Luka 12

1Ŋga leele pre na pan mna fni, mnaa shie kagbeŋ tataara, na peyɛ taanla kre, Yesu na kna mu yo u twanfɛɛnlɛ pre pan mbo, "E eyɛ dↄↄ ta Farisiie pre yiisi yire haa, pe yiɛ nyumu kepelee yire na ni nyi. 2Yaka n wa a pe ki tↄ, a pia kↄↄ ki nyaa, ndee yaka n wa mu ndra, a pia kↄↄ ki wↄ fimi na. 3Kee nyjɛ ee yire ndramwↄmu nu mbe yo kre, na ndram saan pie yi loo. A nyjɛ ee ju mbe yo nyinyi nu kre, pie yire nyuŋgo ndra na mbe yi kpali mbe ndro kro loo." 4"Ni wolo, ni yuu e pan, yaa shia mblɛ pie jaa e gbo, a pia jaa yaka pe e na e kum kↄkrↄ kre fiɛ. 5La mbe e nyina ŋmba ki fna e fiɛ. E Nyiɛkpↄↄ fiɛ, wre we jaa e gbo, a e kumu kↄkro kre, uu wa na jaŋga ni na we sɛ na e ni kanyana lawee. Ki tia ni yuu e pan, e wre chiin fiɛ. 6Pe n na hanyiɛlɛ bɛɛlɛ bɛɛlɛ kunↄ prɛ dambaa? A nde Nyiɛkpↄↄ n pe wa fɛɛ. 7Kena ki ŋgi na hin? Hali e ndrɛ nyjuroe kuraa u yi nyu chin. Kena yaa fiɛ, ee tnu ni mu wɛ hanyiɛlɛ tataara na." 8"Kena ni yuu e pan, ŋmba we yire leele yiɛ na mbe ni mɛɛ chichie yeeri kre, Lewo Pↄ wre we ufun mɛɛ chichie yeeri Nyiɛkpↄↄ nyjeeri bitumblↄ pre yiɛ na. 9La, ŋmba we ni je leele yiɛ na kre, mbe ufun je Nyiɛkpↄↄ nyjeeri bitumblↄ pre yiɛ na. 10A ŋmba we kee ka yo mbe Lewo pↄ wre taan kre, we sisam tinkɛɛ ta, la, ŋmba we jiɛnlɛ kee ka yo mbe Kpra Ŋumu wre taan kre, wa sisam tinkɛɛ ta fio. 11A na pe e yii mu sɛ na e ni fninyinyi nu, ndee mu sɛ na e ni loplombo na jaŋgafɛɛnlɛ yiɛ na kre, yaa shia na kawa na e paaraa ndee ŋga ee yo ni. 12Ŋgi na, Kpra Ŋumu wre we e nyina ŋga ee yo kre nyjila kre nu." 13A lenɛɛrɛ pre wa na kna mna yo Yesu pan mbo, "Nyinafun, jande, yo ni nyjↄ pan mbe u ti mbe o krↄyirɛ nyjɛ o lɛ ku mu ti o pan yire yↄ." 14A Yesu na kna mbo, "Awe, ŋmbi u ni tɛɛ e lalaa kpra kunfun, ndee e krↄyirɛ yↄfun hin?" 15A wra kna mna yo leele pre kro pan mbo, "E eyɛ dↄↄta nyiɛlɛ, jrawari sisaa na. Ŋgi na, ki n pe lewo yirɛ nyjɛ u ta mu tro nu u ŋmaa nyi." 16A Yesu na pe gbun yomini ka mbo, "Swafun wa wra u see tɛɛ, see kre na nyu, a wra yirɛ ta tataara. 17A wra yo uyɛ pan mbo, 'Imi mbe pe kuraa ni n chin. Ni n lawee ta mbe ni sro nyjɛ kro tɛɛ.' 18A wra kna mbo, 'Mbe ni sro tɛɛndoe yire juari, mbe yi sin kpↄɛ, mbe ni sro na ni yirɛ kro tɛɛ yi nu. 19Na ni waa kↄ, mbe ni yo ni yɛ pan na, "Mu ndra nyu, mu yirɛ nyjɛ yi shian ta mu tɛɛ, a yie yɛlɛ tataara li. Kena tni mna wuui, ta lii mna kaa mna gboo mna muyɛ lii." ' 20A Nyiɛkpↄↄ na kna mna yo u