Hebrie 7

1Salɛm ŋunu na wi Mɛlchisɛdɛk, a wra pe Nyiɛkpↄↄ ŋmba u wɛ yirɛ kro na kre sↄfu. Ŋga Abraham na sɛ ŋunↄ wi mna ŋulo gbo gbo na paan kre, Mɛlchisɛdɛk na sɛ u fni mna u dwan. 2A Abraham na yirɛ nyjɛ wra ta yire krɛrɛ yↄↄlɛ kɛ, mna u ŋga nunu. Mɛlchisɛdɛk, kre nyina ŋunu ŋmba u fraka, a wra pe Salɛm ŋunu, a Salɛm kre nyina "wejinyiŋge". 3Mɛlchisɛdɛk nsraa lɛ na lo ni, a kee ka n wa mu o nyina u tolɛɛlɛ, ndee u se ble, na u kumu ble kee ka. Pan u nyi na Nyiɛkpↄↄ Pↄ wre wi, a u pe sↄfu nyjila kro nu. 4A e le imi na wra pe lekpↄↄ mu da, a o tolɛɛ lopom Abraham na u yirɛ nyjɛ wra sɛ ta ŋunↄ nu kre yↄↄlɛ kɛ, mna u ŋga nunu. 5Levi sele leele mblɛ praa sↄfum lii kre, mbra naa wa na Israel ndro kro we na u yirɛ nyjɛ u taa nyjila kro kre yↄↄlɛ kɛ mbra pe kaan nununu. A Abraham sele leele na lɛ pe kro. 6La, Mɛlchisɛdɛk rɛ, wre nsra yili Levi sele nu, a nde Abraham na yirɛ nyjɛ wra ta ŋunↄ nu kre yↄↄlɛ kɛ mna u ŋga nunu, a wra Abraham ŋmba ni Nyiɛkpↄↄ na u nyu yo kre dwan. 7A kakra n wa ki na, lewo ŋmba uu wa na jaŋga ni mbe dwamu ŋga kre, u wɛ ŋmba we dwan kre na. 8Sↄfue mblɛ praa yirɛ kɛ kɛ wee yire shio kre, praa kuu. A Mɛlchisɛdɛk rɛ, wree wa nyjila kro nu, a nde pra u ŋga yirɛ kɛ kɛ wee yire yɛ, imi na Nyiɛkpↄↄ kee kre nyina kre. 9Wa we yo na, kena Levi ŋmba praa yirɛ kɛ kɛ wee yire woni na kaan kre kuraa, 10nyjila ŋga ni pe nsra ta mu u se kre, wra yire Abraham na mna yɛ wↄ mu Mɛlchisɛdɛk ŋga, a Abraham nana wi Levi, a wre nu Judae sↄfue pre yili. 11Levi sↄfue pre na Nyiɛkpↄↄ na yire mna Israel leele pre ŋga mbra yire. Kena na tnumu ŋga Levi sↄfue pre na tun kre na nyu mna ja mbe ndro sisam laa u na peii kre, kaa sↄfu fↄŋgↄ wra pan na Aarↄn wi, kaa sↄfu fↄŋgↄ wa na pan na Mɛlchisɛdɛk wi na. 12Kena na pe sↄfumlie kolo kre chinɛ kre, pan ki fna mbe mbra yire kolo chinɛ na. 13A o Tafun ŋmba na ki yire a o na kee nyjɛ krɛrɛ yuu ŋga, u nsra yiri Levi sele nu, la, wra yiri sele ŋga nu ndro n da mu yiri mu pan mu sↄfum tnumu tun sragbuɛnlɛɛ yire na tun. 14Ŋgi na, o ki chin na ki pe kpra na Juda sele nu pra Yesu wre se. A nyjila ŋga ni Mbose naa sele ŋga nu Israel sↄfue we na yilii kre nyina kre, u nsra Juda sele kre nyini. 15A o kee kre nya chasi. Ŋgi na, Sↄfu fↄŋgↄ pan na Mɛlchisɛdɛk wi. 16A ki n pe Levi sele nu wra yiri mna chin mu pe sↄfu, la, ŋmaa ŋga nu jaŋga nyi, a ki n wa na kↄ haa ni kre kolo na u yire mu pe sↄfu. 17Ŋgi na, Nyiɛkpↄↄ kee kre pe nyunↄ mu tɛɛ kre yo mbo, "Mu pe sↄfu nyjila kro nu, imi na Mɛlchisɛdɛk nyi kre." 18Kolo lɛɛ ŋga na praa yire na sↄfum lii kre n wa na. Yaka ma ki tia, ki nsra jaŋga ta mu tnumu tun. 19Mbose mbra yire nsra ja mu yaka pe cheche, ki tia a o kaanhaa fↄŋgↄ ta, ŋga na oo yire mbe sɛ Nyiɛkpↄↄ lawee. 20Nyiɛkpↄↄ na da, mna chin mu Yesu pe sↄfu. La, Levi sↄfue mblɛ praa yire Mbose mbra yire na na Sↄfum lii kre, Nyiɛkpↄↄ nsra da mna chin mu wa pe sↄfu. 21La, Yesu rɛ, Nyiɛkpↄↄ na da mna chin mu u pe sↄfu. Mbo, "Mi, Nyiɛkpↄↄ, ni da, a mba ndruu ni jawala chinɛ na, mbe mu pe sↄfu nyjila kro nu." 22Kre ki tia nyu nunu fↄŋgↄ kre nyu mu wɛ jle wo kre na, ŋga ki yire Yesu na kre ndra na. 23Fa Judae sↄfue pre na nɛɛ. Ŋgi na, praa kuu, mbe plɛ yirii tni pe titɛɛ. 24A Yesu rɛ, wree wa nyjila kro nu, a u sↄfumlie kre na kna mbe sɛ ndro fↄŋgↄ pan. 25Ki tia u ja na mblɛ pe yire u na na paan Nyiɛkpↄↄ jaara kre shio nyjila kro nu, ŋga uu wa nyjila kro nu na tali na pe kaan kre ndra na. 26Wre sↄfu lopom titi ŋmba nyini ki fna mbe o ta. Ŋgi na, u pe cheche, a yaka n wa u na, a sisam n wa u nu. A pe u wↄ mu yili sisampefɛɛnlɛ nu, mu u ŋga kpↄↄmu lawee nyjeeri. 27Wre n pe na Judae sↄfue loplombo titie pre lɛ, pre pe peyɛ sisam, na pe leele pre sisam sra woni blenyini. La, Yesu na uyɛ tɛɛ mna sra kre wↄ gbee nunu chom. 28Mbose mbra yire kolo na kre, praa leele mblɛ pe n fraka woni Judae sↄfu lopom titi. La, Nyiɛkpↄↄ na nyu yo, mna da, a kra kↄ mu pan ma yɛŋgɛ, Mbose mbra yire na pan a kra chin mu pe, a wra u Pↄ wre wↄ sↄfu lopom titi, a u pe cheche nyjila kro nu.

will be added

X\