Luka 14

1Judae wuuble ka nu Yesu na sɛ Farisiie loplombo pre wa katoo lihaa, blↄ wa kɛnyi na u jeelee na tin tin, a wra pan Yesu pan, a leele pre naa Yesu le poŋgo. 3A Yesu na kna mna Judae mbra nyinafɛɛnlɛ pre na Farisiie pre wie mbo, "Kena o mbra kolo ŋga mbe o yaŋu tra wuuble ree, ndee mni hin?" 4Pe nsra nyu kun, a Yesu na yaŋu wre wru mna u tra mna tia wra sɛ. 5A wra kna mna pe wie mbo, "E ŋmbihaa nuu, ndee bubnↄ we to lↄↄ wuuble, mbe wa sɛ u wↄ titɛɛ kre nu hin?" 6Pe nsra kala ka ta mu yo. 7Ŋga Yesu na yiɛ wa mna leele mblɛ pra fni lihaa wa kre le, mna nya na pe kro sɛ tni tni loplombo tnihɛɛ nu kre, wra yo pe pan mbo, 8"Na ndro e yeeri bijam nu kre, na e sɛ yaa tni lawee chichiele nu, na ki pan na pe ndro ŋmba u wɛ ŋu na yeeri wa kre, 9ŋmba u e kro yeeri wa kre we paan yo mu pan na, 'Yiri mu blↄ ŋmba ŋga jↄↄn,' bawa nyifɛɛrɛ we mu gbo, mbe mu yiri mbe sɛ tni kro. 10Kena na pe mu yeeri lawee kre, sɛ tni lawee waa nu, ŋmba u mu yeeri kre we pan mbe yo mu pan na, 'Awe, yiri mu sɛ tni lawee chichie nu.' Na ki pan ma kre, leele mblɛ nu mu sɛ chaa mbe tni kre we mu kpↄↄ. 11Kena ŋmba we uyɛ kpↄↄ kre, pie u pe fiɛn, a ŋmba we uyɛ pe fiɛn kre, pie u kpↄↄ." 12Yesu na kna mna yo blↄ ŋmba wra u yeeri mna sɛ u katoo kre pan mbo, "Na mu lenɛɛrɛ yeeri fninlihaa kre, maa mu nↄↄlↄ, ndee mu nyjↄↄlↄ na mu chinlɛ, ndee mu sele leele, ndee mbe swafɛɛnlɛ mblɛ pe pe mu tnifɛɛnlɛ chiin yeeri. Ŋgi na, na ki pan ma, pre we ndru mbe mu yeeri ka na, mbe nyjɛ ŋu pe mu pe ŋga kre fↄlↄ tↄ. 13La, na mu leele yeeri fninlihaa kre, shianfɛɛnlɛ na finla, na mblɛ pe fuuru, na fuunlo kro yeeri mu chaa. 14Ŋgi na, ŋga mu pe pre na kre, pia jaa mu fↄlↄ tↄ, la, kprafɛɛnlɛ kunnyiɛ nu kre, mu fↄtↄↄrↄ ta." 15Ŋga leele mblɛ pre na Yesu naa wa mu tni lihaa wa kre na u kee kre loo kre, a pe wa na kna mbo, "Leele mblɛ pie li Nyiɛkpↄↄ ŋunumu kre nu kre wo yi dwamu." 16A Yesu na kna mu yo u pan mbo, "Ki ble ka blↄ wa wra lenɛɛrɛ yeeri mbe pe sɛ li u katoo. 17Ŋga wra sro kre pe mu kↄ kre, wra u sumifun tun na u sɛ leele mblɛ u kɛ wa mu yeeri kre yeeri mbo, 'E pan! Ni sro kre pe mu kↄ.' 18A leele pre kro na kaalɛɛ fↄnyi ta na yuu. Jlewo wre na kna mbo, 'Ni tra ka lↄ, a ki fna ni sɛ ki le. Kena ni mu tali, mba kolo ta.' 19A shiinwo na kna mbo, 'Ni nui kɛ lↄ, a ni shie pe lehaa. Kena jande, mba kolo ta.' 20A taarɛwo na kna mbo, 'Ni chlↄ leŋge. Kena mba kolo ta mbe pan.' 21A blↄ wre sumifun wre na ndru mna pan mu kalɛɛ nyjɛ pe yo yire kro yo u pan. A krↄ na blↄ wre kun, a wra kna mu yo u sumifun wre pan mbo, 'Sɛ lete na nyaanyaa, mu sɛ shianfɛɛnlɛ, na finla, na fuunlo, na mblɛ pe fuuru kro yeeri.' 22A sumifun wre na sɛ mna pan mu yo u tafun wre pan mbo, 'Ni Tafun, ŋga mu yo ni pe kre, ni ki pe, la lawee wa tɛ mbe leele tni.' 23A u tafun wre na kna mu yo sumifun wre pan mbo, 'Sɛ tro mbookrↄe nu, na kooloe na, mblɛ mu nya wa kro pe yeeri mbe pe pan, mbe ni katoo kre nyi. 24Ŋgi na, leele mblɛ ni klu mu yeeri kre, pe wa wa ni sro ŋga ka ta mbe naa.' " 25Lenɛɛrɛ na taa Yesu kro a praa shie, a wra kna mna yo pe pan mbo, 26"Na wa pan mbe taa ni kro, fↄna u ni kori mu wɛ u lɛ, ndee u lo, ndee u chↄ, ndee u biile, ndee u nyjↄↄlↄ na u chinlɛ na u jaala na, mbe u yɛ fɛɛ, wa jaa pe ni twanfun. 27A ŋmba u n u kum kanyana kaan wru mu taa ni kro kre, wa jaa pe ni twanfun. 28Na e wa yo we nyuŋgo sin mbe ki gede kre, we kluu tni mbe ki fↄlↄ gbun mbe le tun, na we swa ta mbe jaa ki sin mbe kↄ rɛ? 29Na kre ma, na u nyuŋgo kre nↄↄ le, a u n shia ja mu ki sin mu kↄ kre, mblɛ pie ki nya kre we u tɛɛ, 30mbra yuu na, 'Blↄ ŋmba yo we u nyuŋgo sin, a u n ja mu ki kↄ.' 31A na ŋunu wa shie sojae kagbeŋ kɛ ni, mbe sɛ wi na ŋunu wa na u sojae kagbeŋ fulo ni kre, we klu mbe tnii jawa na we jaa fni na u loŋgo wre ni ree? 32Na waa nya na wa u ja kre, we leele tun mbe pe sɛ u loŋgo wre fni haalee, mbe pe peyɛ lalaa gbeele. 33Pan ki nyi chↄↄ, ndro wa jaa pe ni twanfun, fↄna u yirɛ nyjɛ yii wa u pan kro kee fɛɛ." 34A Yesu na kna mbo, "Weŋge tna, la, na ki ki tnam wa mu fun kre, yaka wa jaa ti ki tna na fio. 35Kia nyu kuraa mbe jaa yaka pe, a tnu ka wa pe ki nu na, fↄna pie ki kna mbe wo. Kena ŋmba uu wa ndie ni kre, ti mbe u loo."

will be added

X\