Luka 10

1Yire kee nyjɛ kↄkro kre, o Tafun wre na leele fuloetaarɛ na kɛmbↄshiin wↄ, mna pe mbra shiin shiin mna pe tun na pe yiɛklu mbe sɛ ketaan kre yo chiɛ nyjɛ na wre Yesu chaa mbe sɛ yire na. 2Wra yo pe pan mbo, "Yirɛ kun wee yire nɛɛ, a kunfɛɛnlɛ pree fiɛn, kena e yirɛ yire tafun wre tali mbe u tnumutunfɛɛnlɛ tun mbe pe paan yirɛ yire kun. 3E le, e sɛ, ni e tuni, a pan e nyi na mbaala mblɛ pe shie komboolo nu lɛ. 4Yaa shia sɛ na swa le yirɛ ni, a yaa shia bↄtↄ wru, ndee mbe kpawrɛ shiin shiin wru. A yaa na yire mbra shaari mbra nyjila klai. 5A katoo ŋga nu ee le kpan, e klu e yo na wejinyiŋge ki tni katoo kre nu. 6Kena na wejinyiŋge chafuun waa katoo wa kre, wrefun nu e wejinyiŋge kre we tni, a na ki n pan ma naa, e wejiŋyiŋge kre we ndruu pan e pan. 7A e tni katoo nunu kre nu, e na yira ŋga pie na e kaan kpan shuo e na kaa e na gboo. Ŋgi na tnumutunfun fↄtↄↄrↄ fna na u ni, yaa shia yili katoo ka nu mbe sɛ fↄŋgↄ nu. 8Chia ŋga na ee le, a pe waa e shↄ kre, sro ŋga pie e ŋga kpan e ki li, 9a yambla mblɛ pee wa ki na kpan, e pe tra, e yo pe pan na Nyiɛkpↄↄ ŋunumu kre mbra pe na. 10La, na e le chia na a pe n shia e shↄ kre, e sɛ yire chia kre lete na, e yo pe pan na, 11'Hali e chia ŋga tra nyjɛ yi mbra o jeelee na kuraa kre, o yi pↄ mu wo e na mbe ki dansiɛrɛ li mbe e taan, la, e ja e chin na, Nyiɛkpↄↄ ŋunumu kre mbra mna.' 12Ni yuu e pan, Nyiɛkpↄↄ kpra kun ble kre, pie Sodom leele fooro chin mbe wɛ kre chia kre na." 13"Chorazin, atɛ, Bɛtsaida, atɛ. Ŋgi na, kawako kee nyje yi pe e nu ŋga, na yire yira pe Tiro na Sidon na kre, pia na nyjila kla kuraa, pie na pe jawala chinɛ, mbra fooro li kpↄↄ. 14La, Nyiɛkpↄↄ kpra kun ble kre, pie Tiro na Sidon leele fooro chin mbe we e na. 15A ŋu, Kapɛnↄm, mu jawa na muu tnihaa chichie ni nyjeeri. Ma tni haa chiechie ta. Pie sɛ na mu ni kuulo ndoo. 16Kena ŋmba we e kee loo kre, u ni kee loo. A ŋmba we e je kre ni je. A ŋmba we ni je kre u ŋmba u ni tun wre je." 17Leele fuloetaarɛ na kɛmbↄshiin pre na ndru mna pan na yɛshↄↄrↄ ni, mna kna mbo, "O Tafun, mu mɛɛ kre saara na, hali ŋumufuɛn kuraa peyɛ nyjii mu o ŋga." 18A Yesu na kna mna yo pe pan mbo, "Ndaa Sutna nya na u yire nyjeeri mu to tra na nyiɛtwanraa yi. 19E le, ni e ŋga jaŋga mbe e na wↄↄlↄ na naala taanla, a ni Sutna na u jaŋga kro le e kɛɛ, a yaka wa e ta fio. 20La, yaa ti mbe e yiɛshↄ na ŋumufuɛn peyɛ nyjii mu e ŋga, la, e ti mbe e yiɛshↄ na pe e mɛɛ nyunↄ nyjeeri." 21Kre nyjila kre nu, kpra ŋumu wre na tia Yesu yiɛ na shↄ, a wra kna mbo, "Ndoo, nyjeeri na tra Tafun, ni mu kaan mboo, na mu kaalɛɛ nyjɛ ndra kachimblɛ, na hlɛchinfɛɛnlɛ na, mu yi wↄ mu biile fiɛnfiɛn nyina. Yɛŋgɛ yi ndoo, pan mu ki chaa, kre ki tia mu ki pe ma. 22Ni Lɛ wre ni ŋga yirɛ kro. Ndro n u Pↄ wre chin, fↄna Lɛ wre chiin. A ndro n u Lɛ wre chin na Pↄ wre bↄkↄ, na mblɛ Pↄ wre chaa na we lɛ wre wↄ mbe pe nyina kre chiin bↄkↄ." 23A wra kna mna yo u twanfɛɛnlɛ pre pan mbo, "Ndro Ŋmba u kee nyjɛ e nya yire nya kre wo yi dwamu. 