pan mbo, 'Jijuo, aŋga blee ŋga, pie paan mu ŋmaa shↄ mu kɛɛ. Kena yirɛ nyjɛ mu cha mu tɛɛ nyjɛ ŋmbi wee yi hin?' " 21A Yesu na kna mbo, "Pan lewo ŋmba u krↄyirɛ chaa na teeri uyɛ pan tra mna, a u n wa krↄyira ni nyjeeri kre nyi." 22A Yesu na kna mna yo u twanfɛɛnlɛ pre pan mbo, "Kena ni yo e pan na yaa na kawa na sro ŋga ee li mbe ŋmaa ta, ndee yoŋgo ŋga ee tↄ ni. 23Ŋgi na, ŋmaa kee shian mu wɛ sro na, a wejiŋge kee shian mu wɛ yoŋgo na. 24E yiɛ wa e hanyiɛlɛ le, praa sro luu, a pra kun mbe tɛɛ, a pe n sroe tɛɛ ndoe ni, a nde Nyiɛkpↄↄ pe kaan sro. A e kee tnu ni mu wɛ hanyiɛlɛ na. 25A e ŋmbi we jaa kawa na u ble nyjɛ we li ni, mbe jaa ka ya u ŋmaa na hin? 26Kena na yaa jaa kre kee fiɛn ŋga ka pe waa, kena yaa tni mbra kawa na hɛnyi yire ni. 27E yiɛ wa e lↄↄ chiɛtoto le, imi na yi lee, a yira tnumu ka tun, ndee mbe yonyi tin mbe tↄ. La, e ti ni yo e pan, Sↄlↄmↄn na swa ta, nde u n nsra yirɛ ta a ka na nyu mna da na yire toto nyjɛ ka ni. 28Kena na Nyiɛkpↄↄ ja na nyaa nyjɛ yii wa nyaalam tↄni yonyi, yire nyjɛ mu nya aŋga, baŋga na pe yi sro. Kena ŋgi kie ti mbe wa e tↄ hin? E shↄnliee fiɛn kpa. 29Kena yaa na ŋga ee ka, ndee ŋga ee gbↄ chaa, mbra kawa na yi ni. 30Ŋgi ndra na hin? Yire yirɛ nyjɛ ni waŋgra leele kawa. A e Lɛ Nyiɛkpↄↄ wre chin na yi keshiaan wa e na. 31Kena e ti mbe Nyiɛkpↄↄ ŋunumu kre kee e shian, we e ŋga yire yirɛ nyjɛ kro." 32"E n nɛɛ, ande yaa fiɛ, ki tna Nyiɛkpↄↄ pan na we e ŋga u ŋunumu kre. 33E e yirɛ kro prɛ, e shianfɛɛnlɛ ŋga yi swa, e swa ŋga kia jaa kla cha, e krↄ yirɛ nyjɛ yia jaa kla fio haa cha nyjeeri, bawa jio n wa mbe le mbe ju, a dumblↄ n wa wa mbe yi kla. 34Ŋgi na, lawee ŋga nu lewo krↄ yira nyi kre, bawa u jawala nyi." 35"E grere chichie e ti mbe e kania na nyini. 36E pe na leele mblɛ tafun u sɛ bijam lawee nu, a pra u sri lɛ, na waa pan maa krↄ gbun to, mbe pe krↄ nyaa u pan. 37Kena na pe tafun wre waa pan kre, mblɛ we paan da na pe u sri kre wo yi dwamu. Kpra na ni yuu e pan na, na ki pan ma kre, pe tafun wre titi we uyɛ kna, mbe ti mbe pe tnitni, mbe u pe ŋga sro mbe pe li. 38Na waa pan ndroo, ndee lafo na kre, u sumifɛɛnlɛ mblɛ we paan da na pe u sri kre, pre wo yi dwamu. 