Hebrie 8

1Kee ŋga o yuu kre kro yi na, Kristo ŋmba sↄfumlie kee o yuu ŋga, wre wi o sↄfu lopom titi fuŋgaami. A uu wa mu tni Nyiɛkpↄↄ ŋujↄↄn kre kalie nyjeeri. 2Bawa u sɛ pe sↄfu lopom. Cheche ndoo kre nu. Sumi nyuŋgo ŋga Nyiɛkpↄↄ wre titi pe, a ki n pe lewo kɛ nyu tnumu kre. 3A Judae sↄfu lopom kro, woni pe u woni mbe wra yirɛ, na yurɛ sra woni mbra Nyiɛkpↄↄ kaan, kena ki fna mbe Kristo yaka ta mbe sra wↄ na. 4Na wre Yesu wre naa wa tra ŋga na kre, wa na pe Judae sↄfu. Ŋgi na, Judae sↄfue mblɛ pee wa tra ŋga na kre, Judae mbra yire na praa yire na tnumu tuni. 5Sↄfum tnumu ŋga praa tuni kre, nyjeeri wo kre kra wru. Pan ki nyi to, na imi na Nyiɛkpↄↄ na yo Mbose pan, nyjila ŋga ni wra yo we nyuŋgo sin Nyiɛkpↄↄ pan, a wra yo u pan mbo, "Le chichie mu ki yira kro pe na ŋga ndaa mu nyina Sinai nyua kre na kre yi." 6La, imi na ki nyi kre, Kristo sↄfum tnumu ŋga u tuni kre nyu badaaŋga mu wɛ fa Judae sↄfue pre wo na. Yaka ma ki tia, Nyiɛkpↄↄ nyu nunu ŋga u le kre, ki mbakↄ yirɛ nyjɛ oo ta yire nyu mu wɛ Mbose mbra yire na, na Yesu u yire wre na Nyiɛkpↄↄ lalaa kre nyu nunu ŋga nu. 7A na kala ka nsraa wa nyu nunu jle wo kre nu kre, kaa wa na shiin wo yo na. 8La, Nyiɛkpↄↄ na u leele pre nya kolo sisaa na, mna yo pe pan mbo, "Ble yɛ paan mbe ni nyu nunu fↄŋgↄ pe Israel, na Juda leele ni. 9Kre nyu nunu ŋga oo pe ŋga, kia pe na ŋga ndaa pe na pe tolɛɛlɛ ni, ŋga ble ndaa pe yii, mna pe wↄ mu yili Egypt na kre yi. Pe nsra li nyu nunu ŋga o na pe kre na kre nyjila kre nu, ki tia ni nsra ndie tɛɛ pe pan. 10Kena nyu nunu ŋga mbe pe Israel leele ni ble nyjɛ yi paan yire nu kre yi na, Mbe ni mbra le pe jawala nu, mbe yi nyunↄ pe lolonyi nu. Mbe mi pe pe Nyiɛkpↄↄ, mbe pre pe ni leele. 11Ndro wa u chia ndro, ndee u waŋgra ndro nyina na u Nyiɛkpↄↄ chin. Ŋgi na? Pe kro we ni chin, mbe yire pe fiɛn fiɛn na mbe sɛ su pe lekpↄɛ na kro. 12Mbe pe fooro le, mbe mba pe sisam sↄↄnri na." 13Kena na Nyiɛkpↄↄ nyu nunu fↄŋgↄ kee yuu waa, mu chin na jle wo kre lɛ, a kia jaa yaka pe na, kena pie ki tɛɛ mbɛɛ na.

will be added

X\