Jↄn 6

1Nyjɛ kↄkro kre, Yesu na kun Galilii, ndee Tiberia epo kre kro. 2Kawako kee nyjɛ wra pe, na yambla mblɛ wra tra kre ndra na, lenɛɛrɛ na taa u kro. 3Yesu na u twanfɛɛnlɛ na nduu mna sɛ tni nyua ka ndra na. 4Kre nyjila kre, na Judae ble kpↄↄ ŋga pe yeeri Klɛntro kre da. 5Ŋga Yesu na yiɛ wa mu le kre, wra nya na lenɛɛrɛ paan u jaara, a wra kna mna Filipo wie mbo, "Sena oo sro ta mbe leele mblɛ ŋga mbe pe li hin?" 6Wra kre kee ŋga yo mbe Filipo jawala le, la, wre Yesu titi na chin ŋga we pe. 7A Filipo na kna mbo, "Na o denari lafɛɛ shiin sro lↄ kuraa kre, yia pe da." 8U twanfɛɛnlɛ pre nunu, Andriu, Siimↄn Pita chunu wre na kna mbo, 9"Pↄ waa wa na paanu knↄ na mbroe shiin ni mna, a mni yie jaa lenɛɛrɛ mblɛ pe hin?" 10Bawa Yesu na yo mbo, "E ti leele pre tni." Nyaa naa wa lawee kre nu. A leele, pie pe kagbeŋ kunↄ pre na tni tni tra nyaa yire na. 11Yesu na paanu yire shↄ, mna Nyiɛkpↄↄ ŋga mboo, mna yi yↄↄlɛ mu pe kro ŋga. Pan chↄↄ wra ndru mu mbroe pre pe mna pe kɛ, a pe kro na ta imi na pe chaa. 12Ŋga pra ka mu yↄↄ kre, a wra yo u twanfɛɛnlɛ pre pan mbo, "E kamprɛɛ yire koli, mbe ka wa fun." 13Twanfɛɛnlɛ pre na paanu yire na mbroe pre kuɛn koli a yira kakɛɛ nununu kɛmbↄshiin nyi. 14Ŋga leele pre na Yesu kawako kee ŋga nya kre, a pra kna mbo, "Kpra na, Nyiɛkpↄↄ keenyanyofun ŋmba pe yo we pan waŋgra nu kre wi kre." 15Pra pe jawala pe na pie paan Yesu yii jaŋga na, mbe sɛ u pe ŋunu. Ŋga wra ki chin ma kre, wra yili pe nu mna ndru mu sɛ nyua kre na wre nunu. 16Ŋga yila na kↄ kre, u twanfɛɛnlɛ pre na sɛ epo kre nu, 17mna sɛ krↄ wru mbe kun mbe sɛ Kapɛnↄm na. Ble na wↄ, na Yesu n pan pe jaara tun. 18Kre nyjila kre, na fuflɛ kpↄↄ ka gbuun na nyumu kre mↄŋↄi. 19Twanfɛɛnlɛ pre na krↄ kre bri mna sɛ kↄnsni taarɛ ndee jijirɛ nyu na, mna nya na Yesu nyaari lↄↄ kre yiɛ na na paan pe pan, a fiɛrɛ na pe yii kpↄↄ. 20A Yesu kna mbo, "Yaa fiɛ, mi wi." 21A pra yɛshↄↄrↄ tɛɛ mna tia wra le krↄ kre nu to, a krↄ kre na da na pe ni mna praa shie kre. 22Ŋga nyiŋge na se kre, leele pre praa wa lↄↄ kro kre na nya na krↄ nunu kraa wa wa, a kre nu twanfɛɛnlɛ pre chiin na tni mu sɛ, a Yesu nsra chaa pe nu. 23A lawee ŋga nu o Tafun wre na Nyiɛkpↄↄ ŋga mboo mna paanuu yire yↄↄlɛ mu lenɛɛrɛ pre ŋga kre, krↄɛ yɛ na yiri Tiberia na mna pan mu yire wa. 24Ŋga leele pre na nya na Yesu n wa, a u twanfɛɛnlɛ pre n wa na kre, a pra tni krↄɛ yire nu mna sɛ Kapɛnↄm na, mbe sɛ u