Luka 20

1Ki ble ka, Yesu naa leele nyina na ketaan kre yuu pe pan suminyuŋgo wa. Judae sↄfue loplombo pre na mbra nyinafɛɛnlɛ pre, na chia loplombo pre na pan, 2mna u wie mbo, "Ŋmbi u mu ŋga kolo mna yire kee nyjɛ pini mna hin? O nyina ŋmba u mu ŋga kre jaŋga kre." 3A Yesu na kna mu yo pe pan mbo, "Mbe e wie kala nunu na chↄↄ, e ki nyu wↄ. 4Jↄn ndra jee kre, Nyiɛkpↄↄ pan kra yiri ndee, lewo pan hin?" 5A pra ki kna na peyɛ ni, mna kna mbo, "Na o yo na Nyiɛkpↄↄ pan kra yiri kre, we yo na, 'Ŋgi ki tia e nsra u shↄnli hin?' 6A na o yo na, 'Lewo pan kra yiri kre,' leele pre we o waara na dnɛ ni. Ŋgi na, pe shↄnli na Nyiɛkpↄↄ kee nyanyofun na wi Jↄn." 7Ki tia pra kna mbo, "O n chin mna kra yiri." 8A Yesu na kna mna yo pe pan mbo, "A mba e nyina mna ni yiri jaŋga ni na kalɛɛ nyjɛ pini." 9Bawa Yesu na kna mna leele pre gbun yomini ka mbo, "Blↄ wa wra u tresɛnyi see ka pe, mna ki wru mu le falifɛɛnlɛ plɛ kɛɛ mna sɛ waŋgra ka nu, mna sɛ mu wa. 10Ŋga yirɛ yire na sɛ, a wra yire wa mna u sumifɛɛnlɛ pre wa tun see kre lefɛɛnlɛ pre pan, na u sɛ yirɛ yire yɛ shↄ mbe sɛ u ŋga. A see kre lefɛɛnlɛ pre na u frↄ, mna u ni a wra sɛ kɛwaara. 11A wra ndru mna u sumifɛɛnlɛ pre wa tun na, a pra ndru mu wre yii mna u frↄ, mna cheu wↄ u na, mna u ni a wra sɛ kɛwaara. 12A wra je mna taarɛ wo tun na, a pra wre gbun mu laala, mna u wↄ mu wa fimi na. 13A seefun wre na kna mbo, 'Mni mbe pe hin? Mbe ni pↄ ŋmba ni kori tun. Kie pe pie wre nyifɛɛrɛ pe.' 14Ŋga seelefɛɛnlɛ pre na pↄ wre nya kre, a pra kna mna yo peyɛ pan mbo, 'Seefun wre krↄlifun wre wi kre. E ti mbe o u gbo, mbe krↄ kre pe o wo.' 15A pra u yii mna u tini mna yili see kre lam, mna u gbo." A Yesu na kna mna pe wie mbo, "Kena mni seefun wre we pe pe hin? 16We pan mbe see kre lefɛɛnlɛ pre kla peii, mbe see kre wru mbe le lefumblↄ kɛɛ." Ŋga leele pre na kee kre loo ma kre, a pra kna mbo, "Nyiɛ we o kisi ki na." 17A Yesu na pe le komm, mna kna mbo, "Kena kee ŋga pe nyunↄ mu tɛɛ kre ki nↄↄ yi ŋgi hin? 'Dnɛ ŋga nyuŋgo sinfɛɛnlɛ pre na je kre chↄↄ, kre ki kↄ mu pe nyuŋgo kre ndra.' 18Kena ndro ŋmba we to dnɛ kre na kpan, kie u pile, a ŋmba na kie to kpan kie u tre." 19Mbra nyinafɛɛnlɛ pre na Judae sↄfue loplombo pre naa u chaa mbe yii titɛɛ kre nu. Ŋgi na, pra chin na yomini ŋga u gbun kre, pre u taan na ki ni, la, praa fiɛ leele pre na. 20Ŋga kra pan ma kre, praa u chaa nyjila chichie nu mbe u yii, a pra leele wↄ, mna pe ŋga swa, a pra peyɛ pe na leele chichiele lɛ, a pra sɛ na u wie kaalɛɛ, na aada we kee ka yo mbe pe u ta mbe yii ki na, mbe sɛ u le abani kɛɛ. 21Leele pre na sɛ u wie mbo, "Nyinafun, o chin na mu paara na leele nyina kpra ni, a mna leele yoori, la Nyiɛkpↄↄ kpra kolo titi kre mu nyina. 