Luka 18

1Ki ble ka Yesu na u twanfɛɛnlɛ pre gbun yomini ka, mna pe nyina na ki fna pra nyiɛtali nyjila kro nu, mbe pia pra. 2Wra yo pe pan mbo, "Blↄ kalalifun wa naa wa chia ka na. Wre blↄ wre, u nsraa Nyiɛkpↄↄ fiɛ, a u kee ka na ma lewo ni. 3A lekuchlↄ wa naa wa chia kre na, nyjila kro nu wraa shie na yuu blↄ wre pan mbo, 'Jande, mi na ni ŋmbrↄ wa o ta, a ni wo tna, kena ya ni na.' 4Blↄ wre nsraa chaa mbe chlↄ wre kee kre yo, la, kra kↄ mu da wa, a wra kna mna yo uyɛ pan mbo, 'Kii wa na ni n na Nyiɛkpↄↄ fiɛ, a ni kee ka ma na lewo ni. 5La, imi na lekuchlↄ ŋmba ni hau ŋga, mbe kee kre le mbe u ŋga u tam. Na kre ma, u paan mna kuraa we kↄↄ ni gbo.' " 6A O Tafun Yesu na kee kre taa mbo, "E kalalifun denyjuufun ŋmba kee ŋga le. 7Kena Nyiɛkpↄↄ leele mblɛ u wↄ, a pra nyɛni na u yeeri lafo na ble kre, wa pe kala li mbe pe shↄ sisampefɛɛnlɛ kɛɛ ree? E jawa na we pna pe kala ni ree? 8Ni yuu e pan na, we pe kala li mbe pe shↄ nyaanyaa. Kena na Lewo Pↄ wre waa pan, we shↄnlifun da tra ŋga naa?" 9A Yesu na leele mblɛ praa peyɛ jawa na pe fraka, na pe ŋmbilɛ le na pre n fraka kre gbun yomini ka mbo, 10"Bilɛ shiin plɛ pra sɛ suminyuŋgo nyiɛtalihaa, nunu na pe Farisiie wo, a haŋu wre na pe lampooshↄfun. 11Farisiie wo wre na uyɛ kun mna sɛ yire mna nyiɛtali mbo, 'Ni Nyiɛkpↄↄ kaan mboo na ni fraka, ni n pe jajaarafun, a ni n pe denyjuufun ndee chachaa imi na leele hamblɛ nyi kre, ni mu kaan mboo na ni n pe na lampooshↄfun ŋmba u yire wa ŋga wi. 12Ŋgi na, kranu kpan ni blefuni gbee shiin, a ni yirɛ nyjɛ ni taa, ni yi yↄↄlɛ kɛ, mbe mu ŋga nunu.' 13A lampooshↄfun wre na yire lee chiɛri, u nsra yiɛ yire kuraa mna nyiɛ yiɛ le. Kɛ wra taa gbun na, na yuu mbo, 'Nyiɛkpↄↄ, sisampefun wi mi. Jande, ni fooro le.' " 14A Yesu na kna mbo, "E ti ni yo e pan, wre sisampefun wre na fraka Nyiɛkpↄↄ pan, mna sɛ katoo, mna wɛ haŋu wre na. Ŋgi na, ŋmba we uyɛ kpↄↄ kre, Nyiɛkpↄↄ we ufun pe fiɛn, a ŋmba we uyɛ pe fiɛn kre, Nyiɛkpↄↄ we u kpↄↄ." 15Leele plɛ na pan na biile fiɛnfiɛn plɛ ni Yesu pan mbe u kɛ taa pe na. Ŋga u twanfɛɛnlɛ pre na pe nya kre, a praa fuuru leele pre na. 16A Yesu na biile pre yeeri mna pan u jaara mna kna mbo, "E ti mbe biile pre pan ni pan. Yaa pe tↄ kolo. Ŋgi na, mblɛ imi wo yi Nyiɛkpↄↄ ŋunumu kre. 17Kpra na ni yuu e pan, ŋmba u n Nyiɛkpↄↄ ŋunumu kre shↄ na pↄ wi kre, wa le ki nu." 18Bawa Judae lopom wa na kna mna Yesu wie mbo, "Nyinafun Chichie, kee ŋgi mbe pe mbe blenyini ŋmaa ta hin?" 19A Yesu na kna mna yo u pan mbo, "Ŋgi ki tia mna ni yeeri lewo chiriri hin? Ndro n wa mu pe chiriri fↄna Nyiɛkpↄↄ wre chiin bↄkↄ. 20Mu Nyiɛkpↄↄ mbra yire