Luka 15

1Nyjila ka nu lampoo shↄfɛɛnlɛ na sisampefɛɛnlɛ na pan mbe Yesu kee loo. 2A Farisiie pre na Judae mbra nyinafɛɛnlɛ pre naa taanri u na na yuu mbo, "Blↄ ŋmba na sisam pefɛɛnlɛ pe nyaari, hali wra chaa na lii na pe ni." 3A Yesu na kna mna pe wie mbo, 4"E nu, na waa wa mbaala lafaa ni, a nunu chom fun pe nu, ufun wa fuloejirɛ na kɛmbↄkↄↄnajirɛ pre ti pe kahaa wa mbe sɛ nunu wre cha tun ree? 5A na ki pan ma, a waa u nya kre, u yiɛ we shↄ mbe u u bali mbe taa patia na mbe pan na u ni katoo. 6Na waa le katoo, ki yɛshↄↄrↄ we ti u u nↄↄlↄ na u tnifɛɛnlɛ yeeri mbe yo pe pan na, 'Ni yiɛshↄ mu tro. Ni mbↄↄ u fun, a ni u nya. Kena e ti mbe o yiɛshↄ.' 7Na ndro nunu chom u jawala chinɛ mu laa u sisam kro kre, pan chↄↄ, mblɛ pee wa nyjeeri kre yiɛ we shↄ u na mbe wɛ leele fuloejirɛ na kɛmbↄkↄↄnajirɛ mblɛ pe peyɛ jawa na pe fraka, a ki n shian na pie pe jawala chinɛ kre na. 8Ndee e nu, chlↄ ŋmbi we swa finyi nununu kɛ ta, na nunu chom fun u pan, mbe wa kania mu, mbe pↄyira wru mbe katoo kre pↄ, mbe ki cha kama mbe sɛ su na we ki nya hin? 9A na waa ki nya, we u nↄↄlↄ na u tnifɛɛnlɛ yeeri mbe yo pe pan na, 'E ti mbe mi na yire yiɛ shↄ. Ŋgi na, ni swa ki fun a ni ki nya.' 10Pan chↄↄ kie pe, na sisampefun nunu u jawala chinɛ mu laa u sisam kro kre, Nyiɛkpↄↄ bitumblↄ yiɛ shↄ u na." 11A Yesu na kna mbo, "Blↄ wa na u bibilɛ shiin plɛ praa wa. 12A ŋmba wra pe ble wre na kna, mna yo pe lɛ pan mbo, 'Ndoo, jande, o krↄ yirɛyire yↄ mu ni ŋga nyjɛ mbe ta.' A blↄ wre na yirɛ yire yↄ mna u biile pre ŋga. 13Kie pe ble chiɛri yɛ to, a pↄ wre na u yirɛ nyjɛ wra ta yire prɛ, mna swa kre bali, mna kolo kun mna sɛ waŋgra ka nu. Bawa wra sɛ swa kre tɛɛ mna uyɛ li, a kra kↄ mu u ti. 14Ŋga swa kre kro na kↄ u kɛɛ kre, klo badaŋga ka na to kre waŋgra kre nu. A na shian u yii kpↄↄ. 15Bawa wra sɛ uyɛ mbra waŋgra kre ndro wa na, a wre naa u tuni wra shie na u u prakoe kaan sro. 16Klo sisaa na tia sroe yire wraa prakoe pre kaan kre kuraa na pe u pan niŋge ni, a wa ndro ta mbe u u ŋga yaka mbe u ka. 17Ŋga wra u tnimu nya ma kre, a wra kna na yuu uyɛ pan mbo, 'Leele mblɛ pe tnumu tuni ndoo pan kuraa lii na prai sro na, a klo na ni kuu kre. 18Mbe ndru mbe sɛ yo ndoo pan na, "Ndoo, ni sisaa pe mu ŋu na Nyiɛkpↄↄ taan 19Kena ni n fna na mu ni yeeri mu pↄ na. Ni wru mu pe mu sumifɛɛnlɛ pre wa." ' 20A wra yiri mnaa shie u lɛ pan. U lɛ wre na u pↄ wre nya haalee na u paan, a u kee na pe u pan fooro ni, a wra fɛ mna sɛ u fa mu yii, mna u nyu shiun. 21A u pↄ wre na kna mbo, 'Ndoo, ni sisaa pe Nyiɛkpↄↄ na, mu sisaa pe mu na, ki tia ni n fna na pie ni yeeri mu pↄ na.' 22A u lɛ wre na kna mna yo u sumifɛɛnlɛ pre pan mbo, 'E sɛ dodoŋgi titnↄŋↄ chichie titi wru e pan e u le; e u le feelee na kpawrɛ. 23Na e kↄ, mbe e sɛ nuu ŋmba nu nyina nyi yii mbe paan u gbo, mbe sro pe mbe o li, mbe oyɛ yiɛ shↄ. 24Ŋgi na, ni pↄ ŋmba, ki pe na kuu u ku mu nyi, wra fun, a ni u nya.' A pra peyɛ yiɛ shↄ kama. 25Kre nyjila kre na blↄ wre pↄ lopom wree wa see. Ŋga wraa paan mna da katoo nyu na kre, wra loo na pe mɛɛ koni na yoo. 26A wra u lɛ sumifɛɛnlɛ pre nunu yeeri mna u wie mbo, 'A ŋgi pe pini mna hin?' 27A wra kna mna yo u pan mbo, 'Mu chunu u le, a mu lɛ nuu yii mu gbo. Ŋgi na, ŋga u u nya ki mu, a yaka n u ta.' 28A krↄ na pↄ lopom wre kun, a wra yo wa le katoo. A u lɛ wre na yiri mna sɛ u tali na u pan katoo. 29A pↄ lopom wre na kna mbo, 'Ni mu sumi yɛlɛ tataara, ni n mu nyu kee je tun. Yira ŋgi mu ni ŋga tun hin? Hali sugbↄ kuraa mu n ni ŋga wa, a mi na ni nↄↄlↄ oyɛ yiɛ shↄ. 30La, ŋga mu pↄ ŋmba u sɛ mu yirɛ kla tiɛrifɛɛnlɛ na kre le aŋga rɛ, a mu sɛ nuu yii mu gbo wre pan.' 31A blↄ wre na kna mbo, 'Ni pↄ, nyjila kro nu ŋuu wa ni jaara, a ni yira kro mu wo yi. 32Kena ki fna mbe o oyɛ yiɛ shↄ. Ŋgi na, mu chunu ŋmba u ku mu ndru mu nyi, wra fun, a o u nya.' "

will be added

X\