Juda Hlɛ 1

1Mi Juda, Yesu Kristo sumifun wi mi, a Jemisi chunu wi mi, mi pan hlɛ ŋga yiri na shie leele mblɛ Nyiɛkpↄↄ yeeri, a wre titi O Lɛ Nyiɛkpↄↄ wre pe kori, a Yesu Kristo na pe le kre pan. 2Foorochiɛn, na wejinyiŋge, na koroo yi tni e nu tataara. 3Ni wolo mblɛ ni kori, ndaa gbeŋmba na mbe ŋmaashↄmu ŋga o kro ta kre kee nyunↄ mbe paan e ŋga, a ni jawala ta na, ki fna ni nyunↄ mbe paan e le gbeŋmbaa, mbe e wi shↄnlie ŋga Nyiɛkpↄↄ u leele ŋga, a ka n wa mbe paan ya ki na kre na. 4Ŋgi na, leele plɛ ju fɛɛ mu pan mu chaa o nu, pre leele mblɛ pra pe kee nyunↄ fa mu tɛɛ na pie pimi li. Pe n Nyiɛkpↄↄ chin, pre pe o Nyiɛkpↄↄ wre dumiɛ kee kre kna, mu yire ki na na sisam nyjɛ yi n fna pini, mu o Tafun Yesu Kristo jaŋgafun wre je. 5Kee nyjɛ mbe yo ŋga, e yi chin chↄ, chaa ni chaa mbe e sↄↄnri imi na o Tafun wre na Israel leele shↄ mna yili Egypt tra nu, la, ŋga wra pe shↄ mu kↄ kre kↄkro, wra mblɛ pe nsra u shↄ mu li kre kla. 6E nyjeeri bitumblↄ mblɛ pe nsra pe jaŋga ŋga pe ta le chiriri kre sↄↄnri, pre pra fɛ mu pe tnihaa ti. Ki tia Nyiɛkpↄↄ na blenyini jlↄnyi tɛɛ mu pe pↄ, mna sɛ pe tɛɛ wↄmu kprikpri ndoo kre nu. Bawa Nyiɛkpↄↄ pe tɛɛ mu na u ble kpↄↄ kre sri, mbe pe gbun pimi ni. 7E Sodom na Gomora na yi mbɛɛlɛ chiɛ yire sↄↄnri, pan yire chiɛ nyjɛ leele na pe na pre nyjeeri bitumblↄ mblɛ lɛ, mna tiɛrɛɛ ŋga ki n fna tiɛri, mna taa pe niŋge sisaa kro, a Nyiɛkpↄↄ na blenyini kanhun kre tɛɛ mu pe sro, a ki pe o kro pan jaaraa. 8Pan chↄↄ pre leele mblɛ yire pe ŋunɛ nyjɛ pe ŋunu na, mu na sisam pini na pe wejinyi taanla. Pe Nyiɛkpↄↄ jaŋga kre le kewaa, mu na yɛnyiŋgefɛɛnlɛ mblɛ pee wa nyjeeri wa kre tɛɛlɛ. 9Nyjeeri Bitumblↄ Ŋunu Maikɛl wre kuraa nsra Sutna tɛɛ, nyjila ŋga ni wre na Sutna naa nyu knai Mbose gboo na kre, pra kakra li tataara, nde Maikɛl nsra nyu nyaa mu Sutna tɛɛ, ndee mna u gbun na pimi ni, la, wra yo u pan mbo, "O Tafun wre u mu yiɛ kee yo mu pan." 10La, pre leele mblɛ, kee nyjɛ nↄↄ pe n na ndru yire na pe kefuɛn yuu, a pan pe nyi na yurɛ lɛ, nyjɛ pre titi niŋge chaa kre, yire pe pini, a yira pe klai. 11Pe atɛ, kolo ŋga na Kain na tro kre pe bali. Ŋgi na, pe yila swa na, mu peyɛ le sisaa ŋga Balaam na pe kre ka nu. Pe yiri mu Nyiɛkpↄↄ taan imi na Kora na pe kre, a pan Nyiɛkpↄↄ we pe kla imi na wra