chin na pe yi nyunↄ na, 'Maa shia leŋgeere kla, a maa shia liiku, a maa shia ju, a maa shia kafinɛ dansiɛrɛ li a ki fna mu mu lɛ na mu lo ŋga buuro.' " 21A blↄ wre na kna mbo, "Yire mbra nyjɛ krɛrɛ ni li yi na mu yire ni bimi." 22Ŋga Yesu na kre kee ŋga loo kre, a wra kna mna yo u pan mbo, "Kala nunu ki kro mbe mu pe. Sɛ mu yirɛ kro prɛ, mu swa kre yↄↄlɛ mu shianfɛɛnlɛ ŋga, mu pan mu taa ni kro. Kre mu krↄyirɛ ta nyjeeri." 23Ŋga blↄ wre na kre kee ŋga loo kre, u yiɛ na je. Ŋgi na, wra pe swafun. 24Yesu na u le kom mna kna mbo, "Kie sheli na swafɛɛnlɛ we le Nyiɛkpↄↄ ŋunumu kre nu. 25Kie pe yiɛyiɛ nyuuma pan na we le pandiɛ wee, mbe wɛ ŋga swafun we le Nyiɛkpↄↄ ŋunumu kre nu." 26Leele mblɛ pra kee ŋga loo kre na kna mbo, "Kena ŋmbi ŋmaa Nyiɛkpↄↄ we shↄ na hin?" 27A Yesu na kna mbo, "Kee ŋga kia jaa pe lewo pan kre, kie jaa pe Nyiɛkpↄↄ pan." 28A Pita na kna mbo, "Le, o o yirɛ kro ti mu pan mu taa mu kro." 29A Yesu na kna mna yo pe pan mbo, "Kpra na ni yuu e pan, ndro ŋmba u yila Nyiɛkpↄↄ ŋunumu kre na mu u katoo, ndee u chↄ, ndee u chinlɛ, ndee u lo na u lɛ, ndee mu u biile ti kre. 30Ufun we ndru mbe yi ta mbe wɛ jle na, fuŋgaami ble nyjɛ nu o nyi ŋga nu, mbe ndruu blenyini ŋmaa kre ta mbe waŋgra ŋga kie pan na kre nu." 31Yesu na bitumblↄ kɛmbↄshiin pre wru mna sɛ paara pe pan mbo, "E le! Jerusalɛm na o shie kre, a Lewo Pↄ wre kee nyjɛ Nyiɛkpↄↄ kee nyanyofɛɛnlɛ pre nyunↄ mu tɛɛ yire kro we pe. 32Pie u wↄ mbe le leele mblɛ pe n Nyiɛkpↄↄ chin kɛɛ, mbe praa u pini mbra tɛɛ, mbe u tɛɛlɛ, mbe tɛɛnrɛ hlu mbe wo u na. 33Pie u frↄ fwa ni, mbe sɛ u gbo, a u ble taarɛ ble na we nyi." 34Kee yire wra yo kre, pe nsra ka nↄↄ loo. Nyiɛkpↄↄ na kee kre nↄↄ ndra pe na, a pe nsra chin kee ŋga u yuu. 35Ŋga wraa dani Jɛriko na kre, na fuun waa wa mu tni kolo mbɛɛ na na tali. 36Ŋga wra loo na lenɛɛrɛ pre tro u mbɛɛ na kre, a wra mblɛ praa wa u jaara kre wie mbo, "A kee ŋgi ki pini hin?" 37A pra kna mbo, "Yesu ŋmba u yiri Nazrɛt na wre u tro." 38A wra kna mbo, "Yesu, Devid nana, ni fooro le!" 39A leele mblɛ pra yiɛ klu kre naa fuuru u na, na u pieri, la wra je na gble leni kpↄↄ na yaa, mbo, "Devid nana, ni fooro le!" 40A Yesu na yire, mna yo leele pre pan na pe pan na u ni, ŋga wra da u mbɛɛ na kre, a wra u wie mbo, 41"Ŋgi mu chaa ni pe mbe mu ŋga hin?" A wra kna mbo, "Ni Tafun, ti mbe ni nyiɛlɛ nyjɛ nyaa." 42A Yesu na kna mna yo u pan mbo, "Mu nyiɛlɛ yire nyaa, mu shↄnlie mu shↄ." 43Titɛɛ kre nu to, a u nyiɛlɛ yire na nyaa, a wra taa Yesu kro, na Nyiɛkpↄↄ kaan mɛɛ, ŋga leele mblɛ praa wa wa kre na u nya kre, pe kro naa Nyiɛkpↄↄ kaan mɛɛ.

will be added

X\