22Kena mbra kolo ŋga mbe o tↄↄ tↄ mbe ŋunu Kaisari ŋga, ndee mni hin?" 23Yesu na pe kachindɛ kolo ŋga praa chaa kre nya peii, a wra kna mna yo pe pan mbo, 24"E ni ŋga swabie ka," Mbo, "Ndro ŋmbi kumu na u mɛɛ yi ki na ŋga hin?" A pra kna mbo, "Ŋunu Kaisari wee yi." 25A Yesu na kna mna yo pe pan mbo, "Kena e Kaisari yirɛ wru e Kaisari ŋga, e nyjɛ yi pe Nyiɛkpↄↄ wee kre e yi wru e Nyiɛkpↄↄ ŋga." 26Kee ŋga wra yo kre ndra na, pe nsra ja mbe u yii leele pre nu. U kee kre nyu wra wↄ kre na pe pe kawako, a pra pieri komm. 27A Sadukiie mblɛ praa yuu na kunnyiɛ n wa kre na pan mna Yesu wie mbo, 28"Nyinafun, Mbose na nyunↄ mu o ŋga na, na ki pan na ndro ku mu u chↄ ti, na wre na chlↄ wre n se kre, kena ki fna mbe u chunu ndee u nyjↄ lekuchlↄ wre wru mbe leŋge, mbe biile se mbe gboo wre ŋga. 29Nyjila ka nu nyjↄↄlↄ na chinlɛ kↄↄnashin plɛ naa wa. Jle wo wre na leŋge, u nsra se mna ku, 30a shiin wo wre na u chↄ wre wru mna leŋge. Wre chↄↄ nsra se u na, mna ku mu u ti. 31A taarɛ wo wre na u wru. Pe kro kↄↄnashin pre nsra se chlↄ wre na, mna ku mu u ti. 32Pe kum kↄkrↄ kre, chlↄ wre na ku na. 33Kena kunnyiɛ nu, pe ŋmbihaa chↄ wi chlↄ wre hin? Na pe kro kↄↄnashin pre u leŋge mu fni." 34A Yesu na kna mna yo pe pan mbo, "Aŋga leele mblɛ pe leŋgei, 35la, mblɛ pie yiri kunnyiɛ nu, mu fna waŋgra ŋga kie pan kre nu kre wa leŋge. 36Ŋgi na, kumu n wa wa na. Pe ku mu nyi, mu pe Nyiɛkpↄↄ biile, a pan pie pe na nyjeeri bitumblↄ lɛ. 37Mbose na nyina na kunnyiɛ wa yɛŋgɛ. U nyaa shↄↄ lawee kre nu kre, wra o Tafun Nyiɛkpↄↄ wre yeeri, Abraham Nyiɛkpↄↄ, na Isaki Nyiɛkpↄↄ, na Jekↄb Nyiɛkpↄↄ. 38Kee ŋga nyina kama na, gboolo Nyiɛkpↄↄ ma, la, ŋmaafɛɛnlɛ Nyiɛkpↄↄ wi. Ŋgi na, Nyiɛkpↄↄ pan kre, pe kroo ŋmaa ni." 39A mbra nyinafɛɛnlɛ pre plɛ na kna mbo, "Nyinafun, mu kee kre nyu wↄ chichie." 40Kra tia pe nsra sro mu u wie kala ka na. 41Yesu na kna mna pe wie mbo, "Ŋgi ki tia, a pra yuu na Kristo wre, Devid nana wi hin? 42Na Devid wre titi na ki yo mɛɛ hlɛ kre nu mbo, 'Ni Tafun Nyiɛkpↄↄ wre na yo ni Tafun wre pan na, tni ni kalie, 43mu sɛ su ŋga ble mbe mu loŋgoolo le mu jeelee jaara.' 44Devid wre titi na u yeeri Tafun, kena mni u pe mu kↄ mu pe u nana hin?" 45Ŋga lenɛɛrɛ pre naa u kee yire ndru kre, wra kna mu yo u twanfɛɛnlɛ pre pan mbo, 46"E eyɛ dↄↄta mbra nyinafɛɛnlɛ pre haa. Pre pe dodonyi titnↄnyi lee chaa, na lete shaaraa chaa, a tnihɛɛ chichiele nu pe jiin fninyinyi nu. A na pe sɛ fninlihaa, kpↄↄmu lawee pe chaa. 47Pre pe lekuchiɛlɛ yirɛ shio pe pan. A pre pe yire lete na na nyiɛtali titnↄŋↄ mbe leele pe nya. Pe sisam fↄtↄↄrↄ we kpↄↄ."

will be added

X\