Jemisi Hlɛ 2

1Ni wolo, ŋga e o Tafun Yesu Kristo, ŋmba uu wa yɛnyiŋge kpↄↄ ni kre shↄnli ŋga, ki n fna mbe e na leele plɛ kaan kpↄↄmu mbe plɛ ti. 2Na swafun na shianfun pan e fnindoo, a swafun wre u swa nyiɛ kɛgbrɛe, na yirɛ chichiele le le, a shianfun wre u yirɛ wↄɛlɛɛ lele, 3a e waa swafun wre yiɛ le, maa u ŋga kpↄↄmu lawee, maa kna mu yo shianfun wre pan na tni mna wa. 4Kena e sisaa pe, na e sisam jawala teeri na eyɛ yↄↄlɛ. 5Ni wolo, e loo, shianfɛɛnlɛ mblɛ pee wa waŋgra ŋga nu kre, pre Nyiɛkpↄↄ woni, mbe pe shↄnlie ta kpↄↄ, mbe yire ki na mbe le u ŋunumu ŋga nyu u yo mu tɛɛ mblɛ pe u kori kre pan kre nu. 6La, shianfun wre, e wre le lewaa. A swafɛɛnlɛ pre ma pe e yiri pↄↄrↄ, na jaŋga na, na shie kala lifɛɛnlɛ yiɛ na kree? 7Pre swafɛɛnlɛ mblɛ pre pe paara na Kristo mɛɛ chichie ŋga pe taa e na kre taanla kre. 8Na e li Nyiɛkpↄↄ mbra na, imi na pe ki nyunↄ Nyiɛkpↄↄ hlɛ kre nu kre mbo, "Mu ŋmbrↄ kori na mu wejikaara yi kre." Kena e kee ŋga ki fraka pe. 9La, na e leele yoori kena e sisaa pe, a e Mbose mbra taan. 10A ŋmba we taa Mbose mbra yire na kre, na waa nunu chom taan, kena ufun to yi kro nu. 11Nyiɛkpↄↄ ŋmba u yo na "Yaa shia leŋgeere kla" kre, wre chↄↄ u yo na "Yaa shia liiku." Ki tia na mu n leŋgeere kla, a maa sɛ linku kre, mu to mbra nu. 12Kena e ti mbe e paaraa, na e kepele pe na leele mblɛ kpra Nyiɛkpↄↄ we kun mbe yire u kee ŋga ki ki tii mbe lewo uyɛ ta kre na lɛ. 13Ŋgi ndra na? Na Nyiɛkpↄↄ ndro ŋmba u n foorochiɛn ni kpra kuun kre, wra ufun fooro chin, la, ŋmba u lewo fooro chin kre, we chin na, na Nyiɛkpↄↄ kpra kuun kre, u fooro chiɛn kpↄↄ. 14Ni wolo, na lewo yo na uu shↄnlie ni, a u kepele n na ki nyina, u shↄnlie kre we jaa u ŋga ŋmaa ra? 15Pan ki nyi na, na waa wa e nu, a u n yoŋgo ni na toni, ndee u n sro ni na lii, 16a e wa waa yo ufun pan na Nyiɛkpↄↄ we ya mu na, mbe mu ŋga yoŋgo na sro, a mu jaa u ŋga ka, a mu n u ŋga, kena kee ŋgi mu ta mu pe hin? 17Pan Nyiɛkpↄↄ shↄnlie nyi na chↄↄ, na lewo yo na u Nyiɛkpↄↄ shↄnli, a u shↄnlie kre n na tnumu tuni kre, kena u shↄnlie kre ku. 18A wa we jaa yo ki fun pan na, "Ŋuu shↄnlie ni, a mii wa na kepele chichie ni." Mbe jaa mu nyina ni shↄnlie mbe yire ni kepele chiriri na, kena ŋu mu ni nyina mu shↄnlie ŋga nu kepele n chaa kre mbe ni le. 19E shↄnli na Nyiɛkpↄↄ wree nunu chom, e ka pe, la, ŋumufuɛn kuraa chin na Nyiɛkpↄↄ nunu, mu na seeri u yiɛ. 20Jijiele, e n chin na shↄnlie ŋga nu kepele chichie n wa kre shↄnlie waara yi ra? 21Yira ŋgi kra tia Nyiɛkpↄↄ na yo o tolɛɛ Abraham pan na u pe lewo chiriri hin? Abraham na yire shↄnlie na mna Nyiɛkpↄↄ nyu kee loo, mna sɛ u pↄ Isaki tɛɛ mbe sra wↄ mbe Nyiɛkpↄↄ ŋga. 22Kre imi ki nyina na Abraham na shↄnlie na ki kepele pe. Ŋga wraa shie sɛ pe kre na u shↄnlie chiriri nyina. 23Ŋga ki tia kee kre pe nyunↄ Nyiɛkpↄↄ hlɛ kre nu mu tɛɛ kre pe kpra, mbo "Abraham na Nyiɛkpↄↄ shↄnli, a u shↄnlie kre ndra na Nyiɛkpↄↄ na u shↄ na wra pe lewo chiriri, a praa u yeeri Nyiɛkpↄↄ nunu." 24Kena e nya na lewo kepele chiriri na u fraka Nyiɛkpↄↄ yiɛ na, la, u shↄnlie chiin na ma. 25Pan chↄↄ Rahab tɛtiɛrↄↄ wre na nyi na. U kepele chichie na Nyiɛkpↄↄ na u shↄ na lewo chiriri wi. Wra Israel leele mblɛ pra tun yii mna pe le chiriri, mna ya pe na mna pe nyina kolo fↄŋgↄ, a pra tro ki na mna shↄ pe loŋgoolo kɛɛ. 26Pan ki nyi, imi na, na ŋumu n wa wejiŋge nu mbe ki ku kre, pan chↄↄ na kepele chichie n wa shↄnlie nu kena shↄnlie kre ku.

will be added

X\