Luka 19

1Yesu na le Jɛriko na, mnaa tro mbe sɛ. 2Na blↄ waa wa wa praa u yeeri Zakiↄs, a wra pe lampooshↄfɛɛnlɛ lopom, mna pe swafun. 3A wraa Yesu chaa mbe chin lewo ŋmba nyini wi, la, u nsra gede, a leele pre na nɛɛ. Ki tia u nsra ja mbe u nya. 4Kra tia wra fɛ mna sɛ nduu tiŋge na yiɛ, mbe Yesu cha mbe le. Ŋgi na, na bawa kolo kre na Yesu we tro. 5Ŋga Yesu na da wa kre, wra yiɛ yire mna le tiŋge kre na, mna yo u pan mbo, "Zakiↄs, pe nyaanyaa mu tii tra. Mu katoo ki fna ni tni aŋga." 6A wra pe nyaanyaa mna tii tra, mna Yesu wru na yɛshↄↄrↄ ni mna sɛ katoo. 7Ŋga leele pre na ki nya ma kre, a praa taanri na yuu mbo, "U shie mbe sɛ le sisampefun pan." 8Bawa Zakiↄs na yiri mna yire leele pre yiɛ na, mna kna mbo, "Ni Tafun, le, mbe ni yirɛ nyjɛ yii wa ni pan yↄ shiin mbe shianfɛɛnlɛ ŋga yi yↄↄ. A na ni ndro wa yira dnumu kre, mbe ki tↄ ma gbee jijirɛ mbe ufun ŋga." 9A Yesu na kna mbo, "Aŋga ŋmaashↄmu pan katoo ŋga nu. A Abraham sele ndro wi kre. 10Ŋgi na, Lewo Pↄ wre pan mbe mblɛ pe fun kre haa cha, mbe pe shↄ." 11Ŋga leele pre naa wa mu yire na yire kee nyjɛ ndru kre, Yesu na pe gbun yomini ka. Ŋgi na, wraa mbra Jerusalɛm na, a na leele pre jawa na fuŋga pie Nyiɛkpↄↄ ŋunumulie nya na nyini ni. 12A wra kna mna yo pe pan mbo, "Blↄ wa na yiri, wra pe lepↄↄ, a wra sɛ waŋgra ka nu haalee, mbe pe sɛ u tɛɛ ŋunumu na mbe ndruu pan. 13Ŋga wra yo we sɛ kre, wra u sumifɛɛnlɛ kɛ yeeri, mna pe kro ŋga kre nyjila kre pↄni pↄni mna yo pe pan mbo, 'E ta jafa lii na yi ni mbe hɛ su ŋga ble mbe pan.' 14La, wre titi chia kre leele nsraa u kee chaa, kra tia pra leele wↄ mu tun mna u kↄŋgↄ ni mbo, 'O n na blↄ ŋmba chaa mbe u pe o ŋunu.' 15Blↄ wre na sɛ u ŋunumu kre li, mna ndru mu pan. Ŋga wra le kre, titɛɛ kre nu, a wra tia pra u sumifɛɛnlɛ mblɛ wra ŋga swa kre yeeri, mbe pe paan u nyina tnu ŋga pe ta swala nyjɛ wra pe ŋga yire nu 16A jle wo wre na pan mna yo u pan mbo, 'Ni tafun, mu pↄni kre mna ni ŋga kre, ni pↄni kɛ ta mu ya ki na.' 17A wra kna mna yo u pan mbo, 'Sumifun chichie, mu ka pe. Ŋgi na, chiɛri ŋga ni mu ŋga kre mu kpra wru ki na. Kena mbe ti mu jaŋga li chiɛ kɛ na.' 18A shiin wo wre na pan mbo, 'Ni tafun, mu pↄni kre mna ni ŋga kre, ni pↄni kunↄ ta mu ya ki na.' 19A wra kna mna yo u pan, 'Ŋu we jaŋga li chiɛ knↄ na.' 20A nunu pan mbo, 'Ni tafun, mu pↄni kre yi kre, agua nu ni ki fo mu tɛɛ. 21Ŋgi na, ni mu fiɛ. Ŋgi na, mu kee sheli. Yira ŋga ki n pe mu wo kuraa mu ki wrui, a mna mu n luu kuraa mu kuun wa.' 22A wra kna mna yo u pan mbo, 'Sumifun sisaa, mu nyu kee ŋga mu yo kre na mbe mu gbun na pini ni. Na mu chin na ni kee sheli, a ndaa ŋga ki n pe ni wo kuraa wrui, na kuun mna ni n luu, 23yira ŋgi ki tia mu n sɛ ni swa kre tɛɛ swa tɛɛ lawee hin? Kaa ŋga ni pan ŋga, mbe na ki wↄ, mbra tnu ta