Luka 13

1Nyjila ŋga nu Yesu naa yire kee nyjɛ yuu kre, na leele plɛɛ wa wa, a pra Galilii leele mblɛ Pilato na gbo, nyjila ŋga ni praa sra woni na Nyiɛkpↄↄ kaan kre kee yo Yesu pan. 2A Yesu na kna mbo, "Kena ŋga pra pre leele mblɛ gbo kre kolo ŋga na kre, e jawa na pre leele mblɛ sisam na wɛ Galilii leele hamblɛ na ree? 3Pan ma kra nyi, la, e ti ni yo mbe e loo, na e n e jawala chinɛ mu laa e sisam pee kro kre, pan ee ku na chↄↄ. 4Ndee leele kɛmbↄkↄↄnataarɛ pre Siloam nyuŋgo gedeŋge kre na to mu gbo kre, e jawa na pre lee mblɛ sisam na wɛ Jerusalɛm leele hamblɛ na ree? 5La, e ti ni yo e pan, pan ma kra nyi, hali yire chↄↄ, na e n e jawala chinɛ mu laa e sisam kro kre, pan e kro we ku." 6A Yesu na kna mna yomini ŋga gbun mbo, "Blↄ wa wra u kagbla le mna fig tiŋge ka luu ki lam. Ki ble ka wra yiri mna sɛ na sɛŋgɛ chaa ki na, a u nsra ka nya. 7A wra kna mna yo kagbla lefun wre pan mbo, 'Le, yɛlɛ nununu taarɛ wo yi ŋga, na ni pan na sɛŋgɛ chaa fig tiŋge ŋga na, mba ka ta, kena ki kun mu wa, maa ti mbe kra tra kre klai finfin.' 8A kagbla kre lefun wre na kna mbo, 'Ni Tafun, ki ti ala mu ya, mbe ni tra gbun mbe le ki nↄↄ na, mbe tuwe le ki nu. 9Na yɛlɛ waa da a kia sɛ, kena ki nyu, a na ki n shia sɛ naa mbe o ki kun mbe wa.' " 10Judae wuuble ka nu Yesu na sɛ na leele nyina fninyinyi yire ka nu. 11Kre nyjila kre na chlↄ waa wa wa, a ŋumufↄↄn wa u nu. Ŋumufↄↄn kre na tia chlↄ wre na yaa, mna kru, kie pe yɛlɛ kɛmbↄkↄↄnataarɛ na wa jaa uyɛ fraka. 12Ŋga Yesu na chlↄ wre nya kre, wra u yeeri mna yo u pan mbo, "Maa, mu yira kre laa mu na." 13A Yesu na kɛ tini mu taa u na. Titɛɛ kre nu, a chlↄ wre na yiri mna fraka, na Nyiɛkpↄↄ kaan mɛɛ. 14La, fninyuŋgo wa lopom wre krↄ na kun na Yesu ni na u yaŋu tra wuuble. A lopom wre na fuu mna paara leele pre pan mbo, "Ble nununu kↄↄnanu ni ki fna o tnumu tun. Kena na mu chaa mbe yambla tra kre, pan yire ble yire ka nu, la, maa shia pan o wuuble nu." 15A Yesu na kna mna yo u pan mbo, "Yire yiɛnyumufɛɛnlɛ, e n na tnumu tuni wuuble kre ra? E n na e nui, na e bubunlↄ saanla nagbɛɛ na shie na pe ni lↄↄ wuuble nu kre ra? 16Wre chlↄ ŋmba Sutna pↄ mu tɛɛ yɛlɛ nununu kɛmbↄkↄↄnataarɛ ŋga, Abraham nana ma kree? Kena ki n fna mbe pe u saan wuuble ra?" 17Ŋga Yesu na yo ma kre nyifɛɛrɛ na u loŋgoolo pre gbo. La, leele hamblɛ pre yiɛ na shↄ kawako kee ŋga Yesu na pe kre na. 18A Yesu na kna mbo, "Mni nyini Nyiɛkpↄↄ ŋunumu kre nyi hin? A yira