Luka 23

1Ŋga kra pan ma kre, leele pre kro na yiri, mna Yesu wru mna sɛ na u ni Pilato yiɛ. 2Mna sɛ kaalɛɛ fnɛ mu taa u na mbo, "O blↄ ŋmba yii na u o leele fana, na yuu pe pan na pia na tↄↄ toni mbra waŋgra lopom Kaisari kaan, na yuu na Kristo wi wre, a ŋunu wi." 3A Pilato na kna mu u wie mbo, "Ŋu wi Judae ŋunu wre kree?" A Yesu na kna mbo, "Kre ŋu titi yuu kre." 4A Pilato na kna mna yo sↄfue loplombo pre, na lenɛɛrɛ pre pan mbo, "Ni n nya sisaa ŋga blↄ ŋmba pe." 5La, pra paara na yɛnyiɛ ni mbo, "U kee yire u nyina kre ndra na, u pan na kakrↄ ni Judea leele nu. Galilii na wra nↄↄhle, a fuŋgaami u da mna." 6Ŋga Pilato na kre kee ŋga loo kre, a wra u wie, na Galilii ndro wi Yesu rɛ? 7Ŋga Pilato na chin na ŋunu Hɛrodi tra nu Yesu yiri kre, wra tia pra sɛ na u ni ŋunu Hɛrodi pan. Kre nyjila kre chↄↄ na wree wa Jerusalɛm na wa. 8Ŋga ŋunu Hɛrodi na Yesu nya kre, u yiɛ na shↄ. Ŋgi na, na u u chaa mbe nya fa. Ŋgi na, na u u kee loo, na kaan na we u kawako kee yire ka nya. 9Ki tia, wra Yesu wie kaalɛɛ mna mu, la, Yesu nsra ka nyu wↄ. 10Na Judae sↄfue loplombo pre, na mbra nyinafɛɛnlɛ pree wa mu yire na kaalɛɛ badɛnyi yuu na taari u na. 11A ŋunu Hɛrodi na u sojae naa u piin na tɛɛ, na u le na lewaa wi, a Hɛrodi na tia pra u le dodoŋgi titnↄŋↄ chichie ka, mna ndru mna tia pra sɛ na u ni Pilato pan. 12Ki ble kre lam ŋunu Hɛrodi na Pilato na nↄↄlↄ yii, jle kre, na pe n tna na peyɛ ni. 13Ŋga kra pan ma kre, Pilato na Judae sↄfue loplombo pre na, Judae loplombo pre, na leele pre kro yeeri a pra pan mu fni, 14a wra yo pe pan mbo, "Yire e pan mu ni ŋga blↄ ŋmba, na u paara na leele pre fana, a ŋga ni u wie e yiɛ na kre, e kee nyjɛ e yo mu taa u na yire krɛrɛ, u n ka pimi li. 15Pan chↄↄ Hɛrodi nya na u n pimi li, a u ndru mu tia pe pan na u ni mu o ŋga. Blↄ ŋmba n kee ka pe, a ki fna ni u gbun kumu pimi ni. 16Kena mbe ti pe u frↄ fotro ni, mbe ni u wa mbe u sɛ." 17Na pe klɛntro ble lii kre, ki fna mbe Pilato ndro nunu wↄ nyuŋgo mbe wa, ŋmba leele pre chaa. 18La, leele pre kro na gble le mbo, "E blↄ ŋmba gbo. E Barabas wↄ e o ŋga." 19Na Barabas kakrↄ ka tun chia kre na mu ndro gbo, a pra yila ki na mna u yii mu sɛ le nyuŋgo. 20Pilato naa chaa mbe Yesu wa. Kra tia wra leele pre yeeri na, mna paara pe pan. 21La, pra je na gble leni kpↄↄ na yuu mbo, "E u kan kanyana kumu kaan na." 22A wra ndru mna paara pe pan taarɛ wo na mbo, "Yira ŋgi sisaa u pe ma hin? U n sisaa ka pe a ni nya, a ki tia u fna kum ni. Kena mbe ti pe u frↄ fotro ni, mbe ni u wa mbe u sɛ." 23A pra kro na gble leni kpↄↄ na yuu na pe Yesu kan kanyana kumu kaan na. Imi na praa gble kre leni kre na tia Pilato na li pe wo kre na, 24mna Yesu gbun pimi ni. 25A wra Barabas linkufun wre wↄ mu wa mna Yesu wↄ mu pe ŋga imi pre titi naa chaa. 26Ŋga pra Yesu yii na shie kre, pra blↄ wa fni, praa u yeeri Siimↄn, a wra yiri Kireni na, na Jerusalɛm na wa u shie, a pra u yii mna u tio Yesu kanyana kum kaan kre, a wra taa na ki ni Yesu kro. 27Lenɛɛrɛ na taa u kro na nyɛni na u kaan, chiɛlɛ na chaa pe nu. 28A Yesu na kna mna yo pe pan mbo, "Jerusalɛm chiɛlɛ, yaa ni nyɛni, la, e na yire na e biile nyɛni. 