre nu yire kro we pe yɛŋgɛ." 45A wra pe jawala nyaa a pra kee yire pe nyunↄ mu tɛɛ yire nↄↄ loo. 46A wra yo pe pan mbo, "Pra ki nyunↄ mu tɛɛ fa na, Kristo wre fna mbe kala nya, mbe pe u gbo, mbe u nyi u ble taarɛ ble na mbe yili kuulo nu. 47Mbe u mɛɛ kre ti mbe jawala chinɛɛ, na sisam tinkɛɛ kee kre, mbe ki kpali waŋgra kro nu, mbe yire Jerusalɛm na. 48Yire ee kee yire krɛrɛ dansiɛrɛ li. 49A yira ŋga ni lɛ na yo na we e ŋga kre, mbe ki tun mbe ki pan e pan, la, yaa shia sɛ haka, e tni Jerusalɛm lam, mbe jaŋga ŋga kie yiri nyjeeri kre pan e nu tun." 50A wra yili na pe ni chia kre na mna sɛ da na pe ni Bɛtani na, mna kɛnyi yire nyjeeri mna pe dwan. 51Ŋga wraa pe dwan kre to, a pra u wru na shie nyjeeri. 52A bitumblↄ pre na kosie kan mna u sumi na yɛshↄↄrↄ kpↄↄ ni, mna ndru mna sɛ Jerusalɛm na. 53A nyjila kro nu, praa wa suminyuŋgo wa na Nyiɛkpↄↄ kaan mɛɛ.

will be added

X\