Luka 22

1Ble ŋga nu pe nsraa yiisi paanu kaa kre naa dani, kre praa yeeri klɛntro ble kre. 2A Judae sↄfue loplombo pre na Mbose mbra nyinafɛɛnlɛ pre naa kolo chaa, ŋga na pie tro mbe Yesu gbo mbe leele wa chin. Ŋgi na, praa fiɛ leele pre na. 3Kre nyjila kre nu, Sutna na le Judas ŋmba praa yeeri Iskariↄt wre nu. Wra pe Yesu bitumblↄ kɛmbↄshiin pre wa. 4Wra sɛ paara Judae sↄfue loplombo pre, na suminyuŋgo prosie loplombo pre pan, mna pe nyina kolo ŋga na we Yesu wↄ mbe pe ŋga. 5A pe yiɛ na shↄ, a pra u le gbun na pie u ŋga swa. 6A wra ki nↄↄ loo, mna kolo ŋga na we tro mbe u wↄ mbe pe ŋga cha, mbe lenɛɛrɛ pre wa chin. 7Ble ŋga nu pe nsraa yiisi paanu kaa kre na da, mbe pe klɛntro ble sra mbↄↄ wre gbo. 8Yesu na Pita na Jↄn tun mbo, "E sɛ klɛntro ble sro kre pe mbe o paan li." 9A pra kna mna u wie mbo, "Sena mu chaa mbe o sɛ sro kre pe hin?" 10A wra kna mna yo pe pan mbo, "E le, na e le chia kre na, blↄ wa we e fni, na nyumu chↄkoo ni ndra na. E taa u na e sɛ le katoo ŋga nu we le kre nu. 11Na e le kre, e yo katoofun wre pan na, 'O Nyinafun wre yo o paan mu wie na sena fumblↄ nyuŋgo ŋga nu wre na u twanfɛɛnlɛ pre we klɛntro ble kre li nyi hin?' 12We e nyina abansru nyuŋgo kpↄↄ ka nyjeeri. Pe ki lam san kama. E bawa gbeele." 13A pra sɛ, yira kro nya mna sro kre pe na u sri. 14Ŋga pe sro kre li nyjila na da kre, Yesu na u twanfɛɛnlɛ pre na sɛ tni mbe li. 15A Yesu na kna mna yo pe pan mbo, "Ki tna ni pan na mi na yire we klɛntro ble sro ŋga li, mbe ni kanyana kre chiin da. 16Ŋgi na, ni yuu e pan na, mba kre sro ŋga ka li na, fↄna ŋga ble ki titi kre we pe Nyiɛkpↄↄ ŋunumu kre nu." 17A Yesu na gbↄyira wru, na tre sɛnyi simi ni mna Nyiɛkpↄↄ ŋga mboo, mna kna mbo, "E shↄ e gbↄ, e eyɛ ŋga. 18Ni yuu e pan na, mba tre sɛnyi simi ŋga ka gbↄ na, fↄna Nyiɛkpↄↄ ŋunumu kre nu." 19A wra paanu wru, mna Nyiɛkpↄↄ ŋga mboo, mna ki pile mna le pe kɛɛ, mna kna mbo, "Ni wejikaara yi kre, a ndaa e kaan ki yi, e ki tɛɛ e na ni sↄↄnri." 20Pan kra nyi, ŋga pra li mu kↄ, a wra gbↄyira kre bali mna kna mbo, "Gbↄyira ŋga yi Nyiɛkpↄↄ nyu nunu fↄŋgↄ kre, a yire ndra na pe yila mbe ni nyimi kre kna mbe wo. 21A e le, ŋmba we ni wↄ mbe ŋga kree wa mu tni mna. 22Lewo Pↄ wre we ku imi na Nyiɛkpↄↄ ki yo kre. La, ŋmba we u wↄ mbe ŋga kre, ufun atɛ." 23A pra kna na peyɛ wie, na pe ŋmbi haa we kre kee ŋga pe hin? 24Kakra ka na yiri twanfɛɛnlɛ pre nu na pe ŋmbihaa wi pe lekpↄↄ hin? 25A Yesu na kna mna yo pe pan mbo, "Waŋgra leele mblɛ pe n Nyiɛkpↄↄ chin kre, pre pe ŋunumu jaŋga lii pe leele na, a leele na pe yeeri bonyaafɛɛnlɛ 26A yire rɛ, pan ma ki nyi e nu. La, ŋmba u wɛ e na kro kre, ki fna u uyɛ pe fiɛn e lalaa. Mbe e lekpↄↄ pe e sumifun. 