cha. 25Ŋga leele pre na sɛ Yesu nya lↄↄ kro wa kre, a pra u wie mbo, "Nyinafun, nyjila ŋgi nu mu pan mna hin?" 26A Yesu na yo mbo, "Kpra na, paanu nyjɛ ndaa e ŋga, a e na ka mu yↄↄ kre na e ni chaa, ki n pe ni kawako kee, ndee kee nyjɛ ni yo yire nↄↄ e loo. 27Yaa ti mbe e yiɛ nyina sro ŋga kie jaa kla kre na, e yiɛ nyina sro ŋga ki blenyini ŋmaa kaan kre tnumu na, sro ŋga Lewo Pↄ wre we e ŋga kre. Ni Lɛ wre ni dansiɛrɛ li na wre u ni tun." 28A pra kna mu u wie mbo, "Tnumu ŋgi oo tun mbe ki pe Nyiɛkpↄↄ tnumu hin?" 29A Yesu na yo pe pan mbo, "Tnumu ŋga Nyiɛkpↄↄ yo e tun yi na ee ŋmba u tun wre shↄ mbe li." 30A pra kna mu yo mbo, "Kawako kee ŋgi mu pe mbe o nya mbe mu shↄↄli hin? Ŋgi mu pe hin? 31O tolɛɛlɛ na maana ka fimi tra na, imi na pra ki nyunↄ Nyiɛkpↄↄ hlɛ kre nu mu tɛɛ kre mbo, 'Wra pe ŋga paanu mu yiri nyjeeri, a pra ka.' " 32A Yesu na kna mbo, "Mbe kpra yo e pan, Mbose nsra e ŋga paanu ŋga ki yiri nyjeeri kre. Ni Lɛ u e kaan kpra paanu ŋga ki yirii nyjeeri. 33Nyiɛkpↄↄ paanu ŋga u kaan wi ŋmba u yiri nyjeeri mu pan mbe waŋgra leele ŋga ŋmaa kre." 34A pra yo mbo, "O Tafun, ta o kaan kre paanu kre nyjila kro nu." 35A Yesu na yo pe pan mbo, "Mi wi ŋmaa paanu kre. Ŋmba we pan ni pan kre, klo wa u ta na, a ŋmba we ni shↄ mbe li kre, gbↄↄ wa u ta na fio. 36La, ndaa ki yo e pan na e ni nya, la, e n shↄ mu li tɛ. 37Mblɛ ni Lɛ ni ŋga kro we pan ni pan. A mblɛ pie pan ni pan kre, mba pe je. 38Nyjeeri ni yiri mu pan, mbe paan ŋmba u ni tun wre kee ŋga u chaa pe. Ni n pan mi titi kee pehaa. 39A ŋmba u ni tun wre chaara yi na, mblɛ u ni ŋga kre, mba ti mbe wa fun, a mbe pe nyi ble haŋa kre nu. 40Ŋga ni Lɛ chaa yi kre, na ŋmba we Pↄ wre nya, mbe u shↄↄli kre, wre we blenyini ŋmaa ta, mbe ni u nyi ble ŋga ki kro tↄ kre nu." 41Judae pre naa taanri Yesu na ŋga wra yo na, "Mi wi paanu ŋga ki yiri nyjeeri" kre. 42A pra kna mbo, "Blↄ ŋmba, wre ma Yesu, Josɛf pↄ wre kree? O u lɛ na u lo chin, a mni ki pe a wra yuu na nyjeeri u yiri hin?" 43Yesu na kna mu yo pe pan, mbo, "E taanraa ti. 44Ndro n wa mbe jaa pan ni pan, fↄna ni Lɛ ŋmba u ni tun wre u tini mu ni ŋga, mbe ni kↄↄ u nyi ble ŋga ki kro tↄ kre nu. 45Fa kre, Nyiɛkpↄↄ kee nyanyofɛɛnlɛ pre na ki nyunↄ na, 'Nyiɛkpↄↄ we leele kro kro nyina kee kre.' A ŋmba we ndie tɛɛ mbe loo, mbe twan ni Lɛ wre pan kre, we pan ni pan. 46Ndro n da mu ni Lɛ wre nya, fↄna ŋmba u yiri Nyiɛkpↄↄ wre pan wre, wre chiin u da