1 A Yesu na kna mna yo u twanfɛɛnlɛ pre pan mbo, "Imi na kie pe kpan, jini ŋga kie ti lewo sisam pe we pan, la, ndro ŋmba na jini we yire mbe pan kre, ufun atɛ. 2 Na pe fifiire tre dnɛ badaaŋga pↄ ufun lagboo, mu u wa epo nu a ki u li kre, ki prↄ ŋga ufun we tni, mbaa ti mbe ni biile mblɛ wa le sisaa nu." 3 "Kena e eyɛ dↄↄ ta, na mu ŋmbrↄ sisaa pe mu na kre, u yiɛ kee yo u pan, na u waa laa u sisam kro kre, mbe mu u sisam ti mbe u kɛ. 4 Hali na u sisaa pe mu na gbee nununu kↄↄnashin ble nunu, na u pan gbee nununu kↄↄnashin mu yo mu pan na u u jawala chinɛ mu laa u sisam kro kre, ki fna mbe mu u sisam ti mbe u kɛ." 5 A bitumblↄ pre na kna mu yo o Tafun wre pan mbo, "Jande, ka ya o shↄnlie na." 6 A o Tafun wre na kna mu yo pe pan mbo, "Na e shↄnlie na pe fiɛn na mↄstad bie yi kuraa kre, ee na jaa yo tiŋge ŋga pan na kↄ mu sɛ kan epo nu, a kie na kↄ mbra sɛ kan ki nu." 7 "Na e waa wa na sumifun ni, a wra fali, ndee na mbaala le kre, na sumifun wre sɛ nyaa mu le, we sɛ tni to mbra lii? 8 Kra pe ma, la, u lopom wre we yo u pan na, 'Sro pe mu ni ŋga mbe ni li.' We sro kre pe mbe u ŋga tun mbe chin u wo li. 9 A u lopom wre wa u ŋga mboo. Ŋgi na, sumifun tnumu ŋga ki fna u tun yi. 10 Pan chↄↄ e nyi, ŋga mbe yo e pe kre, na e ki pe, e yo na sumifɛɛnlɛ lɛ wre, o n fna mboo ni, o tnumu yi." 11 Ŋga Yesu naa shie Jerusalɛm na kre, Samaria na Galilii lalaa wra tro. 12 Ŋga wraa dani seechia ka na, a kokoefɛɛnlɛ kɛ plɛ na u fni, mna yire lee, 13 mu gble le kpↄↄ mbo, "Yesu o Tafun, o fooro le." 14 Ŋga wra kna mna pe nya ma kre, a wra kna mna yo pe pan, mbo, "E sɛ eyɛ wru e sↄfue pre nyina." Ŋga praa shie kre to, pra saanla kro. 15 Ŋga pe nunu na kna mna uyɛ nya na u saanla kre, a wra ndru na gble leni kpↄↄ na Nyiɛkpↄↄ kaan mɛɛ. 16 Mna pan mu kosie kan Yesu yiɛ mna u ŋga mboo. Na wre blↄ wre pe Samariae wo. 17 A Yesu na kna mbo, "Leele kɛ ma pe saanla kree, a sena Judae kↄↄnajirɛ pre nyi hin? 18 Kena pe nunu kuraa n ja mu ndru mu pan mu Nyiɛkpↄↄ ŋga mɛɛ, na fuŋu ŋmba chiin bↄkↄↄ?" 19 A Yesu na kna mna yo u pan mbo, "Yiri mu sɛ mu lawee. Mu shↄnlie mu saanla." 20 Ki ble ka Farisiie pre na pan mna Yesu wie na nyjila ŋgi nu Nyiɛkpↄↄ ŋunumu kre we pan hin? A wra kna mna yo pe pan mbo, "Na Nyiɛkpↄↄ ŋunumu kre paan, kawako kee ka wa pe mbe e chin na ki paan. 21 A ndro wa yo na, 'E le, Nyiɛkpↄↄ ŋunumu kre yi kre, ndee kre yi wa kre.' Ŋgi na, Nyiɛkpↄↄ ŋunumu kree wa e nu." 22 A Yesu na kna mna yo u twanfɛɛnlɛ pre pan mbo, "Nyjila kaa wa na paan, mbe e na Lewo Pↄ wre chaa mbe wra tni e jaara ble nunu chom, a yaa u ta. 23 Leele we pan mbe yo e pan na, uu wa mna ree mnawa, yaa shia taa pe na mbe sɛ u lehaa. 24 Imi na nyiɛ nyini nyjeeri kokoo ŋga na mbe nya mbe sɛ kokoo ŋgaa na kre, pan Lewo Pↄ wre we pe u pan ble kre nu. 25 La, ŋga ki yiɛklu, ki fna mbe u kala nya tataara, mbe aŋga leele mblɛ u je. 26 Imi na kra nyi Noa ble yire nu kre, pan kie pe Lewo Pↄ wre pan ble yire nu. 27 Leele naa lii, mnaa gboo, mnaa leŋgei, na chiɛlɛ wru na bilɛ kaan, mna sɛ su ŋga ble Noa na le krↄ kre nu, a nyiɛ na pan, a nyumu na leele pre hamblɛ kla peii. 28 Pan kra nyi Lↄt ble yire nu na chↄↄ, leele naa lii, mnaa gboo, mnaa loni na prɛ, mnaa yirɛ ndru, mnaa nyinyi siin. 29 La, ŋga ble Lↄt na yili Sodom na kre, Nyiɛkpↄↄ na tia kanhun na pwa tuwe chaara na yiri nyjeeri mna pan mu Sodom leele kla peii. 30 Pan chↄↄ kie pe Lewo Pↄ wre pan ble. 31 Ki ble kre, ŋmba uu wa nyuŋgo ndra na kre waa shia tii mbe le katoo mbe u yaka wru, pan chↄↄ ŋmba uu wa nyaa kre waa shia ndru mbe pan katoo. 32 E Lↄt chↄ wre sↄↄnri. 33 Lewo ŋmba we na kɛ toni u ŋmaa na kre, kie yili u kɛɛ. La, ŋmba we u ŋmaa wa mbe fun kre, we ki ta. 34 E ti ni yo e pan, ki ble kre, na blee yi, leele shiin we chaa mbe sni dɛŋglɛ nunu na, pie nunu wru mbe nunu ti wa. 35 Chiɛlɛ shiin we chaa mbra yirɛ trei, mbe pe nunu wru, mbe nunu ti wa." 37 A pra kna mna Yesu wie mbo, "O Tafun, sena kre kee ŋga we pe hin?" A wra kna mna pe gbun yomini ka mbo, "Lawee ŋga nu kafↄↄ nyi kre, bawa kↄkↄsachie we ble."