ŋgi sembremu ni mbe ki wru mbe gbun hin? 19Pan ki nyi na mↄstad bie fiɛn ŋga blↄ wa na wru mna sɛ luu u kagbla yi, a kra fin mna lɛ, mna yire tiŋge, a hanyiɛlɛ na zeere le ki klɛ nu." 20A wra ndru mu kna mbo, "Yira ŋgi sembremu kuraa ni mbe tɛɛ mbe Nyiɛkpↄↄ ŋunumu ŋga kra hin? 21Pan ki nyi na yiisi ŋga chlↄ we wↄ mbe le paanu mimi taakpↄↄ nyini nu, mbe ki ti mimi kre tin mbe kpↄↄ." 22Yesu na yiɛ tɛɛ Jerusalɛm na. Ŋga wraa shie kre, wra tro kakpↄɛ na kabɛɛlɛ yɛ na, na pe nyina Nyiɛkpↄↄ kee kre na shie Jerusalɛm na. 23A ndro wa na u wie mbo, "Ni Tafun, kena leele chiɛri plɛ ŋmaa pie shↄ ree?" A Yesu na kna mbo, 24"E eyɛ gbeŋmba na ee tro kolo foo kre na. Ŋgi ndra na hin? E ti ni yo mbe e loo, lenɛɛrɛ we na chaa mbe tro ki na, a pia ki ja. 25Na katoofun wre waa yiri maa katoo krↄ tↄ kre, bawa ee pan mbe yire krↄ kro, mbe krↄ koori, mbe kna mbra yuu na, 'O Tafun, jande, krↄ nyaa o pan.' Bawa we kna mbe yo e pan na, 'E laa ni na, ni n e yirihaa chin.' 26Mbe ee kna mbra yuu na, 'Wre na ŋu nsra chaa mu ka mu gbↄↄ, a mnaa leele nyina o chiɛ na kree?' 27La, bawa we kna mbe yo e pan na, 'E ti ni yo e pan, ni n e yirihaa chin. E laa ni na, e sɛ, yire sisampefɛɛnlɛ mblɛ.' 28Na e waa yire krↄ kro, maa Abraham na Isaki na Jekↄb na Nyiɛkpↄↄ kee nyanyofɛɛnlɛ pre nya Nyiɛkpↄↄ ŋunumu kre nu kre, bawa ee yire mbra nyɛni mbra ŋgaala chirɛ. 29A leele we yiri lawee kro nu mbe paan fni mbe li Nyiɛkpↄↄ ŋunumu kre nu. 30A e le, mblɛ pe kro tↄ kre, plɛ we kna mbe yiɛklu, mbe yiɛkulo pre plɛ kna mbe kro tↄ." 31Kre nyjila kre nu Farisiie plɛ na pan mna yo Yesu pan mbo, "Yili tra ŋga nu mu sɛ lawee fↄŋgↄ nu. Ŋgi na, Ŋunu Hɛrodi mu chaa mbe gbo." 32A Yesu na kna mna yo pe pan mbo, "E sɛ yo leele fanafun wre pan na, 'Ni yo mbe ŋumufuɛn wↄ leele nu, mbe yambla tra aŋga na baŋga, ble taarɛ ble na, kre mbe ni tnumu nyu le.' " 33Fna ki fna mbe ni ni kolo taa mbe kun aŋga na baŋga na ki nyisee. Kia jaa pan na Nyiɛkpↄↄ kee nyanyofun we ku lawee ka nu fↄna Jerusalɛm na. 34"Jerusalɛm atɛ! Ŋu mu Nyiɛkpↄↄ kee nyanyofɛɛnlɛ mblɛ pe tun mu pan kre yiri na pe kuu, mu leele mblɛ pe tun mu pan waari dnɛ ni. Nyjila tataara nu ni chaa mbe mu biile yii mbe le kuɛn jaara, imi na ŋgolo u biile leni kuɛn jaara kre, a mu je ma ni ŋga kolo. 35Le mu katoo we tni waara, a ti ni yo mbe mu loo, ma ni nya na, fↄna ŋga ble e e na yuu na 'Ŋmba u paan o Tafun Nyiɛkpↄↄ mɛɛ nu kre wo yi dwamu bↄkↄ.' "

will be added

X\