Jemisi Hlɛ 1

1Mi Jemisi, Nyiɛkpↄↄ na o Tafun Yesu Kristo tnu wre, mi pan hlɛ ŋga yiri na shie Israel leele sele kɛmbↄshiin mblɛ e nyina waŋgra kro nu kre pan, ni e shaari kro. 2Ni wolo, na e kanyana nyininyini nyaa e tnimu nu kre, e ti ki pe e pan yɛshↄↄrↄ kee. 3Ŋgi na, e chin na, na e shↄnli, a pra e piin na le, e tni penlee yire nu kre, kena ee frↄ ni. 4A e le na e frↄ kre we sɛ na e ni yiɛ, mbe yaa pra kre ee nyu mbe yaka wa e shian. 5La, na waa wa e nu a u n chin kolo ŋga na we tro kre, ufun u Nyiɛkpↄↄ tali. Ŋgi na, mblɛ pe Nyiɛkpↄↄ tali kre u pe kaan tataara, a u krↄ wa kun na pe ni fio. A ŋmba u tali kre, we yira ŋga u tali kre ta. 6La, u tali na shↄnlie ni, mbe wa u jawala pe shiin. Ŋgi na, ŋmba u u jawala piin shiin nyjila kro nu kre, pan ufun nyi na, imi fuflɛ epo nyumu wru na shie na paan kre yi. 7Lewo ŋmba u u jawala pini shiin nyjila kro nu na kna na le kokoo shiin kre, waa jawa na we yaka ta Nyiɛkpↄↄ pan fio. 9Ki fna mbe ŋmba u shian e nu kuraa kre, mbe u ti u yiɛshↄ. Ŋgi na, Nyiɛkpↄↄ u kpↄↄ. 10A ŋmba uu swa ni e nu kre, u ti mbe u yiɛshↄ na Nyiɛkpↄↄ u pe fiɛn, a wa mu, we ku na toto yi. 11Ŋgi na, na yila wɛɛri mu ki gbun to, na ki kun mu to mbe yuwa, mbe ki nyumu fun. Pan swafun we ku u tnimu nu. 12Ndro ŋmba u frↄ taa kanyana nu kre wo yi dwamu. Ŋgi na, na u ja mu tni penlee yire nu kre, Nyiɛkpↄↄ wɛ u ŋga ŋmaa ŋga kee wra yo mu tɛɛ, na leele mblɛ pe u kori ŋga ki yi kre. 13Ndro waa shia yo na, na nyu chaara kee ka u da, na Nyiɛkpↄↄ u u nyu chaa. Ŋgi na, yaka n wa mbe jaa Nyiɛkpↄↄ nyu cha. 14La, lewo niŋge sisaa ŋga kii wa u nu, kre ki u nyu chaa. 15Kena na niŋge sisaa siire ta, sisam ki sii, a na sisam lɛ, kumu ni ki paan. 16Ni wolo, yaa shia ti mbe ndro e fana. 17Yira chichie kro, Nyiɛkpↄↄ pan ki yiri nyjeeri, a wre u tia lawee na nyaa, a wra u kee pe wↄmu nu, a wra kna. 18Nyiɛkpↄↄ wre titi chaara na u o wa, mbe o yire u kpra nyu kee kre na mbe pe u yirɛ nyjɛ u gbeele kre yɛklo. 19Ni wolo, ki fna e kee ŋga le chichie. Lewo kro fna mbe ndiile tɛɛ chichie mbra ndru, mbe u nyu dↄↄ ta, mbe u krↄ wa na kuun nyaanyaa. 20Ŋgi na, lewo ŋmba krↄ ki kuun nyaanyaa kre, wa jaa kee ŋga ki fraka Nyiɛkpↄↄ pan pe. 21Kena e sisam kee, na ndra shelee kepele wↄ e tnimu nu. E eyɛ nyjii Nyiɛkpↄↄ yiɛ, e u kee ŋga u le e lolonyi nu kre yii. Ŋgi na, u kee kre, kre kie jaa e ŋmaa shↄ. 22La, e na kala ŋga kee kre yo e pe kre pini, yaa pe ki loofɛɛnlɛ chiin mbra eyɛ fana. 23Ŋgi na, na wa pe kee kre loofun, a u n na ŋga kee kre yo u pe kre piin kre, 24pan ufun nyi na lewo ŋmba we u yiɛ le dwanle nu, na u ki tɛɛ, mu krↄ kna tↄ, mbe u imi nyini u nyi fɛɛ. 25La, ndro ŋmba u Nyiɛkpↄↄ ŋga ki tii mbe lewo uyɛ lam le mbe taa ki na, a ufun n pe lewo ŋmba u kee kre ndru mbe ki fɛɛ, la, a ufun pe kee kre loofun, na ki kepele piin kre, Nyiɛkpↄↄ we u dwan kee kro nu. 26Na lewo uyɛ jawa na Nyiɛkpↄↄ sumifun chiriri wi, a ufun n na u ndile dↄↄ taa, la, na uyɛ fana kre, ufun sumiɛ pe finfin. 27Sumiɛ ŋga ki nyu a nɛɛrɛ n wa ki nu o Lɛ Nyiɛkpↄↄ yiɛ yi na, mu na bijile na lekuchiɛlɛ le pe kanyana nyjila nu, mbra muyɛ le chichie, mbe waŋgra sisam wa mu kla.

will be added

X\