29Ble yɛ paan, yire nu leele we na yuu mbo, 'Chiɛlɛ mblɛ pe n na siiri, a pe n biile ni, a biile n na ŋgoorii pe pan kre wo yi dwamu.' 30Yire ble yire nu leele we na yuu nyuɛ pan na, 'E klↄ e pan e o fɛɛri.' 31Kena na pe tiŋge nyiŋge ŋga pe imi, kena tiŋge waa kre, mni pie kre pe hin?" 32Bilɛ shiin plɛ na sisam kpↄↄ pe, a pra pe yii mna ya Yesu na, mbe sɛ pe gbo. 33Pra da lawee ka nu, praa ki yeeri Lewo Ndra Kajle. Bawa pra Yesu kan kanyana kumu kaan na. Pra sisampefɛɛnlɛ shiin pre wa kan Yesu kalie, mna nunu kan u kamɛŋɛ. 34A Yesu na kna mbo, "Ndoo, pe sisam ti mu pe kɛ. Na pe n chin kee ŋga pe pini." A sojae pre na Yesu yirɛ nyjɛ wra le yire yↄↄlɛ mna kɛɛn tɛɛ mna chin ŋga pie ta. 35A leele pre na yire na kaalɛɛ nyjɛ yi pini yire le, a Judae loplombo pre naa u pini na tɛɛ mbo, "Wraa plɛ shio, na Nyiɛkpↄↄ Kristo ŋmba u wↄ wre wi, e ti mbe u uyɛ shↄ." 36A sojae pre naa u pini na tɛɛ. A pra pan mna u ŋga simi susrom ka na u gbↄ, 37mna yo u pan mbo, "Na ŋu wi Judae ŋunu wre kre, kena mu yɛ shↄ." 38Pra yira ka nyunↄ mna kan u ndra nyjeeri mbo, "Judae ŋunu wre wi kre." 39Sisampefɛɛnlɛ pre pra kan mna mbra Yesu na kre nunu na kna mna fuu Yesu na mbo, "Ŋu ma Kristo wre kree? Muyɛ shↄ, mu o shↄ mu ya." 40A haŋu wre na kna mna u ŋmbrↄ wre yiɛ kee yo u pan mbo, "Mu n na Nyiɛkpↄↄ fiɛ mbe? Kanyana nunu o kro nyaa kre. 41O wo ŋga fna na o ni. Ŋgi na, kee ŋga o pe ndra na pe o pini ma, la wre blↄ ŋmba n sisaa ka pe." 42A wra kna mna yo Yesu pan mbo, "Na maa mu ŋunumu kre li, jande, mu ni sↄↄnri." 43A Yesu na kna mna yo u pan mbo, "Kpra na ni yuu mu pan na, aŋga lam, mi na ŋu we tni Paradisi Nyiɛkpↄↄ lawee chichie kre nu." 44Kra gbun kie pe nyjila kɛmbↄshiin lafo na, a ndram na wↄ lawee kro nu, mna sɛ su nyjila taarɛ. 45Nyjila ŋga nu ndram na wↄ lawee kro nu kre, yoŋgo ŋga pra tɛɛ mna suminyuŋgo kre yↄ shiin kre na peeri shiin. 46A Yesu na fuu kpↄↄ mbo, "Ndoo, mu kɛɛ ni ni ŋumu wru mu le." Ŋga wra yo ma to, mna ŋu haŋa. 47Ŋga sojae lopom wre na kee ŋga ki pe kre nya kre, wra Nyiɛkpↄↄ ŋga mɛɛ, mna kna mbo, "Kpra na, lewo chiriri wi blↄ ŋmba yɛŋgɛ." 48Leele mblɛ pra fni wa na kala le kre, ŋga pra kee ŋga kra pe kre nya kre, pra kɛnyi taa taa gbun na mna ndru mu sɛ katoo na fooro ni. 49A Yesu nↄↄlↄ na Galilii chiɛlɛ mblɛ pra taa u kro kre na yire haalee na kala ŋga ki pini kre le. 50Blↄ wa naa wa praa u yeeri Josɛf, a wra yiri Judae chia ka na praa ki yeeri Arimatia. Wra pe pe kalalihaa loplombo pre wa, a wra pe kprafun na ndro chichie. 51Wra pe lopom, nde Judae pre kaalɛɛ nyjɛ praa pini kre, wre na pre jawala nsraa nunu, a wraa Nyiɛkpↄↄ ŋunumu kre paan sri. 52Wre blↄ ŋmba na sɛ Pilato pan mna sɛ u tali Yesu gboo. 53Wra u gboo kre kↄ kaan kre na, mna u fo na mbↄfiŋge ni, mna sɛ u le dnɛ wee ka nu, na pe n da mu ndro le wa tun. 54Na ki ble kre pe Ajuan, mbe nyiŋge sɛ Judae wuuble. 55Chiɛlɛ mblɛ pra taa Yesu na mu yiri Galilii na kre, na taa u na mna sɛ faŋga kre lawee nya. Imi na wra u sniŋge krɛrɛ, pra ki nya. 56A pra ndru mna pan katoo, mna pan mu tuwe ndiom tɛɛn yɛ pe, mbe sɛ u gboo kre fa. Ŋga nyiŋge na se kre, wuuble na yi, a pra wuu Mbose mbra kolo na.

will be added

X\