mu u nya." 47"Kpra na, ni yuu e pan, ŋmba u ni shↄ mu li kre, uu wa na blenyini ŋmaa ni. 48Mi wi ŋmaa paanu kre. 49E tolɛɛlɛ na maana ka fimi lawee kre nu, la, pra ku. 50Paanu ŋga ki yiri nyjeeri mu pan tra kre, na ndro ki ka wa ku. 51Mi wi ŋmaa paanu ŋga ki yiri nyjeeri mu pan tra kre, na ndro kre paanu ŋga ka wa ku fio. Paanu ŋga mbe waŋgra leele ŋga mbe pe ŋmaa ta kre yi ni wejikaara kre." 52Kre kee ŋga na pe kakra kpↄↄ Judae pre nu, a praa yuu mbo, "Mni blↄ ŋmba we pe mbe o ŋga u wejikaara mbe o ka hin?" 53A Yesu na kna mbo, "Kpra na, ni yuu e pan, na e n Lewo Pↄ wre wejikaara ka, mu u nyimi gbↄ, kena e n wa ŋmaa ni. 54La, ŋmba we ni wejikaara ka, mbe ni nyimi gbↄ kre, u blenyini ŋmaa ta, a mbe u nyi ble ŋga ki kro tↄ kre nu. 55Ni wejikaara pe sro yɛŋgɛ, a ni nyimi pe gbↄwo yɛŋgɛ. 56Ŋmba we ni wejikaara ka mbe ni nyimi gbↄ kre, uu wa ni nu, a nii wa u nu. 57Ni Lɛ ŋmba uu ŋmaa ni wre u ni tun, a u saara na nii ŋmaa ni kre, pan chↄↄ ŋmba we ni wejikaara ka we ŋmaa ta ni saara na. 58Paanu ŋga, nyjeeri ki yiri mu pan tra. Ki n pe na nyjɛ e tolɛɛlɛ na ka mu ku kre yi, la, ŋmba we paanu ŋga ka kre, wa ku fio." 59Kapɛnↄm fninyuŋgo Yesu na sɛ na nyina, mna yire kee nyjɛ yo. 60Ŋga wra yire kee nyjɛ paara a u kotↄmblↄ pre na loo kre, pe nɛɛrɛ na yo mbo, "Kee nyjɛ u nyina ŋga sheli titi, ŋmbi we jaa taa yi na hin?" 61Ŋga Yesu na chin na pe taanri yire kee nyjɛ na kre, a wra kna mbo, "Ni kee nyjɛ ni yo ŋga, yi n tna e pan ra? 62A na kia pan na e Lewo Pↄ wre nya na u ndru na shie nyjeeri mna wra nyi fa hin? 63Ŋga ki ŋmaa kaan yi Nyiɛkpↄↄ Ŋumu, lewo jaŋga wa jaa yaka pe. Kee nyjɛ ni yo ŋga Nyiɛkpↄↄ Ŋumu yi, a yire yi ŋmaa. 64La, e plɛɛ wa a pe n shↄ mu li." Yesu na klu mu chin mblɛ pe n shↄ mu li, na ŋmba we u wↄ mbe ŋga. 65A Yesu na ndru mu yo mbo, "Kre ki tia ni yo na ndro wa jaa pan ni pan, fↄna ni Lɛ wre u ŋga kolo kre." 66Mu yire kre kee ŋga na, u kotↄmblↄ pre nɛɛrɛ na laa u kro, a pe n na taa u na na. 67A Yesu na kna mna u twanfɛɛnlɛ kɛmbↄshiin pre wie mbo, "A yire hin? E chaa mbe sɛ na ra?" 68A Siimↄn Pita na kna mbo, "O Tafun, ŋmbi pan oo sɛ hin? Mu kee yire nu blenyini ŋmaa nyi. 69Fuŋga o mu shↄ mu li, mu chin na ŋu wi Nyiɛkpↄↄ ndro cheche wre." 70A Yesu na kna mbo, "Mi ma ni e kɛmbↄshiin mblɛ wↄↄ? La e wa pe Sutna." 71Judas, Siimↄn Iskariↄt pↄ kee wraa yuu, twanfɛɛnlɛ kɛmbↄshiin pre wa na wi, a na wre we u wↄ mbe ŋga.

will be added

X\