Luka 1

1Tiofilos chichie, ŋga leele tataara na gbeŋmba mna kaalɛɛ nyjɛ yira pe o nu yire kee nyunↄ kre, 2mblɛ pra kee yire nya mna yi tnumu tun, mna yire yi nↄↄ na kre, imi na pra yi yo o pan kre, pan plɛ yi nyunↄ kre. 3Kena Tiofilos chichie, ŋga ni ja mu kee yire twan mu yire yi nↄↄ na kre ndra na, ki tia ni jawa na ki nyu na mbe yi nyunↄ chichie mbe paan mu ŋga. 4Na ni pe ma kre, kie ti mbe mu chin na kee yire pe mu nyina kre na kpra yi. 5Nyjila ŋga ni Hɛrodi na ŋunumu li Judea tra nu kre, na kre nyjila kre na sↄfu waa wa wa a praa u yeeri Zakaria, a wra yiri Abija sↄfue feko kre nu. U chↄ mɛɛ naa Elisabɛt, a wra pe Aarↄn sele ndro. 6Pe kro shiin na fraka Nyiɛkpↄↄ yiɛ, mnaa lii Nyiɛkpↄↄ mbra na u kaalɛɛ kro na. 7Gbende na wi Elisabɛt, kra tia pe nsraa biile ni, a na Zakaria pe blɛlↄↄ, a u chↄ pe chalↄ. 8Ki ble ka kra da Zakaria na mbe u sɛ sↄfum tnumu tun Nyiɛkpↄↄ suminyuŋgo. 9Imi na sↄfue pre tnumu kre kolo naa nyina kre, pra kɛɛn tɛɛ paala kolo na, a kra Zakaria wↄ na wre ki fna mbe u sɛ Nyiɛkpↄↄ suminyuŋgo wa mbe sɛ tuwe ndiom tɛɛn sro. A wra sɛ le o Tafun wre suminyuŋgo wa, 10nyjila ŋga ni wraa wa wa na tuwe ndiom tɛɛn yire sroi kre, na leele wa mu yire fimi na tataara na nyiɛtali. 11Bawa Nyiɛkpↄↄ nyjeeri bituŋu na u yɛ wↄ mna u nyina, mna pan mu yire sragbuɛnlɛɛ yire kalie mna wraa tuwe ndiom tɛɛn yire sroi kre. 12Ŋga Zakaria na nyjeeri bituŋu wre nya ma kre gbun na yↄ u na, a fiɛrɛ na u yii. 13La, nyjeeri bituŋu wre na kna mu yo u pan mbo, "Maa fiɛ, Zakaria, Nyiɛkpↄↄ mu nyiɛtalaa loo, mu chↄ Elisabɛt we biblↄ se mbe mu u mɛɛ tɛɛ Jↄn. 14We ti mu yiɛ shↄ, a u seble lenɛɛrɛ yiɛ we shↄ. Ŋgi na, 15we pe lekpↄↄ Nyiɛkpↄↄ pan, a waa simi ka na ka gbↄ, a Kpra ŋumu wre we tni u nu mbe yire u seble. 16We yiri mbe Israel leele tataara kna mbe paan taa pe Tafun Nyiɛkpↄↄ wre kro. 17Wre we yiɛ klu o Tafun wre pan, mbe Kpra Ŋumu wre tni u nu mbe u jaŋga ta na Elaija wi. We ti mbe lɛɛlɛ ndru mbe pe biile kori. We ndikanmbla kna mbe pe kee nyjɛ yi fraka jawa, mbe ti leele peyɛ kna mbra o Tafun wre sri." 18A Zakaria na kna mna nyjeeri bituŋu wre wie mbo, "Ŋga mi na ni chↄ kro lɛ, ŋgi kie ti mbe o kee ŋga shↄ mbe li hin?" 19A bituŋu wre na kna mbo, "Mi wi Gabiral. Nyiɛkpↄↄ u yire nyjeeri mu ni tun na ni paan ketaan ŋga yo mu pan kre. 20Le, kee nyjɛ krɛrɛ we pan yɛŋgɛ, la, ŋga mu n ni kee nyjɛ shↄnli ŋga ndra na, mu kaari kpo mbe sɛ su ŋga ble kee nyjɛ ni yuu mu pan ŋga we pe." 21Leele pre naa wa mu yire yire fimi na wa na Zakaria sri, kra pe pe kawako ni na u mu suminyuŋgo wa. 22Ŋga Zakaria na yili fimi na wa leele pre yiɛ na kre, na wa jaa paara na pe ni. ŋga kra pan ma kre, pra ki chin na u yirɛ nya nyiɛlɛ na suminyuŋgo wa. Kra tia kɛ ni wraa paara pe pan. 23Ŋga Zakaria na tnumu tun suminyuŋgo wa mu kↄ kre, wra sɛ katoo. 