27Leele shiin mblɛ ŋmbi u pe lekpↄↄ hin? Ŋmba u tni mbe li ree, ndee ŋmba u sro piin wi hin? Ŋmba u tni mbe li wi, la, mii wa e lalaa na sumifun wi. 28Yire tni ni jaara ni kanyana nyjila nu. 29Imi na ni Lɛ ni ŋga ŋunumu kre, pan chↄↄ ni e wↄ, 30mbe mi na yire chaa mbe li ni ŋunumu kre nu. A ee tni ŋujↄɛn na, mbe Israel sele kɛmbↄshiin yire kala li." 31Yesu na kna mbo, "Siimↄn! Le, Sutna kolo cha mbe e pe mbe le, we e pe imi na chlↄ yirɛ foo, mbe yi bie wↄ yi fue nu kre. 32La ŋu Siimↄn ni nyiɛtali mu mu ŋga, mbe mu shↄnlie wa shↄ mbe to, a na maa mu jawala chinɛ mu ndru mu pan ni pan kre, mbe mu mu wolo pre gbeŋmba." 33A Siimↄn na kna mbo, "Ni Tafun, ni niyɛ kna, na pe shie sɛ mu le nyuŋgo, ndee mbe sɛ mu gbo kre, mbe ka sɛ." 34A Yesu na kna mbo, "Pita, ni yuu mu pan, aŋga, ŋgoplↄ wa nyɛni, na mu kaala na mu n ni chin gbee nununu taarɛ." 35A Yesu na kna mna yo pe pan mbo, "Ŋga ndaa e tun, mna yo e pan na yaa shia sɛ na swa le yira, na bↄtↄ, na kpawrɛ ni kre, yaka na e shian ree?" A pra kna mbo, "Yaka nsra o shian." 36A Yesu na kna mbo, "Fuŋga rɛ, ŋmba uu wa na swa le yira, ndee bↄtↄ ni kre, u ki wru. A ŋmba u n brↄfiɛn ŋunↄ wi wo ni kre, ufun u u dodoŋgi wↄ u prɛ, mbe sɛ ka lↄ. 37Ŋgi na, ni yuu e pan na, ni kee ŋga pe nyunↄ mu tɛɛ na, pra u tↄↄnri mu chaa sisampefɛɛnlɛ nu kre fna mbe pe yɛŋgɛ. Ŋgi na, ni kee nyjɛ pe nyunↄ yire kro nyjila da." 38A pra kna mbo, "O Tafun, le, brↄfiɛn ŋunↄ wi wee shiin yi kre." A wra kna mna yo pe pan mbo, "Yire shiin we da." 39A Yesu na yili chia kre na, imi na wraa pini nyjila kro nu kre, mna sɛ Olive nyua kre na, a u twanfɛɛnlɛ pre na u kↄŋgↄ ni. 40Ŋga wra da lawee ŋga nu wraa shie na jiin kre, a wra yo u twanfɛɛnlɛ pre pan mbo, "E nyiɛtali mbe yaa to nyu chaara kee nu." 41A Yesu na tini mu yili pe nu chiɛri, mna kosie kan, mna nyiɛtali mbo, 42"Ndoo, na mu chaa ti mbe kanyana gbↄyira ŋga ni klɛɛ tro. Imi na mi chaa ma, la, imi ŋu chaa ki pe." 43A Nyiɛkpↄↄ nyjeeri bituŋu na uyɛ wↄ mna u nyina, mna u le faŋga. 44Fooro kpↄↄ na u yii, a kra tia wra nyiɛtali kpↄↄ na nyibinyiɛ ni, a u kafue na pe na nyimi yi woni tra. 45Ŋga wra nyiɛtali mu kↄ kre, wra pan mna u twanfɛɛnlɛ pre na nyi kre, na fooro pe yii, a pra ŋunu. 46A wra kna mna yo pe pan mbo, "Mni a e sni na ŋunu hin? E yiri e nyiɛtali, mbe yaa to penlee nu!" 47Yesu naa wa mu yire na paara to, a lenɛɛrɛ plɛ na pan wa. Twanfɛɛnlɛ kɛmbↄshiin pre nunu ŋmba praa yeeri Judas kre wra yiɛklu na pe ni. A wra flo mu da Yesu na, mbe u nyu shiun. 