39La, ŋga ni chaa mbe e chin yi na, na katoofun na nyjila ŋga nu jio we pan chin kre, we na tni mbra u shie. Wa na ti mbe u paan u katoo juari mbe le. 40Kena yire titi fna mbe eyɛ kna mbra sri. Ŋgi na, Lewo Pↄ wre we pan nyjila ŋga nu e n na u kra nu." 41A Pita na kna mbo, "Ni Tafun, wre chiin pan mu yomini ŋga gbuun ree, ndee ndro kro pan hin?" 42A o tafun wre na kna mbo, "Kena ŋmbi u pe sumifun kprafun, na kachiŋu hin? Wre wi ŋmba u tafun we tɛɛ u katoo lefun, mbe wra katoo kre le, mbra sumifɛɛnlɛ hamblɛ pre le, mbra pe kaan sro nyjila ŋga ki fna nu. 43Na sumifun wre tafun waa ndru maa pan mu u da na u pini ma kre, wre wo yi dwamu. 44Kpra na ni yuu e pan, u tafun wre we u tɛɛ u yirɛ kro nyu na. 45La, na sumifun wre waa kna maa yo uyɛ pan na, 'Ni Tafun mu titi, maa na u ŋmbilɛ bilɛ na chiɛlɛ sumifɛɛnlɛ pre gbuun, na lii na gboo na bru kre.' 46U tafun wre we le mbe u fo, mbe u ndie tini, mbe sɛ u chaa ndikanafɛɛnlɛ nu. 47Wre sumifun ŋmba u ŋga u tafun yo u pe chin, a u n ki pe kre, pie fwa tɛɛ mbe u ndie tini kpↄↄ. 48La sumifun ŋmba u n chin ŋga u tafun chaa, a u kee pe, a ki fna pe u gbun fwa ni kre, pie u gbun fiɛn. Lewo ŋmba pe kaan yirɛ nɛɛrɛ kre, wre pan pe nɛɛrɛ wie, a na pe mu ŋga nɛɛrɛ mu wɛ chↄↄ, pan pie shↄ mu pan nɛɛrɛ." 49"Kanhun ni ni pan tra na, na kra pe imi na ki nyi kuraa kaa ki tna ni pan. 50Kanyana kpↄↄ wa ni yiɛ mbe ni nya, la, ni niyɛ yii mbe hɛ su na kie tro. 51Yaa na jawa na wejinyiŋge ni ni pan waŋgra nu. Wejinyiŋge ni ma ni pan, la, e ti ni yo mbe e loo, ni pan mbe e lalaa yↄↄlɛ. 52Mu yire aŋga na shie, leele kunↄ we pe yɛ yↄↄlɛ sele nunu nu, mbe pe taarɛ yiri mbe shiin pra, mbe shiin pre yiri mbe taarɛ pre pra. 53Lɛ we yiri mbe pↄ pra, mbe pↄ yiri mbe u lɛ pra. Mbe lo yiri mbe u pↄ chlↄ pra, mbe pↄ chlↄ yiri mbe lo pra. Mbe nafun yiri mbe nafun pra." 54A Yesu na kna mna yo lenɛɛrɛ pre pan mbo, "Na e tloe nya nyjeeri yira shie yila tohaa kre, e ja na yuu na, nyiɛ we pan, a nyiɛ ja na paan yɛŋgɛ. 55A na fuflɛ waa na gbuun na yiri fimihaa na paan kre, e ja na yuu na ndram we wɛɛri, a ki ja na pini ma yɛŋgɛ. 56Yiɛnyumufɛɛnlɛ, e ja na tra, na nyiɛ yiɛ le na kee nyjɛ yie pe chini na yuu, la, yaa jaa aŋga kaalɛɛ nyjɛ yi pini ŋga le mbe nyjɛ yie pan nyina." 57"A ŋgi ki tia yire titi wa jaa ŋga ki fraka chin mbe pe ŋga hin? 58Na mu ŋmbrↄ shie na mu ni kalalifun yiɛ kre, kolo cha mbe ŋu na wre eyɛ lalaa gbeele kolo, mbe u chiin da na mu ni kalalifun wre yiɛ na, mbe kalalifun wre waa shia mu le nyuŋgo lefɛɛnlɛ kɛɛ, mbe pre sɛ mu le nyuŋgo. 59Ni yuu e pan, na ki pan ma kre, ma yili nyuŋgo kre nu fio, fↄna yira ŋga pie shↄ mu pan kre, mu ki tↄ kro tun."

will be added

X\