24Kie pe ble chiɛri yɛ kↄkro kre, u chↄ Elisabɛt na siire ta. U nyiɛpↄ nununu kunↄ na wra yili fimi na, 25mnaa yuu mbo, "Fuŋga Nyiɛkpↄↄ kala pe mu ni ŋga, mu nyifɛɛrɛ ŋga ki ni kuu leele nu kre laa ni na." 26Ŋga Elisabɛt siire kre na nyiɛpↄ kↄↄnanu ta kre, Nyiɛkpↄↄ na nyjeeri bituŋu Gabiral tun Galilii chia ŋga pe yeeri Nazrɛt kre na, 27Kre nyjila kre, na pe bichable ŋmba u n blↄ chin wru mu blↄ wa ŋga wa mbe u u leŋge. Blↄ wre mɛɛ naa Josɛf. A wra yiri Ŋunu Devid sele nu. Bichable wre mɛɛ naa Maria. 28A nyjeeri bituŋu wre na pan mu yo bichable wre pan mbo, "Chlↄ, ti mbe mu yiɛ shↄ. Pe mu dumi chiɛlɛ nu, a o Tafun wree wa mu kro." 29Ŋga Maria na kala kre bituŋu wre na yo kre loo kre, u gbun na yↄ u na, a fiɛrɛ na u yii, a wra yo u jawala nu mbo, "A shaaraa ŋgi nyini yi ŋga hin?" 30A nyjeeri bituŋu wre na kna mu yo u pan mbo, "Maria maa fiɛ! Nyiɛkpↄↄ u mu dumi. 31Le, mu siire ta, mbe biblↄ se, mbe u mɛɛ tɛɛ Yesu. 32We pe lekpↄↄ, mbe pe u yeeri Nyiɛkpↄↄ ŋmba uu wa nyjeeri wre pↄ. O Tafun wre we u ŋga u tolɛɛ Devid ŋunumu kre. 33A we ŋunumu li Jekↄb jlom kre na nyjila kro nu, a u ŋunumu lie kre nyu waa to fio." 34A Maria na kna mna nyjeeri bituŋu wre wie mbo, "Mni mbe pe mbe jaa se hin? Na ni n blↄ chin tun." 35A Nyiɛkpↄↄ bituŋu wre na kna mu yo u pan mbo, "Kpra Ŋumu wre we paan tni mu nu, mbe Nyiɛkpↄↄ jaŋga kre pan mu nu. Kre kie ti pↄ cheche ŋmba mu se kre, mbe pe u yeeri Nyiɛkpↄↄ Pↄ. 36Le, mu sele ndro Elisabɛt ŋmba pe yeeri gbende kre, u chalɛm nu kre, u siire ta, u nyiɛpↄ kↄↄnanu wo nu u nyi kre. 37Kee ka n wa mbe Nyiɛkpↄↄ wa jaa ki pe." 38A Maria na kna mbo, "O Tafun wre letaa wi mi, kena kee ŋga mu yo kre ki pe ma mbe ni ŋga." A nyjeeri bituŋu wre na u ti wa mu sɛ. 39Yire ble yire nu, Maria na yiri nyaanyaa mna fↄↄri mu sɛ nyua jaara chia ŋga kii wa Judea tra nu kre na. 40Wra sɛ le Zakaria katoo mu Elisabɛt shaari. 41Ŋga Maria shaaraa kre na to Elisabɛt ndie kre, a u pↄ wre na seeri u lɛɛ. 42A Kpra Ŋumu wre na pan mu le Elisabɛt nu, a wra kna mu paara kpↄↄ mbo, "Pe mu dwan chiɛlɛ nu, mu mu pↄ ŋmba uu wa mu lɛɛ kre dwan na. 43Ŋgi ki pan na kre kekpↄↄ ŋga ni, a ni Tafun lo pan ni shaarihaa ŋga hin? 44Ŋga mu shaaraa to ni ndie to, a ni pↄ wre seeri ni lɛɛ na yiɛshↄↄrↄ ni. 45Mu dwamu ta, ŋga mu shↄnli na ŋga o Tafun yo mu pan kre we pe ma yɛŋgɛ kre na." 46A Maria na kna mbo, "Mbe ni loloŋgo kro tɛɛ mbe Nyiɛkpↄↄ ŋga mboo. 47Ni ŋmaashↄfun Nyiɛkpↄↄ tia ni ŋumu yiɛshↄ. 