48A Yesu na kna mna yo u pan mbo, "Judas, nyu shiun ni mu pan mbe Lewo Pↄ wre wↄ mbe ŋga ra?" 49Ŋga twanfɛɛnlɛ mblɛ praa wa mu taa Yesu kro kre na kee ŋga ki paan kre nya kre, a pra kna mna yo Yesu pan mbo, "O pe chile na o brↄfiɛnlɛ yire ni ree?" 50A twanfɛɛnlɛ pre nunu na sↄfue loplombo pre wa tnu ndie kalie wo chieri mu kun. 51A Yesu na kna mbo, "Yaa pe ma!" A Yesu na u ndie kre yii mna u tra, 52mna kna mu yo sↄfue loplombo pre, na suminyuŋgo prosie loplombo, na Judae loplombo mblɛ pra pan u yiihaa kre pan mbo, "E pan ni pan brↄfiɛnlɛ na vɛɛn ni na kokↄↄn yiihaa e pan. 53Blenyini ŋga, mi na yire lɛ suminyuŋgo wa, e n ni yii wa. La, e nyjila ki da, a Sutna na u wↄmu jaŋga lii." 54A pra Yesu yii mna sɛ na u ni sↄfu lopom titi wre katoo. Pita na taa pe kro, mna lalaa wa wre na leele pre pan. 55Ŋga leele pre na sɛ kanhun gbɛɛri katoo kre lalaa na yuai kre, Pita na sɛ tni mu chaa pe nu. 56A tnu bichable wa na Pita nya na u tni kanhun kre jaara, a wra yiɛ kan u na mna kna mbo, "Blↄ ŋmba u chaa leele mblɛ pra taa u kro kre nu." 57A Pita na kaala mna kna mbo, "Ndro ŋmba kee mu yuu ŋga kuraa ni n u chin." 58Kie pe maa, a blↄ wa na u nya na, mna kna mu yo u pan mbo, "Yesu leele pre wa wi ŋu." A Pita na kaala mna kna mbo, "Ndoo, ni n chaa pe nu." 59Kie pe nyjila chiɛri ka kↄkro kre, lefuŋu na pan mna paara pↄↄrↄ ni mbo, "Kakra n wa ki na, blↄ ŋmba, u chaa leele pre nu yɛŋgɛ. Ŋgi na, Galilii ndro wi." 60La, Pita na kna mbo, "Awe, kala ŋga mu yuu ŋga, ni n ki nↄↄ loo." Ŋga wraa wa mu yire wa na paara kre to, a ŋgoplↄ na nyɛni. 61A o Tafun wre na kna mu Pita yiɛ le. A Pita na kee kre o Tafun na yo kre sↄↄnri, na u klu mu yo u pan na, "Ŋgoplↄ wa nyɛni aŋga, na mu kaala na mu n ni chin gbee nununu taarɛ." 62A Pita na yili mna sɛ nyɛni chichie. 63Bilɛ mblɛ pra Yesu yii kre naa u pini na tɛɛ, na u gbuun, 64mna u yiɛ pↄ mu tↄ, na yuu u pan mbo, "Ŋmba u mu gbun nya mu yo o pan!" 65A pra kenɛɛrɛ yo mu u taanla. 66Ŋga nyiŋge na se kre, Judae loplombo pre, na sↄfue loplombo pre, na Mbose mbra nyinafɛɛnlɛ pre kro na sɛ fni, a pra pan na Yesu ni mu yire pe lalaa, a pra yo u pan mbo, 67"Na ŋu wi Kristo wre, kpra yo o pan." A wra kna mna yo pe pan mbo, "Na ni ki kpra yo e pan kre, yaa ni shↄ mbe li, 68a na ni e wie kee, yaa ki nyu wↄ. 69La, mu yire aŋga na shie, Lewo Pↄ wre we tni jaŋgafun Nyiɛkpↄↄ wre kalie." 70A pe kro na kna na u wie poŋgo mbo, "Kena Nyiɛkpↄↄ Pↄ wi ŋu ree?" A wra kna mna yo pe pan mbo, "Yire titi ki chin, na ki yuu." 71A pra kna mbo, "Yira ŋgi dansiɛrɛ kee o chaa na hin? O kee kre kro loo mu yili wre titi nyuu."

will be added

X\