mna ya ki na.' 24A pe tafun wre na kna mna yo mblɛ praa wa mu yire u jaara kre pan mbo, 'E pↄni kre shↄ u kɛɛ. E ki ya pↄni kɛfun wre pan.' 25A pra kna mna yo u pan mbo, 'O tafun, pↄni kɛ wre ta.' 26A wra kna mbo, 'Ni yuu e pan ŋmba uu ka ni mu ki le chichie kre, pie ka ya u pan, la, ŋmba uu fiɛn ni a u n ki le chichie kre, fiɛn kre ni u nyi kre, pie ki shↄ u kɛɛ. 27Ni loŋgoolo mblɛ pe n na chaa mbe ni pe pe ŋunu kre, e pan na pe ni mna, e pe gbo ni yiɛ.' " 28Ŋga wra yire kee nyjɛ yo mna kↄ kre, a wra yiɛklu na shie Jerusalɛm na. 29Ŋga wraa dani Bɛtfage na Bɛtani na, Olive nyua kre mbɛɛ na kre, a wra u twanfɛɛnlɛ pre shiin wↄ mna tun mbo, 30"E sɛ kable ŋga kii wa e yɛsimi ŋga na. Na e lee wa to, ee bubnↄ pↄ wa nya na pe u pↄ tiŋge ka na. Ndro n da mu tni u na tun. E u saan e pan na u ni mna. 31Na ndro waa e wie na mni a e na u saanri hin, e yo ufun pan na u kee shian mu o Tafun wre ŋga." 32A mblɛ wra tun kre na sɛ mna u nya imi na wra yo pe pan kre. 33Ŋga praa bubnↄ pↄ wre saanri kre, a u tafun na kna mu pe wie mbo, "Mni a e na bubnↄ pↄ wre saanri hin?" 34A pra kna mbo, "O Tafun u u chaa" 35A pra pan na bubnↄ wre ni mna Yesu ŋga, a pra pe yonyi nyaala mu wo bubnↄ wre na mna Yesu wru mu taa u na. 36Ŋga wra tni u na na shie kre, a leele pre naa pe dodonyi woni na chaan kolo. 37Pra da lawee ka nu, na bawa kolo nyi, mbe pe yire mbe Olive nyua kre tii. Bawa u twanfɛɛnlɛ tataara pre kro na chin na gble leni kpↄↄ na Nyiɛkpↄↄ kaan mboo kawako kee nyjɛ pe nya kre na, 38mbo, "Ŋunu ŋmba u paan o Tafun Nyiɛkpↄↄ mɛɛ nu kre wo yi dwamu. Wejinyiŋgee wa nyjeeri, a Nyiɛkpↄↄ wo yi yɛnyiŋge." 39Na Farisiie pre plɛɛ wa lenɛɛrɛ pre nu, a pra kna mna Yesu wie mbo, "Nyinafun, fuu mu twanfɛɛnlɛ pre na mbe pe pieri." 40A wra kna mna yo pe pan mbo, "E ti ni yo e pan, na pe pieri kuraa kre, dnɛ nyjɛ kuraa we na gble leni." 41Ŋga wraa mbra Jerusalɛm na mna ki nya kre, ki kee na u pe fooro ni a wra nyɛni, 42mna kna mbo, "Na mna chin ŋga kie pan mbe mu ŋga wejinyiŋge aŋga kre, a na fuŋgaami pe ki ndra mu na. 43Ŋgi na, ble yɛɛ wa na paan yire ble yire nu mu loŋgoolo we mu kuun fni, mbe nduu mu mboo na mbe paan mu tↄ, ma lawee ta mbe yili. 44Pie ŋu na mu biile kla peii, hali nyuŋgo nunu chom kuraa pia ki ti. Ŋgi na, nyjila ŋga nu Nyiɛkpↄↄ pan mu shↄhaa kre, mu n ki chin." 45A Yesu na sɛ le suminyuŋgo wa, mna leele mblɛ praa yirɛ prɛ wa kre ni, 46mna kna mu yo pe pan mbo, "Pe ki nyunↄ na, 'Ni katoo we pe nyiɛtali ndoo,' a yire ki wru mu pe 'juolo lawee.' " 47Blenyini ŋga Yesu naa shie na nyina suminyuŋgo wa. Sↄfue loplombo pre, na Mbose mbra nyinafɛɛnlɛ pre, na chia loplombo pre naa u chaa mbe gbo. 48La, pe nsra kolo ŋga na pie tro chin. Ŋgi na, na leele pre u kee yire wra yuu yire chaa mbe loo peii.

will be added

X\