Hebrie 9

1Nyu nunu ŋga Nyiɛkpↄↄ na klu mu pe na lewo ni kre, kraa wa na mbra, na ndoo ŋga nu praa sumi ni tra mna. 2Pra pe suminyuŋgo kre sin, mna ki yↄ shiin na yoŋgo ni, ŋga kraa wa nyuhaa kre praa yeeri Cheche Lawee. Bawa kania, na tebru, na paanu ŋga praa teeri Nyiɛkpↄↄ pan kre na nyi. 3A na mu jle wo kre tro, lam wo kre praa yeeri Cheche Lawee Titi. 4Kre lam swa nyiɛ taa ŋga nu praa tuwe ndiom taan sroi kre na nyi, bawa nyu nunu pee daka ŋga mbɛɛlɛ pra tↄ na swa nyiɛ ni kre na nyi na. A Aarↄn kanyie ŋga kra wrɛ fun kre naa wa daka kre nu. Bawa chↄↄ dnɛ shiin nyjɛ na pra Nyiɛkpↄↄ mbra yire nyunↄ kre na nyi. 5Kre daka kre ndra na pra yurɛ shiin plɛ faanri na swa nyiɛ ni, a praa pe yeeri Cherubim, a pra yire na Nyiɛkpↄↄ yɛnyiŋge nyina, mu kuɛn nyaala mu fooro chin jↄↄn kre tↄ. La, nyjila ŋga nu ma oo yire kee nyjɛ nyina mbe sɛ yiɛ. 6Kena na pe yire yirɛ nyjɛ pe krɛrɛ mu kↄ kre, mbe Judae sↄfue pre sɛ le nyuŋgo jle wo kre nu. Blenyini ŋga praa lee wa na Nyiɛkpↄↄ tnumu tuni. 7La, Judae sↄfue lopom titi wre chiin wraa lee nyuŋgo lamwo kre nu. A yɛlɛ ŋga kie pan kpan, gbee nunu we le ki nu, a na u n yurɛ nyimi ta wa le wa, nyimi yire ni wraa wre titi, na u leele pre sisam nyjɛ praa pini, a pe nsra chin na sisam yi sra woni mbe Nyiɛkpↄↄ ŋga. 8A yire kooloe nyjɛ na Kpra Ŋumu wre yire mu o nyina kee kre chasi, na ŋga nyuŋgo fimi wo kree wa mu yire tɛ kre, ki nyina na pe n ta mu Cheche Lawee Titi kre kolo nyaa tun. 9Yire kee nyjɛ tia o chin fuŋgaami na yirɛ, na yurɛ sra wↄↄ mbe Nyiɛkpↄↄ ŋga kre, kia jaa sumifun loloŋgo pe cheche. 10La, pe kooloe yire nɛɛrɛ na pe aliire, na gbↄↄ, na peyɛ kunnjee. Yi krɛrɛ na pe wejiŋge haa paala kolo nyjɛ pra yii. mna sɛ su nyjila ŋga ni Yesu na pan, mna yirɛ kro pe fↄŋgↄ. 11La, Yesu pan mu pe sↄfu lopom titi yirɛ chichiele nyjɛ oo ta yire na. A u tro suminyuŋgo cheche titi kre nu, lewo ma u ki sin, a tra mna ma ki nyi. 12A ŋga Yesu na le suminyuŋgo kre nu, mna tro mu le Cheche Lawee Titi kre nu gbee nunu chom kre, u nsra le wa na sikaala nyimi, ndee nui biile nyimi ni mna sra wↄ, la, wre titi nyimi ni wra tɛɛ mna sra kre wↄ, mna blenyini ŋmaashↄmu kre ta mu o ŋga. 13A kena na sikaala, na nablɛm pre nyimi, na nui biile mblɛ praa sroi kre tↄↄnrↄ praa nyaara mblɛ pe nsraa cheche kre na, mbe pe chiin pe cheche waa, 14kena Yesu ŋmba wra yire u blenyini Kpra Ŋumu