24Ŋgi na, ni yuu e pan na Nyiɛkpↄↄ kee nyanyofɛɛnlɛ tataara, na ŋulo tataara naa chaa na pie na nyjɛ e nya ŋga nya, la, pe nsra yi nya; a praa chaa mbra nyjɛ e loo nyjɛ loo, la, pe nsra yi ta mu loo." 25Bawa mbra nyinafun wa na yiri mna Yesu pe mbe le mbo, "Nyinafun, mni mbe pe mbe blenyini ŋmaa ta hin?" 26A Yesu na kna mna yo u pan mbo, "Kee yire pe nyunↄ Mbose mbra yire nu mu tɛɛ kre, mni mu yi nↄↄ loo mu da hin?" 27A blↄ wre na kna mbo, "Pe yo ki fna mu mu Tafun Nyiɛkpↄↄ kori na mu loloŋgo kro, na mu ŋmaa kro, na mu jawala kro na mu faŋga kro ni, mbe mu ŋmbrↄ kori, imi na mu muyɛ kori mu da." 28A Yesu na kna mbo, "Mu ki nyu wↄ chichie, na mu yire kee nyjɛ pini mu ŋmaa ta." 29La, blↄ wre naa chaa mbe uyɛ gbeele, kra tia wra Yesu wie mbo, "A ŋmbi wi ni ŋmbrↄ hin?" 30A Yesu na kna mbo, "Blↄ wa wra yiri Jerusalɛm na mnaa shie Jɛriko na, mna sɛ fni kokↄↄnlↄ ni kolo, a pra u yirɛ shↄ u pan kro, mna u frↄ mu chaa u gbo, mna u ti wa sɛ. 31Judae Sↄfu wa na kolo kre yii na shie wre lawee ka nu. Ŋga wra blↄ wre nya kre, wra u klɛ mu tro. 32Pan chↄↄ Levi ndro wa na tro kolo kre na mna blↄ wre nya na mna u klɛ mu tro. 33La, Samaria ndro wa naa kolo kuun, mna pan mu da blↄ wre lawee. U kee na pe u pan fooro ni, 34a wra flo mu da u na, mna simi le u klɛ yire nu, mna yi pↄ kama, mna u wru mu taa u yurↄ ŋmba ni wraa kolo kuun na, mna sɛ na u ni fumblↄ snindoo, mna sɛ u le kama. 35Ŋga nyiŋge na se, a wra yiri mna swa wↄ mna fumblↄ lefun wre ŋga, mna kna mbo, 'Jande, shↄ mna blↄ ŋmba le ni pan, fↄlↄ ŋga mu gbun ki kro kpan, na ni pan mbe ki tↄ!' 36Kena leele taarɛ mblɛ, ŋmbi mu jawa na wra pe blↄ ŋmba kokↄↄnlↄ na frↄ wre ŋmbrↄ hin?" 37A mbra nyinafun wre na kna mbo, "Ŋmba wra u fooro chin wre na wi." A Yesu na kna mbo, "Kena sɛ pe ma." 38Ŋga Yesu na u twanfɛɛnlɛ pre na to kolo na shie kre, wra le seechia ka na, bawa chlↄ wa, praa u yeeri Maata, na u wru mu sɛ na u ni u katoo. 39Chlↄ wre chunu wa naa wa praa u yeeri Maria, wra sɛ tni Yesu jaara, na u kee nyjɛ wraa nyina yire ndru. 40Na Maata yiɛ nyina wra sro pini pe pan. Maata krↄ na kun Maria ni, na u pieri mu na wre nunu le wra tnumu kre tuni. A wra sɛ yo Yesu pan mbo, "Ni Tafun, mu n nya na ki n fna na Maria we ti mbe mi nunu tnumu yire kro tuun? Kena yo u pan mbe u paan ya ni na." 41A o Tafun wre na kna mu yo u pan mbo, "Maata, Maata! Maa kawa na kee kro ni ma. 42Kala nunu ki shian. A Maria u ŋga ki nyu kain kre chin mu wↄ, a pia jaa ki shↄ u kɛɛ."

will be added

X\