Kora kla kre. 12Na pe chaa e nu e na lii kre, pan pe nyi na gbronto dnɛ yi e nu, pe n na nyifɛɛrɛ pini, peyɛ kee ki pe shian. Pan pe nyi na tloe yi, mu yi nya, mbe fuflɛ yi wru mbe sɛ, yia jaa pan nyiɛ. Pan pe nyi na tinyi nyjɛ yiraa ja mu sɛ, yi sɛ nyjila yi, a pe yi didinyi klↄ a yi ku. 13Pan pe nyi na imi na fuflɛ epo nyumu wru na shie na paan tafↄkↄ ni kre yi, a pan pe nyifɛɛrɛ kee yire nyi na Epo nyu tafↄkↄ yi. Pan pe nyi na wↄɛlɛɛ nyjɛ yi klↄ yi, Nyiɛkpↄↄ lawee gbeele mu tɛɛ pe pan wↄmu lawee ŋga ki jio kre nu. 14Mu yire Adam na, Enↄku u taa o tolɛɛlɛ pre sem na kↄↄnashin wo. Wre Enↄku ŋmba, wre wra pre leele mblɛ kee nya mu yo mbo, "E le, o Tafun wre na u nyjeeri bitumblↄ kagbeŋ kagbeŋ mblɛ pe pe cheche we pan, 15mbe paan ndro kro kpra kun, we paan yire sisampefɛɛnlɛ mblɛ pe n li Nyiɛkpↄↄ kee na kre sisam kee nyjɛ pe pe na, mbe pe kro gbun pimi ni, kefuɛn nyjɛ pe yo mu Nyiɛkpↄↄ taan kre na pie pimi li kre." 16Pre leele mblɛ pe taanri nyjila kro nu, na baa leele na fin fin, pre titi niŋge sisaa kolo na pe taa, na peyɛ kpↄↄri, nyu tnam kee pe yuu leele pan, mbe yire ki na mbe yaka ta pe pan. 17La, ni wolo, e o Tafun Yesu Kristo bitumblↄ pre kee yire pra yo e pan fa yire sↄↄnri. 18Pra yo e pan na, "Na ble hɛnyi yire waa na dani kre, leele plɛ we yiri mbra e pini mbra tɛɛ, pre leele pre we taa pre titi niŋge sisaa kolo ŋga ki n pe Nyiɛkpↄↄ kolo na." 19Pre leele mblɛ pie paan e lalaa kla, waŋgra ŋga sisam kee na pe taa, a Kpra Ŋumu wre n wa pe nu. 20La, ni wolo, yire rɛ, e ka ya e shↄnlie cheche kre na. E Kpra Ŋumu wre jaŋga tɛɛ e na nyiɛtali. 21Ŋga ee wa na sri mbe o Tafun Yesu Kristo wre yire u foorochiɛn na, mbe paan e ŋga blenyini ŋmaa ŋga, e tni Nyiɛkpↄↄ koroo kre nu. 22E mblɛ jawala yi pe pini shiin shiin pre fooro chin. 23E plɛ tini e yili kanhun kre nu e pe shↄ. E Nyiɛkpↄↄ fiɛrɛ tɛɛ e plɛ fooro chin, la, nyjɛ krɛrɛ nu kre, e eyɛ dↄↄta pe nɛɛrɛ kee yire pe pini yire na, yaa shia eyɛ le yi nu. 24Nyiɛkpↄↄ ŋmba we jaa e yii mbe yaa to, mbe ti e jaa paan yire yɛshↄↄrↄ ni u yɛnyiŋge kre yiɛ, mbe nɛɛrɛ ka wa pe e na kre, 25wre wi Nyiɛkpↄↄ nunu chom, ŋmba wi o ŋmaashↄfun mu yire o Tafun Yesu Kristo na. Wre Nyiɛkpↄↄ wre wo yi yɛnyiŋge, na kpↄↄmu, na faŋga, na jaŋga, nyjila kro nu. Amin.

will be added

X\