wre na mna uyɛ tɛɛ mu sra wↄ mna Nyiɛkpↄↄ ŋga, a nɛɛrɛ ka nsraa wa u na kre, mni wre nyimi kre we o pe chiriri mbe da hin? Kie o jawala laa kee wɛɛ na, mbe o jaa na Nyiɛkpↄↄ ŋmba u le wre sumi. 15Kre kee ŋga ndra na, Yesu u yire lewo na Nyiɛkpↄↄ lalaa, mbe ki yire ki na mbe mblɛ Nyiɛkpↄↄ yeeri kre, mbe pe blenyini yirɛ chichiele nyjɛ nyu u yo kre ta. Kie jaa pan ma. Ŋgi na, leele yire Yesu kumu kre na mu laa sisam ŋga praa piin, nyjila ŋga ni praa wa nyu nunu jle wo kre nu kre kro. 16Mna krↄ yira nyi kre, na kifun n ku, 17kolo n wa ki na mbe krↄlifun ki bali, fↄŋga yirafun wre ku tun. 18Kre kra tia a nyu nunu jle wo kre, a pra nyimi tɛɛ mna ki nↄↄ hle. 19Ŋga Mbose na leele pre nyina Nyiɛkpↄↄ mbra yire mu kↄ kre, wra nui biile nyimi, na sikaala nyimi, na nyumu chaa, mna mbↄↄ yooro nyiɛ yɛ pↄ kaan na, mna ki ni nyimi, na nyumu chaara kre nu mna nyaara mbra hlɛ kre, na leele pre kro na. 20Mna kna mu yo pe pan mbo, "Nyimi ŋga yi Nyiɛkpↄↄ nyu nunu ŋga wra pe mbe e taa ki na kre jaŋga." 21Kolo nunu kre na chↄↄ Mbose na yire mna nyimi nyaara sumi nyuŋgo kre, na yirɛ nyjɛ ni praa sumi kre na. 22Kpra na, na o le Mbose mbra yire nyjila kre, nyimi ni praa yirɛ tataara pini cheche. Na lewo we sisam tinkɛɛ ta kre, fↄŋga pie nyimi wo. 23Kena ŋga yire yirɛ nyjɛ pe na nyjeeri wee titi yire wrumu yi kre, ki fna mbe pe yira kro pe cheche kre kolo kre na. La, ki fna mbe sra chichie wↄ mbe nyjeeri yirɛ yire ŋga, mbe ki wɛ Mbose wee yire na. 24Ŋgi na, Suminyuŋgo ŋga lewo sin na kɛ ni, a ki nyjeeri wo titi kre wru kre, kre nu ma Yesu na sɛ le. La, nyjeeri wa titi u sɛ tni. Bawa u sɛ yire o jeelee na Nyiɛkpↄↄ yiɛ. 25Judae sↄfue lopom titi wre naa lee Cheche Lawee Titi kre nu yɛlɛ kro nu, na nyimi ni, wre titi nyimi ni ma ya. A Yesu rɛ, gbee nunu chom wra sɛ uyɛ tɛɛ mna sra kre wↄ. 26Na we naa sra kre woni yɛlɛ nyini kre, kaa mu yire waŋgra gbeele nyjila kre, pan we naa kala nyaa tataara. A imi na ki nyi kre, ŋga waŋgra nyjila paan mbe kↄ kre, wra uyɛ wↄ gbee nunu chom mu tɛɛ mu sra wↄ mu o sisam pↄ mu laa o na. 27Nyiɛkpↄↄ ki yo mu tɛɛ na lewo kro we ku gbee nunu chom, kre kↄkro kre, mbe pe u pimi na u tam kun. 28Pan chↄↄ Yesu na uyɛ tɛɛ mna sra wↄ gbee nunu chom mu lenɛɛrɛ sisam pↄ mu laa pe na. We ndru mbe pan shiin wo na, a kre rɛ, sisam ma we paan laa, la, mblɛ pe u sri kre we paan shↄ.

will be added

X\