48Ŋgi na, u u letaa ŋmba u n fna kre sↄↄnri. Mu yire aŋga na shie kre, leele kro we ni yeeri, 'ŋmba Nyiɛkpↄↄ dwan.' 49Ŋgi na, jaŋgafun ŋmba mɛɛ ki pe cheche kre, u kekpↄↄ pe mu ni ŋga. 50Leele mblɛ pe u fiɛ kre, pre fooro u chini, mbe yire sem nunu na mbe sɛ su sem shiinwo na. 51U u kɛnyi tɛɛ mu kekpↄɛ pe, a u mblɛ pe peyɛ kpↄↄri kre zaanri na pe kee nyjɛ pe jawa ni. 52U jaŋgafɛɛnlɛ kↄ pe ŋujↄɛn na, mu tinlɛ tɛɛ yi na. 53U mblɛ klo ta kre ŋga yirɛ chichiele, mu swafɛɛnlɛ ni a pe sɛ kɛwaara. 54U u letaala Israel leele fooro chin na yaa pe na nyjila kro nu, 55imi wra yo o tolɛɛ Abraham na u sele leele pan fa kre." 56Maria na tni Elisabɛt jaara nyiɛpↄ taarɛ mna chin mu sɛ u katoo. 57Ŋga Elisabɛt se nyjila na da kre, wra biblↄ se. 58Ŋga kra pan ma kre, u sele leele kro, na u tnifɛɛnlɛ kro na chin na Nyiɛkpↄↄ kekpↄↄ pe mu u ŋga. Kra tia pe kro yiɛ na shↄ. 59Ŋga pↄ wre na li ble kↄↄnataarɛ kre, pra pan mbe pↄ wre fɛŋgɛ kun, mbe u mɛɛ tɛɛ Zakaria, u lɛ mɛɛ na. 60A pↄ wre lo na kna mbo, "Ↄↄnhↄn, e u mɛɛ tɛɛ Jↄn." 61A pra kna mna yo u pan mbo, "Mu sele ndro wa mɛɛ ma kre mɛɛ ŋga." 62A pra kna mu paara kɛ ni Zakaria pan, mu u wie na mɛɛ ŋgi u chaa mbe pe u pↄ wre ŋga hin? 63A wra kna mna kɛ pe mbo pe u ŋga nyunↄ yira, a wra nyunↄ ki na mbo, "U mɛɛ Jↄn." A kra leele pre kro pe kawako ni. 64Titɛɛ kre nu wa to, a Zakaria na ja mna nyu nyaa, a u ndile na saan u nyuu, a wra ja mna paara, mna Nyiɛkpↄↄ ŋga mɛɛ. 65Ŋga kra pan ma kre fiɛrɛ na u tnifɛɛnlɛ pre kro yii, a pra kee kre kpali Judea tra nu kro mu tro. 66Leele mblɛ pra kee kre loo kro naa yuu pe jawala nu mbo, "Ndro ŋmbi sembremu pↄ ŋmba nyini we kↄↄ pe hin? Yaka n nyina na Nyiɛkpↄↄ jaŋga n wa u nu." 67A Kpra Ŋumu wre na pan mu le u lɛ Zakaria nu, a wraa Nyiɛkpↄↄ kee nyaa na yuu mbo, 68"Israel Nyiɛkpↄↄ wre wo yi dwamu. Ŋgi na, u pan mu u leele le mu pe shↄ. 69Mu tia ŋmaashↄfun pan u letaa Devid katoo. 70Imi na wra yire u kee nyanyofɛɛnlɛ na mna ki yo fa kre. 71Wra kre kee ŋga yo na we ti mbe pe paan o shↄ mbe yili o loŋgoolo, na jaŋgafɛɛnlɛ mblɛ pe o pra kre kɛɛ. 72Wra yo na we o tolɛɛlɛ pre fooro le, mbe u nyu nunu ŋga wre na pre na pe mu tɛɛ kre sↄↄnri. 73Wra u nyu yo o tolɛɛ Abraham pan, 74mna da mu u nyina na we o shↄ mbe yili o loŋgoolo kɛɛ, mbe ti o u sumi mbe waa fiɛ. 75A oo pe cheche mbe pe kprafɛɛnlɛ u yiɛ, o ble nyjɛ oo li kro nu. 76A ŋu, ni pↄ, pie mu yeeri Nyiɛkpↄↄ ŋmba uu wa nyjeeri kre kee nyanyofun. Ŋu mu yiɛ klu mbe hɛ o Tafun wre kolo gbeele, 77mbe mu leele nyina na pie ŋmaashↄmu na sisam tinkɛɛ ta. 78Ŋga o Nyiɛkpↄↄ wre pe fooro chinfun kre ndra na, we ti mbe u ŋmaashↄfun wre pan na brimi yila yi, mbe o le. 79Mbe mblɛ pee wa wↄmu na kumu jaŋga nu kre nya, mbe ya o na mbe o nyaari wejinyiŋge kolo na." 80Pↄ wre na lɛ mna faŋga ta Nyiɛkpↄↄ ŋumu nu. Fimi tra lawee yire nu wra nyi chiin mna hɛ su ŋga ble wra uyɛ wↄ mna Israel leele nyina.

will be added

X\